Biblica® Open Lao Contemporary Version
ສຸພາສິດ 22
ຊື່ສຽງດີກໍເປັນທີ່ຕ້ອງການຫລາຍກວ່າຄວາມຮັ່ງມີ;
ໄດ້ຮັບການຍ້ອງຍໍກໍດີກວ່າໄດ້ເງິນ ຫລື ຄໍາ.
ຄົນຮັ່ງມີ ແລະ ຄົນທຸກຍາກມີສິ່ງໜຶ່ງທີ່ຄືກັນຄື:
ພຣະເຈົ້າຢາເວເປັນຜູ້ສ້າງຂອງພວກເຂົາທັງໝົດ.
ຄົນສະຫລາດເຫັນໄພອັນຕະລາຍ ແລະ ເຂົ້າໄປລີ້ໄພ,
ແຕ່ຜູ້ທີ່ບໍ່ຮູ້ຈັກຄິດກໍຍ່າງຕໍ່ໄປ ແລະ ໄດ້ຮັບໂທດ.
ຄວາມຖ່ອມຕົວຄືການຢຳເກງພຣະເຈົ້າຢາເວ;
ຄ່າຈ້າງຂອງຄວາມຖ່ອມຕົວຄື ຄວາມຮັ່ງມີ, ກຽດຕິຍົດ ແລະ ຊີວິດ.
ທາງຂອງຄົນຊົ່ວຮ້າຍເປັນບ້ວງແຮ້ວ ແລະ ເປັນກັບດັກ,
ແຕ່ຄົນທີ່ຮັກສາຊີວິດຂອງຕົນຈະຫລີກໜີຈາກສິ່ງເຫລົ່ານັ້ນ.
ຈົ່ງເລີ່ມອົບຮົມເດັກນ້ອຍໃນທາງທີ່ພວກເຂົາຄວນຈະໄປ,1
ແລະ ເມື່ອພວກເຂົາໃຫຍ່ຂຶ້ນ ພວກເຂົາຈະບໍ່ຫັນໜີຈາກທາງນັ້ນ.
ຄົນຮັ່ງມີປົກຄອງຄົນທຸກຈົນ,
ແລະ ຄົນທີ່ເປັນໜີ້ກໍເປັນຂ້າທາດຂອງເຈົ້າໜີ້.
ຜູ້ທີ່ຫວ່ານຄວາມບໍ່ຍຸຕິທໍາກໍເກັບກ່ຽວໄພພິບັດ,
ແລະ ໄມ້ແສ້ຄືອຳນາດທີ່ພວກເຂົາໃຊ້ກົດຂີ່ຄົນອື່ນຈະຖືກທຳລາຍ.
ຄວາມສຸກເປັນຂອງຄົນໃຈກວ້າງ,
ເພາະພວກເຂົາແບ່ງປັນອາຫານຂອງຕົນໃຫ້ຄົນທຸກຍາກ.
ຈົ່ງໄລ່ຄົນມັກເຢາະເຢີ້ຍອອກໄປ, ແລະ ການຜິດຖຽງກັນກໍຈະບໍ່ມີ;
ການສຽດສີ ແລະ ການໝິ່ນປະໝາດຈະຈົບລົງ.
ຜູ້ທີ່ຮັກຈິດໃຈທີ່ບໍລິສຸດ ແລະ ເວົ້າຈາອ່ອນຫວານ
ຈະມີໝູ່ເປັນກະສັດ.
ຕາຂອງພຣະເຈົ້າຢາເວເຝົ້າຮັກສາຄວາມຮູ້ໄວ້,
ແຕ່ພຣະອົງທໍາລາຍຄຳເວົ້າຂອງຄົນບໍ່ສັດຊື່.
ຄົນຂີ້ຄ້ານເວົ້າວ່າ “ມີໂຕສິງຢູ່ຂ້າງນອກ!”
“ຂ້ອຍຈະຖືກມັນຂ້າຢູ່ກາງທາງກໍໄດ້!”
ປາກຂອງຍິງຫລິ້ນຊູ້ເປັນດັ່ງຂຸມເລິກ;
ຄົນທີ່ຖືກພຣະເຈົ້າຢາເວໂກດຮ້າຍຈະຕົກລົງໄປໃນຂຸມນັ້ນ.
ຄວາມໂງ່ຈ້າຝັງໄວ້ຢູ່ໃນໃຈຂອງເດັກນ້ອຍ,
ແຕ່ໄມ້ແສ້ທີ່ຕີສອນຈະຊ່ວຍໄລ່ມັນອອກໄປ.
