Munda Bible
ଇତୁନିଆଃ 8
ରାଜାରାଃ ଆନ୍ଚୁ ମାନାତିଙ୍ଗ୍
ଅକଏ ସେଣାଁନ୍ ହଡ଼ଲେକା ମେନାଇୟାଃ ଓଡ଼ୋଃ ଏନ୍ ବିଷାଏକରାଃ ମୁଣ୍ଡି କେ ଅକଏ ସାରିକାଦା ? ହଡ଼ରାଃ ସେଣାଁ ଆୟାଃ ମେଦ୍ମୁହାଡ଼୍ କେ ରାସ୍କାତେ ଝାକ୍ମାକ୍ ରିକାଇ ତାନାଏ ଓଡ଼ୋଃ ମେଦ୍ମୁହାଡ଼୍ ରେୟାଃ ଦୁକୁ ରେୟାଃ ବିଷାଏକେ ସାଙ୍ଗିନ୍ ତାନାଏ ।
ରାଜାରାଃ ହୁକୁମ୍ କାଜିକେ ମାନାତିଙ୍ଗ୍ ରିକାଏମେଁ, ଆଇଙ୍ଗ୍ ନେଆଁ ଆଚୁ ମେଁ ତାନା ଓଡ଼ୋଃ ପାର୍ମେଶ୍ୱାର୍ଆଃ ଆୟାର୍ରେ କିରିୟା ରିକା ନାଗେନ୍ତେ ଏନା ରିକାଏମେ । ଇନିୟାଃ ଆୟାର୍ ଏତେ ଇମ୍ତାଗି ସାଙ୍ଗିନ୍ତେ ସେନଃ ନାଗେନ୍ତେ ଆଲମେ ସାନାଙ୍ଗ୍ ରିକାଏ, ଚାଏ ଜେତାନ୍ ଏତ୍କାନ୍ କାଜି ନାଗେନ୍ତେ ଆଲମ୍ ତିଙ୍ଗୁନାଃ । ଚିୟାଃଚି ଇନିୟାଃ ଅକଆଃ ସାନାଙ୍ଗ୍, ଏନା ରିକାଏଃ । ଚିୟାଃଚି ରାଜାରାଃ ବାଚାନ୍ ପେଡ଼େୟାନ୍ ଲେକାନ୍ କାଜିତାନାଃ ଓଡ଼ୋଃ ଚିନାଃମ୍ ଚିକାତାନା ମେନ୍ତେ ଅକଏ ରାଜାକେ କୁଲି ଦାଡ଼ିୟାଃ ? ଅକଏ ଆନ୍ଚୁ ମାନାତିଙ୍ଗ୍ ରିକାଏଃ, ଇନିଃ ଜେତାନ୍ ଏତ୍କାନ୍କାଜି କା ନେଲ୍ ଦାଡ଼ିୟାଃ । ଓଡ଼ୋଃ ପାଣ୍ଡିତ୍ ହଡ଼ରାଃ ମନ୍ସୁରୁଦ୍ ବିଚାର୍ ଓଡ଼ୋଃ ଦିପିଲିକେ ସାରିୟାଃ । ସବେନ୍ ଇଛାସାନାଙ୍ଗ୍ ବିଷାଏ ନାଗେନ୍ତେ ଦିପିଲି ଓଡ଼ୋଃ ବିଚାର୍ ମେନାଃ । ଚିୟାଃଚି ହଡ଼ରାଃ ଦୁକୁ ଇନିୟାଃ ନାଗେନ୍ତେ ପୁରାଃଗି ମେନାଃ । ଚିୟାଃଚି ଇନିୟାଃ ଚେତାନ୍ରେ ଚିନାଃ ହୁଇନାଃ, ଏନା ଇନିଃ କା ସାରିୟାଃ ଓଡ଼ୋଃ ଚିଲ୍କା କେଦ୍ତେ ଏନା ହୁଇନାଃ, ଅକଏ ଇନିଃକେ ଉଦୁବ୍ ଦାଡ଼ିୟାଃ ? ସାହେଦ୍କେ ସାବ୍କେଦ୍ତେ ଦହ ନାଗେନ୍ତେ ଜେତାଏ ହଡ଼ରାଃ ପେଡ଼େଃ ବାନଃଆ, ଚାଏ ଗନଏଃକେ ରୋକାଅ ନାଙ୍ଗ୍ ଜେତା ହଡ଼ରାଃ ଆକ୍ତେୟାର୍ କା ତାହିନାଃ ଓଡ଼ୋଃ ଏନ୍ ଲାଡ଼ାଇ ଏତେ ବାଞ୍ଚାଅ କା ଦାଡ଼ିୟଃଆଃ, ଚାଏ ଏତ୍କାନ୍ କାଜିତେ ପେରେୟାକାନ୍ ହଡ଼କେ ଆୟାଃ ଏତ୍କାନ୍ କାମି କାଏ ବାଞ୍ଚାଅ ଦାଡ଼ିୟାଃ ।
