Munda Bible
ବୁଗିନ୍ ଇନିତୁ 5
ଆପାଙ୍ଗିର୍ କାମିତାନ୍ ବିରୁଧ୍ରେ ଚେତାଅ କାଜି
ହେ ଆଇଁୟାଃ ହନ୍, ଆଇଁୟାଃ ସେଣାଁରେୟାଃ କାଜିକକେ ବୁଗିଲେକା ଆୟୁମେମେ ଓଡ଼ୋଃ ଆଇଁୟାଃ ବୁଦ୍ଧିରେ ଲୁତୁର୍ ଏମେମେ। ଜେ'ଲେକାଚି ଆମ୍ ବିବେକ୍କେ ବାଞ୍ଚାଅ ଦାଡ଼ିୟାମ୍ ଓଡ଼ୋଃ ଆମାଃ ମଚାରେୟାଃ ସେଣାଁନ୍ କାଜିକକେ ମାନାତିଙ୍ଗ୍ ରିକା ଦାଡ଼ିୟାମ୍। ଚିଆଃଚି ଆପାଙ୍ଗିର୍ କୁଡ଼ିରାଃ ମଚାଏତେ ଅଡଙ୍ଗ୍ଅଃତାନ୍ କାଜିକ ହୁରୁମ୍ସୁକୁ ରାସି ଲେକା ଉୟୁଗଃତାନା ଓଡ଼ୋଃ ଆୟାଃ ଜାଗାର୍ରେୟାଃ କାଜିକ ସୁନୁମ୍ ଲେକା ବୟଡ଼ାନ୍ଗି ଆଟ୍କାର୍ ତାନାଃ। ମେନ୍ଦ ଆୟାଃ ଦାସା ଲିମ୍ଦାରୁ ଲେକା ମେହେର୍ ଓଡ଼ୋଃ ବାରାନ୍ସାଃ ଲେସେର୍କାନ୍ ତାରାଉଡ଼ି ଲେକ୍ନାଃ ତାନାଃ। ଆୟାଃ କାଟା ଗନଏଃ ସାଃତେ ସେନଆଃ ଓଡ଼ୋଃ ଆୟାଃ ଚାଣ୍ଡାଙ୍ଗ୍ କାବାର୍ ଜାକେଦ୍ ସେନଆଃ। ଏନାମେନ୍ତେ ଇନିଃ ଜୀଦାନ୍ରେୟାଃ ହରାରେ କାଏ ସେନା, ଚିଆଃଚି ଆୟାଃ ସବେନ୍ ହରା ଇନିଃକେ ଆଦ୍ତାଇୟା ଓଡ଼ୋଃ ଇନିଃ କାଏ ସାରିୟା।
ଏନାମେନ୍ତେ ହେ ଆଇଁୟାଃ ହନ୍, ଆଇଁୟାଃ କାଜି ଆୟୁମେମ୍ ଓଡ଼ୋଃ ଆଇଁୟାଃ ମଚା ହେତେ ଅଡଙ୍ଗ୍ତାନ୍ କାଜିଏତେ ଆଲମ୍ ଗେନାଅଃୱା। ନେ'ଲେକାନ୍ କୁଡ଼ି ତାଃଏତେ ସାଙ୍ଗିନ୍ରେ ତାଇନ୍ମେ ଓଡ଼ୋଃ ଆୟାଃ ଅଡ଼ାଃ ଦୁଆର୍ ହେପାଦ୍ ହଗି ଆଲମ୍ ସେନା। ହବାସାକାଅଃଆ, ଆମାଃତାଃରେ ତାଇକାନ୍ ମାନାରାଙ୍ଗ୍ ଏଟାଃ ହଡ଼କତାଃରେ ଏମଃଆ ଓଡ଼ୋଃ ଆମାଃ ବାରାଷ୍ ଏତ୍କାନ୍ ହଡ଼କକେ ଏମଃଆ। ଅକଏସାରି କା ଚିହ୍ନାର୍ ହଡ଼କ ଆମାଃ ପେଡ଼େଃ ହରାତେ ପେଡ଼େୟାନ୍ ହବାୱା ଓଡ଼ୋଃ ଆମାଃ କାମିରାଃ ନାଲାରାଃ ଜ ଏଟାଃ ଦିଶୁମ୍ରେନ୍ ହଡ଼ରାଃ ଅଡ଼ାଃରେ ପେରେଜଃଆ। ଓଡ଼ୋଃ ଆମାଃ ଟୁଣ୍ଡୁ ଦିପିଲିରେ ଆମାଃ ମାସ୍ ଓଡ଼ୋଃ ହଡ଼୍ମ ଜିଅନଃଆ ଇମ୍ତା ଅକଏସାରି ଆମ୍ ଏୟମ୍ ରିକାୟାମେ। ଓଡ଼ୋଃ କାଜିୟାମ୍, ଆଇଙ୍ଗ୍ ଇନିତୁକେ ଚିଲ୍କା ହିଲାଙ୍ଗ୍ କେଦାଇଙ୍ଗ୍ ଓଡ଼ୋଃ ଆଇଁୟାଃ ମନ୍ସୁରୁଦ୍ ଏଗେର୍କେ ଚିଲ୍କା ହିଲାଙ୍ଗ୍କେଦା ! ଆଇଙ୍ଗ୍ ଇତୁତାନ୍କଆଃ କାଜି କାଇଙ୍ଗ୍ ମାନାତିଙ୍ଗ୍କେଦା ଓଡ଼ୋଃ ଇନ୍କୁ ଅକନ୍ କାଜି କେଦା ଏନାରେ ଆଇଁୟାଃ ଲୁତୁର୍ କାଇଙ୍ଗ୍ ଏମ୍କେଦା। ଆଇଙ୍ଗ୍ ସାମାଜ୍ ଥାଲାରେ ସବେନ୍ କିଲିମିଲି ଏତ୍କାନ୍ରେ ଉୟୁଗାକାନ୍ ତାଇକେନାଇଙ୍ଗ୍।
ଆମ୍ ଆମାଃ ପୋଖେରା ଓଡ଼ୋଃ କୁଆଁ ହେତେ ଲିଙ୍ଗିୟଃତାନ୍ ଦାଆଃ ନୁଁଏମେ। ଚିଆଃ ଆମାଃ ସେତେଙ୍ଗ୍ ବାହାରିରେ ନେତେହାନ୍ତେ କା ହବାୱା ଓଡ଼ୋଃ ଚିଆଃ ଆମାଃ ଲିଙ୍ଗିତାନ୍ ଦାଆଃ ହରାକରେ କା ଲିଙ୍ଗିୟଃଆ ? ଏନା ଆମାଃ ଏସ୍କାର୍ ହବାଅଃକା, ଆମାଃଲଃ ଜେତା କା ଚିହ୍ନାର୍ ହଡ଼କଆଃ ଆଲକା ହବାଅଃକା। ଆମାଃ ସେତେଙ୍ଗ୍ ଧାଇନ୍ ହବାଅଃକା ଓଡ଼ୋଃ ଆମ୍ ସେପେଡ଼େଦ୍ ଦିପିଲିରେ ଆମାଃ କୁଡ଼ିଲଃ ରାସ୍କାଅଃମେ। ଇନିଃ ନେପେଲ୍ରେ ଦୁଲାଡ଼୍ ମିରିକ୍ ଲେକା ଓଡ଼ୋଃ ବୁରୁରେ ତାଇନ୍ତାନ୍ ସୁଗାଡ଼ାନ୍ ବିର୍ ମେରମ୍ହନ୍ ଲେକା ତାନିଃ। ଆୟାଃ ତଆ ସବେର୍ ଇମ୍ତାଙ୍ଗ୍ ସୁକୁ ଏମାମେକାଏ ଓଡ଼ୋଃ ଆୟାଃ ଦୁଲାଡ଼୍ରେ ଜାନାଅଗି ତାଇନ୍ମେ। ହେ ଆଇଁୟାଃ ହନ୍, ଆମ୍ ଆପାଙ୍ଗିର୍ କୁଡ଼ିଲଃ ଚିକାନାଙ୍ଗ୍ ରାସ୍କାଅ ତାନାମେ ଓଡ଼ୋଃ ଏଟାଃ ନିଆଃ କୁଡ଼ିକେ ଚିକାନାଙ୍ଗ୍ ହାମ୍ବୁଦିୟାମ୍। ଚିଆଃଚି ପ୍ରାଭୁଆଃ ଆୟାର୍ରେ ହଡ଼ରାଃ ସବେନ୍ ହରା କା ଉକୁକାନା ଓଡ଼ୋଃ ଇନିଃ ସବେନ୍ ହରା ସାମାନ୍ ରିକାଃଏ। ଏତ୍କାନ୍ ହଡ଼ ଆୟାଃ ଏତ୍କାନ୍ କାମି ହରାତେ ସାବଃଆ ଓଡ଼ୋଃ ଇନିଃ ପାପ୍ରେୟାଃ ବାଏହାର୍ତେ ତଲଃଆ। ଇନିଃ ଇନିତୁ କା ମାନାତିଙ୍ଗ୍ ନାଗେନ୍ତେ ଗଜଃଆ ଓଡ଼ୋଃ ଆୟାଃ ଆପ୍ନାଃ ଡଣ୍ଡ ନାଗେନ୍ତେ ହରା ଆଦେୟାଏ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.