Munda Bible
ବୁଗିନ୍ ଇନିତୁ 6
ଚେନେତାଅରେୟାଃ କାଜିକ
ହେ ଆଇଁୟାଃ ହନ୍, ଆମ୍ ଆମାଃ ହୋପର୍ଜାପାଃରେ ତାଇନ୍ତାନ୍ ହଡ଼ ନାଗେନ୍ତେ ଜିମାରେ ତାଇନ୍ ତାନାମ୍ ଚାଏ କା ଚିହ୍ନାର୍ ହଡ଼ ନାଗେନ୍ତେ ଆମ୍ କିରିୟା ଜମେ ତାନାମେ, ତାବ୍ଦ ଆମ୍ ଆମାଃ କିରିୟା କାଜିରେୟାଃ ଫାଁସ୍ରିରେ ଉୟୁଗଃ ତାନାମେ ଓଡ଼ୋଃ ଆମାଃ ମଚାରେୟାଃ କାଜି ନାଗେନ୍ତେ ସାବ୍ଅଃ ତାନାମେ। ହେ ଆଇଁୟାଃ ହନ୍, ନାହାଁଃ ଆମ୍ ନେ କାମି କାମିମେ ଓଡ଼ୋଃ ଆମ୍ତେଗି ବାଞ୍ଚାଅଃମେ, ଚିଆଃଚି ଆମ୍ ଆମାଃ ହୋପର୍ଜାପାଃନିଆଃ ତିଃଇରେ ମେନାମେଆ, ସେନଃମେ, ଆପାନ୍କେ ଲିବୁଇ କେଦ୍ତେ ଆମାଃ ହୋପର୍ଜାପାଃନିଃକେ ଛଡ଼ାଅ ନାଗେନ୍ତେ ବିନ୍ତିମେ। ଆମ୍ ଆମାଃ ମେଦ୍କେ ଦୁଡ଼ୁମ୍ ଆଲମ୍ ରିକାଏ ଚାଏ ଆମାଃ ମେଦ୍ରାଃ ପିପ୍ନିକେ ଆଲମ୍ ଜାପିଦ୍ ରିକାଏ। ଆମ୍ ଆପାନ୍କେ ମିରିକ୍କେ ଗଏଃ ନାଙ୍ଗ୍ ସାଙ୍ଗାର୍ତାନ୍ ତିଃଇ ହେତେ ଓଡ଼ୋଃ ଅଡ଼େ ଲେକା ଅଡ଼େ ଟୁଟିତାନ୍ ତିଃଇ ହେତେ ବାଞ୍ଚାଅମେ।
ହେ କୁଢ଼ି, ଆମ୍ ଟଣ୍ଟ ହେପାଦ୍ତେ ସେନଃମେ ଓଡ଼ୋଃ ଇନିୟାଃ କାମି ନେଲ୍କେଦ୍ତେ ସେଣାଁନ୍ ହବାଅଃମେ। ଇନିୟାଃ ବିଚାର୍ନିଃ ଚାଏ ଆଗୁଆଇନିଃ ଚାଏ ହାକିମ୍, ଜେତାଏ କାଏ ତାଇନ୍ରେୟଗି ଇନିଃ ଜେଟ୍ରେ ଆୟାଃ ଜମେୟାଃ ହୁଣ୍ଡି ରିକାଏ। ହେ କୁଢ଼ି, ଆମ୍ ଚିମିନ୍ ଦିନ୍ ଜାକେଦ୍ ଦୁଡ଼ୁମାକାନ୍ ତାଇନାଃମେ ? ଆମ୍ ଦୁଡ଼ୁମ୍ ହେତେ ଚିଉଲା ବିରିଦାଃମେ ? ଓଡ଼ୋଃ ହୁଡିଙ୍ଗ୍ ଲେକା ଦୁଡ଼ୁମ୍, ହୁଡିଙ୍ଗ୍ ଲେକା ଝୁପାଅ, ହୁଡିଙ୍ଗ୍ ଲେକା ଦୁଡ଼ୁମ୍ ନାଙ୍ଗ୍ ତିଃଇକେ କୁଡ଼ାମ୍ରେ ଦହରେ, ଗାରିବ୍ ଦାସା ଆମାଃତାଃରେ ମିଆଦ୍ ହନର୍ହଡ଼ ଲେକା ଓଡ଼ୋଃ ସାଙ୍କାଟ୍ ଆମାଃତାଃରେ ମିଆଦ୍ ହାଁତେୟାର୍ ସାବ୍କାଦ୍ ହଡ଼ ଲେକା ହିଜୁଃଆ।
