Nahali Bible
व्यवस्था 23
बोगवानान सोबा माय जाणेन मोना
जान आंड चेंदाय गीयो एय नाहते लिंग काटाय जायेल एय, तो बोगवानान सोबा माय नाय आवणे जुवे।
एगदो सिनालान पायदा एनो एय, तो बोगवानान सोबा माय नाय आवणे जुवे; पुण दोह पिढ्यु वोर कुण बी बोगवानान सोबा माय नाय आवणे जुवे।
काल्लो अम्मोनी नाहते मोआबी बोगवानान सोबा माय नाय आवणे जुवे; तान दोहवी पिढ़ी वालो वोर कुण बी बोगवानान सोबा माय नाय आवणे जुवे; ज्यान केरता काय जेवी तुमू मिस्र माय रेन निकलीन आवताला, तेवी ता एन पाणी लेन वाटे पोर तुमूह मिलने नाह आवा, एने ज्य बी काय ता अर्नराईम देसान पातोर हेयरान बोरान सोरो बिलामाह पोयशा आपीन ता तुमूह हाराप देणे लागाड़ेल एता। पुण तुमरो बोगवान यहोवा बिलाम ने नाह हुमल्यो; पुण तुमरो बोगवान यहोवा तुमरी बोदेल तान हारापाह बोरकेत माय पोलटाव दिनो, काहाकाय तुमरो बोगवान यहोवा तुमरी पोर मोंग मेलतालो। तुमू जीवणो बोर तान केरता हाजो एने बोलो केदी बी मा हुदहो।
काल्ला एदोमीह नफरत मा किरहो, काहाकाय ता तुमरा बाहख हेते; काल्ला मिस्रीह नफरत मा किरहो, काहाकाय तुमू तान देसाम परदेसी बोणीन रियेल इतो। तान तिसरी पिढ़ी वोर वाला माणहे पायदा एती, ता बोगवानान सोबा माय आव सेकती।
सेनान पाड़ावाह चोखो मेलने
जेवी तुमू दुसमोना हेऱ्या लेड़ने जायीन पाड़ावो टाकहे, तेवी सोब बातीन खाराब वात्यु हेऱ्या रेन वोचीन रिज्यो, केदी तुमरी विचीम एगदो एदमी ती एठाय माय रेन जो राती आप आप एया किरेह, ता माय एठो इनो एय, ते खोपड़ीन बाहेर जाय, एने खोपड़ीन माय नाय आवी। पुण हांजीन टेमीन पेल तो उंगले, एने जेवी दिह बुड़ जाय, तेवी खोपड़ी माय आवी।
खोपड़ीन बाहेर तार केरता आगणेन जागो रेणे जुवे, एने ताच आगणेन केरता जाया किरज्ये; एने तार फायवाला आथ्यारा माय रेन एक टिकेम बी रेणे जुवे; एने जेवी तु आगणेन केरता बोही, तेवी ता केरीन खोदीन तारी गाणीह बुज दिज्ये। काहाकाय तारो बोगवान यहोवा तुवाह वोचाड़ने एने तारा दुसमोनाह आरवणेन केरता तारी विचीम फिरती रेय, केरीन तारो पाड़ावो चोखो रेणे जुवे, ओहलो नाय एणे जुवे काय तो तारी विचीम एगदी एठी वोस्तुह देखीन तुवा हिऱ्यो रेन सिटो जात रेय,
दिहरा नियम
जो पावोर तान मालक्या फाय रेन नाहीन तारो आसरो लेय ताह तान मालक्यान आथाम मा देराव दिहे; तो तार विचीम जो हियोर ताह पुटे ताच माय तार हिऱ्यो रेणे जुवे; तु ता पोर अन्याय मा किरहे।
इस्राएली सोऱ्यु माय रेन काल्ली बी रांडी नाय रेणे जुवे, एने नाय इस्राएली एदम्या माय रेन एगदो ओहलो गेलेत काम केरनार रेय। तु रांडीन कामाय नाहते चितान कामाय एगदी मानताह पुरी केरनेन केरता तारा बोगवान यहोवान गेराम मा लेन आवहे; काहाकाय तारा बोगवान यहोवान आहने ज्या दुयून दुयू कामाय खाराब कामे हेते।
तारा एगदा बायाख वियाज पोर केरजो मा आपहे, पोयशा एय निहते खाणेन वोस्तु रेय, निहते काल्ली बी वोस्तु रेय जो वियाजा पोर आपाय जाथे, ताह वियाज पोर मा आपहे। तु पाराया देसावालाह वियाजा पोर केरजो ते आपी, पुण तारा काल्ला बायाख हिऱ्यो ओहलो मा किरहे, काय जा देसान होकदार बोणने तु जाथे, ता जा जा कामा माय तारो आथ लागाड़हे, ता सोबाह तारो बोगवान यहोवा तुवाह बोरकेत आपी।
जेवी तु तारा बोगवान यहोवान केरता मानता माने, ते ताह पुरो केरनेम वार मा किरहे; काहाकाय तारो बोगवान यहोवा ताह जोरूड़ तुवा फाय लेय लेय, एने वार लागाड़हे ताहार तु पापी केवाही। पुण केदी तु मानता नाय माने, ते तारो काय पाप नाय मिले। जो काय तारा मुयाम रेन निकली, ताह पुरो केरनेम चोकसी किरज्ये; तु तारा मुया केरीन वचन आपीन तारी मोरजी से तारा बोगवान यहोवान जोहली मानता माने, तिहेस केरीन मोकला मोना केरीन ताह पुरो किरज्ये।
जेवी तु एगदा दिहरान अंगुरान वाड़ाम जाय, तेवी तुवाह जुवे तोला खा, पुण टोपलीम मेलीन तार गेर मा लिजाहे। जेवी तु एगदा दिहरान खेताम जाहे, तेवी आथा केरीन उंब्यु तोड़ीन खाय सिकेह, पुण तान खेतावाला उंब्या दातला केरीन मा काटहे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.