Munda Bible
ବୁଗିନ୍ ଇନିତୁ 12
ଅକନ୍ ହଡ଼ କାଜି ମାନାତିଙ୍ଗ୍ ତାନାଏ, ଇନିଃ ସେଣାଁ କେ ଦୁଲାଡ଼୍ ରିକାଏ, ମେନ୍ଦ ଅକଏ ଏଗେର୍ କେ କାଏ ସୁକୁଃଆ, ଇନିଃ ଡଣ୍ଡ ତାନିଃ।
ପ୍ରାଭୁ ବୁଗିନ୍ ହଡ଼କଆଃ ନାଙ୍ଗ୍ ରାସ୍କାନା ମେନ୍ଦ ଏତ୍କାନ୍ ଉଡ଼ୁଃ କାମି ରିକାତାନ୍ ହଡ଼କକେ ଇନିଃ ଚିଟା କାଜିରେ ଉୟୁଃକଆ। ଜେତା ହଡ଼ ଏତ୍କାନ୍ କାମି ନାଗେନ୍ତେ କାଏ ତିଙ୍ଗୁ ଦାଡ଼ିୟା, ମେନ୍ଦ ଧାର୍ମାନ୍କଆଃ ବୁଟା ଚିଉଲାହ କା ଆତମଃଆ।
ବୁଗିନ୍ କୁଡ଼ି ଆୟାଃ କଡ଼ାରାଃ ମୁକୁଟ୍ ଲେକାନ୍ନିଃ ତାନିଃ, ମେନ୍ଦ ଗିହୁଗଃ କାମିତାନ୍ କୁଡ଼ି ଆୟାଃ କଡ଼ାରାଃ ଜାଙ୍ଗ୍ କକେ ଜିୟନ୍ ରିକାତାନ୍ ଲେକାନ୍ନିଃ ତାନିଃ।
ଧାର୍ମାନ୍ ହଡ଼କଆଃ ଉଡ଼ୁଃ ସବେନାଃ ବୁଗିନାଃ ତାନାଃ, ମେନ୍ଦ ଏତ୍କାନ୍ ହଡ଼କ ଅକ୍ନାଃ ଉଦୁବ୍ତେୟାଃ, ଏନା ବେଦା କାଜିକ ତାନାଃ।
ଏତ୍କାନ୍ ହଡ଼କ ମାଆଃ ଗଗଏଃ ନାଗେନ୍ତେ ମିଦ୍ତାଃରେ ଦୁବ୍କେଦ୍ତେ ଜାଗାର୍ ରିକାତେୟାଃ କାଜିୟାଃକ, ମେନ୍ଦ ସାର୍ତି ହଡ଼କ ଆକଆଃ ମଚାରେୟାଃ କାଜିତେ ବାନ୍ଚାଅ ରେୟାଃ କାମି ରିକାଃକ।
ଏତ୍କାନ୍ ହଡ଼କ ତୁଦ୍କେଦ୍ତେ ହୁରାଙ୍ଗ୍ ଏଣ୍ଡାଗଃଆକ ଓଡ଼ୋଃ ଇନ୍କୁ କାକ ତାଇନାଃ ମେନ୍ଦ ଧାର୍ମାନ୍ ହଡ଼କଆଃ ଅଡ଼ାଃ ଜାନାଅଗି ତାଇନାଃ।
ହଡ଼ ଆୟାଃ ବୁଗିନ୍ ସେଣାଁନ୍ ଲେକାତେ ମାଇନାନ୍ ନାମେୟା, ମେନ୍ଦ ଅକନ୍ ହଡ଼ ଆୟାଃ ମନ୍ସୁରୁଦ୍ରେ ଏତ୍କାନ୍ ଉଡ଼ୁଃ ରିକାଏଃ, ଇନିଃ ହିଲାଙ୍ଗ୍ଅଃଆଏ।