ମିଆଦ୍ ଏତ୍କାନ୍ ହଡ଼ ଓଡ଼ୋଃ ହଡ଼ ଗଗଏଃନିଃ, ଆୟାଃ ମଚାତେ ବେଦା କାଜି କାଜିୟାଃ। ଇନିଃ ଆୟାଃ ମେଦ୍ତେ ଇସାରା ରିକାଃଏ, କାଟା ରିମ୍କେଦ୍ତେ ଓଡ଼ୋଃ ସାର୍ସାର୍ ଚୁଣ୍ଡୁଲ୍କେଦ୍ତେ ଇସାରା ରିକାଃଏ। ଆୟାଃ ମନ୍ସୁରୁଦ୍ରେ ବେଦା କାଜି ତାଇନାଃ, ଇନିଃ ସବେର୍ ଇମ୍ତା ଏତ୍କାନ୍ ଉଡ଼ୁ ରିକାଃଏ ଓଡ଼ୋଃ ଏପେଗେର୍ କାଜିରାଃ ଏନେଟେଦ୍ ରିକାଃଏ। ଏନାମେନ୍ତେ ଇନିୟାଃ ଚେତାନ୍ରେ ସାଙ୍କାଟ୍ ଆଚ୍କାଗି ସେଟେରା ଓଡ଼ୋଃ ଇନିଃ ମିସାତେ ଜିଅନଆଃ ଓଡ଼ୋଃ ଆୟାଃତାଃରେ ବାନ୍ଚାଅ ନାଙ୍ଗ୍ ଜେତାନ୍ ହରା କା ତାଇନାଃ।
ପ୍ରାଭୁ ତୁରିୟାଠୁ ବିଷାଏକେ ହିଲାଙ୍ଗ୍ଆଃ, ଓଡ଼ୋଃ ଏୟା ବିଷାଏ ହଗି ଆୟାଃ ହିଲାଙ୍ଗ୍ଅଃ କାଜିତାନାଃ। ହିସିଙ୍ଗା ମେଦ୍, ବେଦାତାନ୍ ଆଲାଙ୍ଗ୍ ଓଡ଼ୋଃ ଗୁହ୍ନାଁ କା ରିକାକାଦ୍ ହଡ଼ରାଃ ମାୟୋମ୍ ଲିଙ୍ଗି ତିଃଇ, ଏତ୍କାନ୍ ଉଡ଼ୁଃ ରିକାତାନ୍ ମନ୍ସୁରୁଦ୍, ଏତ୍କାନ୍ କାମି ରିକା ନାଗେନ୍ତେ ଜାଲ୍ଦି ନିର୍ ବାଡ଼ାତାନ୍ କାଟା, ବେଦା କାଜିତାନ୍ ଗାୱା ଓଡ଼ୋଃ ଜେତା ହାଗାକଆଃ ଥାଲାରେ ଏପେରାଙ୍ଗ୍ କାଜିରାଃ ଏନେଟେଦ୍ ରିକାତାନ୍ ଆଲାଙ୍ଗ୍।
ଆପାଙ୍ଗିର୍ କାମିତାନ୍ ବିରୁଧ୍ରେ ଚେତାଅ କାଜି
ହେ ଆଇଁୟାଃ ହନ୍, ଆମ୍ ଆମାଃ ଆପୁରାଃ କାଜି ମାନାତିଙ୍ଗ୍ମେ ଓଡ଼ୋଃ ଏଙ୍ଗାରାଃ ଇନିତୁ ତେୟାଃକ ଆଲମ୍ ବାଗିୟା। ଏନା ସବେର୍ ଇମ୍ତା ଆମାଃ ମନ୍ସୁରୁଦ୍ରେ ତଲ୍କାମେ ଓଡ଼ୋଃ ହଟଃରେ ବାହା ଲେକା ତୁସିଙ୍ଗ୍କାନ୍ମେ। ଆମ୍ ସେନ୍ତାନ୍ ସାମାଏରେ ଏନା ଆମ୍କେ ହରା ଉଦୁବ୍ମେୟାଁଏ ଓଡ଼ୋଃ ନୁବାଃ ଦୁଡ଼ୁମ୍ତାନ୍ ସାମାଏରେ ଏନା ଆମ୍କେ ହରମେୟାଁ ଓଡ଼ୋଃ ଏୟନ୍କାନ୍ ସାମାଏରେ ଆମାଃଲଃ ଜାଗାର୍ ରିକାୟା। ଚିଆଃଚି ଆନ୍ଚୁ ଦିଆ ତାନାଃ ଓଡ଼ୋଃ ଏନ୍ ଇନିତୁ ମାର୍ସାଲ୍ ତାନାଃ ଓଡ଼ୋଃ ଇନିତୁ ନାଗେନ୍ତେ ଏଗେର୍ କାଜି ଜୀଦାନ୍ରେୟାଃ ହରାତାନା। ଇନିଃ ଆମ୍କେ ଏତ୍କାନ୍ କୁଡ଼ି ହେତେ ଓଡ଼ୋଃ ଏଟାଃନିଆଃ କୁଡ଼ିଆଃ ମଚାରାଃ ବେଦା କାଜି ହେତେ ବାଞ୍ଚାଅମେୟାଁ। ଆମାଃ ମନ୍ସୁରୁଦ୍ରେ ଇନିୟାଃ ସୁଗାଡ଼ାନ୍ ହଡ଼୍ମକେ ନେଲ୍କେଦ୍ତେ ଆଲମ୍ ହାୟାଅଃଆ ଚାଏ ଆୟାଃ ମେଦ୍ରାଃ ନେପେଲ୍ ହରାତେ ଆପାନ୍କେ ଆଲମ୍ ସାବ୍ ରିକାନାଃ। ଚିଆଃଚି ବେଶ୍ୟା କୁଡ଼ି ହରାତେ ହଡ଼ ଜମେୟାଃ ଲାଦ୍ କାଏ ନାମେୟା ଓଡ଼ୋଃ ଆପାଙ୍ଗିର୍ କୁଡ଼ି, ହଡ଼ରାଃ ଗନଙ୍ଗ୍ଆଁନ୍ ଜୀଉ ଇଦି ନାଙ୍ଗ୍ ସାଙ୍ଗାର୍ଆଃଏ।
ଜେତା ହଡ଼ ଆୟାଃ କୁଡ଼ାମ୍ରେ ସେଙ୍ଗେଲ୍ ଦହରେ, ଆୟାଃ ଲିଜାଃ ଚିନାଃ କା ଅଣ୍ଡର୍ଅଃଆ ? ଜେତା ହଡ଼ ସେଙ୍ଗେଲ୍ରେ ସେସେନ୍ରେ ଚିନାଃ ଆୟାଃ କାଟାରାଃ ତାଲ୍କା କା ଅଣ୍ଡର୍ଅଃଆ ? ଅକନ୍ ହଡ଼ ଆୟାଃ ହୋପର୍ଜାପାଃନିଆଃ କୁଡ଼ିରାଃ ହେପାଦ୍ତେ ସେନ୍ୟାନ୍ଲଃ ଜୁଟିଦିୟାଏ, ଇନିଃ ସାଜାଇ କା ନାମ୍କେଦ୍ତେ କାଏ ତାଇନାଃ। ଜେତା କୁମ୍ବୁଡ଼ୁ ଆୟାଃ ଲାହିଦ୍ ପେରେଃ ନାଗେନ୍ତେ କୁମ୍ବୁଡ଼ୁ ରିକାଏରେ, ହଡ଼କ ଇନିଃକେ କାକ ହିଲାଙ୍ଗ୍ଇୟା। ମେନ୍ଦ ଇନିଃ ସାନାବ୍କରେ, ଆଇଃକ୍କେ ଏୟା ଗୁନା ରୁହାଡ଼୍ ଲାଗାତିୟାଁ, ଆୟାଃ ଅଡ଼ାଃରାଃ ସବେନାଃ ଏମ୍ ଲାଗାତିୟାଁ। ଅକଏ ଏଟାଃ କୁଡ଼ିଲଃ ଆପାଙ୍ଗିର୍ କାମି ରିକାଃଏ, ଇନିଃ ପୁରା ଡଣ୍ଡ ତାନିଃ। ଇନିଃ ଆଇଃଗି ଆୟାଃ ଜୀଉକେ ଜୀଅନଃ ନାଗେନ୍ତେ ଏନା ରିକାଃଏ। ଇନିଃ ଦାଲଃଆଏ ଓଡ଼ୋଃ ଲାନ୍ଦାଅଃଆଏ, ଆୟାଃ ଗୁହ୍ନାଁ ଚିଉଲା ହଗି କା ଉକୁଃଆ। ଚିଆଃଚି ହିସିଙ୍ଗା ହରାତେ ମିଆଦ୍ କଡ଼ା ପୁରାଃଗି ଖିସ୍କେନଃଆ, ଓଡ଼ୋଃ ଇନିଃ ଚିମ୍ତା ଜାକେଦ୍ ବାଦ୍ଲା କାଏ ଇଦିୟା ଇମ୍ତା ଜାକେଦ୍ ଦାୟା କାଏ ରିକାଇୟା। ଇନିଃ ଜେତା ରାକାମ୍ରେୟାଃ ଘୁସ୍ କାଏ ଇଦିୟା ଓଡ଼ୋଃ ଆମ୍ ଇନିଃକେ ଚିମିନ୍ଗି ଗନଙ୍ଗ୍ଆଁନ୍ ଜିନିଷ୍ ଏମ୍ରେୟ ଇନିଃ କାଏ ମାନାତିଙ୍ଗ୍ୟାଁ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.