Bhalawi 14

Ugholuleku kuhuma mu chitamu cha ngozi

1Bambo Chapanga akumpwaghi Musa, 2Aghagha nde malaghalakilu kubhokana na mundu joabhi na chitamu cha malohi mu lichobha la kugholuleka kwaki. Anaajomwi kulama analetakika kwaka mpenganyambiku, 3mpenganyambiku anajenda kunja ja likambi kundingalila mundu jonihoju. Ngati mundu jonihoju anaalamiki chitamu chaki cha ngozi cha kujambukila, 4panihapa mpenganyambiku anaabhalaghalakya bhandu bhaletaje hijuni ibheli inyahi yeibhi yomi, chipandi cha nkongu wa mwelezi, mangoma makeli gha limbeleli na limbandi la nkongu wa hisopu kwa ndandi jaka mundu joanagholulika hoju. 5Bhela mpenganyambiku anaalaghalakya kubha bhachinja chijuni chimu mu chipika chechibhi na machi manyahi gha chemichemi. 6Bhela mpenganyambiku anatola chijuni chengi chechibhi chomi hechi, chipandi cha nkongu wa mwelezi, mangoma makeli gha limbeleli na limbandi la nkongu wa hisopu na kuijwiha yokapi mu mwahi wa chijuni chechichinjakiki chela. 7Bhela, mpenganyambiku anaammichila mundu joabhi na chitamu cha kujambukila jola mwahi ghonihoghu mala saba na kumtangaza mundu hoju kubha abhi wichu. Bhela anaachilekakya chijuni chechibhi chomi chela chijenda kumighonda.

8Mundu hoju anaachapa ingobhu yaki, anamogha majunju ghaki, na kujogha machi, najombi anaakubha wichu. Anaajomwi kutenda ghanihagha anajenda kulikambi, nambu anaatama kunja ja lihema laki kwa machobha saba. 9Lichobha la saba impalika amogha majunju ghaki ghokapi, yani amogha majunju gha kumutu, indeu yaki, ngopalela yaki, na majunju ghangi ghokapi. Impalika achapaje ingobhu yaki, na ajoghaje kwa machi, najombi anakubha wichu.

10“Lichobha la nane, aletaje bhanambeleli ghabheli makambaku ghangakubha na chilema, mwanambeleli limbomba la chaka chimu langakubha na chilema, kilu itatu ya uhembi laini ghouhangaghinwi na mahuta gha zeituni kwa ndandi ja nyambiku ja chilebhi, papamu na mahuta gha zeituni selusi jimu ja lita. 11Mpenganyambiku joanaangolula mundu hoju anaandetaje palongi jaka Bambo Chapanga pambipi na ndyangu wa Lihema Lihuhu papamu na hindu yealetike.

12“Bhela mpenganyambiku anaatola limu la mambeleli makambaku ghala na kulibhoha kubha nyambiku ja mahoku, papamu na mahuta gha zeituni selusi jimu ghala, anaaghajinua palongi jaka Bambo Chapanga kubha nyambiku ja kujinuliwa. 13Bhela anaalichinja limbeleli heli mu Pandu Pahuhu, pabhachinji hinyama ja nyambiku ja kubhoha mahoku na nyambiku ja kujochakeka. Nyambiku ja kubhoha mahoku heji, ngati mojibhelili nyambiku ja kubhoha mahakau, nde yaka mpenganyambiku, jeniheji nde nyambiku jihuhu namaa. 14Bhela mpenganyambiku anaatola pandu pachokopi pa mwahi wa nyambiku ja kubhoha mahoku na kumpaka mundu joagholuleka mu nkeghi ja likutu laki la kumalelelu na lukonji lwaki lukolongwa lwa chiwoku chaki cha kumalelelu na lukonji lukolongwa lwa chigholu cha kumalelelu. 15Bhela mpenganyambiku anaatolaje pandu pa selusi jimu ja mahuta gha zeituni ghala, na kughajeghela pa chighanja cha chiwoku chaki mweni cha kumangeja, 16anajwiha lukonji lwaki lwa chibhoku cha kumalelelu mu mahuta gha zeituni ghaghabhi pa chighanja chaki, na kwa lukonji loniholu anaammichila mundu hoju joanagholulikaje mala saba palongi jaka Bambo Chapanga. 17Mahuta ghaghahighalili pa chighanja chaka mpenganyambiku anaampaka mundu joanagholulika hoju, munkeghi ja likutu laki la kumalelelu na lukonji lwaki lukolongwa lwa chiwoku chaki cha kumalelelu, na lukonji lukolongwa lwa chigholu cha kumalelelu, pandu pala pala paakumpakiki mwahi wa nyambiku ja kubhoha mahoku. 18Mpenganyambiku anaaghapaka mahuta ghaghahighalili pa chighanja chaki panani ja mmutu waka mundu jola joagholuleka, na kutenda ujunganesu kwa ndandi jaka mundu hoju, palongi jaka Bambo Chapanga.

