Munda Bible
ବୁଗିନ୍ ଇନିତୁ 15
ଲେବେୟାନ୍ କାଜି ଖିସ୍କେ ଆତମ୍ ରିକାଃଏ ମେନ୍ଦ କେଟେୟାନ୍ କାଜି ଖିସ୍କେ ଉସ୍କୁର୍ ରିକାଃଏ।
ସେଣାଁନ୍ ହଡ଼କଆଃ ଆଲାଙ୍ଗ୍, ସାର୍ତିରେୟାଃ ସେଣାଁଁ କାଜିକେ ଉଦୁବାଃ। ମେନ୍ଦ ଡଣ୍ଡକଆଃ ମଚା ହେତେ କା ସେଣାଁନ୍ କାଜିକ ଜାଗାର୍ ରିକାଃଏ।
ପ୍ରାଭୁଆଃ ମେଦ୍ ସବେନ୍ ଠାୟାଦ୍ରେ ତାଇନ୍କେଦ୍ତେ ବୁଗିନ୍ ଓଡ଼ୋଃ ଏତ୍କାନ୍ ହଡ଼କକେ ନେଲାଃଏ।
ଲେବେୟାନ୍ ଆଲାଙ୍ଗ୍ ଜୀଦାନ୍ରେୟାଃ ଦାରୁ ଲେକ୍ନାଃ ତାନାଃ, ମେନ୍ଦ କାପାଟ୍ କାଜି କାଜିତାନ୍ ଆଲାଙ୍ଗ୍ ଆତ୍ମାକେ ଦୁକୁ ଏମାଃଏ।
ଡଣ୍ଡ ଆୟାଃ ଆପୁରାଃ ଇନିତୁ କାଜିକେ କାଏ ଆୟୁମାଃ। ମେନ୍ଦ ଅକଏ ଏଗେର୍ କାଜି ଆୟୁମ୍ କେଦ୍ତେ ମାନାତିଙ୍ଗ୍ ତାନାଏ, ଇନିଃ ସେଣାଁ ନାମାଃଏ।
ଧାର୍ମାନ୍ରାଃ ଅଡ଼ାଃରେ ପୁରାଃ ଖୁର୍ଜିକ ତାଇନାଃ, ମେନ୍ଦ ଏତ୍କାନ୍ ହଡ଼ରାଃ ନାଲାରେ ଦୁକୁ ତାଇନାଃ।
ସେଣାଁନ୍ ହଡ଼ରାଃ ଆଲାଙ୍ଗ୍ ସେଣାଁନ୍ କାଜିକ ଉଦୁବାଃଏ, ମେନ୍ଦ ଡଣ୍ଡ ହଡ଼ରାଃ ମନ୍ସୁରୁଦ୍ ଏନ୍ଲେକା କାଏ ରିକାଃ।
ଏତ୍କାନ୍ ହଡ଼କଆଃ ଦାଣେଁକେ ପାର୍ମେଶ୍ୱାର୍ ହିଲାଙ୍ଗ୍ ରିକାଃଏ, ମେନ୍ଦ ଇନିଃ ବୁଗିନ୍ ମନ୍ରେନ୍ ହଡ଼କଆଃ ବିନ୍ତି ତେୟାଃକେ ସୁକୁଃଆ।
ଏତ୍କାନ୍ ହଡ଼କଆଃ ସେସେନ୍ ହରାକେ ପ୍ରାଭୁ ହିଲାଙ୍ଗ୍ ରିକାଃଏ, ମେନ୍ଦ ଅକଏ ଧାର୍ମାନ୍ ହରାରେ ସେସେନାଃ, ପାର୍ମେଶ୍ୱାର୍ ଇନିଃକେ ଦୁଲାଡ଼ିୟାଏ।
ଅକନ୍ ହଡ଼ ଏତ୍କାନ୍ ହରାରେ ସେସେନ୍ତାନାଏ ଇନିଃ ସାସାତି ନାମେୟା, ଓଡ଼ୋଃ ଅକନ୍ ହଡ଼ ଏଗେର୍ କାଜିକେ କାଏ ସୁକୁତାନା ଇନିଃ ଗଜଃଆ।
ହୁଆଙ୍ଗ୍ଗାଡ଼ା ଓଡ଼ୋଃ ଜିୟନଃ ଠାୟାଦ୍ ପ୍ରାଭୁଆଃ ଆୟାର୍ରେ କା ଉକୁଆକାନା, ତାବ୍ଦ ଚିଆଃ ମାନୱା ହଡ଼କଆଃ ମନ୍ସୁରୁଦ୍ ଆୟାଃତାଃରେ ଉକୁକେଦ୍ତେ ତାଇନାଃ ?
