Nahali Bible
व्यवस्था 22
तुमू तुमरा बायाख ने डोरे, नाहते मेंड्रा बोकड्याह टाकायेल देखीन, नाह देख्यो मा किरहो, ताह जोरूड़ तार बायाख फाय पोचाड़ दिज्यो। पुण केदी तुमरो बाहख आहने नाय रेतेय, नाहते तुमू ताह निह ओलखतेती, ते ता जेनवेराह तुमरा गेराम लियावज्यो, एने जाहुक वोर तुमरो बाहख नाय हुदे, ताहुक वोर तुमू फाय रेय; जेवी तुमरो बाहख ताह होदी, तेवी ताह आप दिज्यो। एने तान गेदड़ा नाहते फाड़कान बाराम, पुण तान काल्ली बी वोस्तु काह नाह रेत, जो ता फाय रेन टाकाय गियी एय, एने ती तुमूह सापड़ी, तान बाराम इहीच किरज्यो; तु दिखेल नाह दिख्यो मा किरहे।
तुमू तुमरा बायाख ने गेदड़ा नाहते बुयोल वाटे पोड़ रियेल देखीन नाह देख्यो मा किरहो; ताह उठाड़ने माय तान मुदेक किरज्यो।
काल्ली बी बायकु एदम्यान पेरवोट नाय पिरे, एने नाय काल्लो एदमी बायकुन पेरवोट पिरे; काहाकाय ओहलो काम केरनारे सोब बोगवानान नेजरीम खाराब हेते।
केदी तुमूह जाड़ा पोर नाहते बुय पोर तुमरी सोमोर वाटी पोर एगदा चिड़ान पांजरो सापड़ी, ता माय पिला एय नाहते इंडा एती, एने पिला पोर नाहते इंडा पोर तान आहख बोहरेनी एय, ते पिला हिऱ्योच आईख मा लियावहे; पिलाह तुमरी वाटु लेय लिज्यो, पुण आईख सोड़ दिज्यो; इह केरीन किरहो ताहार तुमरो हाजो एय, एने तुमू मोक्ता वोरह्या वोर जिवहो।
जेवी तुमू नोवालो गेर बांदहो, तेवी तान साजान आड़ावो केरनेन केरता कोटड़ो बाणावज्यो, ओहलो नाय एणे जुवे काय एगदो साजा पोर रेन जाय पोड़ी, एने तुमू तुमरा गेरल्या पोर खुनान गुनो लागाड़े।
अंगुरान वाड़ीम दिहरी बातीन बियारो मा पिरहो, ओहलो नाय एणे जुवे काय ता माय वाली आखी कामाय, मतलब तारो पिरेल बियारो एने अंगुरान वाड़ीन पाक दुयू एठी एय जाती।
बुयेल एने गेदड़ा दुयाह एकठास एलाम जुपीन मा चालाड़हे।
कापाह एने होण दुयाह बेचकीन बुणेल फाड़का मा पिरहे। 1
तुमरा पांगेरनेन फाड़काह चार चोमखेर फुंदा लागाड्या किरज्यो।
गेलेत समंद ने बाराम नियम
केदी एगदो एदमी एगदी बायकु हिऱ्यो वाराड़ केरी, एने तीन आहने जाणेन टेम माय ताह नाय पुटे, एने तो बदनाम केरीन ती पोर ज्य किन दोस लागाड़ी, “ज्यी बायकु हिऱ्यो मी वाराड़ किऱ्यो, एने मी जुलबुखे ती हिऱ्यो गीयो, तेवी ती माय कुवारली वोयीन निसाणी नाह जुड़नो।”
