Munda Bible
ବୁଗିନ୍ ଇନିତୁ 7
ଆପାଙ୍ଗିର୍ କାମି ରିକାତାନ୍ କୁଡ଼ିତାଃଏତେ ଚେତ୍ଗାର୍
ହେ ଆଇଁୟାଃ ହନ୍, ଆଇଁୟାଃ କାଜିକକେ ମାନାତିଙ୍ଗ୍ମେ ଓଡ଼ୋଃ ଆଇଁୟାଃ ଆନ୍ଚୁକେ ଆମାଃ ମନ୍ସୁରୁଦ୍ରେ ଜାତାନ୍ କେଦ୍ତେ ଦହେମେ। ଆଇଁୟାଃ ଆନ୍ଚୁକେ ମାନାତିଙ୍ଗ୍ମେ, ଏନାରେ ଆମ୍ ବାନ୍ଚାଅ ନାମେୟାମ୍ ଓଡ଼ୋଃ ଆଇଁୟାଃ ଇନିତୁକେ ଆମାଃ ମେଦ୍ରାଃ ପିପ୍ନି ଲେକା ଦହେମେ। ଏନାକେ ଆମାଃ ସାର୍ସାର୍ କରେ ତଲାକାମେ ଓଡ଼ୋଃ ଆମାଃ ମନ୍ସୁରୁଦ୍ରେୟାଃ ଦିରି ପାଟାରେ ଏନାକେ ଅଲ୍କେଦ୍ତେ ଦହକାମେ। ସେଣାଁଁକେ କାଜିମେ, ଆମ୍ ଆଇଁୟାଃ ମିଶିଙ୍ଗ୍ ତାନ୍ମେ ଓଡ଼ୋଃ ଆଟ୍କାର୍ଉରୁମ୍ ତେୟାଃକେ ଆଇଁୟାଃ ଆପ୍ନାଃ ହଡ଼ ତାନ୍ମେ ମେନ୍ତେ କାଜିମେ। ଏନାତେ ଆମ୍ ଏଟାଃ କୁଡ଼ିତାଃଏତେ ଓଡ଼ୋଃ ଆପାଙ୍ଗିର୍ କୁଡ଼ି ତାଃଏତେ ବାନ୍ଚାଅ ନାମେୟାମ୍।
ମୁସିଙ୍ଗ୍ ଆଇଙ୍ଗ୍ ଆଇଁୟାଃ ଅଡ଼ାଃ ଖିଡ଼୍କିରାଃ ଦାନାଙ୍ଗ୍ ଲିଜାଃ ହରା ନେଲ୍ ତାଇକେନାଇଙ୍ଗ୍, ଇମ୍ତା କା ସେଣାଁନ୍କଆଃ ଥାଲାରେ, ଓଡ଼ୋଃ ସେପେଡ଼େଦ୍କଆଃ ଥାଲାରେ ମିଆଦ୍ ଡଣ୍ଡ ସେପେଡ଼େଦ୍କେ ନେଲ୍କିୟାଇଙ୍ଗ୍। ଇନିଃ ଏନ୍ କୁଡ଼ି ତାଇନଃତାନ୍ ଅଡ଼ାଃ ଜାପାଃ ଗେନା ହରାରେ ଆୟାଃ ଅଡ଼ାଃତେ ସେନଃ ତାଇକେନା। ଇମ୍ତା ତାର୍ସିଙ୍ଗ୍, ସିଙ୍ଗି ହାସୁର୍, ସିଙ୍ଗିଡୁବିଃଗ୍ ଓଡ଼ୋଃ ପୁରାଃ ନୁବାଃକାନ୍ ତାଇକେନା, ଏନ୍ ଘାଡ଼ିରେ ନେଲେମେ, ଇନିଃ ମିଆଦ୍ କୁଡ଼ିଲଃ ନାପାମ୍ୟାନା, ଏନ୍ କୁଡ଼ି ଆପାଙ୍ଗିର୍ନିଃ ଲେକା ଲିଜାଃ ତୁସିଙ୍ଗ୍କାନ୍ ତାଇକେନାଏ ଓଡ଼ୋଃ ଇନିୟାଃ ମନ୍ସୁରୁଦ୍ ପୁରାଃ ଚାତୁରାଇତେ ପେରେୟାକାନ୍ ତାଇକେନା। ଇନିଃ ପୁରାଃ ଜାଗାର୍ନିଃ ଓଡ଼ୋଃ କାଜି କା ମାନାତିଙ୍ଗ୍ନିଃ ତାଇକେନାଏ। ଇନିଃ ଚିଉଲାଅ ଅଡ଼ାଃରେ କାଏ ତାଇନଃ ତାଇକେନା। ଇନିଃ ମିସା ହରାରେ, ମିସା ଛାଉର୍ରେ ଓଡ଼ୋଃ କଚା କୁନିକରେ ଲଡବାଡ଼ା ତାଇକେନା। ଏନ୍ କୁଡ଼ି ଏନ୍ ସେପେଡ଼େଦ୍କେ ସାବ୍କେଦ୍ଲଃ ଚଅଃକିୟାଏ, ଓଡ଼ୋଃ ବେଗାର୍ ଗିହୁଃ ମଚାତେ ଇନିଃକେ କାଜିକିୟା, “ମେନେସାରେୟାଃ ଦାନ୍ ଆଇଙ୍ଗ୍ତାଃରେ ମେନାଃ, ତିସିଙ୍ଗ୍ ଆଇଙ୍ଗ୍ ଆଇଁୟାଃ କିରିୟାକାଦ୍ତେୟାଃ ପୁରାକେଦାଇଙ୍ଗ୍। ଏନାତେ ଆଇଙ୍ଗ୍ ଆମାଃଲଃ ନେପେଲ୍ ନାଙ୍ଗ୍ ଅଡଙ୍ଗ୍ୟାନାଇଙ୍ଗ୍ ଓଡ଼ୋଃ ଆଇଙ୍ଗ୍ ଆମ୍କେ ବୁଗିଲେକା ଦାଣାଁକେଦ୍ତେ ନାମାକାଦ୍ମାଇଙ୍ଗ୍। ଆଇଙ୍ଗ୍ ଆଇଁୟାଃ ଡିସ୍ନାରେ ଲେଦ୍ରା ଓଡ଼ୋଃ ମିସାର୍ରାଃ ରାଙ୍ଗ୍ବିରାଙ୍ଗ୍ ଉନ୍ଲିଜାଃ ବିଲାକାଦାଇଙ୍ଗ୍। ଆଇଙ୍ଗ୍ ଆଇଁୟାଃ ଡିସ୍ନାରେ ଅଲିଭ୍ ସୁନୁମ୍, ଆଲ୍ବେରା ଓଡ଼ୋଃ ଦାଲ୍ଚିନି ନେ'ଲେକା ବୁଗିନ୍ ସହାନ୍ ହିର୍ଚି କାଦାଇଙ୍ଗ୍। ଏନାମେନ୍ତେ ଏଲା ଆଲାଙ୍ଗ୍ ସେତାଃ ଜାକେଦ୍ ହଡ଼୍ମରାଃ ସାନାଙ୍ଗ୍କେ ପୁରାତାନ୍ଲଃ ଦୁଲାଡ଼୍ତେ ବୁଲଃଆଲାଙ୍ଗ୍ ଓଡ଼ୋଃ ଦୁଲାଡ଼୍ତେ ବାରାନ୍କିନ୍ ରାସ୍କାଅଃଆଲାଙ୍ଗ୍। ଚିଆଃଚି ଆଇଁୟାଃ କଡ଼ା ଅଡ଼ାଃରେ ବାଙ୍ଗାଇୟା, ଇନିଃ ସାଙ୍ଗିନ୍ ଦିଶୁମ୍ତେ ସେନଃକାନା। ଇନିଃ ଥାଇଲାରେ ପୁରାଃ ଟାକା ଇଦି କେଦ୍ତେ ସେନଃ କାନାଏ ଓଡ଼ୋଃ ଇନିଃ ଚାଣ୍ଡୁଃ ପୁନି ହବାଅଃ ସାମାଏରେ ହିଜୁଃ ରୁହାଡ଼ା।” ନେ'ଲେକା ଆୟାଃ ପୁରାଃ ହେଡ଼େମ୍ କାଜିତେ ଓଡ଼ୋଃ ବେଦା କାଜିତେ ଇନିଃକେ ଲାବୁଃ ଇଦିକିୟା। ଜେ'ଲେକା ମିଆଦ୍ ଉରିକ୍କେ ଗଏଃ ନାଙ୍ଗ୍ ବାହେର୍ରେ ତଲ୍ ଇଦିୟାଃକ ଓଡ଼ୋଃ ଜେ'ଲେକା ସିକ୍ଡ଼ିରେ ତଲ୍କାନ୍ ଡଣ୍ଡ ହଡ଼ ସାଜାଇ ନାମ୍ ନାଗେନ୍ତେ ସେନାଃଏ, ଏନ୍ଲେକାଗି ଇନିଃ ଇମ୍ତାଗି ଇନିୟାଃ ତାୟମ୍ ତାୟମ୍ତେ ସେନଃୟାନା। ଅଡ଼େ ଫାଁସ୍ରିରେ ଆୟାଃ ଜୀଉ ସେନଃଆ ଏନା କା ସାରିକେଦ୍ତେ ଏନ୍ତାଃତେ ଜାଲ୍ଦି ଆଫିର୍କଆଃଏ, ଟୁଣ୍ଡୁରେ ଆୟାଃ କାଲ୍ଜା ଏନ୍ଲେକା କାଲ୍ଜାରେ ଚିଆରିଲଃ ବଲଃଆ।
ନାହାଁଃ ହେ ଆଇଁୟାଃ ହନ୍କ, ଆଇଁୟାଃ କାଜି ଆୟୁମେପେ ଓଡ଼ୋଃ ଆଇଁୟାଃ କାଜିରେ ଆପେୟାଃ ମନ୍କେ ଏମେପେ। ନେ'ଲେକାନ୍ କୁଡ଼ିରାଃ ହରାରେ ଆମାଃ ମନ୍କେ ଆଲମ୍ ଇଦିୟା ଓଡ଼ୋଃ ଆୟାଃ ହରାରେ ଭୁଲ୍ ରେୟଗି ଆଲମ୍ ସେନା। ଚିଆଃଚି ଇନିଃ ପୁରାଃକକେ ଜୀଅନ୍ କାଦ୍କଆ, ଇନିୟାଃ ହରାତେ ଘାଅ ହବାକାନ୍କଆଃ ମିଆଦ୍ ପୁରାଃ ଝୁଣ୍ଡ୍ ମେନାଃ। ଇନିୟାଃ ଅଡ଼ାଃ ପାତାଲ୍ତେ ସେନଃତାନ୍ ହରା ତାନାଃ, ଅକ୍ନାଃଚି ଗନଏଃ ଅଡ଼ାଃତେ ଇଦି ସେଟେରାଃଏ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.