Munda Bible
ବୁଗିନ୍ ଇନିତୁ 11
ବେଦା ତାରାଜୁକେ ପ୍ରାଭୁ ହିଲାଙ୍ଗ୍ଆଁଏ, ମେନ୍ଦ ଠାଉକା ବାଟ୍କାରାକେ ସୁକୁଃଆ।
ଆପାନ୍କେ ମାରାଙ୍ଗ୍ ମେନ୍ତେ କାଜିନ୍ରେ ଗିହୁଃ ହିଜୁଃଆ, ମେନ୍ଦ ଲିବୁଇୟାନ୍ ହଡ଼ତାଃରେ ସେଣାଁ ତାଇନାଃ।
ସାର୍ତି ହଡ଼କେ ଆୟାଃ ସାର୍ତିଗି ହରା ଉଦୁବାଇୟା। ମେନ୍ଦ ବିଶ୍ୱାସ୍ରେ ହସଡ଼ କାଜିନିଃ ଆୟାଃ ବେଦା କାଜିତେ ଜୀଅନଃଆ।
ରିସ୍ମି ସାମାଏରେ ଖୁର୍ଜିରାଃ ଜେତାନ୍ ଲାଭ୍ ବାନଃଆ, ମେନ୍ଦ ଧାର୍ମାନ୍ଗି ଗନଏଃ ହେତେ ବାନ୍ଚାଅ ରିକାଃଏ।
କା ଚିଟାକାନ୍ ସାଧୁ ହଡ଼ରାଃ ଧାର୍ମାନ୍ ନାଗେନ୍ତେ ଆୟାଃ ହରା ସିଧାଗି ତାଇନାଃ, ମେନ୍ଦ ଏତ୍କାନ୍ନିଃ ଆୟାଃ ଏତ୍କାନ୍ ହରାତେ ଜିୟନଃଆ।
ସାଧାସିଧା ହଡ଼କଆଃ ବାନ୍ଚାଅ ଆକଆଃ ଧାର୍ମାନ୍ ହରାତେ ହୁଇନାଃ, ମେନ୍ଦ ବିଶ୍ୱାସ୍ରେ ହସଡ଼ କାଜିତାନ୍ ହଡ଼କ ଆକଆଃ ଏତ୍କାନ୍ କାମିରେ ସାବଃଆ।
ଚିମ୍ତାଙ୍ଗ୍ ଏତ୍କାନ୍ନିଃ ଗଜଃ ତାନାଏ, ଇମ୍ତାଙ୍ଗ୍ ଆୟାଃ ଆସ୍ରା ଜିୟନଃତାନା, ମେନ୍ଦ କା ଧାର୍ମାନ୍ ହଡ଼ରାଃ ଆସ୍ରା କା ତାଇନ୍ତାନା।
ଧାର୍ମାନ୍ ହଡ଼ ଦୁକୁ ହେତେ ବାନ୍ଚାଅ ନାମାଃଏ, ମେନ୍ଦ ଏତ୍କାନ୍ନିଃ ଏନାରାଃ ବାଦ୍ଲାରେ ଦୁକୁ ନାମାଃଏ।
କା ଧାର୍ମାନ୍ ହଡ଼ ଆୟାଃ ହୋପର୍ଜାପାଃନିଃକେ ଆୟାଃ ମଚା ରେୟାଃ କାଜିତେ ଜିୟନଃଆ, ମେନ୍ଦ ଧାର୍ମାନ୍ ହଡ଼ ସେଣାଁ ହରାତେ ବାଞ୍ଚାଅଃ ତାନା।
ଧାର୍ମାନ୍ ହଡ଼କଆଃ ସବେନାଃରେ ପସାଇଦିୟଃ ତାନ୍ରେ ନାଗାର୍ରେନ୍ ହଡ଼କ ରାସ୍କାଅଃଆ, ମେନ୍ଦ ଚିମ୍ତାଙ୍ଗ୍ ଏତ୍କାନ୍ନିଃ ଜିୟନଃ ଇମ୍ତା ପୁରାଃ ରାସ୍କା ହବାଅଃଆ।
ସାଧାସିଧା ହଡ଼ରାଃ ଆଶିଷ୍ତେ ନାଗାର୍କ ପୁରାଃ ହାରା ଇଦିୟଃଆ, ମେନ୍ଦ ଏତ୍କାନ୍ ହଡ଼କଆଃ ମଚାରାଃ କାଜିତେ ଏନା ଜିୟନ୍କଆଃ।