ते सोरीन आहख ने आबोख तीन कुवारलीन निसाणी लेन गावान डावाला माणहा फाय फाटेक ने बाहेर जाय; एने सोरीन आबोख डावाला माणहाह केय, “मी मारी बेटीख ज्या एदम्या हिऱ्यो वाराड़ केर दिनो, एने ती ताह पुटेत नाह; एने तो इह किन ती पोर खाराब कामान दोस लागाड़ेह, मी तारी बेटीख माय कुवारलीन निसाणी नाह सापड़ायो। पुण मारी बेटीख ने कुवारलीन निसाणी ज्यी हे, तेवी तिन आहख आबोख गावान डावाला माणहान सोमोर चादरो पोसरावे।” तेवी गावान डावाला माणहे ता एदम्याह देरीन डेन्ड आपी; एने ता पोर होव रूपियान डेन्ड बी लागाड़ीन ती सोरीन आबाख आपी, केरीन तो इस्राएली सोरीन बोदनामी किरेल हे; एने ती तान बायकु बोणीन रेय, एने तो जीवणो बोर ती बायकुह सोड़ने नाय जुवे।
पुण केदी ती सोरीन कुवारलीन निसाणी नाय जुड़े, एने ता एदम्यान वात खेरी निकले, ते ती सोरीह तिन आबाख ने गेरान बायणा पोर ले जाय, एने ता हेयरान एदमी तिह देगड़ाठीन मार टाके; ती ते तिन आबाख ने गेर रांडीन काम केरीन बुराय किरेल हे; इह केरीन तुमू तुमरी विचीम रेन ओहली खाराबीह सेटा किरज्यो।
केदी एगदो एदमी दिहरा एदम्यान वाराड़ किरेल बायकु हिऱ्यो हुवतालो देराय जाय, ते जो एदमी ती बायकु हिऱ्यो हुवनो एय, तो एने ती बायकु दुयू माराय जाय; इह केरीन तुमू ओहली खाराबीह इस्राएल माय रेन सेटा किरज्यो।
केदी एगदी कुवारली सोरीन वाराड़ान वात एनी एय, एने एगदो दिहरो एदमी तिह हेयराम सापड़ावीन ती हिऱ्यो गेलेत काम केरी, ते तुमू ता दुयाह ता हेयरान बाहेर ले जायीन देगड़ाठीन मार टाकज्यो, सोरीह ज्यान केरता काय ती हेयराम रितीन बी नाह आयेड़नी, ता एदम्याह ज्यान केरता काय तो तान आहने रेणारान बायकुह हिऱ्यो गेलेत काम किरेल हे। इह केरीन तुमू तुमरी विचीम रेन ओहली खाराबीह सेटा किरज्यो।
पुण एगदो एदमी एगदी सोरीन जीन वाराड़ान वात एनी एय, तिह खेताम सापड़ावीन जोबेर जोस्ती तिह हिऱ्यो गेलेत काम केरी, ते निस्तो तो एदमी माराय जाय, जो ती हिऱ्यो गेलेत काम किऱ्यो एय। एने ती सोरीह काय मा किरहो; ती सोरीन पाप मोतीन देन्डान बाराबोर नाय मिले, काहाकाय जीहे एगदो तान आहने रेणारा देन ताह मार टाके, तोहलीच वात ज्यी बी हे। काय तो एदमी ती सोरीह खेताम सापड़ायो, एने ती आयेड़नी ते खोरी, पुण तिह वोचाड़नार कुण नाह जुड़नो।
केदी एगदा एदम्याह एगदी कुवारली सोरी जुड़ी, जीन वाराड़ान वात निह एनी एय, एने तो तिह देरीन ती हिऱ्यो गेलेत काम केरी, एने ता देराय जाय, ते जो एदमी ती हिऱ्यो गेलेत काम किऱ्यो एय, तो ती सोरीन आबाख पाचाह शेकेल रूपिया आपी, एने ती तान बायकु बुणे, तो तिह लाडी बाणाव लिदो; ज्यान केरता तो जीवणो बोर तिह नाय सोड़ने जुवे।
एगदो तान होवत्री आईख तान बायकु नाय बाणावी, तो तान आबाख ने पांगरोण नाय उगाड़े।
Source notes (1)
- Cross-reference गिनती 15:37-41
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.