Munda Bible
ବୁଗିନ୍ ଇନିତୁ 2
ସେଣାଁଁରାଃ ଜ
ହେ ଆଇଁୟାଃ ହନ୍, ଆମ୍ ଆଇଁୟାଃ କାଜିକ ତେଲାଏୟାମ୍ ଓଡ଼ୋଃ ଆଇଁୟାଃ ଆନ୍ଚୁକ ମନ୍ରେ ଦହୟାମ୍, ଓଡ଼ୋଃ ସେଣାଁଁରାଃ କାଜି ବୁଗିଲେକା ଆୟୁମେୟାମ୍ ଓଡ଼ୋଃ ଆଟ୍କାର୍ଉରୁମ୍ କାଜିରେ ମନ୍ସୁରୁଦ୍ ଏମେୟାମ୍, ହେଗି, ଆମ୍ ବୁଗିନ୍ ଉଡ଼ୁଃ ନାଙ୍ଗ୍ କେଡ଼ାଃମେ ଓଡ଼ୋଃ ଆଟ୍କାର୍ଉରୁମ୍ ନାଙ୍ଗ୍ କାଉରିକେଦ୍ତେ କେଡ଼ାଃମେ, ଓଡ଼ୋଃ ଏନାକେ ରୁପା ଓଡ଼ୋଃ ଉକୁଆକାନ୍ ଖୁର୍ଜି ଲେକା ଦାଣାଁଃମେ, ତାବ୍ଦ ଆମ୍ ପ୍ରାଭୁଆଃ ବରକେ ଆଟ୍କାର୍ଉରୁମ୍ ଦାଡ଼ିୟାମ୍ ଓଡ଼ୋଃ ପାର୍ମେଶ୍ୱାର୍ରାଃ ସେଣାଁ ନାମେୟାଁମ୍। ଚିଆଃଚି ପ୍ରାଭୁ ସେଣାଁ ଏମାଃଏ, ଆୟାଃ ମଚାଏତେ ସେଣାଁ ଓଡ଼ୋଃ ଆଟ୍କାର୍ଉରୁମ୍ରେୟାଃ କାଜି ଅଡଙ୍ଗ୍ଆଁ। ଇନିଃ ସାର୍ତି ହଡ଼କ ନାଙ୍ଗ୍ ସାର୍ତି ସେଣାଁ ଦହକାଦା ଓଡ଼ୋଃ ସାର୍ତି ହରାରେ ସେସେନ୍ତାନ୍ ହଡ଼କଆଃ ନାଗେନ୍ତେ ଢାଲ୍ ଲେକାନ୍ନିଃ ତାନିଃ। ଇନିଃ ନ୍ୟାୟ ରେୟାଃ ହରାକେ ବାଚାଅ ଦାଡ଼ିୟା ଓଡ଼ୋଃ ଆୟାଃ ପାତିୟାର୍ରଃ ହଡ଼କଆଃ ହରାକେ ସାମ୍ବାଡ଼ାଅ ଦାଡ଼ିୟା।
ଆମ୍ ଧାର୍ମାନ୍, ନ୍ୟାୟ ଓଡ଼ୋଃ ସାର୍ତି କାଜି ଓଡ଼ୋଃ ହରାରେୟାଃ ସବେନ୍ ବୁଗିନ୍ କାଜିକ ସାରିଉରୁମ୍ ଦାଡ଼ିୟାମେ। ଚିଆଃଚି ସେଣାଁ ଆମାଃ ମନ୍ସୁରୁଦ୍ରେ ବଲଆ ଓଡ଼ୋଃ ସେଣାଁ ଆମାଃ ଜୀଉକେ ପୁରାଃ ସୁକୁ ଏମାଃଏ। ବିବେକ୍ଗି ଆମ୍କେ ହରମା ଓଡ଼ୋଃ ଆଟ୍କାର୍ଉରୁମ୍ ଆମ୍କେ ବାଞ୍ଚାଅମେୟାଁ। ଏନାତେ ଆମ୍ ଏତ୍କାନ୍ ହରାତେ ଓଡ଼ୋଃ ଚିଟା କାଜିତାନ୍ ହଡ଼କଆଃ ହେତେ ବାଞ୍ଚାଅମେୟାଁ। ଅକନ୍କ ବୁଗିନ୍ ହରାକେକ ବାଗିୟା, ଇନ୍କୁ ନୁବାଃରେୟାଃ ହରାରେକ ସେସେନା। ଅକନ୍କ ଏତ୍କାନ୍ କାମିରେ ରାସ୍କାୱାଃକ ଓଡ଼ୋଃ ଏତ୍କାନ୍ ହଡ଼କଆଃ ବେଦା କାଜିକତେ ରାସ୍କାୱାଃକ, ଅକନ୍କଆଃ ଚାଇଲ୍ ଚାଲାନ୍ ସେସେନ୍କ ଏଙ୍କବେଙ୍କ, ଏନ୍ ଲେକାନ୍ ଏତ୍କାନ୍ କାମିତାନ୍ ହରା ହେତେ ଆମାଃ ବାଞ୍ଚାଅ ହବାୱା।
ସେଣାଁ ଓଡ଼ୋଃ ସାରିଉରୁମ୍ ଆମ୍କେ ଏଟାଃ ନିୟାଃ କୁଡ଼ି ହେତେ ବାନ୍ଚାଅ ମେଁୟାଏ, ଏନ୍ କୁଡ଼ି ବେଦା କାଜିକ କାଜିୟାଏ, ଓଡ଼ୋଃ ଇନିଃ ଆୟାଃ ସେପେଡ଼େଦ୍ ରେୟାଃ ଗାତିକେ ବାଗି ତାଇୟା ଓଡ଼ୋଃ ଅକ୍ନାଃ ପାର୍ମେଶ୍ୱାର୍କେ ବାନାର୍ସା ଏମାକାଇ ତାଇକେନା ଏନା ରିଡ଼ିଙ୍ଗ୍ତାଃଏ। ଇନିୟାଃ ଅଡ଼ାଃ ଗନଏଃସାଃରେ ମେନାଃ ଓଡ଼ୋଃ ଇନିୟାଃ ହରା ଗଜାକାନ୍କଆଃ ଥାଲାରେ ସେଟେରା। ଜେତାଏ ଇନିୟାଃ ହେପାଦ୍ତେ ସେନା, ଇନିଃତାଃଏତେ ଜେତାଏ କାକ ରୁହାଡ଼୍ଆଃ ଓଡ଼ୋଃ ଇନ୍କୁ ଜୀଦାନ୍ ହରା ହଗି କାକ ନାମେୟା। ଏନାମେନ୍ତେ ଆମ୍ ବୁଗିନ୍ ହଡ଼କଆଃ ହରାରେ ସେନେମେ ଓଡ଼ୋଃ ଧାର୍ମାନ୍ ହଡ଼କଆଃ ହରାକେ ସାବାକାମେ। ଚିଆଃଚି ବୁଗିନ୍ ହଡ଼କ ଦିଶୁମ୍ରେ ତାଇନାଃକ ଓଡ଼ୋଃ କା ଚିଟାକାନ୍ ହଡ଼କ ଏନାରେ ତାଇନାଃକ। ମେନ୍ଦ ଏତ୍କାନ୍ ହଡ଼କ ଦିଶୁମ୍ ହେତେ ଜୀଅନଃଆକ ଓଡ଼ୋଃ ବେଦାତାନ୍କ ଏନା ହେତେ ତୁଦ୍ ଏଣ୍ଡାଗଃଆକ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.