ଅକଏ ଆୟାଃ ହୋପର୍ଜାପାଃନିଃକେ କାଏ ଦୁଲାଡ଼୍ ତାନାଃ, ଇନିଃ ଡଣ୍ଡ ତାନିଃ, ମେନ୍ଦ ସେଣାଁ ସାରିଉରୁମ୍ ହଡ଼ ହାପାଗି ତାଇନାଃ।
ଅକଏ କାଜିକକେ ନେତେ ହାନ୍ତେ କାଜିୟା, ଇନିଃ ଉକୁଃ କାଜିକ ଉଦୁବାଃ, ମେନ୍ଦ ମିଆଦ୍ ପାତିୟାର୍ରଃ ମନ୍ କାଜିକେ ଉକୁକେଦ୍ତେ ଦହାଃଏ।
ବୁଗିନ୍ ହରା ଉଦୁବ୍ନିଃ କା ତାଇନ୍ରେ ଏନ୍ତାଃରେନ୍ ହଡ଼କଆଃ ଚେତାନ୍ରେ ସାଙ୍କାଟ୍ ହିଜୁଃଆ ଓଡ଼ୋଃ ପୁରାଃ ବୁଗିନ୍ କାଜି ଉଦୁବ୍ତାନ୍କଆଃ ହରାତେ ଜିନିତାଅ ନାମଃଆ।
କା ଚିହ୍ନାର୍ ହଡ଼ ନାଗେନ୍ତେ ଅକଏ ତିଙ୍ଗୁନା ଇନିଃ ଦୁକୁ ନାମେୟା, ମେନ୍ଦ ଅକଏ ଗାୱା ହବା ନାଗେନ୍ତେ ହିଲାଙ୍ଗ୍ ରିକାଏ, ଇନିଃ ସୁକୁତେ ତାଇନାଃ।
ମିଆଦ୍ ଲିବୁଇୟାନ୍ କୁଡ଼ି ମାଇନ୍ ନାମେୟା ଓଡ଼ୋଃ ଦାୟା କା ରିକାତାନ୍ ହଡ଼କ ଖୁର୍ଜି ହୁଣ୍ଡିୟାକ।
ଲିବୁଇୟାନ୍ ହଡ଼ ଆୟାଃ ଜୀଉରାଃ ବୁଗିନାଃ ରିକାୟା, ମେନ୍ଦ ଦାୟା କା ତାଇନ୍ ହଡ଼ ଆୟାଃ ହଡ଼୍ମକେ ଦୁକୁ ଏମାଃଏ।
ଏତ୍କାନ୍ ହଡ଼ ବେଦା କାଜି ନାମେୟାଏ ମେନ୍ଦ ଧାର୍ମାନ୍ ରେୟାଃ ହିତା ହେର୍ ହଡ଼ ସାର୍ତି ଜ ନାମେୟାଏ।
ଧାର୍ମାନ୍ ହରାତେ ଅକଏ ସାର୍ତିରେ ତାଇନ୍ନିଃ ଜୀଦାନ୍ ନାମେୟା, ମେନ୍ଦ ଅକଏ ଏତ୍କାନ୍ କାଜିକେ ଅତଙ୍ଗ୍ ରିକାଏ, ଇନିଃ ଗନଏଃ ନାମେୟା।
ଅକନ୍ ହଡ଼କଆଃ ମନ୍ କାପାଟ୍ କାଜିତେ ପେରେଃ କାନା ପ୍ରାଭୁ ଇନ୍କୁକେ ହିଲାଙ୍ଗ୍କ ତାନା, ମେନ୍ଦ କା ଚିଟାଃଅ ହରାରେ ସେସେନ୍ତାନ୍ ହଡ଼କକେ ସୁକୁତାନା।
ଏତ୍କାନ୍ ହଡ଼ ସାନାବ୍କେନଃରେ ସାଜାଇ କା ନାମ୍କେଦ୍ତେ କାଏ ତାଇନାଃ ମେନ୍ଦ ଧାର୍ମାନ୍ ହଡ଼ରାଃ କିଲିକ ବାଞ୍ଚାଅଃଆ।
ସୁକୁରିରାଃ ମୁହୁଁରେ ତୁସିୟାଁକାନ୍ ସୋନା ଜେ'ଲେକା, ବୁଗିନ୍ ବିଚାର୍ କା ରିକା ସାରିତାନ୍ ମିଆଦ୍ ସୁନ୍ଦ୍ରି କୁଡ଼ି ଏନ୍ ଲେକାନିଃ ତାନିଃ।
ଧାର୍ମାନ୍ ହଡ଼କ ଆକଆଃ ଇଛା ସାନାଙ୍ଗ୍ ରିକାତେୟାଃ ବୁଗିନାଃ ତାନାଃ। ମେନ୍ଦ ଏତ୍କାନ୍ ହଡ଼କଆଃ ଆସ୍ରା ରିସ୍ମି ତାନାଃ।
ଚିମିନ୍ ହଡ଼କ ମେନାକଆ ଆକଆଃ ଜିନିଷ୍କ ସାମାଗି ଏମାଃକ ଇନ୍କୁତାଃରେ ପୁରାଃ ତାଇନାଃ, ମେନ୍ଦ ଅକନ୍କ ବୁଗିନ୍ ବିଷାଏ ଏମଃରେ ହିଚ୍କିଚାଅ କେଦ୍ତେ ଏମାଃକ ଇନ୍କୁତାଃରେ ସବେର୍ ଇମ୍ତାଙ୍ଗ୍ ଜାଞ୍ଜିଅଃଆକ।
ଆଶିଷ୍ ଏମ୍ତାନ୍ ହଡ଼ରାଃ ସବେର୍ ଇମ୍ତା ବିୟଃଗି ତାଇନାଃ ଓଡ଼ୋଃ ଅକଏ ଏଟାଃକଆଃ ଅତେକେ ଦାଆଃ ଏମାଃଏ, ଇନିୟାଃ ଅତେରେ ଦାଆଃ ଏମଃଆ।
ଅକଏ ଆୟାଃ ଜ'କେ ହୁଣ୍ଡିକେଦ୍ତେ ଦହୟା, ହଡ଼କ ଇନିଃକେ ସାର୍ପାଅ ରିକାଇୟାକ ଓଡ଼ୋଃ ଅକନ୍ ହଡ଼ ଏନାକେ ଆଖ୍ରିଙ୍ଗ୍ ତାନା, ଏନ୍ ହଡ଼ ଆଶିଷ୍ ନାମେୟାଏ।
ଅକଏ ଏଟାଃକଆଃ ବୁଗିନାଃ ରିକାଃଏ ଇନିଃ ଆଶିଷ୍ ନାମେୟା, ମେନ୍ଦ ଅକଏ ଏଟାଃକଆଃ ଏତ୍କାନ୍ ରିକାଃଏ, ଇନିଃରେ ଏନ୍ ଏତ୍କାନାଃଗି ହବାଅଃଆ।
ଅକଏ ଆୟାଃ ଖୁର୍ଜିରେ ଆସ୍ରା ଦହୟାଏ, ଇନିଃ ଉୟୁଗଃଆଏ, ମେନ୍ଦ ଧାର୍ମାନ୍ ହଡ଼ ନାୱା ସାକାମ୍ ଲେକା ହାରିୟାର୍ଗି ନେଲଃଆ।
ଅକଏ ଆୟାଃ କୁଟୁମ୍କକେ ଦୁକୁ ଏମାଃଏ, ଇନିଃ ହୟ ଲେକା ଆକ୍ତେୟାର୍ ନାମେୟାଏ ଓଡ଼ୋଃ ଡଣ୍ଡ ହଡ଼, ସେଣାଁନ୍ ହଡ଼ରାଃ ଦାସି ହବାଅଃଆ।
ଧାର୍ମାନ୍ ହଡ଼ରାଃ ଜ' ଜୀଦାନ୍ ଏମଃ ଦାରୁ ତାନାଃ, ଅକଏ ସେଣାଁନ୍ନିଃ ହଡ଼କଆଃ ଆତ୍ମାକେ ଜିନିତାଅ ନାମାଃଏ।
ନେଲେପେ, ଧାର୍ମାନ୍ ହଡ଼କ ଏସ୍କାର୍ ଜ' ନାମାଃକ, ତାବ୍ଦ ଏତ୍କାନ୍ ଓଡ଼ୋଃ ପାପି ହଡ଼କ ଚିଆଃ ଏନା ହେତେ ଜାତ୍କା କାକ ନାମେୟା ?
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.