ଇତୁନିଆଃ

ରାଜା ସୁଲିମାନ୍‌ ଅଲାକାଦ୍‌

ଇତୁନିଆଃ ପୁଥି

ଇତୁଏମଃ ପୁଥିରାଃ ପାରିଚାଏ

ଇତୁନିୟାଃ ମିଆଦ୍‌ ପୁଥି ତାନାଃ, ଅକ୍‌ନାଃଚି ଜୀଦାନ୍‌ ନାଙ୍ଗ୍‌ ଇନିତୁ ଏମାଃଏ । ନେ ପୁଥିରାଃ ଏବ୍ରୀ ଜାଗାର୍‌ରେୟାଃ ମୁଣ୍ଡି ହବାଅଃତାନା, “ଅକଏ ହଡ଼କକେ ମିଦ୍‌ତାଃ ହୁଣ୍ଡିକଆ” । ପୁରାଃ ବାଇବେଲ୍‌ ପାଣ୍ଡିତ୍‌କ ବିଶ୍ୱାସ୍‌ ରିକାଃକ ଯେ, ରାଜା ସୁଲିମାନ୍‌ ଇତୁଏମଃ ପୁଥିରାଃ ଅନଲ୍‌ନିଃ ତାଇକେନାଏ, ମେନ୍‌ଦ ଏଟାଃକ ନେ କାଜିରେ କାକ ମେସାୟାନା । ସୁଲିମାନ୍‌ଗି ନେ ପୁଥି ଅଲାକାଦ୍‌ରେଦ, ନେଆଁ ହବାସାକାଅଃଆ ୯୭୦-୯୩୧ ଖ୍ରୀ: ସିଦା ଅକ ଦିପିଲିରେ ଚି ଜୀନିଦ୍‌ ତାଇକେନାଏ, ଇମ୍‌ତା ଅଲାକାନା । ଏଟାଃ ପାଣ୍ଡିତ୍‌କ ବିଶ୍ୱାସ୍‌ ରିକାଃକ ଯେ, ଏଟାଃ ଆଡଃମିହୁଡ଼୍‌ ଅଲାକାଦାଏ, ଚିଆଃଚି ମିସା ମିସା ନେଆଁ ମିଆଦ୍‌ ରାଜାରାଃ ବାଦ୍‌ଲାରେ ସୁନୁସାର୍‌ ରିକାନିୟାଃ ଜାଗାର୍‌ କାଜିୟାକାନା, ଇତୁନିୟାଃ ୫:୮-୯ । ଏନ୍‌ ପାଣ୍ଡିତ୍‌କ ଉଡ଼ୁଗାଃକ ଯେ, ଇତୁଏମଃ ପୁଥି ସୁଲିମାନ୍‌ରାଃ ଦିପିଲି ହେତେ ପୁରାଃ ତାୟମ୍‌ତେ ଅଲାକାନା, ହବାସାକାଅଃଆ ୪୦୦ ଏତେ ୨୦୦ ଖ୍ରୀଷ୍ଟ୍‌ଆଃ ଜାନାମ୍‌ ସିଦା କରେ ଅଲାକାନ୍‌ଗିଆଃ ।

ଇତୁଏମଃ ପୁଥି ଏନେଟେଦ୍‌ କେଦ୍‌ତେ କାଜିୟାଃ ଯେ, ସବେନ୍‌ ବିଷାଏ ମିଆଦ୍‌ ସାହେଁଦ୍‌ ଇଦି ଲେକାନାଃ, ତାନାଃ ଅକ୍‌ନାଃ ଚି ଜାଲ୍‌ଦିଗି ଉକୁକେନଃଆ, ୧:୨ । ନେଆଁରାଃ ମୁଣ୍ଡି ହବାଅଃତାନା ଯେ, ଆବୁଆଃ ଜୀଦାନ୍‌ ଓଡ଼ୋଃ ଆବୁଆଃ କାମିଉଦାମ୍‌ ସବେନ୍‌ ହୁଲାଙ୍ଗ୍‌ କା ତାଇନାଃ ଓଡ଼ୋଃ ଆଟ୍‌କାର୍‌ ଉରୁମ୍‌ ନାଙ୍ଗ୍‌ କେଟେଃଗିୟା । କାଟିଃ ଘାଡ଼ିକାଦ୍‌ ତାୟମ୍‌ତେ ନେଆଁରାଃ ପୁରାଃ ହିସାକ ରିଡ଼ିଙ୍ଗ୍‌କେନଃଆ । ନେଆଁରାଃ ପୁରାଃ ହିସାକ ଆବୁଆଃ ଆକ୍‌ତେୟାର୍‌ଏତେ ବାହାରିରେ ମେନାଃ । ଜୀଦାନ୍‌ ଜେଲେକା ମେନାଃ, ଏନ୍‌ ଲେକାଗି ତେଲା ଲାଗାତିୟାଁ ଓଡ଼ୋଃ ଆପେୟାଃ ଅକ୍‌ନାଃ ମେନାଃ ଏନାରେଗି ରାସ୍‌କା ତାଇନଃ ବୁଗିନ୍‌ ତାନାଃ, ୯:୯ । ଜୀଦାନ୍‌ରେୟାଃ ସବେନ୍‌ ହାସୁଦୁକୁ ଓଡ଼ୋଃ ରାସ୍‌କାକେ ବିଚାର୍‌ ରିକା । ପୁଥିରାଃ ମୁଖ୍ୟା ବିଷାଏ ହବାଅଃତାନା, ପାର୍‌ମେଶ୍ୱାର୍‌କେ ବର ଓଡ଼ୋଃ ଆୟାଃ ଆନ୍‌ଚୁ ମାନାତିଙ୍ଗ୍‌, ୧୨:୧୩ । ଏନ୍‌ ହବାଅଃତାନା ସବେନାଃଏତେ ବିଶେଷ୍‌ ବିଷାଏ ।

ପୁଥି ଭିତାର୍‌ରେ ତାଇକାନ୍‌

୧. ପୁଥିରେନ୍‌ ଅନଲ୍‌ନିଃ ଓଡ଼ୋଃ କାଟିକାନ୍‌ ଆୟାଃ ଜୀଦାନ୍‌ ବିଷାଏରେ ପାରିଚାଏ ଏମାକାନା । ୧:୧୧

୨. ଜୀଦାନ୍‌ରାଃ ମୁଣ୍ଡି ବିଷାଏରେ ଅଲାକାନା । ୧:୧୨–୬:୯

୩. ଇତୁନିୟାଃ ଉନୁଦୁବ୍‌ ଏମାକାନା । ୬:୧୦–୧୨:୮

୪. ପୁଥିରାଃ ଟୁଣ୍ଡୁରେ କାଜିକାଦା ଯେ, ଜୀଦାନ୍‌ରାଃ ପୁରା ଉଦ୍ଦେଶ୍‌ ହବାଅଃତାନା, ପାର୍‌ମେଶ୍ୱାର୍‌କେ ବର ଓଡ଼ୋଃ ଆୟାଃ ଆନ୍‌ଚୁ ମାନାତିଙ୍ଗ୍‌ ରିକାଏୟାବୁ । ୧୨:୯-୧୪: