Munda Bible
ବୁଗିନ୍ ଇନିତୁ 3
ଡିଣ୍ଡା କଡ଼ା କୁଡ଼ିକକେ ଇନିତୁ
ହେ ଆଇଁୟାଃ ହନ୍, ଆମ୍ ଆଇଁୟାଃ ଆନ୍ଚୁକେ ଆଲମ୍ ରିଡ଼ିଙ୍ଗ୍ୟେଁଆ, ମେନ୍ଦ ଆମାଃ ମନ୍ସୁରୁଦ୍ରେ ଆଇଁୟାଃ ଆନ୍ଚୁକ ମାନାତିଙ୍ଗ୍ମେ। ଚିଆଃଚି ନେ'ଲେକା ଆମ୍ ରିକାରେ ଆମାଃ ଜୀଦାନ୍ ଥିମ୍ବା ହବାୱା ଓଡ଼ୋଃ ଆମ୍ ପୁରାଃ ସୁକୁତେମ୍ ତାଇନାଃ। ଦାୟା ଓଡ଼ୋଃ ସାର୍ତି ଆମ୍କେ ଆଲକାଏ ବାଗିମେକା, ମେନ୍ଦ ଏନାକେ ଆମାଃ ହଟଃରେ ମାଲା ଲେକା ବାଇୟେମେ ଓଡ଼ୋଃ ଆମାଃ ମନ୍ସୁରୁଦ୍ ଲେକାନ୍ ଦିରି ପାଟାରେ ଅଲେମେ। ନେ'ଲେକା ରିକାରେ ଆମ୍ ପାର୍ମେଶ୍ୱାର୍ଆଃ ଓଡ଼ୋଃ ହଡ଼ ନାଜେର୍ରେ ଦାୟା ନାମେୟାମ୍ ଓଡ଼ୋଃ ଆମ୍ ପୁରାଃ ସେଣାଁନ୍ ହବାଅଃଆମ୍।
ଆମ୍ ସବେର୍ ମନ୍ତେ ପାର୍ମେଶ୍ୱାର୍ତାଃରେ ବିଶ୍ୱାସ୍ ରିକାଏମେ ଓଡ଼ୋଃ ଆମାଃ ଆଟ୍କାର୍ଉରୁମ୍ରେ ଆସ୍ରା ଆଲମ୍ ରିକାୟା। ଆମାଃ ସବେନ୍ କାଜିକାମିରେ ଇନିଃକେ ପାହାମିମେ, ଏନ୍ତେ ଇନିଃ ଆମାଃ ନାଗେନ୍ତେ ସିଧା ହରା ବାଇୟା। ଆମ୍ ଆମାଃ ନେପେଲ୍ରେ ସେଣାଁନ୍ ଆଲମ୍ ହବାୱା, ପ୍ରାଭୁକେ ବରଇମେ ଓଡ଼ୋଃ ଏତ୍କାନ୍ କାମି ହେତେ ସାଙ୍ଗିନ୍ରେ ତାଇନ୍ମେ। ନେ'ଲେକା ରିକାରେ ଆମାଃ ହଡ଼୍ମ ବୁଗିଲେକା ତାଇନାଃ ଓଡ଼ୋଃ ଆମାଃ ହଡ଼୍ମରାଃ ଜାଙ୍ଗ୍ରେ ତାଇକାନ୍ ଗୁଦା ପେଡ଼େଃ ହବାୱା। ଆମ୍ ଆମାଃ ଖୁର୍ଜିତେ ଓଡ଼ୋଃ ଅତେରେୟାଃ ସିଦା ଜ'ତେ ପ୍ରାଭୁକେ ମାଇନାନ୍ ରିକାଇମେ। ନେ'ଲେକାତେ ଆମାଃ ଭାଣ୍ଡାର୍ ଅଡ଼ାଃ ଖୁର୍ଜିତେ ପେରେଃକଆଃ ଓଡ଼ୋଃ ଡାଡାକାରେ ନାୱା ଦାଖ୍ରାସି ପେରେଃକଆଃ।