19“Bhela mpenganyambiku anabhoha nyambiku jela ja kubhoha mahoku na kuntendela mundu joagholuleka hoju ujonganesu nahuli kubhoha uhakau waki. Anajomwili kutenda ghanihagha, mpenganyambiku anachinjaje mwanalimbeleli la nyambiku ja kujochakeka, 20na kujibhoha panani ja pandu pa kubhokeha nyambiku, papamu na nyambiku ja uhembi nahuli kuntendela ujonganesu, najombi anakubha wichu.

21“Nambu ngati mundu hoju nde kahochu, na ngacheabhi na uwezu wa kubhoha hindu yeniheyi, bhela aletaje mwanalimbeleli limu likambaku kubha nyambiku ja kubhoha mahoku ambalu anatendiwaje nginyulila ja kubhoha nyambiku nahuli kuntendela mundu hoju ujonganesu. Bhelabhela analetaje kilu jimu ja uhembi laini ghouhangaghinwi na mahuta gha zeituni kwa ndandi ja nyambiku ja uhembi na mahuta gha zeituni selusi jimu, 22na ngunda ibheli au makenda ghabheli gha injebha, chela cheanaweza kupata, jimu kwa ndandi ja nyambiku ja kubhoha mahoku, na jengi kwa ndandi ja nyambiku ja kujochakeka.

23“Mu lichobha la nane impalika aletaje hindu heyi kwaka mpenganyambiku, kwa ndandi ja kugholuleka kwaki pundyangu wa Lihema Lihuhu palongi jaka Bambo Chapanga. 24Mpenganyambiku anaantola mwanalimbeleli likambaku kwa ndandi ja nyambiku ja kubhoha mahoku papamu na selusi jimu ja mahuta gha zeituni gha kujinuliwa palongi jaka Bambo Chapanga ghala kubha nyambiku ja kujinuliwa. 25Mpenganyambiku anaachinjaje mwanalimbeleli likambaku hoju kwa ndandi ja nyambiku ja kubhoha mahoku. Mpenganyambiku anatola pandu pachokopi pa mwahi na kumpaka mundu joagholuleka hoju punkeghi ja likutu laki la kumalelelu, mu lukonji lwaki lukolongwa lwa chiwoku chaki cha kumalelelu, na lukonji lwaki lukolongwa lwa chigholu chaki cha kumalelelu. 26Bhela mpenganyambiku anapongulaje pandu pa mahuta pa chighanja cha chiwoku chaki cha kumangeja, 27na kwa lukonji lwaki lwa kumalelelu anammichilaje mundu hoju pandu pachokopi pa mahuta ghala ghaghabhi pa chighanja chaki cha kumangeja mala saba palongi jaka Bambo Chapanga. 28Mpenganyambiku anaampaka mahuta ghaghahighalile pa chighanja chaki mu pandu pokapi ngati moakumpakili mwahi wa nyambiku wa mahoku: Yani punkeghi ja likutu la kumalelelu lwaka jola joagholuleka, mu lukonji lukolongwa lwa chiwoku chaki cha kumalelelu, na lukonji lukolongwa lwa chigholu cha kumalelelu. 29Mahuta ghaghahighalili mu chiwoku chaki anaampaka mundu hoju pamutu, nahuli kuntendela ibada ja ujonganesu palongi jaka Bambo Chapanga. 30Bhela mpenganyambiku anaatolaje ngunda jimu pachilanda ja ibheli yela, au injebha ibheli ngati mundu hoju moaweze kuipata, 31jimu kwa ndandi ja nyambiku ja mahoku, na jengi kubha nyambiku ja kujochakeka, papamu na nyambiku ja uhembi. Kwa indela hajeji mpenganyambiku anatenda ujonganesu kwa ndandi jaka mundu joagholuleka hoju, palongi jaka Bambo Chapanga.”

32Aghagha nde malaghalakilu kwaka mundu jokapi jola joabhi na chitamu cha ngozi cha kujambukila na ambachu ngachechibhi na uwezu wa kubhoha nyambiku ja kawaida kwa ndandi ja kugholuleka kwaki.

