Nahali Bible
व्यवस्था 12
एकुच बोक्तीन जागो
ज्यु विद्यु एने आदेस हेत्यु, न्याह तुमू पालेन केरनेन केरता चेकचेल्या रिज्यो एने तान गेत तुमू ता देसाम काम किरहो, जो तुमरा डायडायान बोगवान यहोवा तुमूह आपेल हे, काय जाहुक वोर तुमू देरती पोर जिवताला रिहो, ताहुक वोर ता पोर आदिकार किरो। जा देसाह तुमू ताबाम लिहो तान माणहे उच उचा बोयड़ा एने चुटा पोर जा तान देवतान बोक्ती केरतेह, ता सोबाह तुमू पुरा खेतेम केर दिज्यो; तान वेदीह तोड़ दिज्यो तान पुजान खांबाह पाड़ दिज्यो, अशेरा देवीन खांबाह आक्ठाम हेलगाड़ दिज्यो, तुमू तान देवतान मुरत्युह काटीन पाड़ दिज्यो, एने ता जागा पोर रेन तान नाव खेतेम केर दिज्यो।
जिह केरीन ता आखी जागे केरतेह, तिहेच केरीन तुमू तुमरो बोगवान यहोवान केरता मा किरहो। पुण जो जागो तुमरो बोगवान यहोवा तुमरा आखा गेराणाम रेन निवाड़ लेय, काय तान नाव बाणाव मेली, तान तिच रेणेन जागे जाया किरज्यो; एने ताच तुमू तुमरो होमबोली, मेल मिलाप बोली एने दोहवो ईसो, एने विसेल बेट, एने मानतान वोस्तु, एने सोतान मोरजीन बेट, एने गाय बोयलान एने मेंड्रा बोकड्यान पेल्लो पिलाह, ली जाया किरज्यो; तुमू ताच तुमरा बोगवान यहोवान सोमोर खाणो खाज्यो, एने तुमू जिव जिवान गेरवाला हेऱ्या तुमरा आखा कामान केरता खुसी माणावज्यो, जा पोर तुमरो बोगवान यहोवा बोरकेत आपेल हे।
जिह केरीन आज आपु काम केरतेह, तोहलो काम तुमू मा किरहो, आखा माणुह तोच काम केरने बाज रेनोह, जो तान नेजरीम हाजो हे। जो विहेवणेन जागो तुमरो बोगवान यहोवा तुमरा ईसाम आपेह, ता तुमू एवी वोर नाह पुचेल सोता। पुण जेवी यरदन नेदीह पार केर लिहो, एने ता देसाम वोह जाहो, जो तुमरो बोगवान यहोवा तुमूह आपेह, एने तो तुमरा चारो उगेन दुसमोना से तुमूह आराम आपी। एने तुमू बिगेर बिन रेय सिकहो, तेवी तुमू जो जागो तुमरो बोगवान यहोवा तान रेणेन जागो बाणावणेन केरता निवाड़ लेय, ताच माय तुमू तुमरो होमबोली, एने मेल मिलाप बोली, एने दोहवो ईसो एने विसेल बेट; एने मानतान सोब हाज हाजी वोस्तु जो तुमू यहोवान केरता चेड़ावहो, एने तुमरी आखी मानतान बोली जान मानता तुमू बोगवाना फाय मांगतेह। तुमू तुमरा बोगवान यहोवान सोमोर तुमरा सोरा सोऱ्युह, पावोर पावेरन्युह, एने हेयरा माय रेणार लेवी गेराणान माणहा हेऱ्या आनंद माणावज्यो, काहाकाय तुमरी हेऱ्यो लेवीन काल्लो बाग एने ईसो नाय रेय। तु चेकचेल्यो रिज्ये, ओहलो नाय एय काय जो जागो तु देखी, ताच होमबोली चेड़ाव दिहे। पुण जो जागो तारा एगदा गेराणाम बोगवान निवाड़ लेय, ताच तुमरो होमबोली चेड़ाया किरज्यो, एने जा जा कामान उकुम मी तुवाह होमलाड़थु, ता कामाह ताच किरज्ये।
