Bhalawi

Chitabu cha

Bhalawi

Ulongulelo

Chitabu cha Bhalawi nde ubhonganu wa Shelia yebhakapekiwi bhandu bha Izilaeli na Chapanga kwa kupete Musa. Shelia yenjenu ilongalela kubhokana na ntundu wa kubhoha nyambiku na nhupu. Bhelabhela shelia yenjenu ibhoha mfumu, kanuni na ntundu moipalakila kuhengakeka kwa ibada mkati ja Lihema Lihuhu. Lilobhi “Bhalawi” ngati moilembakiki mu lugha ja kutumbula ja Bhaizilaeli libhi na ndandi ja “ghaghabhahusu Bhalawi.” Bhanihabha nde bhabhakabhi bhahaghulika bhaka Chapanga bhabhakabhi na lihengu la kulongoha mahengu gha kipenganyambiku na lihengu la kujighoha Nyumba jaka Chapanga. Kulengana na majopalanelu, bhasomi bha mambu gha Bibilia bhahobhale kubha chitabu cha Bhalawi, papamu na itabu yengi ya Tolati, yani Utumbulilu, Kubhoka, Hesabu, na Kombukombu la Tolati, yakalembakiki na mlota Musa. Uchakaka aghoghu bhelabhela upwaghakika na chitabu chene, maghambu chitabu cha Bhalawi chitumbula kwa kupwagha, “Bambo Chapanga akundohiki Musa na kulonge naku mu Lihema Lihuhu.” (Sula 1:1). Bhangi bhahobhale kubha chitabu chenjenu chakalembakiki kwa kubhongana malembu ghangi gha mwande mu kaline ja 5-6 K. K. (Mangani ja Kubhelakeka Kristo), chikahi bhandu bha Izilaeli pabhakabhi kuutumwa ku Babeli.

Mu utumbulilu wa chitabu cha Bhalawi, tusona ntundu wamaheli wa nyambiku na nhupu yaka Chapanga yeakalaghalaki ibhohakikaje na bhapenganyambiku. Nyambiku yakumu pachilanda ja yeniheyi yakabhohakiki ngati nyambiku ya kubhoha mahoku gha bhandu. Nyambiku yengi yakabhohakiki kwa upalu pela kwaka Bambo Chapanga. Kwa ntundu wokapi ghola, lakabhi lijambu lelipalika namaa kwa nyambiku jeabhoha mundu jikubhaje mu hali jinyahi nakanope, jangakubha na chilema chokapi chela. Nde chakaka kubha lijambu leniheli lakalangihi uhuhu na ukamilufu waka Chapanga. Pandu pa kujomulela pa malembu gha chitabu chenu, palandila ntundu Bhaizilaeli na bhapenganyambiku mobhakawezi kuhighalila mu uhuhu au na ntundu moibhapalaki kuhenga nahuli bhaweza kubha bhahuhu. Mada ngolongwa mu chitabu chenjenu nde kubha Chapanga nde mhuhu, na kwa kujengalela shelia yeibhi mu chitabu chenjenu, bhandu bha Izilaeli bhakabya bhaweziki kutama na Chapanga.

Ghaghabhihomu

Malaghalakilu na ntundu wa kubhoha nyambiku na nhupu patali patali, mu sula ja 1 mbaka sula ja 7.

Ntundu Haluni na bhana bhaki mobhakahaghuliwe na kutendakeka kubha bhapenganyambiku, mu sula ja 8 mbaka ja 10.

Shelia panani ja ilebhi inyahi na ihakau, na itamu patali patali, mu sula ja 11 mbaka ja 16.

Amuli yengi ya malaghalakilu panani ja kula, uwangalalu, lujendu lwa matamu gha bhandu, na hyaka ya Sabato, mu sula ja 17 mbaka ja 27.