Nahali Bible
व्यवस्था 19
खुनीन केरता रेणेन हियोर
(गिनती 35:9-28; यहोशु 20:1-9)
जेवी तारो बोगवान यहोवा ता देसाह खेतेम केरी जान देस तुवाह आपेह, एने तु तान देसान होकदार बोणीन तान हेयरा एने गेराम रेणे बाज जाहे, तेवी तारा देसान विचीम जान होक तारो बोगवान यहोवा तुवाह केर दिथे, तीन हियोर तार केरता आंगे किर दिज्ये। एने तु तार केरता वाट बी तियार किरज्ये, एने तारा देसाह जो तारो बोगवान यहोवा तुवाह होप दिथे, तीन ईसा किरज्ये, काय आखा खुनी ताच नाहीन जाती। एने जो खुनी ता नाहीन तान जीवाह वोचाड़ी, तो इह केरीन रेय; मतलब तो कुणीह बिगेर पेल दुसमोनाय केरी, नाहते ताह बिगेर जाण जोवीन मार टाक्यो एय। जीहे एगदो एगदा हेऱ्यो लाकड़े काटणेन केरता जेंगलाम जाय, एने जाड़ काटणेन केरता कुराड़ आथा से चालाड़ीह, एने कुराड़ डांडाम रेन निगलीन ता बायाख इहकेरीन लागी काय तो मोर जाय, ते तो न्या हेयरा माय रेन एक हेयराम नाहीन जाय सिकेह, एने तान जीव वोचाड़ सिकेह। ओहलो नाय एय काय सेटाली वाटीन कारेण खुनान बुदलो लेणार तान रागाम तान पासाण पोड़ीन ताह सापड़ावीन देरी, एने मार टाकी, तीबी तो मोतीन देन्डान बाराबोर नाय मिले, काहाकाय ता से दुसमोनाय नाह मेलतालो। केरीन मी तुवाह उकुम आपथु, काय तार केरता तीन हियोर आंगे केरीन मिलज्ये।
केदी तारो बोगवान यहोवा ता सुगोणान गेत जो तो तारा डायडाया हिऱ्यो खायेल इतो, तारी वोसीह वोदाड़ीन तो आखो देस तुवाह आपी, जाह आपणेन वायदो तो तारा डायडायाह आपेल इतो। केदी तु ज्या आखा उकुम मान्ने माय जाह मी आज तुवाह होमलाड़थु चोकसी केरी, एने तारा बोगवान यहोवाह मोंग केरी एने जेलेम तान वाटी पोर चालती रेय, ते ज्या तीन हेयरा रेन वोदार उंजु बी तीन हियोर आंगे केर दिज्ये। केरीन काय तारा ता देसाम जो तारो बोगवान यहोवा खाज ईसो केरीन आपेह एगदा निरदोसान लुय मा वोयाड़ाय जाय, एने तान गुनो तार पोर नाय लागे।
पुण एगदो तान आहने रेणारा पोर दुसमोनाय मेलीन ताह मारनेन पासाण पुड़े, एने ताह देरीन ता ओहलो देय काय तो मोर जाय, एने उवतो तो ता एगदा हेयराम नाह जाय, ते तान हेयरान डायला एगदाह मोकलीन ताह ता रेन मांगाड़ीन खुनान बुदलो लेणारान आथाम होप देय, काय तो मार टाकाय जाय। ता पोर गीण मा किरहे, पुण निरदोसान खुनान गुनो इस्राएल हिऱ्यो रेन सिटो किरज्ये, तेवी तारो हाजो एय।
वेगाली हिली
जो देस तारो बोगवान यहोवा तुवाह आपेह, तान जो ईसो तुवाह होक माय जुड़ी, ता माय कुणीन हेड़ाह जाह डायला माणहे बाणायो एय, ताह सेटा मा किरहो।
पुरावो देणारान समंद नियम
एगदो माणुह एगदान विरूद काल्ली बी बातीन गुनो नाहते पाप केऱ्यो एय, निहते तान पाप कोहला बी काहा नाय रेय, ताह दोसी ठेरावणे एकुच जाणान पुरावो मा होमेलहो, पुण दुय नाहते तीन जाणान पुरावा माय वात पाकी ठेराय। केदी एगदो जुठो पुरावो देणार एगदान विरूद बोगवाना से सिटो एय जाणेन पुरावो देणेन उबरिनो एय, ते ता दुयू माणहाह, जान विचीम उहलो मुकदमो उठनो एय, बोगवानान ओंगाण, मतलब ता दुयूह चाकऱ्या एने न्यायनिवाड़ो केरनारान सोमोर उबो किरज्ये। तेवी नियाव केरनार हास केरीन पुसतास केरी, एने केदी ज्या निर्णय पोर पोची काय तो जुठो पुरावो हे, एने तान बायाख ने विरूद जुठो पुरावो दियेल हे। तो तान बायाख ने जोहलो नुकसान केरनेन सुचेल इतो, तोहली तुमू बी ताह सेजा आपज्यो, इहकेरीन तुमरी विचीम खाराबीह सेटा किरज्यो। तेवी दिहरा माणहे होमलीन बिती, एने ओंगाण तारी विचीम ओहलो खाराब कामे नाय केरती। एने तु ता पोर बिलकुर गीण मा किरहे; जीवान बोदले जीवाह, डोलान बोदले डोलाह, एने दातान बोदले दाताह, एने आथान बोदले आथाह, एने पायान बोदले पायाह डेन्ड आपज्ये।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.