Nahali Bible
व्यवस्था 20
लेड़ाय माय जाणेन नियम
जेवी तुमू तुमरा दुसमोना हेऱ्या लेड़ाय केरने जाहो, एने गोड़ा, टांगाह, एने तुमू रेन होवटाला सेनाह दिखहो, तेवी ताह बिय मा जाहो, काहाकाय तुमूह मिस्र देसान रेन काड़ेल, तो यहोवा बोगवान तुमरी हिऱ्यो हे। जेवी तुमू लेड़ाय केरनेन केरता दुसमोनान आहने जाहो, तेवी चाकऱ्यो सेना फाय आवीन केय, “एय इस्राएली हुमलो, आज तुमू तुमरा दुसमोना हेऱ्या लेड़ाय केरने तान आहने आयेल हेते; तुमरा मोन कमजोर नाय एणे जुवे; तुमू मा बिवो, एने थेर थेर मा कापो। काहाकाय तुमरो बोगवान यहोवा तुमरा दुसमोना हिऱ्यो लेड़ाय केरने एने तुमूह वोचाड़नेन केरता तुमरी आरही चालेह।”
उवतो लेवी आदिकारी सेनिकाह इह केणे जुवे, “तुमू माय रेन कुण हे जो नोवालो गेर बांदिन ताह समर्पण निह केऱ्यो एय? ते तो तान गेर जात रेय, केदी ओहलो नाय एणे जुवे तो लेड़ाय माय मोर जाय एने दिहरो माणुह ताह समर्पण केरी। एने कुण हे जो अंगुरान वाड़ी लागाड्यो एय, पुण तान फोल निह खादो एय? तो बी तान गेर जात रेय, ओहलो नाय एणे जुवे काय तो लेड़ाय माय माराय जाय, एने दिहरो माणुह तान फोल खाय। पोशो कुण हे जो एगदी बायकु हेऱ्या वाराड़ान वात केर रेनो एय, पुण तिह वाराड़ केरीन निह लावो एय? तो बी तान गेर जात रेय, ओहलो नाय एणे जुवे तो लेड़ाय माय माराय जाय, एने दिहरो माणुह ती हेऱ्यो वाराड़ केर लेय।”
तो लेवी आदिकारी पुशो इही बी केय, “काल्लो काल्लो माणुह बिणार एने कमजोर मोनान हे, तो बी तान गेर जात रेय, ओहलो नाय एणे जुवे काय ताह देखीन दिहरान बी ईमोत टुट जाय। जेवी आदिकारी सेनिकाह ज्य सोब केय देय, तेवी तान आगवाय केरनेन केरता सेनापोतीह निवाड़े। जेवी तु एगदा हेयरा माय लेड़ाय केरने जाहे, तेवी पेल ता वाला माणहाह मेलजोल केरनेन खुबेर आपो। केदी ता तुमरी वात होमलीन हाजी वात आपीन हेयरान बायणा उगाड़े, ते तावाला आखा माणहे तुमरा पावोर बोणीन तुमरी सेवा केरनारे बोणती। पुण ता तुमरी वात नाय होमले, एने तुमरी हेऱ्या लेड़ाय केरने होद्ती, ते तुमू ता हेयराह कोंड लिज्यो; जेवी तारो बोगवान यहोवा ताह तुमरा आथाम होप देय, तेवी ता माय वाला आखा एदम्याह तालवारी केरीन मार टाकज्यो। पुण बायकु एने बालबोचा, जेनवार एने हेयरान आख्यु वोस्तुह, लुट ने आखा सामानाह तुमरी केरता मेल लिज्यो; एने तारा दुसमोनान लुट जो तारो बोगवान यहोवा तुवाह आपी, ताह कामा माय लागाड़ज्ये। इहकेरीन ता हेयरावाला माणहाह हिऱ्यो किरज्ये, जो तार हेऱ्यो रेन जुलूम सेटो हे, एने ज्या न्या देसान हियोर नाय मिले।”
पुण जा हियोर न्या माणहान हेते, जान होकदार तुमरो बोगवान यहोवा तुमूह बाणावणे जाणे बाज रिनोह, ताम रेन काल्ला बी जीवाह जीवतालो मा सुड़हो, पुण ताह जोरूड़ खेतेम केर दिज्यो, मतलब हित्ती, एमोरी, कनानी, परिज्जी, हिब्बी एने यबूसीह, जीहे काय तुमरो बोगवान यहोवा तुवाह उकुम आपेल हे; ओहलो नाय एणे जुवे काय जोला खाराब कामे ता तान देवतान सेवा माय किरती आयेल हेते, तिहेच केरीन केरने तुमूह बी हिकाड़े, एने तुमू तुमरा बोगवान यहोवान विरूद पाप केरने बाज जाहो।
जेवी तुमू लेड़ाय किरतीन एगदा हेयराह जिकणेन केरता ताह जुलूम दिह वोर कोंड रिहो, तेवी तान जाड़ाह कुराड़ केरीन खेतेम मा किरहो, काहाकाय तान फोले तुमूह खाणेन काम आवती, केरीन ताह मा काटहे। काय मोयदानान जाड़े बी माणहे हेते काय तुमू ताह बी कोंडीन मिलहो? पुण जा जाड़ान बाराम तुमू ज्य जाण लेय काय तान फोलो खाणेन नाह सोता, ते ताह काटीन खेतेम किरज्ये, एने ता हेयरान विरूद ती टेम वोर कोट बांदिन मिलज्ये, जाहुक वोर तो तारा ताबाम नाह आव लागते।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.