Munda Bible
ବୁଗିନ୍ ଇନିତୁ 8
ସେଣାଁଁରାଃ ସାହାରାଅ
ସେଣାଁ ଚିନାଃ କାଏ କେଡ଼ାଃ ?
ବୁଦ୍ଧି ଚିନାଃ କାଏ କାଉରିୟା ?
ଇନିଃ ହରା ଗେନାରାଃ ସାଲାଙ୍ଗି ଚୁଟିରେ,
ହରାକ ମେସାଅଃ ଠାୟାଦ୍ରେ ତିଙ୍ଗୁନାଃଏ।
ଇନିଃ ନାଗାର୍ରେୟାଃ ଦୁଆର୍ ହେପାଦ୍ରେ, ନାଗାର୍ରେୟାଃ ବଲଃ ଦୁଆର୍ରେ,
ବଲଃ ଠାୟାଦ୍ରେ ତାଇନ୍ କେଦ୍ତେ କାଉରି ତାନ୍ଲଃ କାଜିୟା,
“ହେ ସବେନ୍ ମାନୱାକ, ଆଇଙ୍ଗ୍ ଆପେକେ କେଡ଼ା ତାନାଇଙ୍ଗ୍
ଓଡ଼ୋଃ ମାନୱାକ ନାଙ୍ଗ୍ ଆଇଁୟାଃ କେନେଡ଼ା ମେନାଃ।
ହେ କା ସେଣାଁନ୍କ, ଚିର୍ଗାଲ୍ରେୟାଃ କାଜି ଆଟ୍କାର୍ଉରୁମେପେ
ଓଡ଼ୋଃ ହେ ଡଣ୍ଡକ, ଆପେ ଆଟ୍କାର୍ଉରୁମ୍ ମନ୍ସୁରୁଦ୍ ହବାଅଃପେ।
ଆୟୁମେପେ, ଚିଆଃଚି ଆଇଙ୍ଗ୍ ବୁଗିନ୍ କାଜି କାଜିୟାଇଙ୍ଗ୍,
ଆଇଙ୍ଗ୍ ଆପେତାଃରେ ଅକନ୍ କାଜି କାଜିୟା ଏନା ଠାଉକା ତାନାଃ।
ଅକ୍ନାଃ କାଜିୟା ଏନା ସାର୍ତି ତାନାଃ,
ବେଦା କାଜି ଆଇଁୟାଃ ନାଙ୍ଗ୍ ହିଲାଙ୍ଗ୍ କାଜି ତାନାଃ।
ଆଇଁୟାଃ ସବେନ୍ କାଜି ଧାର୍ମାନ୍ ତାନାଃ,
ଏନାରେ ଜେତାନ୍ ବେଦା କାଜିକ ବାନଃଆ।
ଆଟ୍କାର୍ଉରୁମ୍ ହଡ଼କଆଃ ନାଗେନ୍ତେ ଏନ୍ ସବେନାଃ ଠାଉକା ତାନାଃ
ଓଡ଼ୋଃ ସେଣାଁ ନାମାକାଦ୍ ହଡ଼କ ନାଗେନ୍ତେ ଏନା ବୁଗିନାଃ ତାନାଃ।
ଏନାମେନ୍ତେ ରୁପା ବାଗିକେଦ୍ତେ ଆଇଁୟାଃ ଇନିତୁକ
ଓଡ଼ୋଃ ସୋନା ବାଗିକେଦ୍ତେ ଆଇଁୟାଃ ସେଣାଁ ତେଲାଏମେ।
“ଚିଆଃଚି ସେଣାଁ ମୋତି ହେତେ ବୁଗିନାଃ ତାନାଃ
ଓଡ଼ୋଃ ଆପ୍ନାଃ ସବେନ୍ ଇଛାସାନାଙ୍ଗ୍ ଜିନିଷ୍ଲଃ ଏନା କା ଜକାଅଃଆ।
ଆଇଙ୍ଗ୍ ବୁଦ୍ଧି ତାନିଙ୍ଗ୍, ଚିର୍ଗାଲ୍ତେୟାଃକେ ଆପ୍ନାଃ ତାଇନଃ ଠାୟାଦ୍ ରିକାକାଦାଇଙ୍ଗ୍,
ଏନ୍ତେ ସେଣାଁ ଓଡ଼ୋଃ ବିବେକ୍କେ ନାମାକାଦାଇଙ୍ଗ୍।
ପ୍ରାଭୁଆଃ ବିଷାଏକେ ଆଇଙ୍ଗ୍ ବରୱାଃଇଙ୍ଗ୍, ଏତ୍କାନ୍କେ ହିଲାଙ୍ଗ୍,
ଘାମାଣ୍ଡ୍, ହିସିଙ୍ଗା, ଏତ୍କାନ୍ ହରା
