Munda Bible
ବୁଗିନ୍ ଇନିତୁ 9
ସେଣାଁ ଓଡ଼ୋଃ ଡଣ୍ଡ
ସେଣାଁ ଆୟାଃ ଅଡ଼ାଃ ବାଇକେଦା ଓଡ଼ୋଃ ଆୟାଃ ଏୟାଃ ଖୁଣ୍ଟୁ ଖୋଦାକେଦ୍ତେ ବାଇୟାକାଦା। ଇନିଃ ଜମେ ନାଗେନ୍ତେ ଆୟାଃ ଆସୁଲ୍ ଜାଁତୁ ଗଏଃ କିୟାଏ, ଆୟାଃ ଦାଖ୍ରାସିରେ ମାସ୍ଲା ମେସା କେଦାଏ ଓଡ଼ୋଃ ଆୟାଃ ଟେବୁଲ୍ରେ ଦହକେଦା। ଇନିଃ ଆୟାଃ କାମ୍ଡ଼ି କୁଡ଼ିକକେ ନେଅତା ନାଙ୍ଗ୍ କୁଲାକାଦ୍କଆଏ ଓଡ଼ୋଃ ଇନିଃ ନାଗାର୍ରେୟାଃ ସାଲାଙ୍ଗି ଠାୟାଦ୍ ହେତେ କାଉରିକେଦ୍ଲଃ କାଜିୟା, “କା ସେଣାଁନ୍ ହଡ଼ ନେତାଃତେ ହିଜୁଃକା” ଓଡ଼ୋଃ ଅକଏ ଡଣ୍ଡ ତାନିଃ ଇନିଃକେ ସେଣାଁ କାଜିତାନାଏ, “ହିଜୁଃମେ, ଆଇଁୟାଃ ଜମେୟାଁ ଜମେମେ ଓଡ଼ୋଃ ଆଇଁୟାଃ ମାସ୍ଲା ମେସାକାନ୍ ଦାଖ୍ରାସି ନୁଁଏମେ। ହେ କା ସେଣାଁନ୍ ହଡ଼କ, କା ସେଣାଁନ୍ ହଡ଼କଲଃ ସାଙ୍ଗାତି ବାଗିକେଦ୍ତେ ଜୀଦାନ୍ ବାଞ୍ଚାଏପେ, ଆଟ୍କାର୍ଉରୁମ୍ରେୟାଃ ହରାରେ ସେନେପେ।”
ଅକଏ ନିନ୍ଦା ରିକାନିଃକେ ଇତୁ ଏମାଃଏ, ଇନିଃ ଆଇଃକ୍ଗି ଗିହୁଗଃଆ ଓଡ଼ୋଃ ଅକଏ ଏତ୍କାନ୍ ହଡ଼କେ ଏଗେରାଃଏ, ଇନିଃ ଆଇଃଗି ନିନ୍ଦା ନାମେୟା। ନିନ୍ଦା ରିକାତାନ୍କକେ ଆଲମ୍ ଏଗେର୍କଆ, କା'ରେଦ ଇନ୍କୁ ଆମ୍କେଗି ହିଲାଙ୍ଗ୍ମେୟାଁକ, ସେଣାଁନ୍ ହଡ଼କକେ ଏଗେର୍ କରେ, ଇନ୍କୁ ଆମ୍କେ ଦୁଲାଡ଼୍ମେୟାଁକ। ସେଣାଁଁନ୍ ହଡ଼କେ ଇତୁରେ, ଇନିଃ ଆଡଃଗି ସେଣାଁନ୍ ହବାଅଃଆଏ ଓଡ଼ୋଃ ଧାର୍ମାନ୍ ହଡ଼କେ ଇତୁରେ, ଇନିଃ ଆଡଃଗି ଇନିତୁ ନାମେୟାଁ।
ପ୍ରାଭୁଆଃ ବିଷାଏରେ ବରତେୟାଃ ସେଣାଁରେୟାଃ ଏନେଟେଦ୍ ତାନାଃ ଓଡ଼ୋଃ ପାବିତାର୍ନିୟାଃ ବିଷାଏରେ ସେଣାଁ ନାମେରେ ଆଟ୍କାର୍ଉରୁମ୍ ଦାଡ଼ିତେୟାଃ ନାମଃଆ। ଚିଆଃଚି ଆଇଁୟାଃ ହରାତେ ଆମାଃ ସାମାଏ ପସାଅଃଆ ଓଡ଼ୋଃ ଆମାଃ ଜୀଦାନ୍ରାଃ ସିର୍ମା ଜାତ୍କା ହବାୱା। ଆମ୍ ସେଣାଁନ୍ ହବାଅଃ ରେଦ, ଆପ୍ନାଃ ନାଗେନ୍ତେ ସେଣାଁନ୍ ହବାଅଃଆମ୍ ଓଡ଼ୋଃ ଆମ୍ ନିନ୍ଦା ରିକାଏ ରେଦମ୍, ଆମ୍ଗି ଦୁକୁ ସାହାତିଙ୍ଗ୍ୟେଁଆମ୍।
ମିଆଦ୍ କା ସେଣାଁନ୍ କୁଡ଼ି, ମଚା ମଚା କାପ୍ଜିନିଃ ତାନିଃ, ଇନିଃ ଡଣ୍ଡ ତାନିଃ ଓଡ଼ୋଃ ଜେତ୍ନାଃ କାଏ ସାରିୟା। ଇନିଃ ଆୟାଃ ଅଡ଼ାଃରାଃ ଦୁଆର୍ ହେପାଦ୍ରେ ଓଡ଼ୋଃ ନାଗାର୍ରେୟାଃ ସାଲାଙ୍ଗି ଠାୟାଦ୍ରେ ମିଆଦ୍ ରାଜ୍ଗାଦି ତେୟାଃରେ ଦୁବାଃ। ଏନ୍ ହରାତେ ଅକନ୍କ ଆକଆଃ ହରାରେଗି ସେନ୍ପାରମ୍ତାନ୍ ହଡ଼କକେ ହାକାଅକେଦ୍ତେ କାଜିୟା, “କା ସେଣାଁନ୍ ହଡ଼, ନେତାଃତେ ହିଜୁଃକା” ଓଡ଼ୋଃ କା ଆଟ୍କାର୍ ଉରୁମ୍ନିଃକେ ସେଣାଁ ନେଆଁଏ କାଜିତାନା, “କୁମ୍ବୁଡ଼ୁ ଦାଆଃ ହେଡ଼େମ୍ଗିୟା ଓଡ଼ୋଃ ଉକୁ ଉକୁ ଜମ୍ତାନ୍ ଜମେୟାଁ ସିବିଲାନ୍ଗିୟା।” ମେନ୍ଦ ଏନ୍ ହଡ଼ କାଏ ସାରିୟା ଯେ, ଏନ୍ତାଃରେ ଗଜାକାନ୍ ହଡ଼କ ତାଇନାଃ ଓଡ଼ୋଃ ଆୟାଃ କେଡ଼ାକାନ୍କ ପାତାଲ୍ରେୟାଃ ପୁରାଃ ଗାଡାରେ ମେନାକଆ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.