Munda Bible
ଇତୁନିଆଃ 3
ସବେନାଃ କାମିରେୟାଃ ସାଲାକାନ୍ ଦିପିଲି ମେନାଃ
ସବେନ୍ ବିଷାଏରାଃ ଦିପିଲି ମେନାଃ ଓଡ଼ୋଃ ରିମିଲ୍ ଲାତାର୍ରେ ସବେନାଃ ବିଷାଏରେୟାଃ କାଜିକେ ବାଇନାଗେନ୍ତେ ଠାଉକାନ୍ ଦିପିଲି ଦହାକାନା । ଜାନାମଃ ରେୟାଃ ଦିପିଲି ଓଡ଼ୋଃ ଗଜଃ ରେୟାଃ ଦିପିଲି, ହେରଃ ରେୟାଃ ଦିପିଲି, ଅକଆଃ ହେର୍ କାନା ଏନାକେ ଇର୍ ରେୟାଃ ଦିପିଲି, ଗଗଏଃ ରେୟାଃ ଦିପିଲି ଓଡ଼ୋଃ ବୁଗିୟଃ ରେୟାଃ ଦିପିଲି, ହାଦୁଡ଼୍ ରେୟାଃ ଦିପିଲି ଓଡ଼ୋଃ ବାଇରୁହାଡ଼୍ ରେୟାଃ ଦିପିଲି, ରାଆଃ ରେୟାଃ ଦିପିଲି ଓଡ଼ୋଃ ଲାନ୍ଦା ରେୟାଃ ଦିପିଲି, ଏୟମ୍ରେୟାଃ ଦିପିଲି ଓଡ଼ୋଃ ସୁସୁନ୍ ରେୟାଃ ଦିପିଲି, ନିହିଁ ଗାଡ଼ାରେ ଦିରି ଉୟୁଃରେୟାଃ ଦିପିଲି, ଦିରି ହୁଣ୍ଡିରେୟାଃ ଦିପିଲି, ହାମ୍ବୁଦ୍ ରେୟାଃ ଦିପିଲି ଓଡ଼ୋଃ ହାମ୍ବୁଦ୍ ଏତେ ସାଙ୍ଗିନଃ ରେୟାଃ ଦିପିଲି, ଦାଣାଁ ରେୟାଃ ଦିପିଲି ଓଡ଼ୋଃ ଆଦ୍ ରେୟାଃ ଦିପିଲି, ଦହ ରେୟାଃ ଦିପିଲି ଓଡ଼ୋଃ ହୁରାଙ୍ଗ୍ ରେୟାଃ ଦିପିଲି, ଚେଚାଃ ରେୟାଃ ଦିପିଲି ଓଡ଼ୋଃ ଗାଲାଙ୍ଗ୍ ରେୟାଃ ଦିପିଲି, ହାପା ତାଇନ୍ ରେୟାଃ ଦିପିଲି ଓଡ଼ୋଃ ଜାଗାର୍ ରେୟାଃ ଦିପିଲି, ଦୁଲାଡ଼୍ ରେୟାଃ ଦିପିଲି ଓଡ଼ୋଃ ହିସିଙ୍ଗା ରେୟାଃ ଦିପିଲି, ବିପିଙ୍ଗାଅ ରେୟାଃ ଦିପିଲି ଓଡ଼ୋଃ ଜୀଉସୁକୁ ରେୟାଃ ଦିପିଲି ।
ପାର୍ମେଶ୍ୱାର୍ ଏମାକାଦ୍ କାମି
