Munda Bible
ଇତୁନିଆଃ 7
ଡଣ୍ଡ ଓଡ଼ୋଃ ସେଣାଁନ୍
ଗନଙ୍ଗାନ୍ ସହାନ୍ ସୁନୁମ୍ ଏତେ ବୁଗିନ୍ ଚାଇଲ୍ଚାଲାନ୍ ବେଶ୍ ତାନାଃ ଓଡ଼ୋଃ ଜାନାମ୍ ହୁଲାଙ୍ଗ୍ ଏତେ ଗଜଃ ହୁଲାଙ୍ଗ୍, ବୁଗିନାଃ ତାନାଃ ।
ମାରାଙ୍ଗ୍ ଜଜମ୍ ଅଡ଼ାଃତେ ସେନ୍ ବାଗିକେଦ୍ତେ ରାନାଃ ହବାଅଃତାନ୍ ଅଡ଼ାଃ ସେନଃତେୟାଃ ପୁରାଃ ବୁଗିନାଃ, ଚିୟାଃଚି ସବେନ୍ ହଡ଼କ ନାଗେନ୍ତେ ଏନା ଟୁଣ୍ଡୁ ଦାସା ଓଡ଼ୋଃ ଜିନିଦ୍ ତାଇନ୍ ହଡ଼ ଏନା ନେଲ୍କେଦ୍ତେ ଆଟ୍କାର୍ ଉରୁମେୟା ।
ଲାନ୍ଦା ଏତେ ଗେରାଙ୍ଗ୍ ବୁଗିନାଃ ତାନାଃ ଚିୟାଃଚି ଦୁକୁଆକାନ୍ ମେଦ୍ମୁହାଡ଼୍ ହରାତେ ମନ୍ସୁରୁଦ୍ ରାସ୍କା ରିକାୟା ।
ସେଣାଁନ୍ ହଡ଼କଆଃ ମନ୍ସୁରୁଦ୍ ଏୟମ୍ ରିକାତାନ୍ ଅଡ଼ାଃକରେ ତାଇନାଃ । ମେନ୍ଦ ଡଣ୍ଡକଆଃ ମନ୍ସୁରୁଦ୍ ରାସ୍କା ରିକାତାନ୍ ଅଡ଼ାଃରେ ତାଇନାଃ ।
ଡଣ୍ଡକଆଃ ଦୁରାଙ୍ଗ୍ ଆୟୁମ୍ ବାଗିକେଦ୍ତେ, ସେଣାଁନ୍ ହଡ଼କଆଃ ଏପେଗେର୍ ଆୟୁମ୍ ତେୟାଃ ବୁଗିନ୍ ତାନାଃ ।
ଚିୟାଃଚି ଘୁମା ଲାତାର୍ରେ ଜୁଲଃତାନ୍ ଜାନୁମ୍ ରେୟାଃ ସାଡ଼ି ଚିଲ୍କା, ଏନ୍ ଲେକାଗି ଡଣ୍ଡ ହଡ଼ରାଃ ଲାନ୍ଦା ଆୟୁମଃଆ । ଓଡ଼ୋଃ ନେଆଁଗି ସାମା ତାନାଃ ।
ବେଗାର୍ ନ୍ୟାୟରେ ନାମାକାଦ୍ ଖୁର୍ଜି ସେଣାଁନ୍ ହଡ଼କେ ଡଣ୍ଡ ବାଇୟାଃ ଓଡ଼ୋଃ ଉକୁକେଦ୍ତେ ତେଲା ଟାକା ସେଣାଁନ୍ କେ ଜିୟନ୍ ରିକାଏଃ ।
କାମିକେ ଏନେଟେଦ୍ ଏତେ ଏନା ଟୁଣ୍ଡୁ ତେୟାଃ ବୁଗିନ୍ ତାନାଃ । ଓଡ଼ୋଃ ଆତ୍ମାରେ ମାରାଙ୍ଗେନ୍ ରିକାଏ ଏତେ ଆତ୍ମାରେ ଧିରାଜ୍ ହବା ତେୟାଃ ବୁଗିନାଃ ତାନାଃ ।
