Nahali Bible
व्यवस्था 14
दुख माणावणेन विदी
तुमू तुमरा बोगवान यहोवान सोरा हेते! केरीन मुरेल माणहान केरता दुख देखाड़नेन केरता, तुमरा सेरीर पोर जेखेम मा किरहो, एने मुंडान लेट्या मा काटहो। तुमू तुमरा बोगवान यहोवान केरता एक चोखालो सोमाज हे, एने बोगवान तुमूह आखी देरती पोर वाला आखा देसान माणहा माय रेन तान सोतान मालदेन बोणनेन केरता निवाड़ लियेल हे।
चोखो एने एठो जेनवार
(लेव्यवस्था 11:1-47)
तुमू काल्ली खाराब वोस्तु मा खाहो। जा जेनवारे तुमू खाय सेकतेह, ता ज्या हेते, गाय बुयेल, मेंड्रो एने बोकड्यो, मेंदड़ो, निलगाय, मुरग, जेंगली बोकड़ी, हांबोर, कुरंग एने जेंगली मेंड्रो। न्या जेनवाराम रेन जोला जेनवारे चिरा एने फाटेल खुऱ्या वाला एने वेगेलतेह तान माह तुमू खाय सेकतेह। पुण वेगेलनार एने चिरायेल खुऱ्या वाला न्या जेनवेराह, मतलब उटड़ो, हुहल्यो, खोकेवड़ाह मा खाहो, काहाकाय ता वेगेलतेह, पुण तान खुऱ्या चिरा वाला नाय मिले, केरीन ता तुमरी केरता एठा हेते। एने हुवऱ्यो, जो चिरा वाला खुऱ्यान रिथे, पुण विगलेत नाह, केरीन तो तुमरी केरता एठो हे। तुमू नाह ते तान माह खाहो, एने तान देड़ाह बी सापेलहो मा।
एने जोला पाण्यावाला जीव हेते, ताम रेन तुमू न्याह खाय सेकतेह, मतलब जान खोपण्या एने फाके हेते। पुण जोला बिगेर फाखान एने खोपण्यान रेतेह, ताह तुमू मा खाहो; काहाकाय ता तुमरी केरता एठा हेते।
आखा चोखाला चिड़ान माह ते तुमू खाय सेकतेह। पुण न्यान माह मा खाहो, मतलब गुवड़ो, कुरर, गुगदो; इलावटो, कागला एने बाती बातीन गुवड़ा, एने बाती बातीन आखा कागला; शहतुर्मुर्ग, तहमास, कारा, बाती बातीन गुवड़ा, डुडा, बुज्जा एने गुगदा, गिद्द, कारो, बोगल्या, आखी जातीन बोगल्या, टिटेवड़ा, वोटवागला न्या माय रेन काल्ला बी चिड़ाह मा खाहो।
एने जोला लोलनारे जेन्तु हेते ता सोब तुमरी केरता एठा हेते, ता नाय खावाय जाती। पुण तुमू फाखावाला आखा चोखाला चिड़ान माह खाय सेकतेह।
जो आप आप मोर गीयो एय, ताह तुमू मा खाहो; एने तुमरा हेयराम रेणार एगदा परदेसीह खाणेन केरता आप सेकतेह, नाहते एगदा पारायाह वेच सेकतेह; पुण तु ते तुमरा बोगवान यहोवान केरता चोखालो सोमाज हे, बोकड्यान पिलाह तान आईख ने दुदाम मा रांदहो।
दोहवो ईसान नियम
बियारान आखी कामायी माय रेन देर वोरह्यान खेतावाली पाकीन दोहवो ईसो आंगे काढ़ीन मिलजे। एने जा जागाह तारो बोगवान यहोवा, तान नावान रेणेन जागो ठेरावणेन केरता निवाड़ लेय, ता माय तारो एन, नोवालो अंगुरान रूह एने ताजो जेतुन तेलान दोहवो ईसो, एने तुमरा डोरा, मेंड्रा, बोकड्यान पेल्ला पिलाह तुमरा बोगवानान ओंगाण खाया किरज्यो; ज्या माय तुमू तान बिय जेलेम मान्ने हिकहो। पुण तो जागो जाह तारो बोगवान यहोवा तान नाव बाणावीन मेलनेन केरता निवाड़ लेय, तो जुलूम सिटो रेय, ज्यी कारेण ता जाणेन यात्रा ओली सेटो एय काय तु तारा बोगवान यहोवान बोरकेत से जुड़ेल वोस्तु ता नाय ले जाय सिकहे, तेवी तु ताह वेच दिज्ये, एने पोयशाह बांदिन आथाम लेन ता जागा पोर जाज्ये, जो तारो बोगवान यहोवा निवाड़ लेय। एने ता गाय बुयेल, मेंड्रा बोकड्या, अंगुरान रूह, नाहते दारो नाहते काल्ली बी बातीन वोस्तु काहा नाय एय, जो तुवाह पुटेह, ताह ताच पोयशा से वेचातो लेन तान आखा गेराणा हेऱ्या मिलीन तान बोगवान यहोवान सामने खायेन आनंद किरज्यो।
एने तुमरा हेयरा माय रेणारा लेवीह मा सुड़हो, काहाकाय तार हेऱ्या तान काल्लो ईसो एने वाटो नाय रेय। तु एकेक तीन वोरह्यान आखरी माय ता वोरह्यान पाकीन आखो दोहवो ईसो काढ़ीन तारा हेयराम टुलो केरीन मिलज्ये; तेवी लेवी जान तार हेऱ्यो काल्लो सोतान बाग एने ईसो नाय एय, तो एने परदेसी, विखावाला एने रांडायेल तारा हेयराम एती, ता बी आवीन पेट बोरीन खाती, तेवी तारो बोगवान यहोवा तारा सोब कामा माय तुवाह बोरकेत आपी।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.