Nahali Bible
व्यवस्था 9
माणहान उकुम नाह मान्नु
एय इस्राएल! हुमेल, आज तु तुवाह रेन जुलूम वोदार मुठो एने ताकेतवाला देसाह काड़नेन केरता यरदन नेदीह पार किरहे, एने ओहला मोटला हेयराह जान बितड़ो जुगा हेऱ्यो वातु किरेह, तार ताबा माय लेय ले। ता माय अनाक वोसीन मोट मोटला एने उच उचा सेरीरान माणहाह आरवी दिहे, जाह तु जाणेह, एने तान बाराम तु ज्य हुमलेल हे, काय न्या अनाक वोसीन सोमोर कुण थोब सिकेह। केरीन आज तु ज्य जाण ले काय तारो बोगवान यहोवा तार ओंगाण ओंगाण हेलगाड़नार आक्ठान वेहाम नेदी पार केरीन जाण्यो हे, एने तो ताह खेतेम केरी, एने ताह तारा ताबा माय केर देय, बोगवानान वचन ने गेत तु ताह काढ़ीन जेल्दीच खेतेम केर दिहे।
जेवी तारो बोगवान यहोवा, ताह तार सोमोर रेन काढ़ देय, तेवी तु तारा मोनाम ज्य मा किहे, “बोगवान तारा हाजान कारेण तुवाह ज्या देसा पोर होकदार बोणनेन केरता लेन आयेल हे, पुण ता देसान खाराबीन कारेण बोगवान ताह तार सोमोर रेन बाहेर काड़ेह। तु जो तान देसान आदिकारी बोणनेन केरता जाणे बाजरिनोह, ज्यान कारेण तारो हाजो नाहते तारा मोनान हुतराय नाय मिले; तारो बोगवान यहोवा जो ता देसाह तार सोमोर रेन काढ़ने बाज रिनोह, तान कारेण तान खाराबी हे, एने ज्य बी काय जो वचन तो तारा डायडाया अब्राहम, इसाहक एने याकुब हिऱ्यो सुगोण खायीन पुरो केरने हुदेह। केरीन तु ज्य जाण ले काय जो हाजालो देस तुवाह तार होक माय तारो बोगवान यहोवा हाजान कारेण नाह आपेत; काहाकाय तु ते एकएट्यी पोरजा हे।”
ज्यी वातीन इर मिलज्ये एने केदी बी मा विहेरहे, काय तु किह किह केरीन जेंगला माय तारा बोगवान यहोवाह रागाड़ेल इतो, जेदिह रेन तु मिस्र देसाम रेन निकलेल हे, जाह वोर तुमू ज्या जागा पोर नाह पोचना ताह वोर तुमू बोगवाना हेऱ्या विरूद किरती आवा। पोशा होरेब बोयड़ा पोर तुमू बोगवानाह रागाड़ेल एता, एने तो रागाईन तुमूह खेतेम केरने होदतालो। जेवी मी ता वाचान देगड़ान पाट्युह जो बोगवान तुमरी हिऱ्यो बांदिल इतो, लेणेन केरता बोयड़ा पोर चेड़ गीयो, तेवी मी चालीह दिह एने चालीह रात्यु वोर बोयड़ा पोर रिनो, मी नाहते ते रूटो खादो एने नाहते पाणी पिदो। एने बोगवान माहु ताच ने आथा केरीन लिखेल देगड़ान दुयू पाट्युह होप दिनो, एने ताच वचन जाह बोगवान बोयड़ा पोर आक्ठान विचीम रेन सोबान दिह तुमूह कियेल इतो, ता सोब त्यु पोर लेखायेल एता। चालीह दिह एने चालीह रात्यु एय गीयु, तेवी बोगवान देगड़ान त्यु दुय वाचान पाट्यु माहु आप दिनो।
एने यहोवा माहु केयो, “उठ न्या रेन जेल्दीच निड़ो जा; काहाकाय तारा माणहे, जाह तु मिस्र देसाम रेन बाहेर काढ़ीन लेन आयेल हे, ता बिगड़ी जायेल हेते, ज्यी वाटी पोर चालनेन उकुम मी ताह आपेल इतो, ताह ता जेल्दीच सोड़ दियेल हेते; एने ता चालुच तान केरता एक मुरती गेड़ीन बाणाव लियेल हेते।”
पुशो यहोवा माहु ज्य बी केयो, “मी ता माणहाह देख लिदो, ता एकएठ्या माणहे हेते; केरीन एवी, माहु तु मा रूके, काय मी ताह खेतेम केर टाकुह, एने देरती पोर रेन तान नाव एने निसाणी वोर खेतेम केर देव, पुण मी ताह रेन वोदार एक ताकेतवालो एने मुठलो देस तार से बाणावुह।”
