Nahali Bible
व्यवस्था 10
देगड़ान नोवाल्यु पाट्यु
(निर्गमन 34:1-10)
ती टेम माय मालीक माहु कियेल इतो, “तु पेलुन गेत देगड़ान दुय पाट्यु बाणाव एने बोयड़ा पोर चेड़ीन मार फाय आव, तु लाकड़ान एक पेटी बाणाव ले। मी ता पोर ताच वचन लेखुह जा पेल्ल्यु पाट्यु पोर लिखेल इतो, एने जाह तु तुकड़ा तुकड़ा केर दियेल इतो, ताह तु ती पेटी माय मिलज्ये।”
तेवी मी बाबल्यान लाकड़ान एक पेटी बाणायो, एने पेल्ल्यु पाट्युन गेत देगड़ान दुय पाट्यु बाणायो, तेवी मी त्युह आथाम देरीन बोयड़ा पोर चिढ़ गीयो। एने जा वचन बोगवान पोंचान दिह बोयड़ा पोर आक्ठान विचीम रेन तुमूह कियेल इतो, ताच वचन तो पेलुन गेत पाट्यु पोर लेखीन माहु होप दिनो। तेवी मी बोयड़ान निड़ो उतरी गीयो, एने पाट्युह मी बाणायेल ती पेटी माय मिल दिनो, एने बोगवानान उकुमान गेत त्यु ताच मेल राखेल हे।
तेवी इस्राएली माणहे बने याकन वोसीन कुवान उगे रेन फिरीन मोसेरा वोर आवा, ताहरी हारून ने मोत एय गियी, एने ताह ताच बुज देना, एने तान सुरो एलीआजर तान जागा पोर चाकऱ्यान काम केरने बाज गीया। ता तारेन फिरीन गुदगोदा माय, एने गुदगोदा रेन योतबातान माय गीया, ज्या देसा माय पाण्यान नेद्यु हेत्यु। ती टेम बोगवान लेवी गेराणाह ज्यान केरता आंगे किऱ्यो काय ता बोगवानान वाचान पेटी विशा केरी, एने बोगवानान सोमोर उबरीन तान सेवा केऱ्या केरी, एने तान नावा माय बोरकेत आप्या केरी, जिह केरीन आजीन दिह वोर इती आयेल हे। केरीन लेवीह तान बायाख हिऱ्यो काल्ली सोतान खेतान ईसो नाह जुड़नो; पुण बोगवानुच तान सोतान बाग हे, जिह केरीन बोगवान ताह कियेल इतो।
मी ते पेलुन गेत ता बोयड़ा पोर चालीह दिह एने चालीह रात थोबीन रिनो, एने ती वार बी बोगवान मारी विन्ता हुमल्यो, एने तुमूह खेतेम केरनेन मोरजी सोड़ दिनो। उवतो बोगवान माहु केयो, “उठ एने तु ता माणहान अगवाय केर, काय जा देसाह आपणेन मी तान डायडाया हिऱ्यो सुगोण खायीन कियेल इतो, ता माय ता जायीन ताह तुमरा होका माय केर लेय।”
बोगवानान मांग
एवी, एय इस्राएल, तारो बोगवान यहोवा तुवाह ज्यान सिवाय उंजु काय हुदेह, काय तु तारा बोगवान यहोवान बिय माने, एने तान आख्यु वाट्यु पोर चाले, ता पोर मोंग मिले, एने तारो आखो मोन एने तारो आखो जीव लागाड़ीन तान सेवा केरी, एने बोगवानान जा उकुम एने विदी मी आज तुवाह होमलाड़थु तान पालेन किरहे, ता माय तारो बोलो एय? हुमेल, हिरोग एने आखाम रेन उचो हिरोग बी एने देरती एने ता माय जो काय हे, तो सोब तुमरा बोगवान यहोवाच ने हे। तीबी बोगवान तुमरा डायडायाह गीण एने मोंग किऱ्यो, एने तान पासाण तान वोसीह, मतलब तुमूह सोब देसान माणहान विचीम रेन निवाड़ लिदो, जिह केरीन आज बी देखाह। केरीन जिव जिवान मोनान खेतना किरो, एने ओंगाण एकएठ्या मा रिवो। काहाकाय तुमरो बोगवान यहोवा तोच बोगवानान बोगवान एने मालक्यान मालीक हे, तो मुठलो बाहदुर एने बिणे लायेक बोगवान हे, जो कुणीन बेदबाव नाह किरेत एने कुणी फाय पोयशा नाह मांगेत। तो विखावालान एने रांडायेल बायकुन नियाव पुरो किरेह, एने पाराया देसाम रेणारा पोर ओहलो मोंग किरेह काय ताह रूटो एने फाड़का आपेह। केरीन तुमू बी पाराया देसावाला माणहाह पोर मोंग किरो; काहाकाय तुमू बी मिस्र देसा माय पाराया देसावाला एता। तु तारा बोगवानाह बिज्ये एने ताच ने सेवा किरज्ये एने ताच हिऱ्यो जोड़ायीन रिज्ये, एने ताच ने नावान सुगोण खाज्ये। तोच तुमरी बोड़ायीन लायकीन हे, एने तोच तुमरो बोगवान हे जो तार केरता मोटला खास बियावे ओहला कामे किरेल हे, जाह तु तारा डोला केरीन दिखेल हे। जेवी तारा डायडाया मिस्र देसाम गीया, तेवी निस्ता सेत्तेर माणहे एता; पुण एवी तारो बोगवान यहोवा तुमरी गेणती जुगावाला तारान गेत जुलूम वोदाड़ दियेल हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.