Nahali Bible
व्यवस्था 25
केदी दुय माणहान विचीम काह राड़ एय, एने ता नियाव केरावणेन केरता नियाव केरनारा फाय जाय, एने ता तान नियाव केरी, ते निर्दोसाह निर्दोस, एने गुनेगाराह गुनेगार ठेरावे। गुनेगार माणुह मार खाणेन लायकीन एय, ते नियाव केरनार ताह लोटाड़ीन तान सोमोर जोहलो तान गुनो एय तिहेच चापका गेण गेणीन देय। तो ताह चालीह चापका वोर देवाड़ सिकेह; ओहलो नाय एय काय ज्याह रेन वोदार मार खावाड़ने से तारो बाहख तार नेजरीम निचो गेणाय।
वेगेलने बुखेत बोयलान मुयाह मोहको मा बांदहे।
मुरील बायाख ने केरता जापापदारी
जेवी एगदा दुय बाहख एक्ठाच रेतेह, एने ता माय रेन एक बिगेर सोरास ने मोर जाय, ते तान बायकुन वाराड़ दिहरा गेराणा हेऱ्यो नाय केरने जुवे, तिन एदम्यान बाहख ती फाय जायीन तिह तान बायकु बाणाव लेय। जो पिल्लो सुरो ती बायकुन पायदा एय, तो ता मुरेल बायाख ने वोसीन ठेराय, केरीन तान नाव इस्राएल माय रेन नाय मिटणे जुवे। केदी ती बायकुन एदम्यान बाहख ती हिऱ्यो वाराड़ केरने नाय होदी, ते ती बायकु गावान फाटेक पोर डावाला माणहा फाय जायीन केय, “मारा एदम्यान बाहख तान बायाख ने नाव इस्राएल माय बोणीन मेलने नाकार केर दियेल हे, एने मार हिऱ्यो एदम्यान बायाख ने देरमो पालने नाह हुदेत।” तेवी ता हेयरावाला डावाला माणहे ता एदम्याह सोमजाड़े; एने केदी तो तान वात निह मानतेय एने केय, “माहु ज्यी हेऱ्यो वाराड़ केरनो नाह पुटेत,” ते तान बायाख ने बायकु ता डावाला माणहान सोमोर तान आहने जाय, एने तान पायाम रेन चाट्या काड़े एने तान मुया पोर थुप देय; एने केय, “जो एदमी तान बायाख ने वोस चालाड़ने नाह हुदेत ता हेऱ्यो ओहलोच वेवारो केराय जाय। तेवी इस्राएल माय ता एदम्यान नाव ज्योच पोड़ी, मतलब बिगेर चाट्या वाला एदम्यान गेराणो।”
दिहरा नियम
केदी दुय एदमी आपसाम लेड़ाणे बाजरेना एती, एने ताम रेन एकान बायकु तिन एदम्याह देणाराह सोड़वणेन केरता आथ ओंगाण केरीन तान आंडाह जोरेस दाब देय, तेवी ती बायकुन आथ तोड़ दिज्ये, ती पोर गीण मा किरहे। तु तारा थेयलाम बाती बातीन, मतलब कोमी जास्तीन वोजेन मा मिलहे। तारा गेराम बाती बातीन, मतलब आत्यो मोठो पायलो मा मिलहे। तारा वोजेन एने माप पुरा पुरा ठिक रेणे जुवी; केरीन काय जो देस तारो बोगवान यहोवा तुवाह आपेह, ता माय तारी जीवाय जुलूम रेय। काहाकाय ओहला कामाम जोली बेमानी केरतेह, ता सोब तार बोगवान यहोवान नेजरीम खाराब हे।
अमालेकीह खेतेम केरनेन उकुम
इर मिल काय तु मिस्र माय रेन निकलीन आवणे बाजरियेल इतो, तेवी अमालेक तुवाह वाटे काय किरेल इतो। मतलब ताह बोगवानान बिय नाह एती; ज्यी कारेण तो जेवी तु वाटे लेवायेल इतो, तेवी तुमू पोर हामलो केरीन जोला कोमजोर एणेन कारेण आखाम रेन पासाण एता ता सोबाह माऱ्यो। केरीन जेवी तारो बोगवान यहोवा ता देसाम जो तारो बाग केरीन तारा होक माय केर दिथे, तुवाह चार चोमखेरीन सोब दुसमोनाह हिऱ्यो रेन आराम आपी, तेवी अमालेकीन नाव देरती पोर रेन मिटाड़ दिज्ये; एने तुमू ज्यी वातु मा विहेरहो।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.