तेवी मी वोलीन बोयड़ान निड़ो उतरीन आवो, एने बुयड़ो आक्ठा माय देदेकतालो, एने मारा दुयू आथा माय दुय पाट्यु एत्यु। एने मी तुमूह दिख्यो काय तुमू बोगवान यहोवान विरूद पाप केरने बाज रियेल एता, तुमू वासड़ान एक मुरती बाणायेल एता, तुमू ती वाटे रेन जेल्दीच बोटकी जायेल एता, जा पोर चालनेन उकुम मालीक तुमूह आपेल इतो। तेवी मी त्यु दुयू पाट्युह दिऱ्यो, एने मारा दुयू आथा केरीन ताह टाक दिनो, तुमरा डोलान सोमोर मी तान तुकड़ा तुकड़ा केर दिनो। मी पेलुन गेत चालीह रात एने चालीह दिह यहोवान सोमोर पोड़ रिनो, मी नाह ते रूटो खादो नाह ते पाणी पिदो, काहाकाय जो काम मालक्यान नेजरीम खाराब एतो, ताह तुमू किरेल एता एने इह केरीन तुमू मालक्याह किचवाड़ेल एता। मी तान रागान कारेण, एने तान मोटला रागान कारेण कापणे बाज गीयो, काहाकाय तो तुवा से खुस नाह एन तुमू खेतेम किरन्यो इतो, पुण मालीक ती टेम माय मारी वात हुमल्यो। मालीक हारूना पोर उलो रागायेल इतो, काय ताह खेतेम केरनेन केरता तियार एय गीयो, मी ती टेम माय हारूनान केरता विन्ता किऱ्यो। मी तुमरा पापान वोस्तु वासड़ान मुरती, जाह तुमू बाणायेल एता, लेन ताह आक्ठा माय टाक दिनो, तान टुकड़ा टुकड़ा केर दिनो, मी ताह हास केरीन चुरा किर दिनो काय रेजड़ान गेत जिर गीयो, तेवी मी ता चुराह बोयड़ान नेड़ी वोयणार नेदीम टाक दिनो।
ओवतो तबेरा, मस्सा एने किब्रोतहत्तावा माय बी मालक्याह रागाड़ेल एता। जेवी मालीक तुमूह कादेशबर्ने से इही किन मुकलेल इतो, हामलो किरो एने ता देसाह ताबाम केर लिवो, जाह मी तुमूह आपेल हे, तेवी बी तुमू तुमरा बोगवान यहोवान वचनान विरूद दिंगो किरेल एता। तुमू ता पोर बुरहो नाह केऱ्या एने तान वचन नाह होमल्या। जेदिह रेन मी तुमूह जाणथु तेदिह रेन तुमू मालक्या हेऱ्या विरूद केरने बाजरेनाह। एने मी मालक्यान सोमोर चालीह दिह एने चालीह रात्यु वोर पोड़ रिनो, काहाकाय मालीक कियेल इतो, काय तो तुमूह खेतेम केर देय। मी मालक्याह विन्ता किऱ्यो, “एय मालीक तु तारी सोतान पोरजान माणहाह, तारी सोतान मालदेनाह खेतेम मा केरी, ताह तु तारी मोटली ताकेत माय सोड़वेल हे, ताह तु तारा आथा केरीन मिस्र देसाम रेन बाहेर काढ़ीन लायेल हे। तारा पावोर अब्राहम, इसहाक एने याकुबाह इर केर, न्या माणहान एठ एने खाराब कामाह, एने पापा पोर द्यान मा देय। नाहते ओहलो नाय एणे जुवे काय मिस्र देसाम रेणारे, जा रेन तु न्याह काड़ेल हे, ता इह केती, ‘मालीक ताह ता देसाम नाह पोचाड़ सिक्यो, जान बाराम तो ताह कियेल इतो, जोरूड़ मालीक न्या हाजो नाह किरेत, खेरी केय ते, उजाड़ ईलाकाम न्याह मारनेन केरता तो मिस्र देसाम रेन काड़ेल इतो। ज्या माणहे तारी पोरजा एने सोतान बाग हेते, तु तारी मोठली ताकेत एने आथा केरीन न्याह बाहेर काढ़ीन लायेल हे।’”
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.