Nahali Bible
व्यवस्था 21
खुनान नाह मिटाण्यो मामलो
केदी तुमरो बोगवान यहोवा तुमूह तुमरा होक माय आपणे जाणे बाज रिनोह, ता देसाम एगदो मारायेल ने देड़ पुड़ेल सापड़ी, एने ताह कुण मारेल हे ज्य मालुम नाय पुड़े। ते तारा डायडाया एने नियाव केरनार माणहे जायीन ता देड़ान चारो उगेन एकेक हेयरान लाम्बाय मापे। तेवी जो हियोर ता देड़ान आखाम रेन आहने हे, तावाला डायडाया एक डांड्यो निवाड़ लेय, एने जा पोर जुवालो केदी नाय मेलाय गीयो एय। तेवी ता गावान डायडाया ता डांड्याह एक बारा मोयना वोयणार नेदीन ओहला आड़वाया माय जो, केदी खेड़ानो एने पेरानो निह एय, ओहली जागे ले जायीन तान बोच काट देय। एने लेवी चाकऱ्या बी ताहरो आवी, काहाकाय तुमरो बोगवान यहोवा ताह निवाड़ लियेल हे काय तान सेवा केरी एने तान नावा माय बोरकेत आप्या केरी, एने तान वात मानीन काल्ली बी राड़ एने मारकुटीन मुकेदमान निर्णय एय। ओवतो जो गाव ता देड़ान आहने रेय, ता गावान डायडाया माणहे ता डांड्यान उपेर जान बोच आड़वाया माय काटेल हे, आप आपणा आथ दोवीन केय, “ज्यो खुन आमु नाह केऱ्या, एने ज्यो खुन एतालो आमु नाह देख्या। केरीन एय बोगवान, तारा सोड़वेल पोरजान पाप डापीन निर्दोस ने खुनान पाप तारा इस्राएल पोरजान मुंडा पोर रेन उतार, तेवी ता खुनान गुना से ताह माफ केराय जाय। इह केरीन तो काम केरीन जो बोगवानान नेजरीम ठिक हे, तु निर्दोस ने खुनान गुनो तुमरी विचीम रेन सेटा किरज्यो।”
लेड़ाय माय दिरेल बायकु हेऱ्यो वाराड़
जेवी तुमू तुमरा दुसमोना हेऱ्या लेड़ाय केरने जाहो, एने तुमरो बोगवान यहोवा ताह तुमरा आथाम केर देय, एने तुमू ताह बोंदी बाणाव लिहो। तेवी केदी तुमू देरीन लायेल एगदी सुंदर बायकुह देखीन मोन लाग गीयो एय, एने ती हेऱ्यो वाराड़ केर लेव लागे, ते तिह तारा गेरा माय लेन आव, एने ती लेट्या बोड़ावे एने नेखे काटाड़े। एने तीन बोंदीन फाड़का काढ़ीन तार गेराम एक मोयनो वोर तीन आईख आबाख ने केरता दुख मोणावती रेय; तान पासाण तु ती फाय जाज्ये, एने तु तीन एदमी एने ती तारी लाडी बुणे। केदी तुवाह नाय पुटे, ते जा जाणे हुदे ता जाणे दिज्ये; तिह पोयशा लेन का मा विचहे, एने तारो ती हेऱ्यो गेलेत समंद एतो, केरीन तिह गुलाम ने गेत वेवारो मा किरहे।
जेठालान आदिकार
केदी एगदा एदम्यान दुय बायकु एती, एने एकी पोर ताह दिहरी रेन वोदार मोंग एय, एने दुयून बी सोरा एती, पुण निह पोटतेय तीन सुरो जेठालो एय। ते जेवी तो मालदेनाह वाटे, तेवी केदी नाह पोटणारीन बिटोख खेरीस डावालो एय, एने जीवतालोच एय, तो पोटणारीन बेटाख जेठाय नाय आप सेकी; तो ज्यो सोमजीन काय नाह पोटणारीन बिटोख मारो जुवानीन पेल्लो फोल हे, एने जेठालान आदिकार ताच ने हे, ताहच मारा मालदेना माय रेन दुय ईसा आपीन जेठालो माने।
एकएठ्यो सोरो
केदी एगदान एकएठ्यो एने उगार बिटोख एय, जो तान आईख आबाख ने वातु नाह मानेत, पुण दोपकाड़ने से बी तान नाह हुमलेत। ते तान आहख आबोख ताह देरीन तान गावान बाहेर फाटेक ने आहने गावान डायडाया फाय ले जाय, एने ता गाव वाला डायडाया माणहाह केय, “आमरो ज्यो सुरो एकएठ्यो एने उगार हे, ज्यो आमरी नाह हुमलेत; ज्यो उजाड्यो एने दारूड्यो हे। तेवी ता गावान सोब एदमी ताह देगड़ाठीन मार टाके, इहकेरीन तुमरी विचीम रेन ओहली खाराबीह सेटा किरज्यो, तेवी आखा इस्राएली होमलीन बिती।”
दिहरा नियम
केदी एगदाह डेन्ड आपणे सारको काह पाप इनो एय, केरीन तो माराय जाय, एने तु तान देड़ जाड़ा पोर टांग देय। ते राती तो देड़ टांगाय नाय रेय, जोरूड़ तेदिस ताह बुज दिज्ये, काहाकाय जो टांगाय जायेल हे, तो बोगवाना उगे रेन हारपाय जायेल हे, केरीन जो देस तारो बोगवान यहोवा तुवाह ईसो केरीन आपेह, तान बुयीह एठो मा किरहे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.