ଏଟାଃକକେ ଲାନ୍ଦାନିଃ ଏଗେର୍ କାଏ ସୁକୁଃଆ, ଇନିଃ ସେଣାଁନ୍ ହଡ଼ରାଃ ହେପାଦ୍ତେ କାଏ ସେନାଃ।
ସୁକୁ ମନ୍ସୁରୁଦ୍ ମେଦ୍ମୁହାଡ଼୍ କେ ରାସ୍କା ରିକାଃଏ, ମନ୍ରାଃ ଦୁକୁତେ ଆତ୍ମା ହଁ ଦୁକୁରେ ତାଇନ୍ ତାନାଃ।
ସେଣାଁନ୍ରାଃ ମନ୍ସୁରୁଦ୍ ସେଣାଁଁକେ ଦାଣାଁଏଃ, ମେନ୍ଦ ଡଣ୍ଡ ହଡ଼ ଆୟାଃ ଡଣ୍ଡ କାଜିତେ ଆୟାଃ ଲାହିଦ୍ ପେରେଜଃଆ।
ଦୁକୁ ହଡ଼ରାଃ ସବେର୍ ହୁଲାଙ୍ଗ୍ ଦୁକୁ ତାଇନାଃ, ମେନ୍ଦ ଅକେୟାଃ ମନ୍ସୁରୁଦ୍ ରାସ୍କା ତାଇନାଃ, ଇନିୟାଃ ସବେର୍ ଇମ୍ତା ଭୋଜିରେ ମେସାନା।
କା ବାପାଇକେଦ୍ତେ ପୁରାଃ ଖୁର୍ଜି ନାମ୍ତେୟାଃ ହେତେ ପ୍ରାଭୁଆଃ ବର ହୁଡିଙ୍ଗ୍ ଲେକା ତାଇନଃ ବୁଗିନ୍ ତାନାଃ।
ହିସିଙ୍ଗା କେଦ୍ତେ କିରିକାନ୍ ଉରିକ୍ ମାସ୍ ଜମ୍ ନାଙ୍ଗ୍ ଏମ୍ତେୟାଃ ହେତେ ଦୁଲାଡ଼୍ତେ ଏମାକାନ୍ ଆଡ଼ାଃ ସାକାମ୍ ଜମ୍ତେୟାଃ ପୁରାଃ ବୁଗିନ୍ ତାନାଃ।
ରିସ୍ମି ହଡ଼ ଏପ୍ରାଙ୍ଗ୍ ରିକାଃଏ, ମେନ୍ଦ ଅକଏ ମାଡ଼ିତେ ଖିସ୍ଅଃନିଃ, ଏପ୍ରାଙ୍ଗ୍କେ ହକାଏୟା।
ଆଲ୍ସି ହଡ଼ରାଃ ହରା ଜାନୁମ୍ରେୟାଃ କେସେଦ୍କାନ୍ ବାକ୍ଡ଼ି ଲେକା ତାନାଃ, ମେନ୍ଦ ବୁଗିନ୍ ମନ୍ରେନ୍ ହଡ଼ରାଃ ସେସେନ୍ ହରା ମାରାଙ୍ଗ୍ ଚାକାର୍ ହରା ଲେକା ବାଇୟାକାନା।
ମିଆଦ୍ ସେଣାଁନ୍ ହନ୍ ନାଗେନ୍ତେ ଆପୁ ରାସ୍କା ହବାଅଃଆ, ମେନ୍ଦ ଡଣ୍ଡ ଆୟାଃ ଏଙ୍ଗାତେକେ କାଏ ମାଇନ୍ ରିକା।
ଡଣ୍ଡ ହଡ଼ ଆୟାଃ ସେଣାଁ ବାନଃଆ ମେନ୍ତେ ରାସ୍କାନାଃ, ମେନ୍ଦ ସେଣାଁ ସାରିଉରୁମ୍ ହଡ଼ ସିଧା ହରାରେ ସେସେନାଃ।
ବୁଗିନ୍ ସାଲ୍ହା କା ତାଇନ୍ ହରାତେ ଉହାଟ୍କ କା ପୁରାଅଃଆ, ମେନ୍ଦ ପୁରାଃ ଏନ୍ କାମି ସାମା କା ଏଣ୍ଡାଗଃଆ।
ଆପାନ୍ ମଚା ରେୟାଃ କାଜିରୁହାଡ଼୍ ହରାତେ ମିଆଦ୍ ହଡ଼ ରାସ୍କାଅଃଆ। ଓଡ଼ୋଃ ଏନ୍ କାଜି ଠାଉକା ଦିପିଲିରେ କାଜିରେ ରାସ୍କା ନାମଃଆ ଓଡ଼ୋଃ ଏନା ବୁଗିନ୍ ତାନାଃ।
