Munda Bible
ବୁଗିନ୍ ଇନିତୁ 14
ସେଣାଁନ୍ କୁଡ଼ି ଆୟାଃ ଅଡ଼ାଃକେ ବାଇୟାଃଏ, ମେନ୍ଦ ଡଣ୍ଡ କୁଡ଼ି ଏନ୍ ଅଡ଼ାଃକେ ଆୟାଃ ତିଃଇତେ ହାଦୁଡ଼୍ତାଃ।
ଅକେୟାଃ ସେସେନ୍ ହରାକ ବୁଗିନ୍ଗି ତାଇନାଃ, ଇନିଃ ପ୍ରାଭୁକେ ବରଆଃଏ, ମେନ୍ଦ ଅକଏ ଏତ୍କାନ୍ ହରାରେ ସେସେନାଃ ଇନିଃ ପ୍ରାଭୁକେ ହିଲାଙ୍ଗ୍ଆଃ।
ଡଣ୍ଡ ହଡ଼ରାଃ ମଚାରେ ହିସିଙ୍ଗା କାଜିକ ତାଇନାଃ, ମେନ୍ଦ ସେଣାଁନ୍ ହଡ଼କଆଃ ମଚା ଇନ୍କୁକେ ବାଞ୍ଚାଅକଆ।
ଉରିକ୍ କା ତାଇନ୍ରେ ଡାଡାକା ଫାର୍ଚିଗି ତାଇନାଃ, ମେନ୍ଦ ଉରିକ୍ରାଃ ପେଡ଼େଃତେ ପୁରାଃ ଖୁର୍ଜି ହୁଇନାଃ।
ପାତିୟାରଃ ଗାୱା ହସଡ଼ କାଏ କାଜିୟାଃ, ମେନ୍ଦ ହସଡ଼ ଗାୱା ଏମଃନିଃ ହସଡ଼ କାଜି କାଜିୟା।
ଏଟାଃକକେ ଲାନ୍ଦାତାନ୍ ହଡ଼ ସେଣାଁ ଦାଣାଁଏ ରେଦ କାଏ ନାମେୟାଃ, ମେନ୍ଦ ସେଣାଁନ୍ ହଡ଼ ନାଗେନ୍ତେ ସେଣାଁ ନାମେ ନାଙ୍ଗ୍ ରାୱାଲ୍ଗିୟା।
ଡଣ୍ଡ ହଡ଼ରାଃ ହେପାଦ୍ତେ ସେନ୍ରେ, ଆମ୍ ଇନିଃତାଃଏତେ ଜେତାନ୍ ସେଣାଁ କାମ୍ ନାମେୟା।
ଚାତୁର୍ ହଡ଼ ସେଣାଁତେ ଆୟାଃ ହରା ସାରିଉରୁମ୍ ରିକାଃଏ, ମେନ୍ଦ ଡଣ୍ଡ ହଡ଼ରାଃ ବେଦାତେୟାଃ ଡଣ୍ଡଗି ତାନାଃ।
ଡଣ୍ଡ ହଡ଼କ ଚିଟା କାଜିକେ ଲାନ୍ଦା କାଜି ଲେକା ଆଟ୍କାରାଃକ, ମେନ୍ଦ ବୁଗିନ୍ ହଡ଼କଆଃ ଥାଲାରେ ଲିନିବୁଇ ତାଇନାଃ।
ମନ୍ସୁରୁଦ୍ ଆୟାଃ ଦୁକୁକେ ଆଇଃକ୍ଗି ସାରିୟା ଓଡ଼ୋଃ କା ଚିହ୍ନାର୍ ହଡ଼ ଇନିୟାଃ ରାସ୍କାରେ ଜେତାଲେକାତେ ଏନାରେୟାଃ ହିସା କାଏ ହବାଅଃଆ।
ଏତ୍କାନ୍ ହଡ଼ରାଃ ଅଡ଼ାଃ ଜିୟନ୍କଆଃ, ମେନ୍ଦ ବୁଗିନ୍ ହଡ଼ରାଃ କୁମ୍ବା ତିଙ୍ଗୁକେଦ୍ତେ ତାଇନାଃ।
ହଡ଼ରାଃ ମେଦ୍ରେ ଚିମିନ୍ ହରାକ ଠାଉକାଗି ନେଲଃଆ, ମେନ୍ଦ ଏନାରାଃ ଟୁଣ୍ଡୁରେ ଗନଏଃରାଃ ହରା ତାଇନାଃ।
