Nahali Bible
व्यवस्था 24
तलाक एने पोशो वाराड़
केदी एगदो एदमी एगदी बायकु हिऱ्यो वाराड़ केरी, एने तान पासाण ओबरून वात सापड़ावीन नाय पोटी, ते तो तिह सोड़नेन पोत्रो लेखीन तिन आथाम आपीन तिह गेराम रेन काढ़ देय। जेवी ती तान गेराम रेन निकली जाय, तेवी दिहरा एदम्यान एय सिकेह। पुण केदी ती ता दिहरा एदम्याह बी नाय पुटे, एने तो तीन केरता सोड़नेन पोत्रो लेखीन तीन आथाम आपीन तिह गेराम रेन काढ़ देय, नाहते दिहरो एदमी जो तिह तान बायकु बाणाव लिदो एय मोर जाय, ते तीन पेल्लो एदमी, जो तिह काढ़ दिनो एय, तीन एठाय एणेन पासाण तिह तान बायकु नाय बाणावणे जुवे, काहाकाय ज्यी वात बोगवानान नेजरीम खाराब हे, इह केरीन तु ता देसाह जाह तारो बोगवान यहोवा तारो ईसो केरीन तुवाह आपेह पापी मा बाणावहे।
दिहरा नियम
जो एदमी नोवालो नोवालो वाराड़ किऱ्यो एय, तो सेना हिऱ्यो नाय जाय, एने काल्ला बी कामान वोजो ता पोर टाकाय नाय जाय; तो वोरीह बोर तान गेराम मुकलो रेन तान वाराड़ किरेल बायकुह खुस किरते रेय।
एगदो एदमी गेरटी नाहते तान उपेरल्या पुड़ाह गिरवी नाय मिले; काहाकाय ओहलो केरने मानो तान जीव गिरवी मेल दियेल हे।
केदी एगदो तान एगदा इस्राएली बायाख पावोर बाणावणे नाहते वेचणेन विचार से चोरी केरतालो सापड़ी जाय, ताहार ता चोराह मार टाकज्यो; इह केरीन ओहली खाराबीह तारी विचीम रेन सिटो किरज्ये।
एगदा कोढ़ लागेल माणहान बाराम चोकसी माय रिज्यो, एने जो लेवी चाकऱ्यो तुमूह हिकाडे़, ताह पालनेन कोसीत केरनेन चोकसी किरज्यो; जोहलो उकुम मी ता माणहाह आपेल हे, तिहेच केरनेन चोकसी किरज्यो। इर मिलज्यो काय तुमरो बोगवान यहोवा, जेवी तुमू मिस्र रेन निकलीन आवणे बाजरियेल एता, तेवी वाटे मिर्याम हिऱ्यो काय किरेल इतो।
जेवी तुमू एगदा बायाख काह उदार आपो, ते गिरवीन वोस्तु लेणेन केरता तान गेरा माय मा रिगहो। तु बाहेर उब रिज्ये, एने जाह तु आपी तोच गिरवीन वोस्तु तार फाय बाहेर लेन आवी। एने केदी तो माणुह गेरीब एय, ते तान गिरवीन वोस्तु तारे आहने मेलीन मा हुवहे; दिह बुड़ता बुड़ता ताह ती गिरवीन वोस्तु जोरूड़ फिराव दिज्ये, केरीन काय तो तान पांगरोण पांगरीन हुव सेकी, एने तुवाह बोरकेत आपी; ज्य तारा बोगवान यहोवान नेजरीम हाजो काम ठेराय।
एगदो मोंजऱ्यो जो गेरबड़ो एने गेरीब एय, नाहते तो तारा बायाख माय रेन रेय, नाहते तारा देसान फाटकी माय रेणार पाराया देसावाला माय रेन एय, ता पोर अन्याय मा किरहे; ज्य जाणीन, काय तो गेरबड़ो एने तान मोन मोंजरी माय लाग रिथे, मोंजरी केरनेच ने दिह बुड़नेन पेल तु तान मोंजरी आप दिज्ये; ओहलो नाय एय काय तो तार कारेण बोगवाना फाय विन्ता केरी, एने तु पापी ठेराय।
सोरान कारेण आबोख नाय माराय जाय, एने नाय आबाख ने कारेण बिटोख माराय जाय; जो पाप केऱ्यो एय तोच ता पापान कारेण माराय जाए। एगदा पाराया देसावालान नाहते विखावालान नियाव मा बिगाड़हे, एने एगदी रांडायेल बायकुन फाड़का गिरवी मा मिलहे; एने ज्याह इर मिलज्ये काय तु मिस्र माय पावोर इतो, एने तारो बोगवान यहोवा तुवाह ता रेन सोड़वीन लायेल हे; केरीन मी तुवाह ज्यो उकुम आपथु।
जेवी तु खेतावाली कामाय काटहे, एने एक पुलो खेताम विहरीन सुट जाय, ते ताह लेणेन केरता पुशो मा जाहे; तो परदेसी, विखावाला एने रांडायेल ने केरता पोड़ रेय, केरीन काय बोगवान यहोवा तारा सोब कामाम बोरकेत आपी। जेवी तु फोलावाला जाड़ाह जेंजाड़हे, तेवी दिहरी वारीन पुशो मा जेंजाड़हे; तो परदेसी, विखावाला, एने रांडायेल बायकुन केरता रेय जाय। जेवी तु तारा अंगुरान वाड़ा माय फोल तोड़े, एने तोड़ने बुखेत ता माय अंगुर रेय जाती, ताहार पुशो मा तुड़हे, तो परदेसी, विखावाला, रांडायेल ने केरता रेय जाय। एने ज्य इर मिलज्ये काय तु मिस्र देसाम पावोर इतो; केरीन मी तुवाह ज्यो उकुम आपथु।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.