Nahali Bible
व्यवस्था 27
देगड़ा पोर लिखेल बोगवानान नेम
उवतो इस्राएलान डावाला माणहा हिऱ्यो मुसा पोरजान माणहाह ज्यो उकुम आप्यो, “जोला उकुम मी आज तुमूह होमलाड़थु ता सोबाह मानज्यो। एने जेवी तुमू यरदन नेदीन पार इन ता देसाम पुचहो, जो तुमरो बोगवान यहोवा तुमूह आपेह, तेवी मोठ मोटला दिगोड़ उबा केर लिज्यो, एने ता पोर चुनो निपज्यो; एने पार एणेन पासाण ता पोर ज्या नेमान आखा वचनाह लिखज्यो, केरीन काय जो देस तुमरा डायडायान बोगवान यहोवा तान वचनान गेत तुमूह आपेह, एने जा देसाम दुदान एने मोवालान दार वोयत्युह ता देसाम तुमू जाय सिकहो। उवतो जा देगड़ान बाराम मी आज उकुम आपेल हे, ताह यरदन नेदीन पार एन एबाल बोयड़ा पोर उबा किरज्यो एने ता पोर चुनो निपज्यो। एने ताच तुमरा बोगवानान केरता देगड़ान एक वेदी बाणावज्यो, ता पोर काल्लो आथ्यार मा लागाड़हो। तुमरा बोगवान यहोवान केरता देगड़ान एक वेदी बाणावीन ता पोर होमबोली चेड़ावज्यो। एने ताच होमबोली बी चेड़ावीन खाणो खाज्यो, एने तुमरा बोगवानान सोमोर मोंज किरज्ये। एने ता देगड़ा पोर ज्या नेमान आखा वचनाह साप रिती से लिख दिज्यो।”
उवतो मुसा एने लेवी चाकऱ्यो सोब इस्राएली माणहाह ज्य बी केया, “एय इस्राएल ठावको रेन हुमेल; आजीन दिह तु तार बोगवान यहोवान पोरजा बोण जायेल हे। केरीन तारा बोगवान यहोवान वात मानज्ये, एने तान जो जो उकुम एने विदी आज मी तुवाह होमलाड़थु, तान पालेन किरज्ये।”
हाराप ने वचन
उवतो तेदिस मुसा पोरजान माणहाह ज्यो उकुम आप्यो। जेवी तुमू यरदन नेदी पार एय जाहो, तेवी शिमोन, लेवी, यहुदा, इस्साकार, युसूफ, बिन्यामीन, ज्या गिरीजीम बोयड़ा पोर उब रेन बोरकेतीन वचन होमलाड़े। एने रूबेन, गाद, आशेर, जबुलून, दान एने नप्ताली, ज्या एबाल बोयड़ा पोर उब रेन हाराप ने वचन होमलाड़ी। तेवी लेवी माणहे सोब इस्राएली एदम्याह आयड़ीन केय,
“हारपायेल हे, तो माणुह जो काल्ली मुरती कारागीरा फाय गेड़ीन तिह हाजाली जागे बोहाड़े, काहाकाय ज्यान वोजेसे बोगवानाह खाराब लागेह,”
तेवी आखा माणहे केय, “आमेन!”
हारपायेल हे, तो माणुह जो तान आईख आबाख निचो जाणे,
तेवी आखा माणहे केय, “आमेन!”
हारपायेल हे, तो जो एगदान हेड़ाह हेरकावेह,
तेवी आखा माणहे केय, “आमेन!”
हारपायेल हे, तो जो आंदलाह वाटी से बोटकाड़ दिथे,
तेवी आखा माणहे केय, “आमेन!”
हारपायेल हे, तो जो परदेसी, विखावाला नाहते रांडायेल ने नियाव बिगाड़ेह,
तेवी आखा माणहे केय, “आमेन!”
हारपायेल हे, तो जो तान होवत्री आईख हेऱ्यो गेलेत काम केरी, काहाकाय तो तान आबाख ने पांगरोण उगाड़ेह,
तेवी आखा माणहे केय, “आमेन!”
हारपायेल हे, तो जो काल्ली बी बातीन जेनवारा हिऱ्यो गेलेत काम केरी,
तेवी आखा माणहे केय, “आमेन!”
हारपायेल हे, तो जो तान खाजगीन बोणीख नाहते होवत्री बोणीख हिऱ्यो गेलेत काम केरी,
तेवी आखा माणहे केय, “आमेन!”
हारपायेल हे, तो जो तान खाजगीन हाहवुकी हिऱ्यो गेलेत काम केरी,
तेवी आखा माणहे केय, “आमेन!”
हारपायेल हे, तो जो एगदाह लिकायेन देय,
तेवी सोब माणहे केय, “आमेन!”
हारपायेल हे, तो जो निर्दोस माणहाह मार टाकणेन केरता पोयशा लेय,
तेवी आखा माणहे केय, “आमेन!”
हारपायेल हे, तो जो ज्या नेमान वचनाह मानीन पुरो नाह किरेत,
तेवी आखा माणहे केय, “आमेन!”
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.