ଲାନ୍ଦା ସାମାଏ ରେୟଗି ମନ୍ସୁରୁଦ୍ ଦୁକୁ ତାଇନାଃ ଓଡ଼ୋଃ ରାସ୍କାରେୟାଃ ଟୁଣ୍ଡୁରେ ଏୟମ୍ ତାଇନାଃ।
ଏତ୍କାନ୍ ହଡ଼ ଆୟାଃ କାମି ଲେକାତେ ନାଲା ନାମେୟା ଓଡ଼ୋଃ ବୁଗିନ୍ ହଡ଼ ଆୟାଃ କାମିରେୟାଃ ବୁଗିନ୍ ନାଲା ନାମେୟା।
କା ସେଣାଁନ୍ ହଡ଼ ସବେନ୍ ବିଷାଏକେ ବିଶ୍ୱାସ୍ ରିକାଃଏ, ମେନ୍ଦ ଚାତୁର୍ ହଡ଼ ଆପ୍ନାଃ ସବେନ୍ ସେସେନ୍ ହରାକେ ବୁଗିଲେକାତେ ସାରିଉରୁମ୍ ରିକାଃଏ।
ସେଣାଁନ୍ ହଡ଼ ବରତାନ୍ଲଃ ଏତ୍କାନ୍ ହେତେ ସାଙ୍ଗିନ୍ତେ ନିରାଃଏ, ମେନ୍ଦ ଡଣ୍ଡ ହଡ଼ ଢିଟ୍ଗି ତିଙ୍ଗୁ କେଟେଃଦ୍ କେଦ୍ତେ କାମିୟା।
ଅକଏ ଜାଲ୍ଦିଗି ରିସ୍ମି କଆଃଏ, ଇନିଃ ଡଣ୍ଡ କାମି ରିକାଃଏ ଓଡ଼ୋଃ ଏତ୍କାନ୍ ଉଡ଼ୁଃତାନ୍ ହଡ଼ ହିଲାଙ୍ଗ୍ଅଃଆଏ।
କା ସେଣାଁନ୍ ହଡ଼କ ଡଣ୍ଡରେୟାଃ ଆକ୍ତେୟାର୍ ନାମାଃକ, ମେନ୍ଦ ଚାତୁର୍ ହଡ଼କ ସେଣାଁନ୍ ରେୟାଃ ମୁକୁଟ୍ ତୁସିଙ୍ଗ୍ଅଃଆକ।
କା ବୁଗିନ୍ ହଡ଼କ ବୁଗିନ୍ ହଡ଼କଆଃ ଆୟାର୍ରେ ଓଡ଼ୋଃ ଏତ୍କାନ୍ ହଡ଼କ ଧାର୍ମାନ୍ ହଡ଼କଆଃ ଦୁଆର୍ରେ ଇକ୍ଡ଼ୁମେୟାଁକ।
ଗାରିବ୍ ଆୟାଃ ହୋପର୍ଜାପାଃନିୟାଃ ହରାତେ ହିଲାଙ୍ଗ୍ଅଃଆ, ମେନ୍ଦ କିସାଁଣ୍ ହଡ଼ରାଃ ପୁରାଃ ଦୁଲାଡ଼୍ ଗାତିକ ତାଇନାଃ।
ଅକନ୍ ହଡ଼ ଆୟାଃ ହୋପର୍ଜାପାଃନିଃକେ ହିଲାଙ୍ଗ୍ ରିକାଃଏ, ଇନିଃ ପାପ୍ ରିକାଃଏ, ମେନ୍ଦ ଅକନ୍ ହଡ଼ ଗାରିବ୍କେ ଲିବୁଇ ରିକାଃଏ, ଇନିଃ ଧାଇନ୍ ତାନିଃ।
ଏତ୍କାନ୍ ଉଡ଼ୁଃତାନ୍କ ଚିଆଃ କାକ ଆଦଃଆ ? ମେନ୍ଦ ବୁଗିନ୍ ଉଡ଼ୁଃତାନ୍କ ନାଙ୍ଗ୍ ଦାୟା ଓଡ଼ୋଃ ସାର୍ତି ହବାଅଃଆ।
ସବେନ୍ ଲେକାନ୍ କେଟେଃ କାମି ରିକାଲେରେ ଜ ନାମଃଆ, ମେନ୍ଦ କା କାମିକେଦ୍ତେ ମଚାତେ ଏସ୍କାର୍ କାଜିଲେରେ ଗାରିବ୍ ହିଜୁଃଆ।
ସେଣାଁନ୍ ହଡ଼କଆଃ ମୁକୁଟ୍ ଖୁର୍ଜି ତାନାଃ, ଓଡ଼ୋଃ ଡଣ୍ଡ ହଡ଼କଆଃ ନାଗେନ୍ତେ ଡଣ୍ଡ ଏସ୍କାର୍ ମେନାଃ।