ହେ ଆଇଁୟାଃ ହନ୍, ପ୍ରାଭୁଆଃ ଇନିତୁକେ ଆଲମ୍ ନେଲ୍ ବାଗି ଓଡ଼ୋଃ ଆୟାଃ ଚେନେତାଅରେ ଆଲମ୍ ଲାଗାଅଃଆ। ଜେ'ଲେକା ଆପୁ ଆୟାଃ ହନ୍କେ ଏଗେର୍ ରିକାଃଏ ଏନ୍ଲେକା ପ୍ରାଭୁ ଅକଏକେ ଦୁଲାଡ଼୍ ରିକାଃଏ ଇନିଃକେ ଏଗେର୍ ରିକାଃଏ। ଅକନ୍ ହଡ଼ ସେଣାଁ ନାମାଃଏ ଓଡ଼ୋଃ ଆଟ୍କାର୍ଉରୁମ୍ ଦାଡ଼ିୟାଏ ଇନିଃ ଧାଇନ୍ ତାନିଃ। ଏନାଦ ରୁପାରେୟାଃ କିରିଙ୍ଗ୍ ଆଖ୍ରିଙ୍ଗ୍ ହେତେ ସେଣାଁ ନାମେତେୟାଃ ମାରାଙ୍ଗ୍ କାଜିତାନା ଓଡ଼ୋଃ ଏନାରାଃ ଲାଭ୍ ସୋନାରେୟାଃ ଲାଭ୍ ହେତେ ବୁଗିନାଃ ତାନା। ଏନା ମୋତି ହେତେ ଗନଙ୍ଗ୍ ତାନାଃ ଓଡ଼ୋଃ ଆମାଃତାଃରେ ତାଇନଃ ସବେନ୍ ଜିନିଷ୍ଲଃ ଏନା କା ଜକାନାଃ। ଏନାରାଃ ଜମ୍ତିସାଃରେ ପୁରାଃ ସିର୍ମା ଜୀଦାନ୍ ଓଡ଼ୋଃ ଲେଙ୍ଗାତିସାଃରେ ଖୁର୍ଜି ଓଡ଼ୋଃ ମାଇନାନ୍ ତାଇନାଃ। ଇନିୟାଃ ହରା ସବେନାଃ ସୁକୁଆନ୍ଗି ଓଡ଼ୋଃ ଆୟାଃ ସବେନ୍ ହରା ଜୀଉସୁକୁ ହବାଅଃଆ। ଅକନ୍କ ଏନାରାଃ ଆସ୍ରା ଇଦିୟାକ, ଇନ୍କୁଲଃ ଇନିଃ ଜୀଦାନ୍ ଏମଃ ଦାରୁ ଲେକା ତାନିଃ ଓଡ଼ୋଃ ଅକନ୍ ହଡ଼ ଏନା ସାବ୍କେଦ୍ତେ ତାଇନାଃ, ଇନିଃ ଧାଇନ୍ ତାନିଃ।
ପ୍ରାଭୁ ସେଣାଁତେ ଅତେଦିଶୁମ୍କେ ବାଇକେଦା
ଓଡ଼ୋଃ ସିର୍ମାକେ ଆୟାଃ ବୁଦ୍ଧିତେ ଦହକେଦା।
ଆୟାଃ ସେଣାଁତେ ପୁରାଃ ଗାଡା ହେତେ ଦାଆଃ ପେରେଃ ଅଡଙ୍ଗ୍କଆଃ
ଓଡ଼ୋଃ ରିମିଲ୍ ହେତେ ଅସ୍ ଦାଆଃ ବୁନ୍ଦା ବୁନ୍ଦା ଉୟୁଗଃଆ।
ହେ ଆଇଁୟାଃ ହନ୍, ନେ ସବେନାଃ ଆମାଃ ମେଦ୍ ଆୟାର୍ ହେତେ ଆଲକା ସେନ୍କା, ଆମାଃ ସେଣାଁ ଓଡ଼ୋଃ ବିବେକ୍କେ ବାନ୍ଚାଅ ରିକାଏମେ। ନେଆଁ ଆମାଃ ଜୀଉକେ ବାନ୍ଚାଅ ରିକାଏୟା ଓଡ଼ୋଃ ହଟଃରାଃ ମାଲା ଲେକା ହବାୱା। ଏନ୍ତେ ଆମ୍ ଆମାଃ ହରାରେ ବେଗାର୍ ବରତେ ସେନେୟାମ୍ ଓଡ଼ୋଃ ଆମାଃ କାଟା କା ତହଦଃଆ। ଆମ୍ ଦୁଡ଼ୁମ୍ ଇମ୍ତାଙ୍ଗ୍ ଆମାଃ ବର କା ତାଇନାଃ ଓଡ଼ୋଃ ଆମାଃ ଦୁଡ଼ୁମ୍ ଜୀଉସୁକୁତେ ହବାୱା। ଇମ୍ତାଗି ହିଜୁଃ ସାଙ୍କାଟ୍ ହେତେ ଚାଏ ଏତ୍କାନ୍ ହଡ଼କକେ ଜିଅନ୍ ରିକାନାଙ୍ଗ୍ ହିଜୁଃତାନ୍ ସାଙ୍କାଟ୍କେ ଆଲମ୍ ବରୟା। ପ୍ରାଭୁ ଆମାଃସାଃରେ ତାଇନ୍କେଦ୍ତେ ଦେଙ୍ଗାମେୟାଁ ଓଡ଼ୋଃ ଇନିଃ ଆମାଃ କାଟାକେ ଫାଁସ୍ରି ହେତେ ବାଞ୍ଚାଅମେୟାଁ।
ଦେଙ୍ଗାରେୟାଃ ପେଡ଼େଃ ଗମ୍କେରାଃ ତିଃଇରେ ତାଇନ୍ରେ, ଦେଙ୍ଗା ଆସିତାନ୍କେ ଏମଃ ନାଙ୍ଗ୍ ଆଲମ୍ ମାନାଇୟା। ଆମାଃତାଃରେ ଏମଃତେୟାଃ ତାଇନ୍ରେଦ, ସେନଃମେ, ଓଡ଼ୋଃ ମିସା ହିଜୁଃମେ, ଗାପା ଏମାମେୟାଇଙ୍ଗ୍, ଏନ୍କା ଆମାଃ ହୋପର୍ଜାପାଃନିଃକେ ଆଲମ୍ କାଜିୟା। ଆମାଃ ହୋପର୍ଜାପାଃନିଃ ଆମାଃତାଃରେ ବେଗାର୍ ବରତେ ତାଇନ୍ ତାନାଏ, ତାବ୍ଦ ଆୟାଃ ବିରୁଧ୍ରେ ଏତ୍କାନାଃ ଉଡ଼ୁ ଆଲମ୍ ରିକାୟା। ଅକ ହଡ଼ ଆମାଃ ହାନି କାଏ ରିକାଏରେ, ଇନିଃଲଃ ସାମା ସାମାରେ ବିରୁଧ୍ ଆଲମ୍ ରିକାଏ। ହାଲାଗୁଲା ରିକାତାନ୍ ହଡ଼କେ ଆଲମ୍ ହିସିଙ୍ଗାକଆ ଓଡ଼ୋଃ ଇନିୟାଃ ହରା ଆଲମ୍ ସାଲାୟା। ଚିଆଃଚି ପ୍ରାଭୁ ଏତ୍କାନ୍ ରିକାତାନ୍ ହଡ଼କେ ହିଲାଙ୍ଗ୍ ରିକାଃଏ ମେନ୍ଦ ସାର୍ତି ହରାରେ ସେସେନ୍ ତାନ୍ ହଡ଼କକେ ଆୟାଃ କାଜି ଉଦୁବ୍ ରିକାଏ। ପ୍ରାଭୁ ଏତ୍କାନ୍ ହଡ଼କଆଃ ଅଡ଼ାଃରେ ସାର୍ପାଅ ରିକାଃଏ ମେନ୍ଦ ଧାର୍ମାନ୍ ହଡ଼କଆଃ ଅଡ଼ାଃରେ ଆଶିଷ୍ ରିକାଃଏ। ଇନିଃ ଲାନ୍ଦାତାନ୍ ହଡ଼କକେ ଲାନ୍ଦାକଆ ଓଡ଼ୋଃ ଲିବୁଇ ହଡ଼କକେ ଦାୟାକଆଏ। ସେଣାଁନ୍ ହଡ଼ ମାଇନ୍ ନାମେୟାଏ ମେନ୍ଦ ଡଣ୍ଡ ହଡ଼ରାଃ ଗିହୁଃ ପସା ଇଦିଅଃଆ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.