Munda Bible
ବୁଗିନ୍ ଇନିତୁ 10
ସୁଲିମାନ୍ରାଃ ବୁଗିନ୍ ଇନିତୁ
ସୁଲିମାନ୍ରାଃ ବୁଗିନ୍ ଇନିତୁ କାଜି, ସେଣାଁନ୍ ହନ୍ ନାଗେନ୍ତେ ଆପୁ ରାସ୍କାଅଃଆଏ ମେନ୍ଦ ଡଣ୍ଡ ହନ୍ ନାଗେନ୍ତେ ଏଙ୍ଗାରାଃ ଦୁକୁ ହବାଅଃଆ। ଏତ୍କାନ୍ ହରାତେ ଦହକାନ୍ ଖୁର୍ଜିତେ ଜେତାନ୍ ଜ କାଏ ଏମେଆ, ମେନ୍ଦ ଧାର୍ମାନ୍ ହରାତେ ଗନଏଃ ହେତେ ବାନ୍ଚାଅ ନାମଃଆ।
ପ୍ରାଭୁ ଧାର୍ମାନ୍ ହଡ଼କକେ ରେଙ୍ଗେଃତେ କାଏ ଜୀଅନ୍ କଆ ମେନ୍ଦ ଇନିଃ ଏତ୍କାନ୍ ହଡ଼କଆଃ ଇଛା ସାନାଙ୍ଗ୍କେ କାଏ ପୁରାଏୟା।
ଅକନ୍ ହଡ଼ ଆଲ୍ସି ତିଃଇତେ କାମିରେ, ଇନିଃ ଗାରିବ୍ ହବାଅଃଆଏ, ମେନ୍ଦ କାମିତାନ୍ ହଡ଼ରାଃ ତିଃଇତେ କିସାଁଣ୍ ହବାଅଃଆ।
ସେଣାଁନ୍ ହନ୍, ଜେଟ୍ରେ ଜମେୟାଃ ହୁଣ୍ଡିୟାଃଏ, ମେନ୍ଦ ଅକନ୍ ହନ୍ ଇରଃ ସାମାଏରେ ଦୁଡ଼ୁମାକାନ୍ ତାଇନାଃଏ, ଇନିଃ ଗିହୁଗଃଆଏ।
ଧାର୍ମାନ୍ ଚେତାନ୍ରେ ପୁରାଃ ଆଶିଷ୍ ହବାଅଃଆ, ମେନ୍ଦ ଏତ୍କାନ୍ ହଡ଼ରାଃ ମଚାରେ ଏତ୍କାନ୍ କାଜି ଉକୁଆକାନ୍ ତାଇନାଃ।
ଧାର୍ମାନ୍ ହଡ଼କେ ପାହାମ୍ କେଦ୍ତେ ଆଶିଷ୍ ଏମଃଆ ମେନ୍ଦ ଏତ୍କାନ୍ ହଡ଼ରାଃ ନୁତୁମ୍ ରିଡ଼ିଙ୍ଗ୍ କଆଃ।
ମନ୍ସୁରୁଦ୍ରେ ସେଣାଁନ୍ ହଡ଼, ଆନ୍ଚୁ ତେଲାଏୟା, ମେନ୍ଦ ଡଣ୍ଡ ହଡ଼ ଜୀଅନଃଆ।
ସାର୍ତି ହରାରେ ସେସେନ୍ନିଃ, ବେଗାର୍ ବରତେ ସେସେନା, ମେନ୍ଦ ଏଙ୍କବେଙ୍କ ହରାରେ ସେସେନ୍ନିଃକେ ଆଟ୍କାର୍ଉରୁମ୍ ଦାଡ଼ିୟଃ।
ଅକଏ ମେଦ୍ ରାପିଦ୍ କେଦ୍ତେ ଏତ୍କାନ୍ କାମି ନାଙ୍ଗ୍ ଇସାରା ରିକାଃଏ, ଏନାତେ ଏଟାଃକକେ ଦୁକୁ ହବାଅଃଆ ଓଡ଼ୋଃ ଡଣ୍ଡ ହଡ଼ରାଃ ଜାଗାର୍ତେ ଜିଅନ୍ ହବାଅଃଆ।
ମିଆଦ୍ ଧାର୍ମାନ୍ ମଚାତେ ଅଡଙ୍ଗ୍ତାନ୍ କାଜି ଜୀଦାନ୍ ସେତେଙ୍ଗ୍ ତାନାଃ, ମେନ୍ଦ ଏତ୍କାନ୍ ହଡ଼ରାଃ ମଚାରେ ଏତ୍କାନାଃ ଉକୁଆକାନ୍ ତାଇନା।
ହିସିଙ୍ଗା ଏପେଗେର୍ ରିକାଃଏ ମେନ୍ଦ ଦୁଲାଡ଼୍ ସବେନ୍ ଗୁହ୍ନାଁକେ ହାରୁବ୍ତାଃ।
ସାରିଉରୁମ୍ ହଡ଼କଆଃ କାଜିରେ ସେଣାଁ ନାମଃଆ ମେନ୍ଦ ଡଣ୍ଡ ହଡ଼କଆଃ ଦୟା ନାଗେନ୍ତେ ସଟା ମେନାଃ।
ସେଣାଁନ୍ ହଡ଼କ ସେଣାଁ ହୁଣ୍ଡି ରିକାୟା, ମେନ୍ଦ ଡଣ୍ଡ ହଡ଼ରାଃ କାଜି ହରାତେ ଜୀଅନ୍ ହବାୱା।
ମିଆଦ୍ କିସାଁଣ୍ ହଡ଼ରାଃ ଖୁର୍ଜି ଆୟାଃ କେଟେଦ୍ ନାଗାର୍ ଲେକା ତାନାଃ, ମେନ୍ଦ ମିଆଦ୍ ଗାରିବ୍ ହଡ଼ରାଃ ରେଙ୍ଗେଃ ଆୟାଃ ଜୀଅନଃ ନାଙ୍ଗ୍ ତାନାଃ।
ଧାର୍ମାନ୍ ହଡ଼ରାଃ କାମିରେ ବୁଗିନ୍ ଜୀଦାନ୍ ନାମଃଆ, ମେନ୍ଦ ଏତ୍କାନ୍ ହଡ଼ରାଃ କାମି ପାପ୍ ନାଗେନ୍ତେ ତାନାଃ।
ଅକଏ ଇନିତୁ ଆୟୁମ୍ କେଦ୍ତେ ସେନେୟା ଇନିଃ ଜୀଦାନ୍ରାଃ ହରାରେ ମେନାଇୟା, ମେନ୍ଦ ଅକଏ ଏଗେର୍ କାଜିତେ କାଏ ମାନାତିଙ୍ଗ୍ ତାନାଃ, ଇନିଃ ଏତ୍କାନ୍ ହରାରେ ସେନେୟା।
ଅକଏ ହିସିଙ୍ଗାକେ ଉକୁଇୟା, ଇନିଃ ବେଦା କାଜି କାଜିୟା ଓଡ଼ୋଃ ଅକଏ ଚିଟା କାଜିକ କାଜିୟା, ଇନିଃ ଡଣ୍ଡ ତାନିଃ।
ଅକ୍ତାଃରେ ଜାତ୍କା କାଜିକ ହବାଅଃଆ, ଏନ୍ତାଃରେ ଗୁହ୍ନାଁ ପୁରାଃଗି ତାଇନାଃ, ମେନ୍ଦ ଜେତାଏ ଆପ୍ନାଃ ଲାଚଡ଼ାକେ ହାପାଏୟା ଇନିଃ ସେଣାଁନ୍ଗିୟାଏ।
ଧାର୍ମାନ୍ ହଡ଼ରାଃ କାଜି ବୁଗିନ୍ ରୁପା ଲେକା ତାନାଃ, ମେନ୍ଦ ଏତ୍କାନ୍ ହଡ଼ରାଃ ମନ୍ସୁରୁଦ୍ କାଟିଃଗି ଗନଙ୍ଗ୍ଆଁନ୍ ତାନାଃ।
ମିଆଦ୍ ଧାର୍ମାନ୍ ହଡ଼ରାଃ କାଜିତେ ପୁରାଃ ହଡ଼କଆଃ ଆନାସୁଲ୍ ହୁଇନାଃ ମେନ୍ଦ ଡଣ୍ଡକ ଆକଆଃ ଡଣ୍ଡ ନାଗେନ୍ତେ ଗଜଃଆକ।
ଖୁର୍ଜି ପ୍ରାଭୁଆଃ ଆଶିଷ୍ ହରାତେ ନାମଃଆ ଓଡ଼ୋଃ ଏନାଲଃ ଦୁକୁ କା ନାମଃଆ।