पुण तु तारा एगदा हेयराम जेनवार मारीन तारी मोरजी एने तारा बोगवान यहोवान उगे रेन आपेल बोरकेतीन गेत, माह खाय सिकेह, चोखालो एने एठो दुयाह माणुह खाय सिकेह, जीहे काय निलगाय एने मेंदड़ान माह। पुण तान लुय मा खाहे; ताह पाण्यान गेत बुय पोर वोयाड़ दिज्ये। तु तारा हेयरा माय एन, अंगुरान रूह, ताजो जेतुन तेलान दोहवो ईसाह एने डोरा बोकड्या, मेंड्रान पेल्ला पिलाह, एने मानतान काल्ली बी वोस्तु, तारी मोरजीन बेट, एने विसेल बेट जाह तु चेड़ावे, मा खाहे। पुण तु तारा सोरा सोऱ्यु, पावोर पावेरन्यु एने तारा हेयराम रेणारे लेवी ताह बोगवान यहोवान सोमोर तिच जागे खाज्ये, जाह तारो बोगवान यहोवा निवाड़ी, तु तारा आखा काम पोर जाह तु आथ लागाड़ेल हे, बोगवानान सोमोर आनंद किरज्ये। तु चेकचिल्यो रिज्ये! जोला दिह वोर तु तारा देसाम जिवतालो रिहे ताहुक वोर लेवी माणहाह मा सोड़हे।
जेवी तारो बोगवान यहोवा तान वचनान गेत तारा देसाह वोदाड़ी, एने तारो जिव माह खाणेन आसा किरेह, ते तु जोलो जुवे तोलो माह खाय सिकेह। जो जागो तारो बोगवान यहोवा तान नाव उचो केरनेन केरता निवाड़ लेय, तो केदी तार हेऱ्यो रेन जुलूम सेटो रेय, डोरे बोकड्या, मेंड्रा बोगवान तुवाहच आप्यो एय, ताह जिह केरीन मी तुवाह आदेस आपथु, तिह केरीन तु तारा हेयरा माय तुवाह पुटे ताह मारीन खाय सिकेह। जीहे निलगाय एने मेंदड़ान माह खावाय जाथे, तिहेच केरीन ताह बी तु खाय सिकेह, एठा, चोखाला दुयू बातीन माणुह ताह खाय सिकेह। पुण तान लुय मा खाहे; काहाकाय लुयी मायच जिव हे, केरीन तु माहा हिऱ्यो जिवाह केदीच मा खाहे। ताह मा खाहे, पुण ताह बुय पोर पाण्यान गेत वोयाड़ दिज्ये। तु ताह मा खाहे, काहाकाय तु बोगवानान नेजरीम हाजो काम केर सिके, एने तारो एने तार पासाण तारा सोरान बी बोलो एय। पुण जेवी एगदी वोस्तु तु चोखी केरी, एने मानतान बोलीह लेन ता जागा पोर जाज्ये, जाह बोगवान निवाड़ी। एने ता तारो होमबोलीन माह एने लुय दुयू तारा बोगवान यहोवान वेदी पोर चेड़ावज्ये, एने मेल मिलाप बोलीन लुय तान वेदी पोर रोचवी दिज्ये, पुण माह तु खाय सिकेह। ज्यी वातीह जान उकुम मी तुवाह होमलाड़थु मोन लागाड़ीन हुमेल, जेवी तु तो काम किरहे जो तारा बोगवान यहोवान नेजरीम ठिक एने हाजो हे, तेवी तारो एने तार पासाण तारा सोरान बी जेलेम बोलो इते रेय।
मुरती पुजान विरूद चेतावणी
जेवी तारो बोगवान यहोवा ता देसान जाह तु ताबाम लेणे जाणे बाजरिनोह, तार ओंगाण रेन खेतेम केरी, एने तु तान होकदार बोणीन तान देसाम वोह जाय। तेवी तु चेकचिल्यो रिज्ये, ओहलो नाय एय काय तान खेतेम एणेन पासाण तु बी तान गेत जालीम फोस जाहे, मतलब ज्य किन तान देवतान बाराम फुसणे बाज जाहे, ता देसान माणहे तान देवतान बोक्ती किह केरीन केरताला? मी बी तिहेच केरीन केरूह। तु तारा बोगवान यहोवान केरता ओहलो काम मा किरहे; काहाकाय जोला बातीन कामा से बोगवान नफरत किरेह एने बेदबाव किरेह, ता सोब कामाह ता तान देवतान केरता किरेल हेते, न्या वोर काय ता तान देवतान केरता तान सोरा सोऱ्युह बी आक्ठाम टाकीन हेलगाड़ देतेह।
जोल्यु वातुन उकुम मी तुमूह आपथु, ताह चोकसी केरीन पालेन किरज्ये; तु ता माय काह वोदाड़हे मा एने ता माय रेन काह गेटाड़हे मा।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.