Nahali Bible
व्यवस्था 18
लेवी एने चाकऱ्यान ईसो
लेवीन वोसीन माणहाह इस्राएल माय बुयीन ईसो एने वाटो नाय मिले, ता चाकऱ्या केरीन काम केरती, तान खाणो होमबली एने बोगवानाह बेट आपेल ईसाम रेन रेय। तान तान बायाख ने विचीम काल्लो ईसो नाय रेय; काहाकाय तान वचनान गेत यहोवा तान खाज ईसो बुणेल हे।
एने निहते डोरे निहते मेंड्रा बोकड्यान ता जेनवेरान मेल मिलाप बोलीन ईसो, ताह केरनार माणहान उगे रेन चाकऱ्यान होक ज्यो रेय, काय तान खांद एने दुयू गाड़शा एने पेट चाकऱ्याह आपज्यो। ताह तारी पेल्ली पाकीन एन, नोवालो अंगुरान रूह, जेतुन ने तेल एने तारा मेंड्रान रोचका जा पेल्ली वारीन काटाना एती, ता आपज्ये। काहाकाय तारो बोगवान यहोवा तारा आखा गेराणा माय रेन ताहच निवाड़ लियेल हे, काय तो एने तान वोस जेलेम तान नावाम चाकरी केरनेन केरता आया केरी।
उवतो केदी एगदो लेवी इस्राएलान वोहती माय रेन एगदाह, जा तो परदेसीन गेत रेतेय, तान मोनान मोटली आसा से ता जागा पोर जाय जाह बोगवान निवाड़ लेय, ते तारा सोब लेवी बायाख ने गेत, जो ता तारा बोगवान यहोवान सोमोर आवती, ता बी तान नावा माय सेवा केऱ्या केरी। एने तारा डायडायान ईसान किमोत सोड़ीन ताह खाणेन ईसो बी हारको जुड्या केरी।
मुरती पुजान विदी से चेकचेल्या रेणे
जेवी तु ता देसाम पुचे जो तारो बोगवान यहोवा तुवाह आपेह, तेवी ता देसान माणहान गेत खाराब कामे केरने मा हिकहे। तार माय काल्लो ओहलो नाय रेणे जुवे, जो तान बेटा बेटीह आक्ठा माय बोली केरीन चेड़ावणार, एने बोड़वाय केरनार, हाजो बाकता हुगुणाह मान्नार, एने जादुटोणा, एने निजेरबांदो, एने जादुगार, नाहते मोन वालनार, नाहते बुताह पुजणार, नाहते बुतड़ाह जागाड़नार एय। काहाकाय जोला ओहला ओहला कामे केरतेह, ता सोब यहोवान सोमोर खाराब हेते; एने ज्या खाराब कामान कारेण तारो बोगवान यहोवा ताह तार सोमोर रेन काढ़ने जाणे बाजरिनोह। तु तार बोगवान यहोवान सोमोर चोखो बोणीन रिज्ये।
एक जाणकार मोकेलनेन वायदो
ता सोब देस जान तु होकदार बुणन्यो हे, जा हाजा बाकता हुगुणाह मान्नार एने बोड़वाय केरनारान वात होमल्या केरतेह; पुण तुवाह तारो बोगवान यहोवा ओहलो नाह केरने दिनो। तारो बोगवान तार विचीम रेन, मतलब तारा बायाख माय रेन मार हारको एक जाणकार उब राखाड़ी; तु तान वातु हुमेलज्ये।
ज्य तारी ती विन्तान गेत एय, जो तु होरेब बोयड़ान आहने पोंचान दिह तार बोगवान यहोवाह कियेल इतो, “माहु नाय ते मारा बोगवानान बोल पोशो होमेलनु हे, एने नाह ता मोटला आक्ठाह पोशो देखणे पोड़ी, ओहलो नाय एय काय मी मोर जाव।” तेवी बोगवान माहु केयो, “ता जो काय केतेह तो ठिक केतेह। केरीन मी तान केरता तान बायह्याख ने विचीम रेन तार हारको एक जाणकार उबो केरूह; एने मी तान मोनाम मारो वचन टाकुह; एने जी जी वातीन मी ताह उकुम आपुह, तो ताह केय होमलाड़ी। एने जो माणुह मारा ता वचनाह, जो तो मारा नावाम केय, ताह नाय होमली, ते मी तान इसाब ता फाय लेह। पुण जो जाणकार मोठाय केरीन मारा नाव लेन ओहलो वचन केय, जान उकुम मी ताह निह आप्यो एय, नाहते पाराया देवतान नाव लेन काह केय, तो जाणकार बी माराय जाय।”
केदी तु तारा मोनाम केय, “जो वचन बोगवान नाह केयो ताह आपु किह केरीन ओलेखहो?” ते तान ओलखात ज्यी हे काय जेवी एगदो जाणकार बोगवानान नाव लेन काह केय; केदी तो वचन नाय गिटे एने नाय पुरो एय, ते तो वचन बोगवानान कियेल नाय मिले; पुण ता जाणकार मोठाय केरीन कियेल हे, तु ताह मा बिहे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.