Munda Bible
ଇତୁନିଆଃ 11
ସେଣାଁନ୍ ହଡ଼ରାଃ କାମି
ଆମାଃ ଜଜମ୍ତେୟାଃ ଦାଆଃ ଚେତାନ୍ରେ ଉୟୁଃ ତାମ୍ । ପୁରାଃ ମାହା ଜାକେଦ୍ ଜଜମ୍ ନାଗେନ୍ତେ ନାମେୟାମ୍ । ସାତ୍ ଝାନ୍ ଚାଏ ଇରାଲିୟା ଝାନ୍କକେ ଆମ୍ ଆମାଃ ହିସାକେ ହାଟିୟାଁକୁମେ । ଚିୟାଃଚି ଗାପା ମେୟାଙ୍ଗ୍ କରେ ଅତେରେ ଚିନାଃ ହୁଇନାଃ, ଏନା ଜେତାଏ କାକ ସାରିୟାଃ ।
ରିମିଲ୍ରେ ଦାଆଃକ ପୁରାଃଗି ହୁଣ୍ଡିୟଃ ରେଦ ଦାଆଃ ଗାମାଏ । ଓଡ଼ୋଃ ଦାରୁ ଚିମ୍ତା ଲେଙ୍ଗାସାଃ ଚାଏ ଜମ୍ସାଃରେ ଉୟୁଗଃ, ଏନା ଅକ୍ତାଃରେ ଉୟୁଗଃଆ ଏନ୍ତାଃରେଗି ଏନା ତାଇନାଃ । ଅକଏ ହୟକେ ନେଲେ ଇନିଃ କା ହେରେୟା ଚାଏ ଅକନ୍ ହଡ଼ ରିମିଲ୍କେ ନେଲେ ଇନିଃ କା ଇରେୟା । ଚିଲ୍କା ଆପେ ହୟ ଅକସାଃ ସେନଃତାନାଃ ଓଡ଼ୋଃ ଏଙ୍ଗାରାଃ ଲାହିଦ୍ରେ ହନ୍ରାଃ ଜାଙ୍ଗ୍ ଚିଲ୍କା କେଦ୍ତେ ହାରା ଇଦିୟଃତାନା କାପେ ସାରିୟାଃ, ଏନ୍ଲେକା ପାର୍ମେଶ୍ୱାର୍ଆଃ ରିକାକାଦ୍ କାମିକେ କାପେ ସାରି ଦାଡ଼ିୟାଃ । ସେତାଃ ଇମ୍ତା ହିତା ହେରେପେ ଓଡ଼ୋଃ ସିଙ୍ଗି ହାସୁର୍ ଇମ୍ତା ଆପେୟାଃ ତିଃଇକେ ହକାକେଦ୍ତେ ଆଲପେ ଦହେୟା । ଚିୟାଃଚି ନେଆଁ ଚି ଏନା ବୁଗିନ୍ ହୁଇନାଃ, ଚାଏ ବାରାନ୍ କାଜି ମିଦ୍ ସାମାନ୍ ହୁଇନାଃ, ଏନା କାପେ ସାରିୟାଃ ।
ସେତାଃ ଇମ୍ତା ରେୟାଃ ମାସ୍କାଲ୍ ସୁକୁତାନ୍ ଆଟ୍କାରାଃ ଓଡ଼ୋଃ ମେଦ୍ତେ ସିଙ୍ଗି ନେଲ୍ ତେୟାଃ ବୁଗିନାଃତାନାଃ । ହେଗି, ହଡ଼ ପୁରାଃ ବାରାଷ୍ ଜିନିଦ୍ ତାଇନଃ ରେଦ ଇନିଃ ସବେନ୍ ମାହା କରେ ରାସ୍କାତେ ତାଇନ୍କା । ମେନ୍ଦ ନୁବାଃ ରେୟାଃ ମାହା କକେ ଇନିଃ ପାହାମ୍ କେଦ୍ତେ ତାଇନ୍କା । ଚିୟାଃଚି ଏନ୍ ସବେନ୍ ହୁଲାଙ୍ଗ୍କ ପୁରାଃ ହୁଇନାଃ । ଅକ ସବେନାଃ ହୁଇନାଃ ନେଆଁଗି ସାମା ତାନାଃ ।
ସେପେଡ଼େଦ୍ କଡ଼ା କୁଡ଼ିକକେ ଚେତାଅ
ହେ ସେପେଡ଼େଦ୍ ଆମାଃ ଧାଙ୍ଗ୍ଡ଼ା ଦିପିଲି ଇମ୍ତା ରାସ୍କାରେ ତାଇନ୍ମେ ଓଡ଼ୋଃ ଆମାଃ ମନ୍ରେୟାଃ ଉଡ଼ୁଃ ପାହାମ୍ ଲେକାତେ ରାସ୍କାତେ ତାଇନ୍ମେ । ଆଡଃଗି ଆମାଃ ମନ୍ରେୟାଃ ସେସେନ୍ ଓଡ଼ୋଃ ଆମାଃ ମେଦ୍ ରେୟାଃ ନେନେଲ୍ ଲେକାତେ ସେସେନ୍ମେ, ମେନ୍ଦ ପାର୍ମେଶ୍ୱାର୍ ନେ ସବେନାଃ ବିଷାଏକେ ଇଦିକେଦ୍ତେ ଆମ୍କେ ବିଚାର୍ରେ ଆଉମେୟା, ନେଆଁ ସାରିମେ ।
ଏନାମେନ୍ତେ ଆମାଃ ମନ୍ସୁରୁଦ୍ ଏତେ ଖିସ୍ କାଜିକକେ ସାଙ୍ଗିନ୍ ରିକାଏମେ ଆମାଃ ହଡ଼ମ ରେୟାଃ ଦୁକୁ କାଜିକକେ ସାଙ୍ଗିନ୍ ରିକାଏମେ । ଚିୟାଃଚି ସେପେଡ଼େଦ୍ ଦିପିଲି ଓଡ଼ୋଃ ଏନ୍ ଜିୱାନ୍ ରେୟାଃ ହିସାକ ସାମା ତାନାଃ ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.