Bhalawi 6

1Bambo Chapanga akumpwaghi Musa, 2Ngati mundu jokapi jola anaatendiki mahoku kwa kulepa kubha na ulongwana kwaka Bambo Chapanga, kwa kunkoloha njaki kubhokana na chindu cheapekiwi, au cheapekiwi kuchighoha, au anachijibhakiki, au anaambonili njaki, 3au anaatondwili chindu chaka njaki chechahobhiki, na kupwagha kubha ngacheakiweni, au ngati anaalapiki kwa upuhe kubhokana na lihoku lokapi lela ambalu bhandu bhaweza kulihenga, 4mundu jonihoju paakubha ahengiki lihoku leniheli na kubha na mahoku, impalika akelabhuhaje chindu chela cheajibhike, au cheachipatiki kwa kukoloha, au chindu chela cheachipatiki kwa kubhonela, au chindu chela cheapekiwi kuchighoha, au chindu chaka njaki chechakabhi chihobhiki nambu akachiwene, 5au chindu chokapi chela cheakachilapili kwa upuhe. Impalika alepaje kila chindu ngati mochabhelile, na kujonjukela pandu pa kahanu nakanopi pa samani ja chindu chenihechi. Hindu yokapi akelabhuhaje kwaka mweni yaki mu lichobha lela paapeleka nyambiku jaki ja kubhoha mahoku. 6Bhela mundu jonihoju andetilaje mpenganyambiku limbeleli likambaku au imbuhi lipongu jangakubha na chilema na kumbokeha Bambo Chapanga nyambiku ja kubhoha mahoku. Samani ja chinyama chenihechi ipalika jilenganaje na jela ja kubhoha mahoku. 7Kwa kuhenga bhenibhela mpenganyambiku anaahenga ujonganesu kwa ndandi jaki palongi jaka Bambo Chapanga, najombi mundu hoju anaalekakiwaje mahakau ghokapi ghaghakuntendiki kubha na mahoku.

Nyambiku ya kujochakeka

8Bambo Chapanga akumpwaghi Musa, 9Umpekyaje Haluni na bhana bhaki malaghalakilu aghagha: Aghagha nde mambu ghaghapalika kujengalewa gha ntundu wa kubhoha nyambiku ja kujochakeka: Nyambiku ja kujochakeka jihighalyaje panani ja moto ghoubhi panani ja pandu pa kubhokeha nyambiku ikilu jokapi, mbaka lukela, nawombi moto ghonihoghu ipalika ujendalya kubhelela panani ja pandu pa kubhokeha nyambiku. 10Bhela mpenganyambiku koni akabya awati ingobhu yaki inyahi ihuhu, na libundulu laki linyahi lihuhu, atolaje ilihu ya nyambiku kuhuma pandu pa kubhokeha nyambiku, na kuibheka punkeghi ja pandu pa kubhokeha nyambiku. 11Bhela ahulaje ingobhu yeniheyi na kuwata ingobhu yengi, najombi atola ilihu yeniyela na kuipeleka kunja ja likambi na kughapeleka pandu panyahi papajetakaliwi na Chapanga. 12Moto ghoubhi panani ja pandu pa kubhokeha nyambiku upalika ujendalya kubhelela, ngawichuchuka ng'o. Kila lukela mpenganyambiku impalika ajonjukya hanju na kupanga nyambiku ya kujochakeka panani ja moto, na kughajocha mahuta gha nyambiku ya kutama kwa lukwali panani jaki. 13Moto upalika ujendalya kubhelela chikahi chokapi panani ja pandu pa kubhoha nyambiku, panga kuchuchuka.

Nhupu ya uhembi

14“Yenjenu nde amuli ya nhupu ya uhembi laini. Bhana bhaka Haluni anabhailetaje palongi yaka Bambo Chapanga, na palongi ya pandu pa kubhohakela nhupu. 15Jumu wa bhapenganyambiku anatola libhundi limu la uhembi laini na mahuta, papamu na ubani ghokapi ghoubhili panani ja nhupu ja uhembi, na kuijocha nhupu heji panani ja pandu pa kubhohakela nhupu ngati pandu pa ukombukelu, unungilu waki anaunyambiha Bambo Chapanga. 16Haluni na bhana bhaki anabhakula pandu papahighalile, nambu anabhakula panga kujeghe amila pandu pahuhu. Anabhakula paliwangala la Lihema Lihuhu. 17Ngaijochakeki na amila ng'o, nabhapekihi ngati chibhambiku chabhu cha nyambiku jejibhohakiwi kwangu kwa moto. Nde nyambiku jihuhu namaa ngati mojibheli nyambiku ja kubhoha mahoku na ja kobhoha mahakau. 18Kila mwanalomi mbelekeka waka Haluni aweza kula. Nde lifungu laki la kila lichobha la nyambiku yeibhohakiki kwaka Bambo Chapanga kwa moto kwa ibhelekeku yeihika. Chindu chokapi chela cheanachigusaje anachikubha chaka Chapanga.” 19Kabheti Bambo Chapanga akumpwaghi Musa, 20Ajeji nde nhupu ambaju Haluni na bhana bhaki ibhapalika kumbokeha Bambo Chapanga mu lichobha lela lebhahimikwa kubha bhapenganyambiku: Kilu jimu ja uhembi laini kwa lichobha, nusu jimu ja uhembi ghonihoghu anaabhoha lukela na nusu jengi anaabhoha pakamihe. 21Ajilenganakyaje kwa mahuta mu chikalango, ujileta jakabya jihanganginwi wichu na ubhoha nhupu heji ja uhembi jakabya jihekitwi ipandi ipande kubha unungilu unyahi wa kunyambiha Bambo Chapanga. 22Mwana waka Haluni joanajingala pandu paki ngati mpenganyambiku joajeghaliki mahuta, jonihoju nde joanaandihaje. Leniheli nde lilaghalakilu la mileli laka Bambo Chapanga, nalombi analijochakikaje nakanopi. 23Kila nyambiku ja uhembi jaka mpenganyambiku anaijochakika nakanopi, ngacheipalika kula ng'o.

Nyambiku kwa ndandi ja mahoku

24Bambo Chapanga akampwaghi Musa, 25Umpwaghila Haluni na bhana bhaki: Aghagha nde malaghalakilu kwa ndandi ja nyambiku ja kubhoha mahoku, pandu pala ambapu chinyama cha nyambiku ja kujochakeka pabhachinjila panihapa nde pachichinjakikaje chinyama cha nyambiku ja kubhokeha mahoku, palongi jaka Bambo Chapanga, jeniheji nde nyambiku jihuhu nakanopi. 26Mpenyanyambiku joabhoha nhupu jeniheji nde joanakulaje, anajikulakikaje pandu pahuhu, mu liwangala la Lihema Lihuhu. 27Chokapi chechigusaje inyama jeniheji ja nyambiku anachikubha chihuhu na ngati mwahi wa chinyama hechi anauholulili panani ja ingobhu, ipalika ajichapilaje mu liwangala la pandu pahuhu. 28Chibhegha chenabhatelakya inyama jeniheji ipalika chikajulikikaje, nambu ngati anajitelakiki mu chombu cha shaba, chombu hechi anachigholulika wichu na kujeleha kwa machi. 29Kila mwanalomi mu bhandu bha munyumba jaka mpenganyambiku aweza kula inyama jeniheji, nde jihuhu nakanopi. 30Nambu kila nyambiku ja kubhoha mahoku ambaju mwahi waki uletakiki mkati ja Lihema Lihuhu kutenda ujonganeshu mu Pandu Pahuhu ngajikulakika ng'o, ipalalika jijochakika kwa moto.