Munda Bible
ବୁଗିନ୍ ଇନିତୁ 16
ମନ୍ସୁରୁଦ୍ ରେୟାଃ ପାହାମ୍ ହଡ଼ରାଃ ତାନା। ମେନ୍ଦ ଆଲାଙ୍ଗ୍ ରେୟାଃ କାଜିରୁହାଡ଼୍ ପାର୍ମେଶ୍ୱାର୍ଆଃ ହରାତେ ହୁଇନାଃ।
ହଡ଼ରାଃ ସବେନ୍ ଚାଇଲ୍ ଚାଲାନ୍ ଆୟାଃ ଆୟାର୍ରେ ଫାର୍ଚି ନେଲଃଆ, ମେନ୍ଦ ପାର୍ମେଶ୍ୱାର୍ ଆତ୍ମାକକେ ବିନିଡ଼ାଅ ରିକାଏ।
ଆମାଃ ପାହାମ୍ ରିକାକାଦ୍ ସବେନ୍ କାମିକକେ ପ୍ରାଭୁ ପାର୍ମେଶ୍ୱାର୍କେ ଏମାଇମେ, ଏନାରେ ଆମାଃ ପାହାମ୍ ରିକାକାଦ୍ କାମିକ ପୁରାଃ ହବାୱା।
ପ୍ରାଭୁ ସବେନ୍ ବିଷାଏକକେ ଆପ୍ନାଃ ଇଛା ସାନାଙ୍ଗ୍କେ ପୁରାଏ ନାଗେନ୍ତେ ରିକାକାଦା, ଏତ୍କାନ୍ନିଃକେ ହଁ ଏତ୍କାନ୍ ଦିପିଲି ନାଙ୍ଗ୍ ବାଇୟାକାନା।
ମନ୍ରେ ଘାମାଣ୍ଡ୍ ରିକାତାନ୍ ସବେନ୍ ହଡ଼କ ପ୍ରାଭୁଆଃ ଆୟାର୍ରେ ହିଲାଙ୍ଗ୍ନିଃ ଲେକା ହବାଅଃଆକ, ତିଃଇ ସାପାବ୍ ରେୟଗି ଇନ୍କୁ ସାଜାଇ କା ନାମ୍କେଦ୍ତେ କାକ ତାଇନାଃ।
ଦାୟା ଓଡ଼ୋଃ ସାର୍ତି ହରାତେ ପାପ୍ କାମି ଛାମାଅଃଆ, ଓଡ଼ୋଃ ପ୍ରାଭୁଆଃ ବରୱାନ୍ ବିଷାଏକେ ମାନାତିଙ୍ଗ୍ ହରାତେ ହଡ଼କ ଏତ୍କାନ୍ ବିଷାଏ ଏତେ ସାଙ୍ଗିନଃଆ।
ଚିମ୍ତାଙ୍ଗ୍ ହଡ଼ରାଃ ଚାଇଲ୍ ଚାଲାନ୍ ପ୍ରାଭୁ ସୁକୁଃତାନା ଇମ୍ତାଙ୍ଗ୍ ଇନିୟାଃ ବାଇରିକକେ ହଁ ଇନିଃଲଃ ସୁକୁତେ ତାଇନ୍ ନାଗେନ୍ତେ ଆଚୁକ ତାନାଏ।
କା ଧାର୍ମାନ୍ତେ ନାମାକାଦ୍ ପୁରାଃ ଖୁର୍ଜି ଏତେ ଧାର୍ମାନ୍ତେ କାଟିକାନ୍ ତାଇନ୍ତେୟାଃ ବୁଗିନ୍ ତାନାଃ।
ହଡ଼ ଆୟାଃ ମନ୍ସୁରୁଦ୍ରେ ଚିମିନ୍ ବିଷାଏକକେ ଉହାଟ୍ ରିକାଏ, ମେନ୍ଦ ପାର୍ମେଶ୍ୱାର୍ ଇନିୟାଃ ସେସେନ୍ ହରାକେ ସାଲାଏ।
ରାଜାରାଃ ମଚାରେ ଦାର୍ଶାନ୍ ନେନେଲ୍ ରେୟାଃ କାଜିକ ତାଇନ୍ତାନା, ଇନିୟାଃ ମଚା ବିଚାର୍ ରିକାତାନ୍ ଇମ୍ତା କା ପାତିୟାର୍ରଃ ବିଚାର୍ କାଏ ରିକାୟା।
ଅଜାନ୍ ରିକାତାନ୍ ସାର୍ତି ତାରାଜୁ, ଥାଇଲାରେ ତାଇକାନ୍ ବାଟ୍କାରା ଓଡ଼ୋଃ ସଙ୍ଗ୍ ରିକାତାନ୍ ସଟାକେ ପ୍ରାଭୁ ବାଇୟା କାଦାଏ।
