Munda Bible
ବୁଗିନ୍ ଇନିତୁ 1
ବୁଗିନ୍ ଇନିତୁରାଃ ଗନଙ୍ଗ୍
ଦାଉଦ୍ଆଃ ହନ୍ ଇସ୍ରାଏଲ୍କଆଃ ରାଜା ସୁଲିମାନ୍ରାଃ ବୁଗିନ୍ ଇନିତୁ କାଜି,
ବୁଗିନ୍ ଇନିତୁକେ ପାଢ଼ାଅତାନ୍ନିଃ ସେଣାଁ ଓଡ଼ୋଃ ଇନିତୁ ନାମେୟା ଓଡ଼ୋଃ କା ଆଟ୍କାର୍ଉରୁମ୍ କାଜିକ ଆଟ୍କାର୍ଉରୁମ୍ ଦାଡ଼ିୟା। ବୁଗିନ୍ ଚାଇଲ୍ ଚାଲାନ୍, ଧାର୍ମାନ୍, ନ୍ୟାୟ ଓଡ଼ୋଃ ସାର୍ତି ବିଚାର୍ରେୟାଃ ସେଣାଁଏ ନାମେୟା। କା ସେଣାଁନ୍ ହଡ଼କେ ଚିର୍ଗାଲ୍ ରିକାଃଏ ଓଡ଼ୋଃ ସେପେଡ଼େଦ୍କେ ସେଣାଁ ଏମାଃଏ ଓଡ଼ୋଃ ଆଟ୍କାର୍ଉରୁମ୍ରେୟାଃ ବିବେକ୍ ଏମାଃଏ। ଜେ'ଲେକାଚି ସେଣାଁନ୍ ହଡ଼ ଏନା ଆୟୁମ୍ କେଦ୍ତେ ଆଡଃଗି ସେଣାଁ ନାମେୟାଏ ଓଡ଼ୋଃ ବୁଦ୍ଧିମାନ୍ ହଡ଼ ବୁଗିନ୍ ହରା ଉଦୁବ୍ନିଃ ହବାଅଃଆଏ, ଓଡ଼ୋଃ ବୁଗିନ୍ ଇନିତୁ କାଜି, ଜନକା କାଜି ଓଡ଼ୋଃ ପାଣ୍ଡିତ୍କଆଃ ଉକୁଆକାନ୍ କାଜିକ ସାରିଉରୁମ୍ ଦାଡ଼ିୟା।
ଡିଣ୍ଡା କଡ଼ା କୁଡ଼ିକଆଃ ନାଗେନ୍ତେ ଇନିତୁ
ପ୍ରାଭୁକେ ବରତେୟାଃ ସେଣାଁରେୟାଃ ଏନେଟେଦ୍ ତାନାଃ, ମେନ୍ଦ ଡଣ୍ଡ ହଡ଼ ସେଣାଁ ଓଡ଼ୋଃ ଇନିତୁକେ କାଏ ସୁକୁଆଃ।
ହେ ଆଇଁୟାଃ ହନ୍, ଆମାଃ ଆପୁରାଃ ଇନିତୁକେ ଆୟୁମେମ୍ ଓଡ଼ୋଃ ଆମାଃ ଏଙ୍ଗାରାଃ କାଜିକେ ଆଲମ୍ ବାଗିୟା। ଚିଆଃଚି ଏନା ଆମାଃ ବହଃ ନାଙ୍ଗ୍ ମାନାରାଙ୍ଗ୍ରାଃ ମୁକୁଟ୍ ଓଡ଼ୋଃ ହଟଃରାଃ ମାଲା ଲେକା ହବାୱା।
ହେ ଆଇଁୟାଃ ହନ୍, ପାପି ହଡ଼କ ଆମ୍କେ ବେଦାରେ, ଆମ୍ ଆକଆଃ କାଜିକେ ଆଲମ୍ ମାନାତିୟାଁଃ। ଇନ୍କୁ ଆମ୍କେ କାଜିରେଦ, ଆଲେଲଃ ହିଜୁଃମେ, ଆଲେ ଗଗଏଃ ନାଙ୍ଗ୍ ହରକେଦ୍ତେ ତାଇନାଲେ, ଗୁହ୍ନାଁ କା ରିକାକାଦ୍ ହଡ଼କେ ସାବ୍ ନାଗେନ୍ତେ ଉକୁକେଦ୍ତେ ତାଇନାଲେ। ଆଲେ ଇନ୍କୁକେ ପାତାଲ୍ ଲେକା ପୁରା ଜୀହିଦ୍ଗି ଉଦ୍କଆଲେ, ଓଡ଼ୋଃ ଇନ୍କୁକେ କାବାର୍ରେ ତାଇନ୍ତାନ୍ ଗଏଃ ହଡ଼ଲେକା