Madoa mu nyumba

33Bambo Chapanga akabhapwaghi Musa na Haluni, 34Pamwijingalaje mu inchi ja Kanaani ambaju numpekeha kubha jinu, nanatu anameka madoa ghaghajaghanila mu nyumba mu inchi jenijela, 35impalika mweni nyumba heji akumpwaghila mpenganyambiku: Nichiweni chindu chechilengana na madoa mu nyumba jangu. 36Mpenganyambiku analaghalakyaje hindu yokapi ibhohakijaje mkati ja nyumba mangani ngacheapiti kulinga ngati jibhi na chitamu chenihechi, nahuli chindu chokapi mkati ja nyumba ngachitangazwa kubha chihakau. Bhela, mpenganyambiku anajingala mkati ja nyumba na kujilingalila nyumba heji. 37Mpenganyambiku analingalyaje madoa ghanihagha mu lumatu lwa nyumba heji, najombi ngati anajibhi na langi ja mahamba mabhehi au ukeli na kubhi na mabhomba mkati ja lumatu, 38bhela, mpenganyambiku anapita kunja na kujighila ndyangu wa nyumba heji kwa machobha saba, 39mu lichobha la saba, mpenganyambiku anakelabhukaje na kujilinga kabheti nyumba. Ngati anaaweni madoa ghajaghanili munani ja lumatu heyi, 40mpenganyambiku analaghalakya kubha maganga ghokapi ghaghajambukiwi ghabhohakikaje na kughalekela pandu papabhi pahakau kunja ja muchi. 41Lipu jokapi ja nyumba jeniheji jikojuliwaje na luhombi lwaki kululekela pandu pahakahu kunja ja muchi. 42Bhela anabhatola maganga ghangi na kuchenga pandu pabhabombwili, nabhombi anabhamata nyumba heji kwa lipu jahenu.

43Ngati madoa hagha anaghapitalili kabheti chikahi maganga hagha ghabhohakiki na kukwangula lipu heji na kubheka lipu jahenu, 44mpenganyambiku anajendaje kujilingalila na ngati madoa ghajaghanili mkati ja nyumba, bhela ghanihagha nde madoa ghaghayonanga, nyumba jeniheji nde jihakau. 45Nyumba heji jipalika jibombuliwaje na maganga ghaki, mikongu jaki na lipu jaki, yokapi ikapelakwaje pandu pahakau kunja ja muchi. 46“Kabheti mundu jokapi joanajingalaje mkati ja nyumba heji koni jakabya jijighaliki, anakubha mhakau mbaka pakamihe. 47Mundu jokapi joanaghonilaje mkati ja nyumba heji au kula chilebhi mkati ja nyumba heji impalika achapa ingobhu yaki.

48“Nambu anangati mpenganyambiku anahikiki kujingila mkati ja nyumba na kubhona kubha madoa ngacheghajaghani kabheti kwa kubha nyumba jitehi kumatakika, anaajitangaza nyumba heji kubha jibhi wichu, maghambu madoa ghajomwike. 49Nahuli kujigholola nyumba heji, mweni nyumba analeta hijuni ibheli, limbandi la nkongu wa mwelezi, na nyuzi ya mangoma makeli gha limbeleli na limbandi la hisopu. 50Mpenganyambiku anachinja chijuni chimu mu chipika chechibhi na machi manyahi gha chemichemi. 51Bhela mpenganyambiku anaatola limbandi la nkongu wa mwelezi, limbandi la nkongu wa hisopu, na nyuzi ya mangoma makeli gha limbeleli na chijuni chechibhi chomi, na kuijwiha mkati ja mwahi wa chijuni chechichinjakiki papamu na machi manyahi na kujimichila nyumba jela mala saba. 52Bhenibhela nde ntundu mpenganyambiku moanaajigholula nyumba heji kwa mwahi wa chijuni chela, machi manyahi, chijuni chomi chela, limbandi la nkongu wa mwelezi, limbandi la nkongu wa hisopu na nyuzi ya mangoma makeli gha limbeleli. 53Bhela mpenganyambiku anachilekakya chijuni chechibhi chomi chela kulijeka mu mighonda kunja ja muchi. Kwa indela hajeji anatenda ujonganesu kwa ndandi ja nyumba heji, najombi anajikubha wichu.”

54Aghagha nde malaghalakilu kubhokana na chitamu chokapi chela cha ngozi cha kujambukila, na kunyanya kwa ntundu wokapi ghola, 55madoa gha mu ingobhu au mkati ja nyumba, 56kwa kuhimba, maputi au madoa ghaghang'anya, 57nahuli kulangiha nde chindu bholi chinyahi au chihakau kwaka Bambo Chapanga. Ghanihagha nde malaghalakilu kubhokana ntundu wokapi wa itamwa ya malohi.