ରାଜାକଆଃ ନାଗେନ୍ତେ ଏତ୍କାନ୍ କାମିତେୟାଃ ହିଲାଙ୍ଗ୍ କାଜିତାନାଃ, ଚିୟାଃଚି ଧାର୍ମାନ୍ତେ ରାଜ୍ଗାଦି ତିଙ୍ଗୁକେଦ୍ତେ ତାଇନାଃ।
ଧାର୍ମାନ୍ କାଜି କାଜିତାନ୍କକେ ରାଜା ସୁକୁଆଃଏ ଓଡ଼ୋଃ ଅକଏ ସାର୍ତିକାଜି କାଜିୟାଃ, ରାଜା ଇନିଃକେ ଦୁଲାଡ଼ାଃଏ।
ରାଜାରାଃ ଖିସ୍ ଗନଏଃରେନ୍ ଦୁଁତ୍ ଲେକ୍ନାଃ ତାନାଃ, ମେନ୍ଦ ସେଣାଁନ୍ ହଡ଼ ଏନାକେ ସୁକୁଇଚିୟା।
ରାଜାରାଃ ମନ୍ସୁରୁଦ୍ରେ ରାସ୍କା ତାଇନ୍ରେ ଜୀୱାନ୍ ତାଇନାଃ। ଇନିୟାଃ ସାୟାଦ୍ ରିମିଲ୍ ଏତେ ଲିଙ୍ଗିୟଃତାନ୍ ଟୁଣ୍ଡୁ ଦାଆଃ ଲେକ୍ନାଃ ତାନାଃ।
ସୋନା ଏତେ ସେଣାଁନ୍ ନାମ୍ତେୟାଃ ବୁଗିନ୍ ତାନାଃ ଓଡ଼ୋଃ ରୁପା ଏତେ ଆଟ୍କାର୍ଉରୁମ୍ ନାମ୍ତେୟାଃ ଚିମିନ୍ ବୁଗିନ୍ ବିଷାଏ ତାନାଃ।
ଏତ୍କାନ୍ ହରା ବାଗି ତେୟାଃ ବୁଗିନ୍ ହଡ଼କ ନାଗେନ୍ତେ ଠାଉକାନ୍ ବିଷାଏ ତାନାଃ। ଓଡ଼ୋଃ ଅକଏ ଆୟାଃ ହରାରେ ଚିର୍ଗାଲ୍କେଦ୍ତେ ସେସେନାଏ, ଇନିଃ ଆୟାଃ ଜୀଉକେ ବାଞ୍ଚାଅୟା।
ହିସିଙ୍ଗା ଜିୟନଃରେୟାଃ ଆୟାର୍ରେ ତାଇନାଃ। ଓଡ଼ୋଃ ଉୟୁଗଃ ସିଦାରେ ଆତ୍ମା ଘାମାଣ୍ଡ୍ ରିକାଃଏ।
ହିସିଙ୍ଗା ରିକାତାନ୍ ହଡ଼କଲଃ ରେରେଃକ୍ ଜିନିଷ୍କେ ହାଟିଙ୍ଗ୍ ବାଗିକେଦ୍ତେ ନାରାଦୁରା ଲେବେଃମନ୍ରେନ୍ ହଡ଼କଲଃ ତାଇନ୍ତେୟାଃ ବୁଗିନାଃ ତାନାଃ।
ଅକନ୍ ହଡ଼ ପ୍ରାଭୁଆଃ କାଜିକେ ବୁଗି ଲେକା ଆଟ୍କାର୍ଉରୁମ୍ ରିକାଃଏ, ଇନିୟାଃ ବୁଗିନ୍ ହବାଅଃଆ ଓଡ଼ୋଃ ଅକଏ ପ୍ରାଭୁତାଃରେ ଆସ୍ରା ଦହେତାନା, ଇନିଃ ଧାଇନ୍ ତାନିଃ।
ଅକଏ ମନ୍ରେ ସେଣାଁନ୍ ହଡ଼, ବୁଦ୍ଧିରେ ସାରିଉରୁମଃଆ ଓଡ଼ୋଃ ମଚାରେୟାଃ ହେଡ଼େମ୍ କାଜିତେ ସେଣାଁ ପସା ଇଦିୟଃଆ।
ଅକ ହଡ଼ରେ ଆଟ୍କାର୍ଉରୁମ୍ ମେନାଃ, ଇନିଃତାଃରେ ଜୀଦାନ୍ରେୟାଃ ସେତେଙ୍ଗ୍ ଲେକା ମେନାଃ, ମେନ୍ଦ ଡଣ୍ଡକଆଃ ସାସାତି କା ସେଣାଁରେୟାଃ ଇନିତୁ ତାନାଃ।