ଡଣ୍ଡ ହଡ଼ ଏତ୍କାନ୍ କାମି ରିକାକେଦ୍ତେ ରାସ୍କା ନାମାଃଏ, ମେନ୍ଦ ବୁଦ୍ଧି ନାମାକାଦ୍ ହଡ଼ ସେଣାଁ ନାମ୍କେଦ୍ତେ ରାସ୍କା ନାମାଃଏ।
ଏତ୍କାନ୍ ହଡ଼ ଅକ୍ନାଃ ବରୟାଏ, ଏନା ଆୟାଃ ଚେତାନ୍ରେଗି ହବାଅଃଆ ମେନ୍ଦ ଧାର୍ମାନ୍ ହଡ଼କଆଃ ଇଛା ସାନାଙ୍ଗ୍ ପୁରାୱାଃ। ହୁର୍ଲାସି ହୟ ହିଜୁଃରେ ଏତ୍କାନ୍ ହଡ଼ ଅଟାଙ୍ଗ୍କଆଃଏ, ମେନ୍ଦ ଧାର୍ମାନ୍ ହଡ଼ ଜାନାଅଗି କେଟେଃକେଦ୍ତେ ନିହିଁଗାଡ଼ା ଲେକା ତାଇନାଃ।
ଡାଟା, ଜଜ ରାସିକେ ଓଡ଼ୋଃ ମେଦ୍, ସୁକୁଲ୍କେ କାଏ ସାହାତିଙ୍ଗ୍ ଦାଡ଼ିୟା, ଏନ୍ଲେକା ଆଲ୍ସି ହଡ଼ ଆଇଃକ୍କେ କୁଲାକାଇ ହଡ଼କକେ କାଏ ସାହାତିଙ୍ଗ୍କଆ।
ପ୍ରାଭୁଆଃ ବିଷାଏରେୟାଃ ବର ମାନାତିଙ୍ଗ୍ରେ ଜୀଦାନ୍ ପସାଅଃଆ, ମେନ୍ଦ ଏତ୍କାନ୍ ହଡ଼କଆଃ ଜୀଦାନ୍ ହୁଡିଙ୍ଗ୍ ସାମାଏଗି ହବାଅଃଆ।
ଧାର୍ମାନ୍କକେ ଆସ୍ରା ଦହ ନାଙ୍ଗ୍ ରାସ୍କାକଆ, ମେନ୍ଦ ଏତ୍କାନ୍ ହଡ଼କଆଃ ଆସ୍ରାରେ ଜେତ୍ନାଃ କା ନାମଃଆ।
ପ୍ରାଭୁଆଃ ହରା ସାର୍ତି ହଡ଼ ନାଙ୍ଗ୍ ଗୁମାଟ୍ ତାନାଃ, ମେନ୍ଦ ଏତ୍କାନ୍ କାମିକ ନାଙ୍ଗ୍ ଜୀଅନ୍ ତାନାଃ।
ଧାର୍ମାନ୍ ଜାନାଅଗି ତିଙ୍ଗୁ କେଦ୍ତେ ତାଇନାଃ, ମେନ୍ଦ ଏତ୍କାନ୍ନିଃ ଦିଶୁମ୍ରେ କାଏ ତାଇନ୍ ଦାଡ଼ିୟା।
ଧାର୍ମାନ୍ ହଡ଼ରାଃ ମଚା ହେତେ ସେଣାଁ କାଜି ଅଡଙ୍ଗ୍ଅଃଆ, ମେନ୍ଦ ଏତ୍କାନ୍ କାଜି କାଜିତାନ୍ ଆଲାଙ୍ଗ୍ ଜିଅନଃଆ।
ଧାର୍ମାନ୍ ହଡ଼ ଅକ୍ନାଃ ବୁଗିନାଃ ତାନାଃ ଏନା ସାରିଉରୁମ୍ କେଦ୍ତେ କାଜିୟା, ମେନ୍ଦ ଏତ୍କାନ୍ନିଃ ଆୟାଃ ମଚା ହେତେ ଏତ୍କାନ୍ କାଜିଗି କାଜିୟା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.