ଜିଅନ୍କଆଲେ। ଏନାରେ ଆଲେ ସବେର୍ ଲେକାନ୍ ଗନଙ୍ଗ୍ଆଁନ୍ ଖୁର୍ଜି ନାମେୟାଁଲେ, ରେଜାକାନ୍ ଜିନିଷ୍ରେ ଆପ୍ନାଃ ଆପ୍ନାଃ ଅଡ଼ାଃରେ ପେରେଜେୟାଲେ। ଦେଲା, ଆମ୍ ଆଲେଲଃ ମେସାକେଦ୍ତେ ଚିଠା ଉୟୁଗେମେ ଓଡ଼ୋଃ ଆବୁଆଃ ସବେନ୍କଆଃ ମିଆଦ୍ଗି ଥାଇଲା ହବାୱା।
ହେ ଆଇଁୟାଃ ହନ୍, ଆମ୍ ଇନ୍କୁଲଃ ଏନ୍ ହରାରେ ଆଲମ୍ ସେନା, ଚାଏ ଇନ୍କୁଆଃ ହରାରେଗି ଆମାଃ କାଟା ଆଲମ୍ ଦହୟା। ଚିଆଃଚି ଇନ୍କୁଆଃ କାଟା ଏତ୍କାନ୍ କାମି ରିକାନାଙ୍ଗ୍ ନିର୍ ବାଡ଼ାଃଏ ଓଡ଼ୋଃ ଇନ୍କୁ ଗଗଏଃ ନାଙ୍ଗ୍ ଚିର୍ଗାଲ୍କାନ୍ ତାଇନାଃକ। ଚିଆଃଚି ଅଡ଼େରାଃ ମେଦ୍ ସାମ୍ନାଙ୍ଗ୍ରେ ଜାଲମ୍ ରୋପାଅତେୟାଃ ସାମାତାନାଃ। ଏନ୍ଲେକାଗି ଇନ୍କୁ ଆପ୍ନାଃଗି ମାୟୋମ୍ ଲିଙ୍ଗି ନାଙ୍ଗ୍ ହରକେଦ୍ତେ ତାଇନାକ ଓଡ଼ୋଃ ଆପ୍ନାଃଗି ଜୀଉକେ ଇଦିନାଙ୍ଗ୍ ଦାନାଙ୍ଗ୍ରେ ଉକୁଆକାନ୍ ତାଇନାକ। ଟାକା ପାଏସା ହାଏୟାତାନ୍ ସବେନ୍ ହଡ଼କଆଃ ହରା ନେଆଁଗି ତାନାଃ, ଏନା ଟାକା ପାଏସାରାଃ ଆକ୍ତେୟାର୍କଆଃ ଜୀଉ ଜିଅନ୍ ରିକାଃଏ।
ସେଣାଁ ରେୟାଃ କେନେଡ଼ା
ସେଣାଁ ହରାରେ କାଉରି ତାନ୍ଲଃ କାଜିୟା ଓଡ଼ୋଃ ଛାକ୍ରେ ଆୟାଃ ପାର୍ଚାର୍ ରିକାଏୟା। ଇନିଃ ହଡ଼ ହୁଣ୍ଡିୟଃତାନ୍ ଠାୟାଦ୍ରେ କାଉରିୟା ଓଡ଼ୋଃ ନାଗାର୍ରେୟାଃ ବଲଃ ଦୁଆର୍ କତାଃରେ ତିଙ୍ଗୁକେଦ୍ତେ କାଜିୟା,
“ହେ କା ସେଣାଁନ୍ ହଡ଼କ, ଚିମିନ୍ ଦିନ୍ ଜାକେଦ୍ ଡଣ୍ଡକେ ଦୁଲାଡ଼୍ ରିକାୟାପେ ? ହେ ଚିଟାତାନ୍ ହଡ଼କ, ଚିମିନ୍ ଦିନ୍ ଜାକେଦ୍ ଚିଟା କାଜିରେ ସୁକୁରେପେ ତାଇନାଃ ? ହେ ଡଣ୍ଡ ହଡ଼କ, ଓଡ଼ୋଃ ଚିମିନ୍ ଦିନ୍ ଜାକେଦ୍ ସେଣାଁଁକେ ହିଲାଙ୍ଗ୍ ରିକାୟାପେ ? ଆମ୍ ଆଇଁୟାଃ ଏଗେର୍ ଆୟୁମ୍ କେଦ୍ତେ ମନ୍ ରୁହାଡ଼େମେଁ; ଆୟୁମେମ୍, ଆଇଙ୍ଗ୍ ଆମାଃ ଚେତାନ୍ରେ ଆଇଁୟାଃ ଆତ୍ମା ଏମେୟାଇଙ୍ଗ୍, ଆଇଙ୍ଗ୍ ଆମ୍କେ ଆଇଁୟାଃ ବାଚାନ୍କେଇଙ୍ଗ୍ ଉଦୁବାମେୟାଁ। ଆଇଙ୍ଗ୍ ଆମ୍କେ ହାକାଅ କେଦ୍ମାଇଙ୍ଗ୍ ମେନ୍ଦ ଆମ୍ ମାନା କେଦାମ୍, ଓଡ଼ୋଃ ଆଇଙ୍ଗ୍ ତିଃଇ ପାସ୍ରାଅ କେଦାଇଙ୍ଗ୍ ମେନ୍ଦ ଜେତାଏ କାକ ନେଲ୍ ଉରୁମ୍କେଦା। ଆମ୍ ଆଇଁୟାଃ ସବେନ୍ ଇନିତୁକେ କାମ୍ ଆୟୁମ୍କେଦା ଓଡ଼ୋଃ ଆଇଁୟାଃ ଏଗେର୍କେ ଗନଙ୍ଗ୍ଆଁନ୍ କାମ୍ ଆଟ୍କାର୍କେଦା। ଏନାମେନ୍ତେ ଆଇଙ୍ଗ୍ହଗି ଆମାଃ ଦୁକୁ ସାମାଏରେ ଲାନ୍ଦାୟାଇଙ୍ଗ୍ ଓଡ଼ୋଃ ଚିମ୍ତାଙ୍ଗ୍ ଆମାଃ ଚେତାନ୍ରେ ଦୁକୁ ହିଜୁଃଆ ଇମ୍ତା ଲାନ୍ଦାମେୟାଁଇଙ୍ଗ୍। ଚିମ୍ତା ଦୁଦ୍ଗାର୍ ହୟ ଲେକା ଆମାଃରେ ସାଙ୍କାଟ୍ ହିଜୁଃଆ ଓଡ଼ୋଃ ହୁର୍ଲାସି ହୟ ଲେକା ସାଙ୍କାଟ୍ ହିଜୁଃଆ ଓଡ଼ୋଃ ଆମ୍ ଦୁକୁ ସାସାତିରେ ଉୟୁଗଃଆମ୍, ଏନ୍ ଦିପିଲିରେ ଇନ୍କୁ ଆଇଙ୍ଗ୍କେ କେଡ଼ାଇୟାଁକ ମେନ୍ଦ ଆଇଙ୍ଗ୍ କାଇଙ୍ଗ୍ ଆୟୁମେୟା। ଇନ୍କୁ ଆଇଙ୍ଗ୍କେ ପୁରାଃ ଜାତାନ୍ କେଦ୍ତେ ଦାଣାଁଁଇୟାଁକ ମେନ୍ଦ କାକ ନାମିୟାଁ। ଚିଆଃଚି ଇନ୍କୁ ସେଣାଁଁକେ ହିଲାଙ୍ଗ୍କେଦାକ ଓଡ଼ୋଃ ପ୍ରାଭୁଆଃ ବରକେ କାକ ସାଲାକେଦା। ଏନାମେନ୍ତେ ଆଇଁୟାଃ ଜେତାନ୍ ଇନିତୁ କାଜି କାକ ଆୟୁମ୍କେଦା ଓଡ଼ୋଃ ଆଇଁୟାଃ ସବେନ୍ ଏଗେର୍କେ ହୁଡିଙ୍ଗ୍ ଆଟ୍କାର୍କେଦାକ। ଏନାମେନ୍ତେ ଇନ୍କୁ ଆକଆଃ କାମିରେୟାଃ ନାଲାକ ନାମେୟା ଓଡ଼ୋଃ ଆପ୍ନାଃ ଆପ୍ନାଃ ଏତ୍କାନ୍ ଉନୁଦୁବ୍ ନାଗେନ୍ତେ ପୁରାଃ ଜ ନାମେୟାଁକ। କା ସେଣାଁନ୍ ହଡ଼କଆଃ ଏତ୍କାନ୍ ସେନ୍ ହରା ଇନ୍କୁକେ ଜୀଅନ୍କଆ ଓଡ଼ୋଃ ଡଣ୍ଡ ହଡ଼କ ଆକଆଃ ଆପ୍ନାଃ ଆତ୍ମାରାଃ ରିଜ୍ରାଙ୍ଗ୍ ଇନ୍କୁକେ ଜିଅନ୍କଆ। ମେନ୍ଦ ଅକଏ ଆଇଁୟାଃ କାଜି ଆୟୁମେୟା, ଇନିଃ ବୁଗିଲେକା ତାଇନାଃଏ ଓଡ଼ୋଃ ସାଙ୍କାଟ୍ ଇମ୍ତା ବେଗାର୍ ବରତେ ସୁକୁରେ ତାଇନାଃ।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.