ସେଣାଁନ୍ ହଡ଼ରାଃ ମନ୍ସୁରୁଦ୍ ଆୟାଃ ମଚାକେ ଇନିତୁ ଏମାଃଏ। ଓଡ଼ୋଃ ଆୟାଃ ମଚା ସେଣାଁନ୍ କାଜି କାଜିୟା।
ସୁଗାଡ଼ାନ୍ କାଜି ହୁରୁମ୍ସୁକୁ ଲେକ୍ନାଃ ତାନାଃ, ଏନା ଜୀଉ ନାଗେନ୍ତେ ସିବିଲ୍ ଓଡ଼ୋଃ ଜାଙ୍ଗ୍ ନାଙ୍ଗ୍ ବୁଗିୟଃ ଲେକ୍ନାଃ ତାନାଃ।
ହଡ଼ରାଃ ଆୟାର୍ରେ ଚିମିନ୍ ହରାକ ସେସେନ୍ ନାଗେନ୍ତେ ବୁଗିନ୍ଗି ନେଲଃଆ, ମେନ୍ଦ ଏନାରାଃ ଟୁଣ୍ଡୁରେ ଗନଏଃ ତାଇନାଃ।
କାମିତାନ୍ ନିୟାଃ ରେଙ୍ଗେଃ, ଆଇଃକ୍କେ କାମିଇଚିୟା, ଚିଆଃଚି ଆୟାଃ ମଚା ଏନା ନାଙ୍ଗ୍ ଇନିଃକେ ରିକାଇଚିୟା।
ଏତ୍କାନ୍ ହଡ଼ ଏତ୍କାନ୍ ଉଡ଼ୁଃ ରିକାଃଏ ଓଡ଼ୋଃ ଇନିୟାଃ ମଚାରେ ଜୁଲଃତାନ୍ ସେଙ୍ଗେଲ୍ ଲେକା କାଜିକ ତାଇନାଃ।
ଲାଡ଼ାଇତାନ୍ ହଡ଼ ଲାଡ଼ାଇ ରେୟାଃ ହିତା ହେରାଃଏ। ଓଡ଼ୋଃ କାଜି କା ଆୟୁମ୍ନିଃ ବୁଗିନ୍ ଗାତିକକେ ବିନ୍ଗାଅ ରିକାଃଏ।
ସିଗିଦ୍ ରିକାତାନ୍ ହଡ଼ ଆୟାଃ ହୋପର୍ଜାପାଃନିଃକେ ହସଡ଼ କାଜି କାଜିକେଦ୍ତେ ଏତ୍କାନ୍ ହରାରେ ସୁତୁଃ ଇଦିୟା।
ଅକନ୍ ହଡ଼ ଏନ୍ଡ୍ରାଅ କେଦ୍ତେ ଆରିଦାଃଏ, ଇନିଃ କାପାଟ୍ କାଜି ଉଡ଼ୁଃ ରିକାଃଏ। ଅକନ୍ ହଡ଼ ଆୟାଃ ମଚାକେ ହାପାକେଦ୍ତେ ଦହୟା, ଇନିଃ ଏତ୍କାନ୍ କାମି ରିକାଃଏ।
ବହଃରେୟାଃ ଉବ୍ ପୁଣ୍ଡିୟାନ୍ରେ ଏନା ମାନାରାଙ୍ଗ୍ ରେୟାଃ ମୁକୁଟ୍ ଲେକ୍ନାଃ ତାନାଃ, ଏନା ଧାର୍ମାନ୍ ହରାରେ ନାମଃଆ।
ଅକଏ ଜାଲ୍ଦି କାଏ ଖିସ୍ଅଃଆ, ଇନିଃ ପେଡ଼େୟାନ୍ ହଡ଼ ହେତେ ହଁ ମାରାଙ୍ଗ୍ ତାନିଃ। ଓଡ଼ୋଃ ଜେତାଏ ଆପ୍ନାଃ ମନ୍ ଆତ୍ମାକେ ଆକ୍ତେୟାର୍ରେ ଦହୟା, ଇନିଃ ନାଗାର୍କେ ଜିନିତାଅ ହଡ଼ଏତେ ହଁଗି ମାରାଙ୍ଗ୍ ତାନିଃ।
ଜେତ୍ନାଃ ସାରିନାଙ୍ଗ୍ ଚିଠା ଉୟୁଗାଃକ, ମେନ୍ଦ ଏନାରାଃ ବିଚାର୍ ରିକାତେୟାଃ ପ୍ରାଭୁଆଃ ତିଃଇରେ ତାଇନାଃ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.