Nahali Bible
व्यवस्था 26
काटणेन बेट
उवतो जेवी तु ता देसाम जाह तारो बोगवान यहोवा तारो सोतान बाग केरीन तुवाह आपेह, ता पोचीन तान होकदार बोणीन ता माय वोह जाही, तेवी जो देस तारो बोगवान यहोवा तुवाह आपेह, तान बुयीन बाती बातीन जो पेल्ली पाक तु तारा गेराम लावहे, ता माय रेन थोड़ोक टोपली माय लेन ता जागा पोर जाज्ये, जाह तारो बोगवान यहोवा तान नावान रेणेन केरता निवाड़ लेय। ती टेम माय चाकऱ्या फाय जायीन इह किज्ये, “मी आज तार बोगवान यहोवान सोमोर गोसीत केरथु, काय बोगवान आमुह जा देसाह आपणेन केरता, आपणा डायडाया हिऱ्यो सुगोण खायेल इतो ता माय मी आव लागेल हे।”
तेवी चाकऱ्या तारा आथाम रेन ती टोपली लेन तार बोगवान यहोवान वेदीन सोमोर मेल देय। तेवी तु तारा बोगवानाह इह केरीन किज्ये, “मारो डावालो एदमी एक अरामी माणुह इतो जो न्या ता बोटेकणार इतो; तेवी तो तान आत्याच परिवार हिऱ्यो मिस्र माय गीयो, एने ता पाराया देसावालो बोणीन रिनो; एने ताहरी ता से एक मोटली, ताकेत वाली एने जुलूम माणहा से बोरायेल देस पायदा एनी। एने मिस्री आमु हेऱ्या बुरो वेवारो केऱ्या, आमुह जुलूम दुख देना, आमुह केठीण काम केराया। पुण आमु आमरा डायडायान बोगवानाह रेड़ रेड़ीन विन्ता केऱ्या, एने यहोवा आमरी होमलीन आमरो दुख, केस्टो एने तेकलीत पोर नेजेर टाक्यो; उवतो बोगवान तान ताकेत एने ताकेतवाला आथा से बिय आवी ओहला चोमेत्कार देखाड़ीन आमुह मिस्र देसा माय रेन काढ़ीन लावो। एने आमुह ज्या जागा पोर पोचाड़ीन जो देस जा माय दुद एने मोवालान नेदी वोयत्युह आमुह आप दियेल हे। एवी एय बोगवान देख, ज्यी बुय तु माहु आपेल हे, तान पेल्ली पाक मी तार फाय लेन आयेल हे।”
तेवी तु ताह तारा बोगवान यहोवान सोमोर मिलज्ये; एने यहोवाह वुंदज्यी; एने जोल्यु हाज्यु वोस्तु तारो बोगवान यहोवा तुवाह एने तारा गेराणाह आपी, तान केरता तु लेवी एने तार विचीम रेणारे परदेसी हिऱ्यो मोंज किरज्ये।
तिसरो साल जो दोहवो ईसो आपणेन साल ठेरायेल हे, जेवी तु तारी वोड़ती माय रेन दोहवो ईसो निकाल लेय, तेवी ताह लेवी, परदेसी, विखावाला एने रांडायेलाह आप दिज्ये, काय ता तार फाटेक ने माय खायीन आफरी जाय। तेवी तु तारा बोगवान यहोवाह किज्ये, “मी तारा सोब उकुमान गेत चोखाली ठेरायेल वोस्तुह मारा गेराम रेन काढ़ीन लेवी, परदेसी, विखावाला एने रांडायेलाह आप दियेल हे; तारा काल्ला उकुमाह मी नाह ते टाल्यो एने ताह नाह विहरेल सुतो। त्यु वोस्तुम रेन मी दुखान टेम माय नाह खादो, एने ताम रेन काल्ली वोस्तु एठायीन देशा माय गेराम रेन काड्यो, एने नाह काह दुख केरनाराह आप्यो; मी मारा बोगवान यहोवान होमलेल हे, मी तारा सोब उकुमान गेत किरेल हे। तु हेरगाम रेन जो तारो चोखालो दाम हे, निजेर टाकीन तारी पोरजा इस्राएलाह बोरकेत आप, एने ज्या दुद एने मोवालान दारान देसान बुय पोर बोरकेत आप, जाह तु आमरा डायडाया हिऱ्यो खायेल सुगोणान गेत आमुह आपेल हे।”
बोगवानान सोतान पोरजा
आजीन दिह तारो बोगवान यहोवा तुवाह विद्यु एने नेम पालेन केरनेन उकुम आपेह; केरीन तारो आखो मोन लागाड़ीन एने आखा जीवा केरीन ज्यान पालनेन चोकसी किरज्ये। तु ते आज यहोवाह तारो बोगवान मानीन ज्य वचन आपेल हे, काय मी तार कियेल वाटी पोर चालुह, एने विद्यु, उकुम एने नेमाह मान्या केरूह, एने तारी होमल्या केरूह। एने बोगवान बी आज तुवाह तान वचनान गेत तान पोरजा एने सोतान मालदेन मानेल हे, काय तु तान उकुमाह मान्या केरी। एने तो तान बाणायेल आखा देसाह रेन वोदार बोड़ाय, नाव एने होबान बाराम तुवाह मान सम्मान आपी, एने तु तान वचनान गेत तारा बोगवान यहोवान चोखाली पोरजा बोणीन रेय।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.