Munda Bible
ବୁଗିନ୍ ଇନିତୁ 13
ସେଣାଁନ୍ ହନ୍
ସେଣାଁନ୍ ହନ୍ ଆପୁରାଃ ଉଦୁବ୍କାଜି ଆୟୁମାଃଏ, ମେନ୍ଦ ନିନ୍ଦା ରିକାଏନିଃ ଚେତାଅ କାଜି କାଏ ଆୟୁମାଃ।
ମାନୱା ଆୟାଃ ମଚାରାଃ କାଜି ହରାତେ ବୁଗିନ୍ ବିଷାଏକ ନାମାଃଏ, ମେନ୍ଦ କା ପାତିୟାରଃ ହଡ଼ରାଃ ଜୀଉ ପୁରାଃ ଏତ୍କାନ୍ କାମିତେ ପେରେୟାକାନା।
ଅକଏ ଆୟାଃ ମଚାରେ ଲାଗାମ୍ ଦହାଃଏ, ଇନିଃ ଆୟାଃ ଜୀଉକେ ବାଞ୍ଚାଅ ରିକାଃଏ, ମେନ୍ଦ ଅକଏ କା ଉଡ଼ୁଃ କେଦ୍ତେ କାଜିୟାଃଏ, ଇନିଃ ଆୟାଃ ଜୀଉକେ ଜୀଅନେୟା।
ଆଲ୍ସି ହଡ଼ ଆୟାଃ ଇଛାସାନାଙ୍ଗ୍ ଲେକାତେ ରିକାଏ ରେୟ ଜେତ୍ନାଃ କାଏ ନାମାଃ, ମେନ୍ଦ କାମିତାନ୍ ହଡ଼ରାଃ ଜୀଉରେ ଇଛାସାନାଙ୍ଗ୍ ପୁରାଅଃଆ।
ଧାର୍ମାନ୍ ହଡ଼ ବେଦା କାଜିକେ ହିସିଙ୍ଗା ରିକାଃଏ, ମେନ୍ଦ ଏତ୍କାନ୍ ହଡ଼ ସିତ୍ରୁ ସହାନ୍ତାନ୍ ଲେକାନ୍ନିଃ ତାନିଃ ଓଡ଼ୋଃ ଇନିଃ ଗିହୁଗଃଆଏ।
ସାର୍ତି ହରାରେ ସେସେନ୍ତାନ୍ ନିଃକେ ଆୟାଃ ଧାର୍ମାନ୍ ବାଞ୍ଚାଅ ରିକାଃଏ, ମେନ୍ଦ ଏତ୍କାନ୍କାଜି ପାପି ହଡ଼କେ ଜିୟନ୍ ରିକାଃଏ।
ଚିମିନ୍କ ଆପାନ୍କେ କିସାଁଣ୍ ମେନ୍ତେ କାଜିୟାଃକ, ମେନ୍ଦ ଆକତାଃରେ ଜେତ୍ନାଃ କା ତାଇନାଃ ଓଡ଼ୋଃ ଚିମିନ୍କ ଆପାନ୍କେ ଗାରିବ୍ ମେନ୍ତେ ଉଦୁବାଃକ, ମେନ୍ଦ ଆକତାଃରେ ପୁରାଃ ଖୁର୍ଜି ମେନାଃ।
ହଡ଼ ଆୟାଃ ଜୀଉ ବାଦ୍ଲାରେ ଖୁର୍ଜି ଏମ୍ ଦାଡ଼ିୟାଏ, ମେନ୍ଦ ଗାରିବ୍ ହଡ଼ ଜେତାନ୍ ବତଙ୍ଗ୍ କାଜି କାଏ ଆୟୁମାଃ।
ଧାର୍ମାନ୍ ହଡ଼ରାଃ ମାସ୍କାଲ୍ ସୁକୁ ଏମାଃଏ, ମେନ୍ଦ ଏତ୍କାନ୍ ହଡ଼ରାଃ ଦିଆ ଇଣିଁଜଃଆ।
ହିସିଙ୍ଗା କାଜିକ ଏତେ ଏସ୍କାର୍ ଏପେଗେର୍ ହବାଅଃଆ। ମେନ୍ଦ ଉନୁଦୁବ୍କାଜି ତେଲାଏତାନ୍ ହଡ଼ତାଃରେ ସେଣାଁ ମେନାଃ।
ବେଦାତେ କାମିୟାକାନ୍ ଖୁର୍ଜି ଜିୟନ୍ ହବାଅଃଆ, ମେନ୍ଦ ତିଃଇତେ କେଟେଃ କାମି କାମିୟାକାନ୍ ଖୁର୍ଜି ପସା ଇଦିୟଃଆ।
ଚିମ୍ତାଙ୍ଗ୍ ଆସ୍ରା ପୁରାଅଃ ନାଙ୍ଗ୍ ହେଡ଼ା ହବାଅଃଆ, ଇମ୍ତା ମନ୍ରେ ଦୁକୁ ଆଟ୍କାରଃଆ, ମେନ୍ଦ ଚିମ୍ତାଙ୍ଗ୍ ମନ୍ରେୟାଃ ସାନାଙ୍ଗ୍ ପୁରାଅଃଆ, ଇମ୍ତାଙ୍ଗ୍ ଏନା ଜୀଦାନ୍ ଦାରୁ ଲେକା ହବାଅଃଆ।