ଆପାନ୍ ଆତ୍ମାରେ ଇମ୍ତାଗି ଖିସ୍ ଆଲପେ ରିକାନାଃ । ଚିୟାଃଚି ଅକନ୍କ ଇମ୍ତାଗି ଖିସ୍ ରିକାନାଃ ଇନ୍କୁ ଡଣ୍ଡକ ତାନ୍କ ।
ନାହାଁ ରେୟାଃ ଦିପିଲି ଏତେ ସିଦା ରେୟାଃ ଦିପିଲି ବୁଗିନ୍ ତାଇନ୍କେନା ମେନ୍ତେ ଆଲପେ କାଜି । ଚିୟାଃଚି ନେ ବିଷାଏ ରେୟାଃ କୁନୁଲି ଆପେୟାଃ ସେଣାଁତେ କାପେ ରିକାଏତାନା ।
ସେଣାଁ ପୁର୍ଖା ଆପୁକଆଃ ନାମାକାଦ୍ ଆକ୍ତେୟାର୍ ଲେକା ବୁଗିନ୍ କାଜିତାନାଃ । ଆଡଃଗି ସିଙ୍ଗିକେ ନେଲ୍ତାନ୍, ଜୀନିଦ୍ ତାଇନ୍ ହଡ଼କ ନାଗେନ୍ତେ ଏନା ପୁରାଃଗି ଲାଭ୍ ଲେକାନ୍ କାଜିତାନାଃ ।
ଚିୟାଃଚି ଖୁର୍ଜି ଚିଲ୍କା ଆସ୍ରା ଇଦିତାନ୍ ବିଷାଏ ତାନାଃ, ସେଣାଁ ହଁଗି ଏନ୍ଲେକା ଆସ୍ରା ଇଦିତାନ୍ ଲେକାନ୍ ବିଷାଏ ତାନାଃ । ମେନ୍ଦ ଇନିତୁରାଃ ମାରାଙ୍ଗ୍ କାଜି ନେଆଁ ଯେ, ସେଣାଁ ତାଇନଃ ଗମ୍କେ ଆୟାଃ ଜୀଉକେ ବାଞ୍ଚାଅୟା ।
ପାର୍ମେଶ୍ୱାର୍ଆଃ କାମିକେ ଉଡ଼ୁଃଇପେ, ଚିୟାଃଚି ଇନିଃ ଅକଆଃ ଏଙ୍କବେଙ୍କ କାଦା, ଅକଏ ଏନାକେ ସିଧା ଦାଡ଼ିୟାଃ ?
ସୁକୁତାନ୍ ଦିପିଲିରେ ରାସ୍କା ରିକାଏପେ ଓଡ଼ୋଃ ଦୁକୁ ଇମ୍ତା ପାହାମେପେ । ଚିୟାଃଚି ହଡ଼ରାଃ ତାୟମ୍ ଦିପିଲିରେ ଚିନାଃ ହୁଇନାଃ, ଇନିଃ କା ସାରିୟାଃ । ଏନାମେନ୍ତେ ପାର୍ମେଶ୍ୱାର୍ ସୁକୁ ଓଡ଼ୋଃ ଦୁକୁକେ ହେପାଦ୍ରେ ଦହାକାଦାଏ ।
ଆଇଙ୍ଗ୍ ଆଇଁୟାଃ ଜୀଦାନ୍ ନେ ସବେନାଃ ହଗି ନେଲାକାଦାଇଙ୍ଗ୍ । ଚିମିନ୍ ଧାର୍ମାନ୍ ହଡ଼କ ଆକଆଃ ଧାର୍ମାନ୍ କାମି ରିକା ରିକାତେ ଜିୟନ୍କଆଃକ । ଓଡ଼ୋଃ ଚିମିନ୍ ଏତ୍କାନ୍ ହଡ଼କ ଆକଆଃ ଆପନାଃ ଏତ୍କାନ୍ କାମି ରିକା ରିକାଗି ପୁରାଃ ଦିପିଲି ଜାକେଦ୍ ଜୀନିଦ୍ ତାଇନାଃକ । ପୁରାଃ ଧାର୍ମାନ୍ ଆଲପେ ହୁଇନାଃ, ଚାଏ ଆପାନ୍କେ ପୁରାଃ ସେଣାଁନ୍ ମେନ୍ତେ ଆଲପେ ଉଦୁବେୟା । ଚିନାଃ ମେନ୍ତେ ଆପେ ଆପାନ୍କେ ଜିୟନ୍ ରିକାୟା ? ଆପେ ପୁରାଃ ଏତ୍କାନ୍ ଆଲପେ ହୁଇନାଃ ଚାଏ ଡଣ୍ଡ ଆଲପେ ହୁଇନାଃ । ଆପାନ୍ ଦିପିଲି ସେଟେର୍ ସିଦାରେ ଚିନାଃ ମେନ୍ତେପେ ଗଜଃଆ ? ଏନାକେ ସାବ୍କେଦ୍ତେ କା ତାଇନ୍ ତେୟାଃ ଚାଏ ଏନ୍ତାଃଏତେ ତିଃଇ ସାଙ୍ଗିନ୍ ରିକାତେୟାଃ ବୁଗିନ୍ ହୁଇନାଃ । ଚିୟାଃଚି ଅକଏ ପାର୍ମେଶ୍ୱାର୍କେ ବରଆଃ, ଇନିଃ ଏନ୍ ସବେନାଃ ଏତେ ଜିନିତାଅନିଃ ହବାଅଃଆ ।
ଦାଶ୍ ଝାନ୍ ହଡ଼ ମିଆଦ୍ ନାଗାର୍କେ ରାଇଜ୍ ରିକାତାନ୍ ଏତେ, ମିଆଦ୍ ସେଣାଁନ୍ ହଡ଼ରାଃ ସେଣାଁ ପୁରାଃ ପେଡ଼େୟାନ୍ ଲେକ୍ନାଃ ତାନାଃ ।
ପାପ୍କାମି କା ରିକାକେଦ୍ତେ, ମିଆଦ୍ ଧାର୍ମାନ୍ ହଡ଼ ମେନ୍ତେ ନେ ଅତେରେ ଜେତାଏ ବାଙ୍ଗାଇୟାଃ ।
ଅକନ୍ କାଜିକ କାଜିୟଃଆ, ଏନ୍ ସବେନାଃ ଆଲପେ ଆୟୁମେୟା । ଏନା ଆୟୁମେରେଦ ହବାସାକାଅଃଆ, ଇନିଃ ଆମ୍କେ ସାର୍ପାଅ ରେୟାଃ କାଜିକେ କାଜିତାନ୍ ତେୟାଃ ଆୟୁମେୟା ।
ଚିୟାଃଚି ଆମାଃ ମନ୍ସୁରୁଦ୍ ସାରିତାନାଏ ଯେ, ଆମ୍ ହଁ ଏଟାଃକକେ ଏନ୍ଲେକା ବାର୍ବାର୍ ସାର୍ପାଅ ଏମାକାଦ୍କଆ ।
ଆଇଙ୍ଗ୍ ଆଇଁୟାଃ ସେଣାଁତେ ନେ ସବେନାଃ ବିନିଡ଼ାଅ ରିକାକାଦା । ଆଇଙ୍ଗ୍ କାଜିକେଦା, ଆଇଙ୍ଗ୍ ସେଣାଁନ୍ନିଃ ହୁଇନାଃ । ମେନ୍ଦ ଏନା ଆଇଁୟାଃତାଃ ଏତେ ସାଙ୍ଗିନ୍ରେ ତାଇକେନା । ଅକଆଃ ମେନାଃ, ଏନା ସାଙ୍ଗିନ୍ରେ ମେନାଃ ଓଡ଼ୋଃ ଏନା ପୁରାଃ ଗାଢ଼ା ରେୟାଃ । ଏନାକେ ଅକଏ ନାମ୍ ଦାଡ଼ିୟାଃ ? ସେଣାଁ ଓଡ଼ୋଃ ବିଷାଏକରାଃ ମୁଣ୍ଡି ସାରିନାମ୍ ଦାଡ଼ି ନାଗେନ୍ତେ ଓଡ଼ୋଃ ଏତ୍କାନ୍ ବିଷାଏ କା ଆଟ୍କାର୍ ଉରୁମ୍ ଓଡ଼ୋଃ ଡଣ୍ଡ ବିଷାଏ ଯେ ବାଉଡ଼ା ଲେକାନ୍ କାଜି । ନେଆଁ ସାରି ନାଗେନ୍ତେ ଆଇଙ୍ଗ୍ ହିଜୁଃରୁହାଡ଼୍ୟାନା । ଏନ୍ତେ ଆଇଁୟାଃ ମନ୍ସୁରୁଦ୍ ଏନାରେୟାଃ ମୁଣ୍ଡି ଆଟ୍କାର୍ ଉରୁମ୍ ନାଗେନ୍ତେ ଓଡ଼ୋଃ ଦାଣାଁ ନାମେ ନାଗେନ୍ତେ ସାନାଙ୍ଗ୍କେଦା ।
ଆଇଙ୍ଗ୍ ଗନଏଃ ଏତେ ହଁ ପୁରାଃ ଦୁକୁରେୟାଃ ମିଆଦ୍ ବିଷାଏ ନାମ୍କେଦା । ମେନ୍ଦ ଅକନ୍ କୁଡ଼ିରାଃ ମନ୍ସୁରୁଦ୍ ଫାର୍ଚି ବାନଆଃ ଓଡ଼ୋଃ ଇନିୟାଃ ତିଃଇ ଫାଁସ୍ରି ଲେକ୍ନାଃ ତାନାଃ । ଜେତାଏ ପାର୍ମେଶ୍ୱାର୍କେ ସୁକୁଇଚି ରିକାୟା, ଇନିୟାଃ ତାଃଏତେ ଇନିଃ ବାଞ୍ଚାଅଃଆ । ମେନ୍ଦ ପାପ୍ କାମିତାନ୍ନିଃ ଇନିୟାଃ ହରାତେ ସାବ୍ ରିକାନାଃ । ଇତୁନିଃ କାଜିତାନାଏ, ନେଲେପେ, ଆଇଙ୍ଗ୍ ମୁଣ୍ଡି ସାରିନାଙ୍ଗ୍ ମିଆଦ୍ ବିଷାଏକେ ଆଡଃମିଆଦ୍ ବିଷାଏଲଃ ମେସା କେଦା ଓଡ଼ୋଃ ଏନ୍ ବିଷାଏଗି ନାମ୍କେଦା । ଆଇଁୟାଃ ଜୀଉ ମିଆଦ୍ ବିଷାଏକେ ଦାଣାଁତାନାଏ, ମେନ୍ଦ ଏନା ଇନିଃ କା ନାମାକାଦା । ହାଜାର୍ ଭିତାର୍ ଏତେ ମିଆଦ୍ କଡ଼ାକେ ନାମ୍କିୟାଃ ମେନ୍ଦ ଏନ୍ ଭିତାର୍ ଏତେ ମିଆଦ୍ କୁଡ଼ି କାଇଙ୍ଗ୍ ନାମ୍କିୟାଃ । ନେଲେପେ, ଆଇଙ୍ଗ୍ ନିମିନ୍ ଏସ୍କାର୍ ସାରି ନାମାକାଦାଇଙ୍ଗ୍ ଯେ, ପାର୍ମେଶ୍ୱାର୍ ହଡ଼କେ ସାଧାସିଧା ବାଇକିୟା । ମେନ୍ଦ ଏନ୍ ହଡ଼ ପୁରାଃ ଚିମିନ୍ ରାକାମ୍ରାଃ ଜିନିଷ୍କ ବାଇକେଦା ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.