ସାର୍ତି ଗାୱା ଜୀଦାନ୍ ବାନ୍ଚାଅ ରିକାଃଏ, ମେନ୍ଦ ବେଦା କାଜିନିଃ ବେଦା ରିକାଃଏ।
ପ୍ରାଭୁଆଃ ବିଷାଏରେୟାଃ ବରଗି କେଟେଃ ବିଶ୍ୱାସ୍ ତାନାଃ ଓଡ଼ୋଃ ଆୟାଃ ହନ୍କ ତାଇନଃ ଠାୟାଦ୍କ ନାମେୟା।
ପ୍ରାଭୁଆଃ ବିଷାଏରେୟାଃ ବରଗି ଗନଏଃ ରେୟାଃ ଜାଲମ୍ ହେତେ ବାନ୍ଚାଅ ନାଙ୍ଗ୍ ଜୀଦାନ୍ରାଃ ମିଆଦ୍ ସେତେଙ୍ଗ୍ ତାନାଃ।
ହଡ଼କ ଜାତ୍କା ହବାଅଃରେ ରାଜାରାଃ ମାନାରାଙ୍ଗ୍ ହବାଅଃଆ, ମେନ୍ଦ ହଡ଼କ କାମ୍ତିୟଃରେ ରାଜାରାଃ ଜୀଅନ୍ ହବାଅଃଆ।
ଅକଏ ଜାଲ୍ଦି କାଏ ଖିସ୍ଅଃଆ, ଇନିଃ ପୁରାଃ ବୁଦ୍ଧିମାନ୍ନିଃ ତାନିଃ, ମେନ୍ଦ ଅକଏ ଜାଲ୍ଦିଗି ଖିସ୍ଅଃନିଃ ଆୟାଃ ଡଣ୍ଡକେ ପସାଏୟା।
ସୁକୁ ମନ୍ସୁରୁଦ୍ ହଡ଼୍ମରାଃ ଜୀଦାନ୍ ଲେକ୍ନାଃ ତାନା, ମେନ୍ଦ ହିସିଙ୍ଗାରେୟାଃ କାଜି ଜାଙ୍ଗ୍କେ ନାରାଦୁରା ରିକାଃଏ।
ଅକଏ ଗାରିବ୍କକେ ସାସାତିକଆଃ, ଇନିଃ ଆୟାଃ ବାବାଇନିଃକେ ନିନ୍ଦା ରିକାଃ, ମେନ୍ଦ ଅକଏ ଇନିଃକେ ମାଇନ୍ ରିକାଃଏ, ଇନିଃ ଗାରିବ୍କକେ ଦାୟା ରିକାଃଏ।
ଏତ୍କାନ୍ ହଡ଼ ଆୟାଃ ଏତ୍କାନ୍ କାମି ନାଗେନ୍ତେ ହାର୍ଅଡଙ୍ଗ୍ଅଃଆ, ମେନ୍ଦ ଧାର୍ମାନ୍ ହଡ଼ ଆୟାଃ ଗନଏଃ ହବାଅଃରେୟ ଆସ୍ରା ତାଇନାଃ।
ସେଣାଁ ବୁଦ୍ଧିମାନ୍ ହଡ଼ରାଃ ମନ୍ସୁରୁଦ୍ରେ ତାଇନାଃ, ମେନ୍ଦ ଡଣ୍ଡ ହଡ଼ରାଃ ଥାଲାରେ ସାରିୟଃଆ।
ଧାର୍ମାନ୍ ହରାତେ ରାଇଜ୍ରେ ସବେନାଃ ହାରାପସା ଇଦିୟଃଆ, ମେନ୍ଦ ପାପ୍ ହଡ଼କ ନାଗେନ୍ତେ ନିନ୍ଦା ତାନାଃ।
ରାଜାରାଃ ଲିନିବୁଇ ସେଣାଁନ୍ ଦାସି ଚେତାନ୍ରେ ତାଇନାଃ, ମେନ୍ଦ ଅକଏ ଗିହୁଃ କାମି ରିକାଃଏ, ଇନିୟାଃ ଚେତାନ୍ରେ ଆୟାଃ ରିସ୍ମି ତାଇନାଃ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.