Nahali Bible
व्यवस्था 15
सातवो साल सुटकारान साल
(लेव्यवस्था 25:1-7)
तु एकेक सात वोरह्यान सेवली बुखेत केरजा माय रेन सुटकारो आप्या किरज्यो। मतलब जो कुण बी केरजो आपणार तान आहने रेणाराह काह उदार आप्यो एय, तो ता सोड़ देय; एने तार आहने रेणाराह नाहते बायाख से ताह पोशो फिरावणेन जोर नाय केरी, काहाकाय यहोवा बोगवानान नावाम ज्या सुटकारान पारचार इयेल हे। पाराया देसान माणहाह तु आखो बोराव सिकेह, पुण जो काय तारा बायाख फाय तारो काह एय, ताह तु बिगेर बोरायेल सोड़ दिज्ये।
तारी विचीम कोय बी गेरीब नाय रेय, काहाकाय जा देसाह तारो बोगवान यहोवा ईसो केरीन तुवाह आपेह, काय तु तान होकदार बुणे, ता माय तुवाह जुलूमच बोरकेत आपी। ओलोक जोरूड़ी हे काय तु तारा बोगवान यहोवान वात मोन लागाड़ीन होमली, एने ज्या आखा उकुम पालने माय जा आज मी तुवाह होमलाड़थु, चोकसी केरी। तारो बोगवान यहोवा तुवाह तान वचनान गेत तुवाह बोरकेत आपी, एने तु जुलूम देसाह उदार आपहे, पुण तुवाह उदार मांगणे नाय पोड़ी; एने तु जुलूम देसा पोर राज किरहे, पुण ता तार पोर राज केर नाय सेकती।
जो देस तारो बोगवान यहोवा तुवाह आपेह, तान एगदा हेयराम केदी तारा बायह्याख माय रेन इखेह गेरीब एय, ते ता गेरीब बायाख ने केरता, तु तारो मोन वातड़ो मा किरहे, एने तार मुठ बोंद मा किरहे। जी वोस्तुन ताह गिरेज एय, ताह जोलो जुवी तोलो तारो आथ डिल्लो केरीन ताह उदार आपज्ये। चेकचिल्यो रे! तारा मोना माय ओहलो खाराब विचार नाय आवी, सातवो साल जो सुटकारान साल हे, केरीन ओहलो मतलबी एन ता बायह्याख आपणे से नाकार दिहे, एने तो तार विरूद यहोवा फाय विन्ता केरी, ते ज्यो तार केरता पाप ठेराय। केरीन तुवाह जोलो बुणे तोलो ताह मोकला मोना केरीन आप, तारा ज्या कामाह देखीन तारा बोगवान यहोवान उगे रेन तुवाह बोरकेत जुड़ी, तु जा कामा माय आथ लागाड़हे, ता पोर तुवाह बोरकेत आपी। तारा देसाम गेरीब ते जेलेम जुड़ती, केरीन मी तुवाह ज्यो उकुम आपथु, काय तु तारा देसाम तारा गेरबड़ा, गेरीब बायह्याख तारो आथ मुकलो केरीन जोरूड़ दान आपज्ये।
पावरा हेऱ्यो वेवहार
(निर्गमन 21:1-11)
केदी एगदो इब्री बाहख नाहते बोणीख पावोर केरीन वेचाता लेदा एती, ते तो सोव वोरह्या वोर तारी चाकरी केरी। तु सातवे साल ताह आजाद केर दिज्ये, एने तार फाय रेन जाणे दिज्ये। एने जेवी तु ताह मोकलो केरीन तार फाय रेन जाणे दिहे, तेवी ताह ठाल्ले आथेच मा जाणे दिहे; पुण तारा मेंड्रा बोकड्या, खोलाम एने अंगुरान कुंडाम रेन जुलूम होवटोस आपज्ये; तारो बोगवान यहोवा तुवाह जोहलो बोरकेत आपेल हे तिहेच केरीन ताह आपज्ये। एने ज्यी वातीह एर मिलज्ये काय तु बी मिस्र देसाम पावोर इतो, एने तारो बोगवान यहोवा तुवाह सोड़वी लिदो, ता माय मी आज तुवाह, ज्यो उकुम होमलाड़थु।
केदी तो तुवाह एने तारा गेराणा पोर मोंग केरतेय, एने तार हिऱ्यो खुसी से रेतेय, केरीन तो तुवाह केणे बाज जाय, “मी तार फाय रेन नाय जाव।” तेवी आर लेन तान कान बायणा पोर मेलीन टोच दिज्ये, तेवी तो जेलेम तारो पावोर बोणीन रेय, एने तार पावेरनीह बी इहीच केरीन किरज्ये। जेवी तु तार फाय रेन ताह आजाद केरीन जाणे दिहे, तेवी ताह सोड़ दिज्ये तुवाह काठो नाय लागणे जुवे, काहाकाय तो सोव वोरह्या दुय मोंजऱ्यान बाराबोर तारी सेवा किरेल हे, एने तारो बोगवान यहोवा तारा आखा कामा माय तुवाह बोरकेत आपी।
पेल पायदा इयेल जेनवारान अर्पण
तारा डोरे एने मेंड्रा बोकड्यान जोला पेल पायदा इयेल नर एती, ता सोबाह तारा बोगवान यहोवान केरता चोखाला मिलज्ये; तारी गाय ने पेल्ला वासड़ा रेन काल्लो कामाम मा लिहे, एने तारा मेंड्रा बोकड्यान पेल्ला पिलान रोचका मा काटहे। ता जागा पोर जो तारो बोगवान निवाड़ लेय, तु यहोवान सोमोर तारा आखा परिवार हेऱ्यो एकेक वोरीह तान माह खाज्ये। पुण केदी ता माय एगदी बातीन खोट एय, मतलब लेंगड़ो नाहते आंदलो एय, नाहते काल्ली बी बातीन उंजु खाराबीन खोट एय, ते ताह तारा बोगवान यहोवान केरता बोली मा चेड़ावहे। ताह तु तारा हेयरा मायच खाज्ये; चोखाला एने एठाला दुयू बातीन माणुह जीहे निलगाय एने मेंदड़ान माह खातेह, तिहेच ताह बी खाय सिकहो। पुण तान लुय मा खाहो; ताह पाण्यान गेत बुय पोर वोयाड़ दिज्यो।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.