ଏତ୍କାନ୍ ଓଡ଼ୋଃ ଧାର୍ମାନ୍
ସିଙ୍ଗି ଲାତାର୍ରେ ଯେ ଅକ ସବେନାଃ କାମିକ ହୁଇନାଃ, ଏନାକେ ବୁଗିଲେକାତେ ଆଇଙ୍ଗ୍ ନେନେଲ୍ତେ ସାରିକେଦା ଯେ, ମିସା ମିସା ହଡ଼ ଓଡ଼ୋଃ ମିହୁଡ଼୍ ଚେତାନ୍ରେ ଆକ୍ତେୟାର୍ ରିକାକେଦ୍ ହରାତେ ଆୟାଃ ଚେତାନ୍ରେ ଦୁକୁ କାଜିକେ ଆଉୱେତାନାଏ । ଆଡଃଗି ଆଇଙ୍ଗ୍ ଏତ୍କାନ୍ ହଡ଼କକେ କାବାର୍ ଗାଡ଼ାତେ ସେନଃତେୟାଃ ନେଲାକାଦ୍କଆ ଓଡ଼ୋଃ ଇନ୍କୁ ଅକନ୍ ପାବିତାର୍ ଠାୟାଦ୍ତେକ ହିଜୁଃସେନଃ ତାଇନ୍କେନା ଓଡ଼ୋଃ ଅକନ୍ ନାଗାର୍ରେ ଇନ୍କୁ କାମିତାନ୍ ତାଇକେନା, ଏନ୍ ନାଗାର୍ରେ ତାଇନ୍ ହଡ଼କ ହରାତେ ଇନ୍କୁ ମାଇନାନ୍ ନାମ୍କେଦା । ନେଆଁଗି ଆଇଙ୍ଗ୍ ସାମା ତାନାଃ ମେନ୍ତେ ଆଟ୍କାର୍କେଦା ।
ଚିମ୍ତା ମିହୁଡ଼୍ ଏତ୍କାନ୍ କାମି ରିକାକେଦ୍ତେ ଇନିଃକେ ଇମ୍ତାଗି ସାଜାଇ କା ନାମଃଆ, ଇମ୍ତା ମାନୱାରାଃ ମନ୍ସୁରୁଦ୍ ଏତ୍କାନ୍ କାମି ରିକା ନାଗେନ୍ତେ ଆୟାର୍ ଇଦିୟଃଆ । ମିଆଦ୍ ପାପୀ ହଡ଼ ମିଦ୍ଶାଅ ବାର୍ ପାପ୍ କାମିକେଦ୍ତେ ପୁରାଃ ମାହା ଜିନିଦ୍ ତାଇନାଃ, ଏନ୍ରେହ ଆଇଙ୍ଗ୍ ସାରିକାଦା ଯେ, ଅକନ୍କ ପାର୍ମେଶ୍ୱାର୍କେ ବର କେଦ୍ତେ ସେସେନ୍ତାନା, ଇନ୍କୁଆଃ ବୁଗିନାଃ ହୁଇନାଃ । ମେନ୍ଦ ଏତ୍କାନ୍ ହଡ଼ରାଃ ବୁଗିନାଃ କା ହୁଇନାଃ, ଚାଏ ଉମ୍ବୁଲ୍ ଲେକା ଇନିଃ ଆୟାଃ ମାହାକେ ପସା କା ଦାଡ଼ିୟାଃ । ଚିୟାଃଚି ଇନିଃ ପାର୍ମେଶ୍ୱାର୍କେ ବର କେଦ୍ତେ କା ସେସେନ୍ତାନା । ଅତେରେ ଓଡ଼ୋଃ ମିଆଦ୍ ବିଷାଏ ସାମା ଲେକା ନେଲଃଆ । ମିସା ମିସା ଧାର୍ମାନ୍ ହଡ଼କଆଃ କାମିରେୟାଃ ନାଲା ଏତ୍କାନ୍ ହଡ଼କ ନାମାଃକ । ଓଡ଼ୋଃ ମିସା ମିସା ଏତ୍କାନ୍ ହଡ଼କଆଃ କାମିରେୟାଃ ନାଲା ଧାର୍ମାନ୍ ହଡ଼କ ନାମାଃକ । ଏନ୍ତେ ଆଇଙ୍ଗ୍ କାଜିକେଦା, ନେଆଁହଗି ସାମା ତାନାଃ ।
