Nahali Bible
व्यवस्था 11
बोगवानान माहानता
केरीन तु तारा बोगवान यहोवा पोर जुलूम मोंग किरज्ये, एने जो काय तुवाह हुपेल हे तान, मतलब तान विद्यु, नियम एने उकुम ने कायेम पालेन किरज्ये। एने तुमू आज ज्य सोच सोमेज लिवो, काहाकाय मी ते तुमरा सोरा पोऱ्याह नाह कित, जा नाहते काय देख्या एने नाह जाणतेह काय तुमरो बोगवान यहोवा काय काय हिकवोण आपेल इतो, एने निस्ता तुमू तुमरा बोगवान यहोवान माहानता, ताकेतवाला, सुटकारान केरता पोसरावेल आथ, निसाणी एने तान मोटला कामाह दिखेल हेते, ज्य सोब बोगवान मिस्र देस माय, मिस्र देसान फिरोन राजा एने तान देसा हिऱ्यो किरेल इतो; ज्या मोटला कामे तो मिस्र देसान सेना, गोड़ा, तान आथ्यारे एने रथा हिऱ्यो किरेल इतो, जेवी ता तुमरी पासाण पोड़ना, तेवी तो ताह रातला देरीयाम बुड़ाव दियेल इतो, बोगवान ताह इह केरीन खेतेम केर दिनो काय आज वोर तान निसाणी नाह देखात। पुण तुमूह ज्या जागा पोर पोचणेन पेल, बोगवान यहोवा तुमरी हिऱ्यो किह केरीन वेवारो किरेल इतो। तो रूबेन ने वोस एलीआबान सुरो दातान एने अबीराम हिऱ्यो काय किरेल इतो, तुमूह मालुम हे काय इस्राएली सोमाजान विची माय देरती तीन मुय उगाड़ी एने ती दातान एने अबीरामाह तान गेरल्याह एने तान तोम्बुह तान आखा माणहाह गिल गियी। तुमू सोता तुमरा डोला केरीन यहोवान उगे रेन केरायेल ता सोब मोटला कामाह दिखेल हेते।
वायदो एने चेतावणी
तुमू ता आखा उकुमाह पालज्यो, जान आदेस मी आज तुमूह आपणे बाजरिनोह, तुमू ताकेतवाला बुणो, एने ता देसाम पार जायीन ताह ताबाम केर सिकहो, जाहरी तुमू होक माय लेणे जाणे बाजरेनाह। बोगवानान उकुम पालेन केरने से ता देसाम तुमरी उमेर लाम्बी रेय, मालीक सुगोण खायेल इतो, काय तो दुद एने मोवालान नेदी वालो देस तुमरा डायडायाह एने तान वोसीह आपी। जा देसाह ताबाम केरनेन केरता तुमू ता जाणे बाजरेनाह, तो मिस्र देसान गेत नाय मिले, जा रेन तुमू बाहेर निकलेल हेते, मिस्र देस जाड़ान बोगीचान गेत हे, जा तुमू बियारो पेरतेह, एने सोता तुमरा पाया केरीन रहट चालाड़ीन पाणी वालतेह। पुण जा देसाह तुमू ताबाम केरनेन केरता जाणे बाजरेनाह, तो देस बोयड़ान गाटान देस हे, तो जुगावाला पाण्या केरीन पेराय जाथे। तुमरो बोगवान यहोवा ता देसाह होमालेह तुमरा बोगवानान डोला वोरह्यान सुरवाती रेन ते वोरह्यान आखरी वोर ता पोर लागीन रेतेह।
केदी तुमू मारो उकुमाह पालेन किरहो, जान आदेस आज मी तुमूह आपथु, एने तुमरो बोगवान यहोवा पोर मोंग किरहो, तुमरो आखो मोन एने आखो जीव लागाड़ीन तान सेवा किरहो। तेवी मी तुमरा देसाम जेठवड़ीन सुरवात माय एने आखरी दुयू टेम माय पाण्याह टेम पोर पाडुह, ता माय तुमू एन, अंगुरान रूह एने तेल टुलो केर सिकहो। तो तुमरा जेनवेरान केरता चोवगान माय चारो उगाड़ी, तुमू एन खायीन आफरी जाहो। पुण तुमू चेकचेल्या रिज्यो! नाहते ओहलो नाय एणे जुवे काय तुमरो मोन दुको खाय एने तुमू बोटकीन दिहरा देवतान बोक्ती केरने लाग जाहो, एने वोलीन ताह वोंदणे लाग जाहो। ओहलो नाय एय काय बोगवानान राग तुमरी पोर बोड़की, एने तो जुगाम रेन पाणी बोंद केर देय, एने बुय तिन पाक नाय आपी, एने तुमू ता हाजाला देसा माय जो बोगवान तुमूह आपेह, जेल्दीच खेतेम एय जाहो।
केरीन तुमू मारा वचनाह तुमरा मोनाम एने जीवा माय मेल रिज्यो, एने निसाणीन केरता तुमरा आथा पोर बांदज्यो, तो तुमरा दुयू डोलान विचीम टिलान काम केरी। एने तुमू गेराम बोहता, वाटे चालता, लुटते उठते ज्यान चेरचा केरीन तुमरा सोराह हिकाड़ज्यो। तुमू ताह तुमरा गेरान चोवकट पोर हेयरान फाटेक पोर लिखज्ये। तेवी तुमरो एने तुमरा सोरान उमेर ता देसाम लांबी रेय, जान केरता बोगवान तुमरा डायडाया हिऱ्यो सुगोण खायेल इतो, जाहुक वोर देरतीन उपेर जुग उब रियेल हे, ताहुक वोर ता देसा माय बोणीन रेती।
केदी तुमू ज्या आखा उकुमाह जोरूड़ पालेन किरहो, जान आदेस आज मी तुमूह आपथु, ताह वेवारा माय लावहो, तुमरा बोगवान यहोवाह मोंग किरहो, तान वाटे पोर चालहो, एने ताह हेऱ्या जोड़ाय रिहो। ते बोगवान तुमरी सोमोर रेन न्यु जातीह काढ़ देय; एने तुमू तुमूह रेन वोदार मोठा एने ताकेतवाला देसाह काढ़ दिहो। जा जागा पोर तुमरा पाय पोड़ती, तो तुमरो एय जाय; तुमरी हिल जेंगला माय रेन लबानोन वोर, एने फरात नेदीन पश्चिम देरीया वोर रेय। काल्लो बी माणुह तुमरी सोमोर उबरेय नाय सेकी, काहाकाय जा देसाम तुमरा पाय पोड़ती, ताह तुमरो बोगवान यहोवा तुमरी कारेण ता माय बिय एने थेर थेर केर देय।
हुमेल, मी आज तुमरी सोमोर बोरकेत एने हाराप दुयू मेलथु। केदी तुमू तुमरा बोगवान यहोवान उकुम पालेन किरहो, जान आदेस आज मी तुमूह आपथु, ते बोगवाना उगे रेन तुमूह बोरकेत जुड़ी। केदी तुमू तुमरा बोगवान यहोवान उकुम नाय पालेन किरहो, एने ती वाटी पोर रेन बोटकी जाहो, जा पोर चालनेन आदेस आज मी तुमूह आपथु, एने देवतान पासाण जाहो जाह तुमू नाह जाणते, ते तुमू पोर हाराप पोड़ी।
जेवी तुमरो बोगवान यहोवा तुमूह ता देसाम पोचाड़ देय, जाह ताबाम केरनेन केरता तुमू जाणे बाजरेनाह, तेवी गिरीजीम बोयड़ा पोर रेन बोरकेत एने एबाल बोयड़ा पोर रेन हारापान वचन हुमेलज्यो। ज्यो बुयड़ो जिह केरीन तुमू जाणतेह, यरदन नेदीन पार पश्चिम वाटी पोर, कनानी माणहान देसाम, जो अराबा माय रिथे, गिलगालान सोमोर, “मोरे वाहण्यान जाड़ान आहने हे।” तुमूह यरदन नेदीह पार केरने पोड़ी काय तुमू ता देसाम जायीन ता पोर ताबो केर सिको, जो तुमरो बोगवान यहोवा तुमूह आपेह, जेवी तुमू ताह ताबाम केर लिहो एने ता माय वोह जाहो। तेवी यहोवा बोगवानान आखी विद्यु एने आदेस पालेन किरज्ये, एने तान गेत काम किरज्यो, जो आज मी तुमरी सोमोर होमलावथु।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.