ଓଡ଼ୋଃ ବେଦା କାଜିକ ଆଇଙ୍ଗ୍ ହିଲାଙ୍ଗ୍ଆଃଇଙ୍ଗ୍।
ଆଇଙ୍ଗ୍ତାଃରେ ଉହାଟ୍ ଓଡ଼ୋଃ ସେଣାଁ ମେନାଃ,
ଆଇଙ୍ଗ୍ ଆଟ୍କାର୍ଉରୁମ୍ ଦାଡ଼ି ତାନାଇଙ୍ଗ୍ ଓଡ଼ୋଃ ଆଇଙ୍ଗ୍ତାଃରେ ପେଡ଼େଃ ମେନାଃ।
ଆଇଁୟାଃ ହରାତେ ରାଜାକ ରାଇଜ୍ ରିକାଃକ
ଓଡ଼ୋଃ ରାଇଜ୍ ଚାଲାଅ ତାନ୍କ ନ୍ୟାୟ ବିଚାର୍ ରିକାଃକ।
ଆଇଁୟାଃ ହରାତେ ଗୁସିୟାଁକ, ହାକିମ୍କ
ଓଡ଼ୋଃ ଅତେଦିଶୁମ୍ରେନ୍ ସବେନ୍ ଧାର୍ମାନ୍ତେ ବିଚାର୍ତାନ୍କ ରାଇଜ୍ ତାନା।
ଆଇଙ୍ଗ୍କେ ଅକଏ ଦୁଲାଡ଼୍ ରିକାଃଏ ଆଇଙ୍ଗ୍ ଇନିଃକେ ଦୁଲାଡ଼ାଃଇଙ୍ଗ୍
ଓଡ଼ୋଃ ଅକନ୍କ ଚୁହୁଲ୍ତେ ଦାଣାଁଃକ ଇନ୍କୁ ଆଇଙ୍ଗ୍କେ ନାମିୟାଁକ।
ଆଇଙ୍ଗ୍ତାଃରେ ଖୁର୍ଜି ଓଡ଼ୋଃ ମାଇନାନ୍ ମେନାଃ
ଓଡ଼ୋଃ କା ଚାବାଅଃ ଖୁର୍ଜି ଓଡ଼ୋଃ ଧାର୍ମାନ୍ ମେନାଃ।
ଆଇଁୟାଃ ଜ ସୋନା ତାନାଃ, ହେଗି ଫାର୍ଚି ସୋନା ହେତେ ବୁଗିନ୍ ତାନାଃ,
ଆଇଙ୍ଗ୍ ଅକ୍ନାଃ ନାମେୟାଇଙ୍ଗ୍ ଏନା ବୁଗିନ୍ ରୁପା ହେତେ ପୁରାଃ ବୁଗିନ୍ ତାନାଃ।
ଆଇଙ୍ଗ୍ ଧାର୍ମାନ୍ ହରାରେ
ଓଡ଼ୋଃ ବିଚାର୍ରେୟାଃ ହରାରେ ସେନାଇଙ୍ଗ୍।
ଅକନ୍କ ଆଇଙ୍ଗ୍କେ ଦୁଲାଡ଼ିଙ୍ଗ୍ ତାନା, ଇନ୍କୁକେ ସବେନ୍ ଖୁର୍ଜିରେୟାଃ ଆକ୍ତେୟାର୍ ଏମଃଆ
ଓଡ଼ୋଃ ଆକଆଃ ଭାଣ୍ଡାର୍ ଅଡ଼ାଃ ପେରେଃକଆଃ।
“ପ୍ରାଭୁ କାମି ଏନେଟେଦ୍ ସିଦାରେ
ଚାଏ ଆୟାଃ ମାରି କାମି ସିଦାରେ ଆଇଙ୍ଗ୍କେ ବାଇକାଇଙ୍ଗ୍ ତାଇକେନା।
ଜାନାଅ ଜାନାଅ ଏତେ, ଚାଏ ଏନେଟେଦ୍ ଏତେ
ଚାଏ ଅତେଦିଶୁମ୍ ବାଇୟଃ ସିଦାରେ ଆଇଙ୍ଗ୍ ଠାହାରାଅ କାନାଇଙ୍ଗ୍।
ଚିମ୍ତା ଇକିର୍ ଦରେୟା କା ତାଇକେନା
ଓଡ଼ୋଃ ଚିମ୍ତା ସେତେଙ୍ଗ୍ ଦାଆଃ କା ତାଇକେନା, ଏନ୍ ସାମାଏରେ ଆଇଙ୍ଗ୍ ଜାନାମ୍ କାନାଇଙ୍ଗ୍।
ବୁରୁ ଓଡ଼ୋଃ ଟୁଙ୍ଗୁରିକ କା ବାଇୟାକାନ୍ ସିଦାରେ ଆଇଙ୍ଗ୍ ଜାନାମ୍ କାନାଇଙ୍ଗ୍।
ଏନ୍ ସାମାଏରେ ପ୍ରାଭୁ ଅତେ, ପିଡ଼ି