ସେଣାଁନ୍ ହଡ଼କଆଃ ଜୀଦାନ୍ ହରା ଚେତାନ୍ତେ ସେସେନାଃ। ଓଡ଼ୋଃ ଏନ୍ଲେକା ରିକା ହରାତେ ଇନ୍କୁ ହୁଆଙ୍ଗ୍ ଗାଡ଼ାରେ ଉୟୁଃ ଏତେ ବାଞ୍ଚାଅଃଆ।
ଅକଏ ଆପାନ୍କେ ମାରାଙ୍ଗ୍ୟେଁନ୍ ରିକାଏଃ, ପ୍ରାଭୁ ଇନିୟାଃ ଅଡ଼ାଃକେ ହାଦୁଡ଼େୟା, ମେନ୍ଦ ରାଣ୍ଡି କୁଡ଼ିରାଃ ସିମ୍ନାକେ କେଟେଃ ରିକାଃଏ।
ଏତ୍କାନ୍ ହଡ଼କଆଃ ଉଡ଼ୁଃକେ ପ୍ରାଭୁ ହିଲାଙ୍ଗ୍ ରିକାଏଃ, ମେନ୍ଦ ଫାର୍ଚି ମନ୍ସୁରୁଦ୍ ହଡ଼କଆଃ କାଜି ଜୀଉସୁକୁ ଏମାଃଏ।
ହାୟାନିଃ ଆୟାଃ ଅଡ଼ାଃରେନ୍ ହଡ଼କକେ ଦୁକୁ ଏମାଃଏ, ମେନ୍ଦ ଅକଏ ଘୁସ୍ରେୟାଃ ଟାକାକେ ହିଲାଙ୍ଗ୍ ରିକାଃଏ, ଇନିଃ ଜୀହିଦଃଆଏ।
ଧାର୍ମାନ୍ ହଡ଼ କାଜି ସିଦାରେ ଉଡ଼ୁଃୟା ଚି, ଚିନାଃ କାଜିୟା, ମେନ୍ଦ ଏତ୍କାନ୍ ହଡ଼କଆଃ ମଚା ଏତେ ଏତ୍କାନ୍ କାଜି ଅଡଙ୍ଗଃଆ।
ପ୍ରାଭୁ ଏତ୍କାନ୍ ହଡ଼କତାଃ ଏତେ ସାଙ୍ଗିନ୍ରେ ତାଇନାଃ, ମେନ୍ଦ ଇନିଃ ଧାର୍ମାନ୍କଆଃ ବିନ୍ତି ଆୟୁମାଃଏ।
ମେଦ୍ରେୟାଃ ମାର୍ସାଲ୍ ମନ୍ସୁରୁଦ୍କେ ରାସ୍କା ଏମାଃଏ, ମେନ୍ଦ ମିଆଦ୍ ବୁଗିନ୍ ସୁକୁକାଜି ହଡ଼୍ମରାଃ ଜାଙ୍ଗ୍କେ କେଟେଦ୍ ରିକାଃଏ।
ଅକନ୍ ଲୁତୁର୍ ଜୀଦାନ୍ ଏମଃ ଏଗେର୍ ଆୟୁମାଃଏ, ଇନିଃ ସେଣାଁନ୍କ ଥାଲାରେ ତାଇନାଃ।
ଅକନ୍ ହଡ଼ ବୁଗିନ୍ ହରାରେ ସେସେନ୍ ନାଗେନ୍ତେ ଇନିତୁ କାଏ ଆୟୁମାଃ ଇନିଃ ଆୟାଃ ଜୀଉକେ କାଏ ଦୁଲାଡ଼୍ତାନା, ମେନ୍ଦ ଅକଏ ଏଗେର୍ ଆୟୁମାଃଏ, ଇନିଃ ସେଣାଁ ନାମାଃଏ।
ପ୍ରାଭୁଆଃ ବିଷାଏରେୟାଃ ବର ସେଣାଁନ୍ ଲେକାନ୍ ଇନିତୁ ତାନାଃ ଓଡ଼ୋଃ ଲେବେଃ ମନ୍ରେନ୍ ହଡ଼କଆଃ ଆୟାର୍ରେ ମାଇନାନ୍ ତାଇନାଃ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.