ଅକ ହଡ଼ତାଃରେ ଜମେୟାଁ ବାନଃଆ ଓଡ଼ୋଃ ଆପାନ୍କେ ମାରାଙ୍ଗ୍ ମେନ୍ତେ କାଜିନାଃ, ଏନ୍ ହଡ଼ତାଃଏତେ ଅକନ୍ ହଡ଼ ହିଲାଙ୍ଗ୍ଅଃଆଏ ଓଡ଼ୋଃ ଅକ ହଡ଼ତାଃରେ କାମ୍ଡ଼ିକ ମେନାକଆଃ ଏନ୍ ହଡ଼ ଧାଇନ୍ ତାନିଃ।
ଧାର୍ମାନ୍ ହଡ଼ ଆୟାଃ ଜାଁତୁକଆଃ ଜୀଉକେ ଜାତ୍ନାଅ ରିକାଃଏ, ମେନ୍ଦ ଏତ୍କାନ୍ ହଡ଼କଆଃ ମନ୍ରେ ଜେତାନ୍ ଦାୟା କା ତାଇନାଃ।
ଅକଏ ଆୟାଃ ଲୟଙ୍ଗ୍ ସିହୁଃ କାମି ରିକାଃଏ, ଇନିଃ ପୁରାଃ ଜଜମ୍ ନାମେୟା, ମେନ୍ଦ ଏତ୍କାନ୍ ହଡ଼ ଏତ୍କାନ୍ କାଜିରେ ତାଇନାଃ, ଚିୟାଃଚି ଇନିୟାଃ ସେଣାଁ ବାନଃଆ।
ଏତ୍କାନ୍ ହଡ଼, ଏତ୍କାନ୍ କାମିତାନ୍ ହଡ଼କଆଃ ଜାଲୋମ୍କେ ବୁଗିନ୍ ଆଟ୍କାରାଃ, ମେନ୍ଦ ଧାର୍ମାନ୍ ହଡ଼ କେଟେଦ୍ଗି ତିଙ୍ଗୁକେଦ୍ତେ ତାଇନାଃ।
ଏତ୍କାନ୍ ହଡ଼ ଆୟାଃ ଲାଚଡ଼ାଲଃ ଗୁହ୍ନାଁ ରିକାକେଦ୍ ହରାତେ ଫାଁସ୍ରିରେ ଉୟୁଗଃଆ, ମେନ୍ଦ ଧାର୍ମାନ୍ ହଡ଼ ସାଙ୍କାଟ୍ ହେତେ ବାଞ୍ଚାଅଃଆ।
ହଡ଼ ଆୟାଃ ମଚାରାଃ ଜ ହରାତେ ବୁଗିନ୍ ବିଷାଏତେ ବିୟଃଆ ଓଡ଼ୋଃ ତିଃଇରାଃ କାମି ହରାତେ ଇନିଃକେ ନାଲା ଏମଃଆ।
ଡଣ୍ଡ ହଡ଼ରାଃ ହରା ଆୟାଃ ଆପ୍ନାଃ ନେପେଲ୍ରେ ବୁଗିନାଃ ତାନାଃ, ମେନ୍ଦ ଅକଏ ସେଣାଁନ୍ନିଃ, ଇନିଃ ଉନୁଦୁବ୍କାଜି ଆୟୁମାଃଏ।
ଡଣ୍ଡ ହଡ଼ରାଃ ଏନେସେଦ୍ ବଦେଗି ନେଲଃଆ, ମେନ୍ଦ ଚାତୁର୍ ହଡ଼ ଗିହୁଃ କାଜିକେ ହାରୁବେୟା।
ଅକଏ ସାର୍ତି କାଜିୟାଏ, ଇନିଃ ଧାର୍ମାନ୍ନିଃ ପାତିୟାର୍ରଃ କାଜି ଉଦୁବ୍ ରିକାଃଏ, ମେନ୍ଦ ଅକଏ ହସଡ଼ ଗାୱା ଏମାଃଏ, ଇନିଃ ବେଦା କାଜି କାଜିୟାଏ।
ବେଗାର୍ ଉଡ଼ୁଃତେ ଜାଗାର୍ତାନ୍ ନିୟାଃ କାଜିକ ତାରାଉଡ଼ିଲଃ ମାଆଃତାନ୍ ଲେକାଃ, ମେନ୍ଦ ସେଣାଁନ୍ ନିୟାଃ କାଜିତେ ହଡ଼ ବୁଗିଅଃ ଲେକା ହବାଅଃଆ।