କାମିତାନ୍ ହଡ଼ରାଃ ଆୟାଃ କାମିରେ ଚିନାଃ ଲାଭ୍ ମେନା ? ପାର୍ମେଶ୍ୱାର୍ ମାନୱାକକେ କାମିରେଗି ତାଇନ୍ ନାଗେନ୍ତେ ଅକ ଦିପିଲି ଏମାକାଦ୍କଆଏ, ଏନା ଆଇଙ୍ଗ୍ ନେଲାକାଦାଃ । ଇନିଃ ସବେନ୍ ବିଷାଏକେ ଆୟାଃ ଦିପିଲିରେ ସୁଗାଡ଼ାନ୍ଗି ବାଇୟାକାଦା । ଓଡ଼ୋଃ ଇନିଃ ଇନ୍କୁଆଃ ଜୀଉରେ ଜାନାଅରେୟାଃ ଦିପିଲି ଦହକାଦା । ଏନ୍ରେହ ପାର୍ମେଶ୍ୱାର୍ ଏନେଟେଦ୍ ଏତେ ଟୁଣ୍ଡୁ ଜାକେଦ୍ କାମି ରିକାକାଦା । ହଡ଼ ଇନିୟାଃ ଜେତାନ୍ ମୁଣ୍ଡି କା ନାମ୍ ଦାଡ଼ିତାନା । ଆଇଙ୍ଗ୍ ସାରିକାଦା, ଜିନିଦ୍ ତାଇନ୍ ଜାକେଦ୍ ରାସ୍କା ଓଡ଼ୋଃ ବୁଗିନ୍ କାମି ବାଗିକେଦ୍ତେ ଇନ୍କୁଆଃ ଓଡ଼ୋଃ ଜେତାନ୍ ବୁଗିନ୍ ବିଷାଏ ବାନଃଆ । ଆଡଃଗି, ସବେନ୍ ହଡ଼ ଜମ୍ ନୁଁ କେଦ୍ତେ ଆପ୍ନାଃ ସବେନାଃ କାମିରେ ସୁକୁତେ ଜିୱାନ୍ ବିତାଅ ରିକାୟା, ନେଆଁଦ ପାର୍ମେଶ୍ୱାର୍ଆଃ ଦାନ୍ ତାନାଃ ।
ଆଇଙ୍ଗ୍ ସାରିକାଦା ଯେ, ପାର୍ମେଶ୍ୱାର୍ ଅକଆଃ ରିକାଏଃ, ଏନା ଜାନାଅଗି ତାନାଃ । ଚାଏ ଏନାକେ ଘାଟି ରିକା କା ଦାଡ଼ିୟଃଆ ଓଡ଼ୋଃ ହଡ଼କ ପାର୍ମେଶ୍ୱାର୍ଆଃ ଆୟାର୍ରେ ବର ନାଗେନ୍ତେ, ଇନିଃ ନେ ଲେକା ରିକାକାଦା । ଅକଆଃ ମେନା, ଏନା ତାଇନ୍କେନା, ଓଡ଼ୋଃ ଅକଆଃ ହୁଇନାଃ, ଏନାଗି ତାଇନ୍କେନା ଓଡ଼ୋଃ ଅକଆଃ ସେନଃୟାନା, ପାର୍ମେଶ୍ୱାର୍ ଏନାକେ ଆଡଃମିସା ଦାଣାଁବାଡ଼ା ରିକାଃ ।
ଟୁଣ୍ଡୁ ବିଚାର୍
ଆଡଃଗି ଆଇଙ୍ଗ୍ ସିଙ୍ଗି ଲାତାର୍ରେ ବିଚାର୍ ଠାୟାଦ୍ ନେଲ୍କେଦା, ଏନ୍ତାଃରେ ଏତ୍କାନାଃ କାଜି ମେନାଃ, ଓଡ଼ୋଃ ଧାର୍ମାନ୍ ଠାୟାଦ୍ରେ ହଁ ଏତ୍କାନାଃ କାଜିକ ମେନାଃ, ଏନା ନେଲ୍ କେଦା । ଆଇଙ୍ଗ୍ ଆଇଁୟାଃ ମନ୍ରେ କାଜିକେଦା, ପାର୍ମେଶ୍ୱାର୍ ଧାର୍ମାନ୍ ଓଡ଼ୋଃ ଏତ୍କାନ୍ ହଡ଼ରାଃ ବିଚାର୍ ରିକାୟା, ଚିୟାଃଚି ସବେନ୍ ଉଡ଼ୁଃ ପାହାମ୍ ରେୟାଃ କାଜି ଓଡ଼ୋଃ ସବେନ୍ କାମି ନାଗେନ୍ତେ ସାମାୟ ମେନା । ଆଇଁୟାଃ ମନ୍ସୁରୁଦ୍ରେ କାଜିକେଦା, ପାର୍ମେଶ୍ୱାର୍ ଚିଲ୍କା ମାନୱାକକେ ବିନିଡ଼ାଅ କଆଃ ଓଡ଼ୋଃ ଇନ୍କୁ ଆପାନ୍ ଏସ୍କାର୍ ଯେ, ଜାଁତୁ ଲେକାନ୍କ ତାଇନ୍କେନା, ନେଆଁ ଇନ୍କୁ ଚିଲ୍କା ନେଲ୍ ଦାଡ଼ିୟାଃକ, ଏନାନାଗେନ୍ତେ ନେ ସବେନାଃ ଇନ୍କୁ ନାଗେନ୍ତେ ହବାଅଃତାନାଃ । ଚିୟାଃଚି ହଡ଼ହନ୍ ଚେତାନ୍ରେ ଅକଆଃ ହୁଇନାଃ, ଜାଁତୁକଆଃ ଚେତାନ୍ରେ ହଁଗି ଏନ୍ଲେକା ହୁଇନାଃ, ସବେନ୍କଆଃ ଚେତାନ୍ରେ ଏନ୍ଲେକା ମିଆଦ୍ଗି ଦାସା ହୁଇନାଃ, ଇନିଃ ଚିଲ୍କା ଗଜଃଆ, ଏନ୍ଲେକା ଏଟାଃ ମିହୁଡ଼୍ନିଃ ହଁଗି ଗଜଃଆ ଓଡ଼ୋଃ ସବେନ୍କଆଃ ସାହେଁଦ୍ ହଁଗି ମିଆଦ୍ ତାନାଃ ଓଡ଼ୋଃ ଜାଁତୁ ତାଃଏତେ ମାନୱାରାଃ ଜେତାନ୍ ଗନଙ୍ଗ୍ ବାନଃଆ, ଚିୟାଃଚି ସବେନାଃ ସାମାଗି ତାନାଃ । ସବେନ୍କ ମିଆଦ୍ ଠାୟାଦ୍ ଗି ସେନାଃ, ସବେନ୍କ ଧୁଡ଼ି ଏତେଗି ଜାନାମ୍କାନା ଓଡ଼ୋଃ ସବେନ୍କ ଆଡଃମିସା ଧୁଡ଼ିରେ ମେସାଅଃଆ । ମାନୱାରାଃ ଆତ୍ମା ଚେତାନ୍ତେ ସେନାଃ ଓଡ଼ୋଃ ଜାଁତୁକଆଃ ଜୀଉ ଅତେ ଲାତାର୍ତେ ସେନ୍କେଦ୍ତେ ହାଁସାରେ ମେସାନାଃ, ନେଆଁ ଅକଏ ସାରିୟାଃ କାଦା ? ଚିୟାଃଚି ହଡ଼ ହନ୍ ଆପାନ୍ କାମିରେ ରାସ୍କା ରିକାତାନ୍ଲଃ ଆୟାଃ ଓଡ଼ୋଃ ଜେତ୍ନାଃ ଜାତ୍କା ବୁଗିନ୍ ବିଷାଏ ବାନଃଆ ମେନ୍ତେ ନେଲ୍କେଦା, ଚିୟାଃଚି ନେଆଁଗି ଇନିୟାଃ ଆକ୍ତେୟାର୍ ତାନାଃ ଓଡ଼ୋଃ ଏନ୍ ତାୟମ୍ତେ ଅକଆଃ ହୁଇନାଃ, ଏନା ନେନେଲ୍ ନାଗେନ୍ତେ ଅକଏ ଇନିଃକେ ରୁହାଡ଼୍ ଆଉ ଦାଡ଼ିୟାଃ ?
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.