ଅକନ୍ ହଡ଼ ପାର୍ମେଶ୍ୱାର୍ଆଃ ଇନିତୁ କାଜିକେ ହିଲାଙ୍ଗ୍ ରିକାଃଏ, ଇନିଃ ଆୟାଃ ଚେତାନ୍ରେ ସିଗିଦ୍ ଆଉୱାଃଏ। ମେନ୍ଦ ଅକଏ ଆନ୍ଚୁକେ ବର ତାନାଏ, ଇନିଃ ନାଲା ନାମେୟାଏ।
ସେଣାଁନ୍ ହଡ଼କଆଃ ଇନିତୁ ଜୀଦାନ୍ରେୟାଃ ସେତେଙ୍ଗ୍ ତାନାଃ ଓଡ଼ୋଃ ଏନାତେ ହଡ଼ ଗନଏଃରେୟାଃ ଜାଲମ୍ ହେତେ ଆୟାଃ ଜୀଉକେ ବାଞ୍ଚାଅ ଦାଡ଼ିୟା।
ବୁଗିନ୍ ସେଣାଁରେୟାଃ ଜ ସାୟାଦ୍ ତାନାଃ। ମେନ୍ଦ ପାତିୟାର୍ତେ ଅକଏ କାଏ ସେସେନା, ଇନିୟାଃ ହରା କେଟେଃଗିୟା।
ଚାତୁର୍ ହଡ଼ ସେଣାଁତେ କାମି ରିକାଃଏ, ମେନ୍ଦ ଡଣ୍ଡ ହଡ଼ ଆୟାଃ ଡଣ୍ଡ କାଜିକ ପାସ୍ରାଅ ରିକାଃଏ।
ଏତ୍କାନ୍ କାଜି ଏମଃନିଃ ସାଙ୍କାଟ୍ରେ ଉୟୁଗଃଆ, ମେନ୍ଦ ପାତିୟାରଃ କାଜି ଏମଃନିଃ ବୁଗିୟଃରେୟାଃ ହରା ଆଉୱାଃଏ।
ଅକଏ ଇନିତୁକେ କାଏ ଆୟୁମାଃ, ଇନିଃ ଗାରିବ୍ ଓଡ଼ୋଃ ଗିହୁଃ ନାମାଃ, ମେନ୍ଦ ଅକଏ ଏଗେର୍ ଆୟୁମ୍କେଦ୍ତେ ମାନାତିଙ୍ଗ୍ ରିକାଃଏ, ଇନିଃ ମାଇନ୍ ନାମେୟାଏ।
ମନ୍ସୁରୁଦ୍ରାଃ ଇଛାସାନାଙ୍ଗ୍ ପୁରା ହବାଅଃରେ ଜୀଉକେ ସିବିଲ୍ ଆଟ୍କାରାଃ, ମେନ୍ଦ ଡଣ୍ଡ ହଡ଼ ଏତ୍କାନ୍ କାମିକେ ବାଗି ନାଙ୍ଗ୍ ହିଲାଙ୍ଗ୍ ଆଟ୍କାରିୟା।
ସେଣାଁନ୍ ହଡ଼ଲଃ ସାଙ୍ଗାତିରେ ତାଇନ୍ରେ ଆମ୍ ସେଣାଁନ୍ ହବାଅଃଆମ୍, ମେନ୍ଦ ଡଣ୍ଡ ହଡ଼ଲଃ ସାଙ୍ଗାତିରେ ତାଇନ୍ରେ ସିଗିଦ୍ ନାମେୟାମ୍।
ପାପି ହଡ଼କଆଃ ଦୟାରେ ଏତ୍କାନ୍ କାଜି ଅତଙ୍ଗ୍ଆଃଏ, ମେନ୍ଦ ଧାର୍ମାନ୍ ହଡ଼କକେ ସାୟାଦ୍ରେୟାଃ ବୁଗିନ୍ ଜ ନାମଃଆ।
ବୁଗିନ୍ ହଡ଼ ଆୟାଃ ଜାଇହନ୍କ ନାଗେନ୍ତେ ଖୁର୍ଜିକ ବାଗିକେଦ୍ତେ ସେନାଃଏ, ମେନ୍ଦ ପାପିକଆଃ ଖୁର୍ଜି ଧାର୍ମାନ୍ ହଡ଼କଆଃ ନାଗେନ୍ତେ ହୁଣ୍ଡିୟଃଆ।
ଗାରିବ୍ ହଡ଼ରାଃ ଲୟଙ୍ଗ୍ କାମି ହରାତେ ଜମେୟାଃ ପୁରାଃ ନାମଃଆ। ମେନ୍ଦ ଅନ୍ୟାୟ କାମି ରିକା ହରାତେ ଚିମିନ୍ ହଡ଼କଆଃ ଜୀଅନ୍ ହବାଅଃଆ।
ଅକଏ ଆୟାଃ ହନ୍ ଚେତାନ୍ରେ ସଟା କାଏ ବେଭାର୍ତାନା, ଇନିଃ ଆୟାଃ ହନ୍କେ ହିଲାଙ୍ଗ୍ ତାନା, ମେନ୍ଦ ଅକଏ ଆୟାଃ ହନ୍କେ ଦୁଲାଡ଼ି ତାନା, ଇନିଃ ଠାଉକା ସାମାଏରେ ସୁଧ୍ରାଅ ନାଙ୍ଗ୍ ସାଜାଇ ଏମାଇୟାଏ।
ଧାର୍ମାନ୍ ହଡ଼ ଲାହିଦ୍ ପେରେଜଃ ଜାକେଦ୍ ଜମାଃଏ, ମେନ୍ଦ ଏତ୍କାନ୍ ହଡ଼କଆଃ ଲାହିଦ୍ ରେଙ୍ଗେଃଗି ତାଇନାଃ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.