व्यवस्था 13

1केदी तारी विचीम एगदो जाणकार नाहते होपनो देखणार आवीन निसाणी नाहते चोमेत्कार देखाड़ी, 2एने ज्यी निसाणी एने चोमेत्काराह पाको ठेरावीन तुवाह केय, “आवो, आपु दिहरा देवतान अनुयायी बोणीन, जाह तुमू उंजु वोर नाह जाणते, तान पुजा किरहो। 3तेवी तुमू जाणकार नाहते होपनो देखणारान वात मा होमेलहो, काहाकाय तुमरो बोगवान यहोवा तुमरी पारेख केरी, ज्या से ज्य जाण लेय काय ज्या मार पोर तान आखो मोन एने जिव लागाड़ीन मोंग केरतेह काय नाह? 4तु निस्तो तारा बोगवान यहोवान पासाण चालज्ये, तान बिय मानज्ये, एने तान उकुमा पोर चालज्ये एने तान वचन हुमेलज्ये, तु तान बोक्ती किरज्ये एने ता हिऱ्यो जोड़ायीन रिज्ये। 5पुण ता जाणकार एने होपनो देखणाराह मार दिज्ये; काहाकाय तो तुवाह ता बोगवान यहोवा हिऱ्यो रेन आंगे केरनार वातु कियेल इतो, जो तुवाह मिस्र देसाम रेन बाहेर काड्यो एने गुलामीन गेराम रेन सोड़वेल हे, तो जाणकार नाहते तो होपनो देखणार तुवाह ती वाटे रेन बोटकावणार बोणनो, जी वाटे चालनेन उकुम तुमरो बोगवान यहोवा तुवाह आपेल हे, तुवाह तारी विचीम रेन खाराब कामे सेटा केरने जोरूड़ी हे।”

6तारो खाज बाहख, नाहते तारा सोरा सोऱ्यु, नाहते मोंगाल्ली बायकु, नाहते तारा जोड़ीदार तुवाह बोटकाड़नेन केरता इह केती, “आवो आपु दिहरा देवतान बोक्ती नाहते पुजा केरता,” जाह तु नाह जाणेत एने नाह तारा डायडाया जाणताला। 7निहते तुमरी आस पास रेणार माणहान देवता एती, निहते देरतीन एक खुणे रेन ते दिहरी खुणे सेटा रेणार देसान एती। 8ते तु तान वात मा मानहे एने तान वात मा होमेलहे, ता पोर गीण मा किरहे, एने ताह जिवतालो मा सोड़हे, तु तान पाप लिकाड़हे मा, 9पुण जोरूड़च ताह खेतेम केर दिज्ये, ताह मारनेन केरता आखान पेल तारोच आथ उठी एने तार पासाण दिहरा माणहान आथ। 10तु देगड़ा केरीन देय दिन ताह मार दिज्ये, काहाकाय तो तुवाह ता यहोवा बोगवाना हिऱ्यो रेन आंगे केरनेन कोसीत किरेल इतो, जो तुवाह मिस्र देसाम, गुलामीन गेराम रेन बाहेर काढ़ीन लायेल हे, बोटकाड़नेन काम किरेल हे। 11आखा इस्राएली माणहे ज्यी गेटनान बाराम होमेलती, एने बिती, ता ओहलो खाराब कामे तारी विचीम पोशा नाय केरती।

12केदी तु एगदा हेयराम, जाह तारो बोगवान यहोवा तुवाह ता रेणेन आपेह, ज्यी वात होमली, 13कोलाक बोटकाड़नार एदमी तारी विचीम रेन निकलीन तान हेयराम रेणाराह ज्यो किन बेहकाव देनाह, “आवो आपु दिहरा देवतान बोक्ती केरता,” जाह तु नाह जाणेत, 14ते तु पुसतास किरज्ये, एने होदज्ये एने हास केरीन पोतो किरज्ये, केदी ज्यी वात खेरी एने पाकी रेय काय तारी विचीम ओहलो खाराब कामे केराय जातेह। 15ते ता हेयराम रेणाराह जोरूड़ मार दिज्ये, ता सोबाह जा ता माय हेते, एने तान जेनवाराह बी ता हिऱ्योच जा ता माय रेतेह, तालवारी केरीन मार दिज्ये। 16एने ता माय वाली आखी लुट चोवकी माय टुलो किरजे, एने तारा बोगवान यहोवान केरता होमबोलीन गेत ता हेयराह एने तान आखी लुटीह आक्‍ठा माय हेलगाड़ दिज्ये। तो हामेशान केरता उजाड़ एय जाय; पोशो ताह वोहाड़ाय नाय जाय। 17एने काल्ली खेतेम किरेल वोस्तु तारा आथाम नाय सापेड़ने जुवे, तान वोजेसे बोगवानान बुड़केल राग ठावको केरी, तार पोर गीण केरी, एने किव केरीन तुवाह ताकेतवालो बाणावी; जिह केरीन तो तारा डायडाया हिऱ्यो सुगोण खायेल इतो। 18पुण ज्य तुलबुखे एय, जुलबुखे तु तारा बोगवान यहोवान वचन होमेलहे, एने ता आखा उकुमान पालेन किरहे, जान गेत काम केरनेन आदेस मी आज तुवाह आपथु; एने जो काम तारा बोगवान यहोवान नेजरीम हाजो हे, तोच तु किरहे।