ଓଡ଼ୋଃ ଅତେଦିଶୁମ୍ରାଃ ଗିତିଲ୍ କାଏ ବାଇୟାକାଦ୍ ତାଇକେନା।
ଚିମ୍ତାଙ୍ଗ୍ ଇନିଃ ସିର୍ମାକେ ବାଇକେଦା, ଇମ୍ତାଙ୍ଗ୍ ଆଇଙ୍ଗ୍ ଏନ୍ତାଃରେ ତାଇକେନାଇଙ୍ଗ୍,
ଚିମ୍ତାଙ୍ଗ୍ ଇନିଃ ଇକିର୍ ଦରେୟା ଚେତାନ୍ରେ ମିଆଦ୍ ଗୋଲ୍ଗି ସିମ୍ନା ବାଇକେଦା,
ଓଡ଼ୋଃ ଚେତାନ୍ରାଃ ସିର୍ମାକେ ପୁରାଃ କେଟେଦ୍ ବାଇକେଦା
ଓଡ଼ୋଃ ଇକିର୍ ଦରେୟା ହେତେ ସେତେଙ୍ଗ୍ ଅଡଙ୍ଗ୍ୟାନା।
ଇନିଃ ଦରେୟାରାଃ ଦାଆଃ ସିମ୍ନାଏତେ ଆଲକା ଅଡଙ୍ଗ୍ଅଃକା ମେନ୍ତେ ନିୟାମ୍ ବାଇକେଦା
ଓଡ଼ୋଃ ଚିମ୍ତାଙ୍ଗ୍ ଅତେଦିଶୁମ୍ରେ ନିହିଁଗାଡ଼ାରାଃ ଚିହ୍ନାଁ ଏମ୍କେଦା,
ଇମ୍ତାଙ୍ଗ୍ ଆଇଙ୍ଗ୍ ଆୟାଃ ହେପାଦ୍ରେ ମୁଖ୍ୟା ମିସ୍ତ୍ରି ତାଇକେନାଇଙ୍ଗ୍,
ଓଡ଼ୋଃ ସବେର୍ ହୁଲାଙ୍ଗ୍ ଆୟାଃ ଆୟାର୍ରେ ରାସ୍କାଅଃ ତାଇକେନାଇଙ୍ଗ୍।
ଓଡ଼ୋଃ ଆଇଙ୍ଗ୍ ଆୟାଃ ଅତେଦିଶୁମ୍ରେ ରାସ୍କାତେ ତାଇକେନାଇଙ୍ଗ୍
ଓଡ଼ୋଃ ଆଇଁୟାଃ ରାସ୍କା ମାନୱା ହଡ଼କଲଃ ମେସାକେଦ୍ତେ ତାଇକେନା।
“ଏନାମେନ୍ତେ ହେ ଆଇଁୟାଃ ହନ୍କ, ଆଇଁୟାଃ ଆୟୁମେପେ,
ଅକନ୍କ ଆଇଁୟାଃ ହରାକେ ସାବେତାନା, ଇନ୍କୁ ଧାଇନ୍ଗିୟାକ।
ଇନିତୁକେ ଆୟୁମ୍କେଦ୍ତେ ସେଣାଁନ୍ ହବାଅଃପେ
ଏନାକେ କା ଆୟୁମ୍ ଲେକା ଆଲପେ ହବାଅଃଆ।
ଅକନ୍ ହଡ଼ ଆଇଁୟାଃ ଆୟୁମ୍ ତାନାଏ, ଇନିଃ ଧାଇନ୍ଗିୟାଏ
ଓଡ଼ୋଃ ଆଇଁୟାଃ ଦୁଆର୍ ହେପାଦ୍ରେ ଜାନାଅଗି ହରୟାଏ
ଓଡ଼ୋଃ ଆଇଁୟାଃ ଦୁଆର୍ରେୟାଃ ଚାଉଖାଠ୍ ହେପାଦ୍ରେ ନେଲ୍ହରା କାତେୟାଃଏ।
ଚିଆଃଚି ଅକଏ ଆଇଙ୍ଗ୍କେ ନାମିୟାଁ, ଇନିଃ ଜୀଦାନ୍ ନାମେୟାଁଏ
ଓଡ଼ୋଃ ପ୍ରାଭୁଆଃ ଲିନିବୁଇ ନାମେୟାଏ।
ମେନ୍ଦ ଅକଏ ଆଇଙ୍ଗ୍କେ ଦାଣାଁ କାଏ ଦାଡ଼ିତାନା, ଇନିଃ ଆୟାଃ ଜୀଦାନ୍କେ ଜିଅନ୍ ତାନାଏ,
ଜେତାଏ ଆଇଙ୍ଗ୍କେ ହିଲାଙ୍ଗ୍ ତାନାଏ, ଇନିଃ ଗନଏଃକେ ଦୁଲାଡ଼୍ ତାନାଏ।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.