Bhalawi 10

Lihoku laka Nadabu na Abihu

1Nadabu na Abihu bhana bhaka Haluni bhakatoliki chetezu yabhu, bhakabhekiki moto mkati jaki na kujonjukela ubani, bhela bhakumbokili Bambo Chapanga moto wanga kupalika, ghoubhili chihanganyuma na malaghalakilu ghaka Chapanga. 2Bhela moto ukapitalili palongi jaka Bambo Chapanga, na kubhayonanga akakombu bhala, nabhombi bhakapotili palongi jaka Bambo Chapanga. 3Bhela Musa akumpwaghi Haluni, “Haleli nde lela leapwaghiki Bambo Chapanga chikahi paakapwaghike, ‘Pachilanda ja bhala bhabhanheghalela ananililangihaje kubha mhuhu, pamihu ja bhandu bhokapi anandopalikaje.’ ” Haluni akatumbili chinunu.

4Bhela, Musa akabhalohiki Mishaeli na Elisafani, bhana bhaka Uzieli, tati nchoku waka Haluni, na kubhapwaghila, “Muhika pambane, mujibhoha mituhi ja bhalongu bhinu kunja ja likambi kutali na Pandu Pahuhu.” 5Bhela bhakahikiki na kubhoha mituhi, bhakabya bhahwati ingobhu yabhu ya ibada, bhakabhapeliki kunja ja likambi, ngati Musa moakabhalaghalakile.

6Bhela Musa akumpwaghi Haluni papamu na bhana bhaki, Eleazali na Itamali, “Ngamwiyekula mayunju gha mimutu jinu wala ngamwikachula ingobhu hinu, anangati ngabhela anampotilaje na Bambo Chapanga anaabhayomila bhandu bhokapi. Nambu bhalongu bhinu, nyumba jokapi ja Izilaeli anabhaweza kubhalelela bhala ambabhu Bambo Chapanga abhayoningi kwa moto. 7Ngamwipita kunja ja ndyangu wa Lihema Lihuhu nangabhela anampotilaje, kwa ndandi mahuta gha kupaka ghaka Bambo Chapanga ghakali ghabhi panani jinu.” Bhela bhakatendiki ngati Musa moakapwaghile.

Malaghalakilu kwa bhapenganyambiku

8Bhela Bambo Chapanga akumpwaghi Haluni, 9“Wehapa na bhana bhaku ngamwikunywa divai wala chakunywa chengi chokapi chechibhi na amila chikahi pampala kujenda kujingila mu Lihema Lihuhu, nangabhela anampotilaje. Hajeji anajikubha amuli ja mileli mu ibheleku hinu yokapi. 10Impalika muhaghulaje pachilanda ja mambu mahuhu na mambu ghangakubha mahuhu, pachilanda ya mambu mahakau na ghangakubha mahakau. 11Impalika mwabhola Bhaizilaeli shelia yokapi ambayu Bambo Chapanga akumpekihi kwa kupete Musa.”

12Bhela Musa akabhapwaghi Haluni papamu na bhana bhaki bhabhahighalile, Eleazali na Itamali, “Mtolaje pandu pa nyambiku ja uhembi jejihighalile kuhuma mu nyambiku yeabhohakewa Bambo Chapanga kwa moto, mkulaje pambipi na pandu pa kubhokeha nyambiku panga kujeghe amila kwa ndandi nde jihuhu namaa. 13Anamjikula mu pandu pahuhu kwa ndandi nde lifungu linu na lifungu la bhana bhinu la nyambiku jejibhohakiki kwa Bambo Chapanga kwa moto, ndandi bhenibhela nde monaghalakiwi. 14Nambu wehapa na bhana bhaku na akakamwali bhaku muweza kula chihimba chela chechajinuliwi na lipaja lela lelabhohakiki. Anamkula pandu panyahi pa kawaida ja ibada, upekiwi wehapa na bhana bhaku kubha lifungu linu la nyambiku ja kutama kwa lukwali la Bhaizilaeli. 15Lipaja lela lelabhohakiki na chihimba chela chechijinuliwi ipalika iletakikaje papamu na pandu pa mahuta gha nyambiku ja kujochakeka kwa moto, nahuli kujinuliwa palongi jaka Bambo Chapanga ngati nyambiku ja kujinuliwa. Haleli analikubha lifungu laku la mileli na bhana bhaku, ngati Bambo Chapanga moakalaghalakile.”

16Musa paalalukili kubhokana na imbuhi jejibhohakeka kwa ndandi ja nyambiku ja mahoku, na kubhona kubha jiyonangike, akabhayomili Eleazeli na Itamali, bhana bhaka Haluni bhabhahighalile, na kubhalalukila, 17“Bho, maghambu kike ngachemwakuliki nyambiku ja mahoku pachilanda ja pandu pahuhu? Kwa kubha nde jihuhu namaa, mkapekiwi mwanganya nahuli kubhoha mahoku gha lipogha, kwa ndandi ja kutenda ujonganesu palongi jaka Bambo Chapanga. 18Kwa kubha mwahi waki ngachewaletakiki mkati ja Pandu Pahuhu, mkabya mkulike imbuhi heji mkati ja Pandu Pahuhu ngati monalaghalakile.”

19Haluni akamuyangiki Musa, “Lalenu bhana bhangu bhabhohiki nyambiku yabhu ya kubhoha mahoku na nyambiku yabhu ya kujochakeka palongi jaka Bambo Chapanga, nambu mambu ngati aghagha ghambatiki nepani. Bho, Bambo Chapanga akabya anyambakiki lelu ngati nakabi nguliki nyambiku ja kubhoha mahoku lalenu?” 20Musa paakajowini ghanihagha, akakotwiki kuyoma.