ମଚାତେ ସାର୍ତି କାଜିତାନ୍ ଆଲାଙ୍ଗ୍ ଜାନାଅଗି ତାଇନାଃ, ମେନ୍ଦ ବେଦା କାଜିତାନ୍ ଆଲାଙ୍ଗ୍ ହୁଡିଙ୍ଗ୍ ସାମାଏ ତାଇନାଃ।
ଏତ୍କାନ୍ ଉଡ଼ୁଃତାନ୍ ହଡ଼କଆଃ ମନ୍ସୁରୁଦ୍ରେ ବେଦା କାଜିକ ତାଇନାଃ, ମେନ୍ଦ ସୁକୁରେୟାଃ କାଜି ଉଦୁବ୍ତାନ୍ ହଡ଼କଆଃ ରାସ୍କା ହବାଅଃଆ।
ଧାର୍ମାନ୍ ହଡ଼ରେ ଜେତାନ୍ ସାଙ୍କାଟ୍ କା ହିଜୁଃଆ, ମେନ୍ଦ ଏତ୍କାନ୍ ହଡ଼ ପୁରାଃ ଏତ୍କାନ୍ କାଜିକରେ ପେରେଜଃଆ।
ପ୍ରାଭୁ, ବେଦା କାଜି କାଜିତାନ୍କକେ ହିଲାଙ୍ଗ୍ଆଁ। ମେନ୍ଦ ଅକନ୍କ ସାର୍ତି କାଜିକେଦ୍ତେ, ଏନ୍ଲେକା କାମି ରିକାଃକ, ଇନ୍କୁ ଆୟାଃ ନାଗେନ୍ତେ ସୁକୁଆନ୍କ ତାନ୍କ ।
ଚାତୁର୍ ହଡ଼ ଆୟାଃ ସେଣାଁଁକେ କାଏ ଉଦୁବାଃ, ମେନ୍ଦ ଡଣ୍ଡ ହଡ଼ ଆୟାଃ ମନ୍ରାଃ କାଜିକେ କାଉରି ତାନ୍ଲଃ ଉଦୁବାଃ।
କାମିତାନ୍ ହଡ଼କ ରାଇଜ୍ ରିକାଏୟାକ, ମେନ୍ଦ କୁଢ଼ି ହଡ଼ ଦାସି ବାଇମେୟାଁ।
ହଡ଼ରାଃ ପାହାମ୍ କାଜିକ ମନ୍କେ ହୁଡିଙ୍ଗ୍ ରିକାଃଏ, ମେନ୍ଦ ସୁଗାଡ଼ାନ୍ କାଜି ଇନିଃକେ ରାସ୍କା ଏମାଇୟା।
ଧାର୍ମାନ୍ ହଡ଼ ଆୟାଃ ହୋପର୍ଜାପାଃନିୟାଃ ହରା ଉଦୁବ୍ନିଃ ତାନିଃ, ମେନ୍ଦ ଏତ୍କାନ୍ ହଡ଼କଆଃ ହରା ଇନ୍କୁକେ ଏଟାଃ ହରାତେ ଇଦିକଆ।
ଆଲ୍ସି ହଡ଼ ସାଙ୍ଗାର୍କେଦ୍ତେ ଆଉକାଦ୍ ଜାଁତୁରାଃ ମାସ୍ କାଏ ଆନ୍ଦାଃଏୟା, ମେନ୍ଦ କେଟେଦ୍ କାମିତାନ୍ ହଡ଼ ପୁରାଃ ଗନଙ୍ଗ୍ଆଁନ୍ ସାମ୍ପାତି ନାମେୟା।
ଧାର୍ମାନ୍ ହରାରେ ଜୀଦାନ୍ ତାଇନାଃ ଓଡ଼ୋଃ ଏନ୍ ସେନ୍ ହରାରେ ଗନଏଃ କା ତାଇନାଃ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.