ຜູ້ທີ່ກົດຂີ່ຂົ່ມເຫັງຄົນທຸກຍາກເພື່ອໃຫ້ຕົນເອງຮັ່ງມີຂຶ້ນ.
ແລະ ຜູ້ທີ່ເອົາຂອງຂັວນໃຫ້ຄົນຮັ່ງມີ ຈະເຮັດໃຫ້ທັງສອງຄົນທຸກຈົນລົງ.
ຄຳສອນ 30 ຕອນຂອງຄົນມີປັນຍາ
ຄໍາສອນທີ 1
ຈົ່ງຕັ້ງໃຈ ແລະ ຟັງຄຳເວົ້າຂອງຄົນມີປັນຍາ
ແລະ ຈົ່ງເອົາໃຈໃສ່ໃນສິ່ງທີ່ປັນຍາສັ່ງສອນ,
ເພາະມັນຈະເຮັດໃຫ້ເຈົ້າສຸກໃຈ ເມື່ອເຈົ້າຮັກສາຄຳສັ່ງສອນນັ້ນໄວ້ໃນໃຈຂອງເຈົ້າ.
ແລະ ມີຄຳສັ່ງສອນທັງໝົດຢູ່ໃນປາກຂອງເຈົ້າ.
ເພື່ອໃຫ້ຄວາມໄວ້ວາງໃຈຂອງເຈົ້າຢູ່ໃນພຣະເຈົ້າຢາເວ,
ເຮົາສອນເຈົ້າໃນມື້ນີ້, ແມ່ນແຕ່ເຈົ້າເອງກໍຄືກັນ.
ເຮົາໄດ້ຂຽນຄຳສັ່ງສອນສາມສິບຕອນໄວ້ໃຫ້ເຈົ້າບໍ່ແມ່ນບໍ,
ເປັນຄຳແນະນຳ ແລະ ຄວາມຮູ້.
ສັ່ງສອນເຈົ້າໃຫ້ເປັນຄົນສັດຊື່ ແລະ ເວົ້າຄວາມຈິງ,
ເພື່ອເຈົ້າຈະນໍາຄວາມຈິງກັບມາລາຍງານ
ຜູ້ທີ່ໃຊ້ເຈົ້າໄປ?
ຄໍາສອນທີ 2
ຢ່າເອົາປຽບຄົນທຸກຈົນ ເພາະພວກເຂົາກໍທຸກຈົນຢູ່ແລ້ວ
ແລະ ຢ່າຢຽບຢໍ່າຄົນຂັດສົນຢູ່ໃນສານ,
ເພາະພຣະເຈົ້າຢາເວຈະແກ້ຄະດີໃຫ້ພວກເຂົາ
ແລະ ຈະເອົາຊີວິດຂອງຜູ້ທີ່ຈະເອົາຊີວິດຂອງພວກເຂົາ.
ຄໍາສອນທີ 3
ຢ່າເປັນໝູ່ກັບຄົນໃຈຮ້ອນ,
ຢ່າຄົບກັບຄົນທີ່ໃຈຮ້າຍງ່າຍ,
ເພາະເຈົ້າອາດຈະຮຽນແບບວິຖີທາງຂອງພວກເຂົາ
ແລະ ເຮັດໃຫ້ຕົນເອງຕົກຢູ່ໃນບ້ວງແຮ້ວ.
ຄໍາສອນທີ 4
ຢ່າເປັນຜູ້ທີ່ຈັບມືໃຫ້ຄໍາສັນຍາ
ຫລື ຄ້ຳປະກັນໃນການໃຊ້ໜີ້ຄົນອື່ນ;
ຖ້າເຈົ້າບໍ່ມີເງິນຈ່າຍ,
ແມ່ນແຕ່ບ່ອນນອນກໍຈະຖືກດຶງອອກໄປຈາກຫລັງຂອງເຈົ້າ.
ຄໍາສອນທີ 5
ຢ່າຍ້າຍຫລັກເຂດແດນເກົ່າ
ທີ່ບັນພະບຸລຸດຂອງເຈົ້າໄດ້ຕັ້ງໄວ້.
ຄໍາສອນທີ 6
ເຈົ້າເຫັນຄົນທີ່ມີຄວາມຊຳນານໃນວຽກງານຂອງພວກເຂົາບໍ?
ພວກເຂົາຈະໄດ້ຮັບໃຊ້ກະສັດ;
ພວກເຂົາຈະບໍ່ຮັບໃຊ້ຂ້າລາຊະການຊັ້ນຕໍ່າ.
Source notes (1)
- Footnote ຫລື ຈົ່ງໃຫ້ເດັກເລີ່ມຕົ້ນໄປໃນທາງທີ່ຄວນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.