ଏନାମେନ୍ତେ ଜୀଦାନ୍ରେ ଜଜମ୍ ନୁଁ କେଦ୍ତେ ରାସ୍କାତେ ତାଇନ୍ ତେୟାଃ ବୁଗିନ୍ ତାନାଃ ମେନ୍ତେ ଆଟ୍କାର୍ କେଦା । ଚିୟାଃଚି ଜମ୍ ନୁଁ କେଦ୍ତେ ଓଡ଼ୋଃ ରିଜ୍ରାଙ୍ଗ୍ରେ ତାଇନ୍ ବାଗିକେଦ୍ତେ ସିଙ୍ଗି ଲାତାର୍ରେ ହଡ଼ ନାଗେନ୍ତେ ଏଟାଃ ଜେତାନ୍ ସୁକୁ ବାନଃଆ । ଏନାମେନ୍ତେ ସିଙ୍ଗି ଲାତାର୍ରେ ପାର୍ମେଶ୍ୱାର୍ ଏମାକାଇ ଆୟାଃ ଜୀଦାନ୍ରେୟାଃ ଟୁଣ୍ଡୁ ଜାକେଦ୍ ଅକ କାଜିକାମି ରିକାଏଃ, ଏନାଗି ଇନିଃକେ ନେ'ସବେନାଃ ଆସ୍ରା ଏମାଇତାନାଏ ।
ଚିମ୍ତା ଆଇଙ୍ଗ୍ ସେଣାଁରେୟାଃ ମୁଣ୍ଡି ସାରିନାଗେନ୍ତେ ଓଡ଼ୋଃ ଅତେରେ ଅକ ସବେନାଃ କାମିକ ହୁଇନାଃ, ଏନା ନେଲ୍ନାଗେନ୍ତେ ମନ୍କେ ଏମ୍କେଦା । ଚିୟାଃଚି ନିଦା ଚାଏ ସିଙ୍ଗି ମେଦ୍ରେ ଦୁଡ଼ୁମ୍ କା ତାଇନ୍ କେଦ୍ତେ ଅତେରେ କାମି ରିକାତାନ୍ ଲେକା ହଡ଼କ ମେନାକଆ । ଇମ୍ତା ଆଇଙ୍ଗ୍ ପାର୍ମେଶ୍ୱାର୍ଆଃ ସବେନ୍ କାଜିକାମିକେ ନେଲ୍କେଦା ଓଡ଼ୋଃ ଏନାକେ ଆଟ୍କାର୍ଉରୁମ୍ ନାଗେନ୍ତେ ସାନାଙ୍ଗ୍କେଦା । ଯେ, ସିଙ୍ଗି ଲାତାର୍ରେ ଅକ ସବେନାଃ କାମିକ ହୁଇନାଃ, ଏନା ନେଲ୍ କେଦ୍ତେ ହଡ଼ ଏନ୍ କାମିରାଃ ମୁଣ୍ଡି ସାରି ନାଗେନ୍ତେ ସାନାଙ୍ଗ୍ତାନ୍ ରେୟ ଏନାରାଃ ମୁଣ୍ଡି କା ନାମ୍ ଦାଡ଼ିୟାଃ । ଜେତାଏ ସେଣାଁନ୍ ହଡ଼ ଏନା ସାରିକାଦାଇଙ୍ଗ୍ ମେନ୍ତେ ହାଟି ରିକାଏ ରେଅ ଇନିଃ ଏନ୍ କାମିରାଃ ମୁଣ୍ଡି ସାରି ନାମ୍ କା ଦାଡ଼ିୟାଃ ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.