Munda Bible
ବୁଗିନ୍ ଇନିତୁ 4
ସେଣାଁଁରାଃ ଜ
ହେ ଆଇଁୟାଃ ହନ୍ଗାଁଣାକ, ଆପୁରାଃ ଇନିତୁକେ ଆୟୁମେପେ ଓଡ଼ୋଃ ଆଟ୍କାର୍ଉରୁମ୍ ନାଗେନ୍ତେ ଆପେ ମନ୍କେ ଚିହୁଟ୍ ରିକାଏପେ। ଚିଆଃଚି ଆଇଙ୍ଗ୍ ଆପେକେ ବୁଗିନ୍ ଇନିତୁକ ଏମାକାଦ୍ପେୟାଇଙ୍ଗ୍ ଏନାତେ ଆଇଁୟାଃ ଇନିତୁକେ ଆଲପେ ବାଗିୟା। ଆଇଙ୍ଗ୍ ଆଇଁୟାଃ ଆପୁରାଃ ମିଆଦ୍ ହନ୍ ତାଇକେନାଇଙ୍ଗ୍ ଓଡ଼ୋଃ ଏଙ୍ଗାରାଃ ଆୟାର୍ରେ ମିଆଦ୍ଗି ଦୁଲାଡ଼୍ ହନ୍ ତାଇକେନାଇଙ୍ଗ୍। ଆଇଁୟାଃ ଆପୁ ଆଇଙ୍ଗ୍କେ ଇତୁ ଏମ୍କେଦ୍ତେ କାଜିକେଦା, ଆମାଃ ମନ୍ସୁରୁଦ୍ରେ ଆଇଁୟାଃ କାଜିରେ ତାଇନ୍କା ଓଡ଼ୋଃ ଆଇଁୟାଃ ଆନ୍ଚୁକ ମାନାତିଙ୍ଗ୍ରେଦ ଆମାଃ ଜୀଉ ବାଞ୍ଚାଅଃଆ। ସେଣାଁ ତେଲାଏମେ, ଆଟ୍କାର୍ଉରୁମ୍ ଦାଡ଼ି ଲେକା ରିକାଏମେ, ଓଡ଼ୋଃ ଆଇଁୟାଃ ମଚାରାଃ ବାଚାନ୍କେ ଆଲମ୍ ରିଡ଼ିଙ୍ଗ୍ୟେଁଆ ଓଡ଼ୋଃ ଆଲମ୍ ବାଗିୟା। ସେଣାଁକେ ଆଲମ୍ ବାଗିୟା, ଏନାକେ ଦୁଲାଡ଼େମେ, ଏନାତେ ଏନା ଆମ୍କେ ବାଞ୍ଚାଅମେୟାଁ। ସେଣାଁ ମାରାଙ୍ଗ୍ ବିଷାଏ ତାନାଃ, ଏନାମେନ୍ତେ ସେଣାଁ ତେଲାଏମେ ଓଡ଼ୋଃ ଆମାଃ ସବେନାଃ ଆଖ୍ରିଙ୍ଗ୍ କେଦ୍ତେ ଆଟ୍କାର୍ଉରୁମ୍କେ ତେଲାଏମେ। ଏନାକେ ମାଇନାନ୍ ରିକାଏମେ, ଏନା ଆମାଃ ବୁଗିନାଃ ରିକାୟା ଓଡ଼ୋଃ ଆମ୍ ଏନାକେ ଦୁଲାଡ଼୍ ରେଦ, ଆମ୍କେ ମାରାଙ୍ଗ୍ମେୟାଁ। ଏନା ଆମାଃ ବହଃରେ ସାୟାଦ୍ରେୟାଃ ଗନଙ୍ଗ୍ ତୁସିଙ୍ଗ୍ତେୟାଃ ଏମାମେୟା ଓଡ଼ୋଃ ଆମ୍କେ ସୁଗାଡ଼ାନ୍ ମୁକୁଟ୍ ଏମାମେୟା।
ହେ ଆଇଁୟାଃ ହନ୍, ଆୟୁମେମ୍ ଆଇଁୟାଃ କାଜି ତେଲାଏମେ, ଏନାରେ ଆମାଃ ଜୀଦାନ୍ରାଃ ବାରାଷ୍ ପୁରାଃଗି ହବାୱା ଆଇଙ୍ଗ୍ ଆମ୍କେ ସେଣାଁଁରାଃ ହରା ଇତୁକାଦ୍ ମେୟାଁଇଙ୍ଗ୍ ଓଡ଼ୋଃ ବୁଗିନ୍ ହରାରେ ଇଦିକାଦ୍ ମେୟାଁଇଙ୍ଗ୍। ଆମ୍ ସେନ୍ତାନ୍ ଇମ୍ତା ଆମାଃ କାଟାରେ ଜେତ୍ନାଃ ନକ୍ସାନ୍ କା ହବାୱା ଓଡ଼ୋଃ ନିର୍ତାନ୍ ଇମ୍ତା ଆମ୍ କାମ୍ ତହଦଆଃ। ଇନିତୁକେ ସାବାକାମେ, ଆଲମ୍ ବାଗିୟା ଏନାକେ ଦହକାମେ, ଚିଆଃଚି ଏନା ଆମାଃ ଜୀଦାନ୍ ତାନାଃ। ଏତ୍କାନ୍ କାମି ହଡ଼କଆଃ ଥାଲାରେ ଆଲମ୍ ବଲଆ ଓଡ଼ୋଃ ଏତ୍କାନ୍ ହଡ଼କଆଃ ହରାରେ ଆଲମ୍ ସେନେୟା। ଏନାକେ ବାଗି କେଦ୍ତେ ଏନାରାଃ ହେପାଦ୍ତେ ଆଲମ୍ ସେନାଃ ଓଡ଼ୋଃ ଏନାକେ ହେତାବାଗି କେଦ୍ତେ ଆୟାର୍ତେ ସେନଃମେ। ଚିଆଃଚି ଏତ୍କାନ୍ ହଡ଼କ ଏତ୍କାନ୍ କାମି କା ରିକାରେ କାକ ଦୁଡ଼ୁମାଃ ଓଡ଼ୋଃ ଇନ୍କୁ ଜେତାଏକେ ଦୁକୁ କା ଏମ୍ ଜାକେଦ୍ ଇନ୍କୁ କାକ ଦୁଡ଼ୁମାଃ। ଚିଆଃଚି ଇନ୍କୁ ଏତ୍କାନ୍ ଲେକାନ୍ ଲାଦ୍ ଜମେୟାଁକ ଓଡ଼ୋଃ ହିସିଙ୍ଗା ଲେକାନ୍ ଦାଖ୍ରାସି ନୁଏଁୟାକ। ମେନ୍ଦ ଧାର୍ମାନ୍ ହଡ଼କଆଃ ହରା ସେତାଃରେୟାଃ ମାର୍ସାଲ୍ ଲେକା, ଅକ୍ନାଃ ଚି ତିକିନ୍ ସିଙ୍ଗି ଜାକେଦ୍ ଆଡଃଗି ପୁରାଃ ମାର୍ସାଲ୍ ହବାଅଃଆ। ଏତ୍କାନ୍ ହଡ଼କଆଃ ହରା ନୁବାଃ ଲେକା, ଏନାମେନ୍ତେ ଇନ୍କୁ ଏନାରେ ତହଦଃଆକ, ମେନ୍ଦ କାକ ସାରିୟା।
ହେ ଆଇଁୟାଃ ହନ୍, ଆଇଁୟାଃ କାଜିକେ ବୁଗିଲେକା ଆୟୁମେମେ ଓଡ଼ୋଃ ଆଇଁୟାଃ ବାଚାନ୍ରେ ଲୁତୁର୍ ଏମେମେ। ଏନାକ ଆମାଃ ମେଦ୍ ହେତେ ଆଲକା ସେନଃକା ମେନ୍ଦ ଆମାଃ ମନ୍ସୁରୁଦ୍ରେ ଯାତାନ୍ କେଦ୍ତେ ଦହେମେ। ଚିଆଃଚି ଏନାକେ ଅକନ୍କ ନାମେୟା, ଇନ୍କୁଆଃ ଜୀଦାନ୍ ବାଞ୍ଚାଅଃଆ ଓଡ଼ୋଃ ହଡ଼୍ମରାଃ ସବେନ୍ ଦୁକୁ ନାଗେନ୍ତେ ବୁଗିନ୍ ହବାୱା। ଆମାଃ ମନ୍ସୁରୁଦ୍କେ ପୁରାଃ ଜାତାନ୍ କେଦ୍ତେ ଦହେମେ, ଚିଆଃଚି ଏନା ଜୀଦାନ୍ରାଃ ମିଆଦ୍ ଲିଙ୍ଗିୟଃତାନ୍ ସେତେଙ୍ଗ୍ ତାନାଃ। ବେଦା କାଜିକ ଆମାଃ ମଚାତେ ଆଲମ୍ କାଜିୟା ଓଡ଼ୋଃ ବେଦା କାଜି ହେତେ ପୁରାଃ ସାଙ୍ଗିନ୍ରେ ତାଇନ୍ମେ। ଆମାଃ ମେଦ୍ ଆୟାର୍ତେ ନେଲେକା ଓଡ଼ୋଃ ଆୟାର୍ତେ ନେଲେ ନାଙ୍ଗ୍ ଆମାଃ ମେଦ୍ ଆଲମ୍ ଜାପିଦ୍ ରିକାୟା। ଆମ୍ ଆମାଃ କାଟା ତାଲ୍କାକେ ସିଧାଗି ଦହଏମେ ଓଡ଼ୋଃ ଆମାଃ ସବେନ୍ ହରା ବୁଗି ଲେକା ତାଇନାଃ। ଲେଙ୍ଗାସାଃ ଚାଏ ଜମ୍ସାଃ ଆଲମ୍ ସେନା ଓଡ଼ୋଃ ଆମାଃ କାଟା ଏତ୍କାନ୍ ହରା ହେତେ ସାଙ୍ଗିନ୍ରେ ତାଇନ୍କା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.