Biblica® Open Lao Contemporary Version
ສຸພາສິດ 23
ຄໍາສອນທີ 7
ເມື່ອເຈົ້ານັ່ງກິນເຂົ້າກັບຜູ້ປົກຄອງ,
ຈົ່ງສັງເກດເບິ່ງສິ່ງ1 ທີ່ຢູ່ຕໍ່ໜ້າເຈົ້າໃຫ້ດີ,
ຖ້າເຈົ້າເປັນຄົນມັກກິນຫລາຍ,
ກໍຈົ່ງເອົາມີດຈີ້ຄໍຕົນເອງໄວ້.
ຢ່າໂລບມາກໃນອາຫານທີ່ດີຂອງລາວ,
ເພາະອາຫານນັ້ນເປັນສິ່ງທີ່ຫລອກລວງ.
ຄໍາສອນທີ 8
ຢ່າອິດເມື່ອຍອ່ອນແຮງເພື່ອຢາກຮັ່ງມີ;
ຢ່າໄວ້ວາງໃຈໃນຄວາມເຂົ້າໃຈຂອງເຈົ້າເອງ.
ຄວາມຮັ່ງມີກໍຫາຍໄປໄດ້ພຽງແຕ່ພັບຕາດຽວ,
ເພາະປີກມັນຈະງອກອອກມາ
ແລະ ບິນຂຶ້ນສູ່ທ້ອງຟ້າເໝືອນດັ່ງນົກອິນຊີ.
ຄໍາສອນທີ 9
ຢ່າກິນອາຫານຂອງຄົນທີ່ຂີ້ຖີ່,
ຢ່າໂລບມາກໃນອາຫານດີຂອງລາວທີ່ເອົາມາໃຫ້;
ເພາະລາວເປັນຄົນປະເພດ
ທີ່ຄິດເລື່ອງລາຄາຢູ່ໃນໃຈສະເໝີ.2
ລາວເວົ້າກັບເຈົ້າວ່າ, “ເຊີນກິນ ແລະ ເຊີນດື່ມ”
ແຕ່ໃຈຂອງລາວບໍ່ໄດ້ຄິດແບບນັ້ນ.
ເຈົ້າຈະຮາກອາຫານທີ່ເຈົ້າໄດ້ກິນເຂົ້າໄປອອກມາ
ແລະ ຄໍາຍ້ອງຍໍຂອງເຈົ້າຈະສູນເສຍໄປ.
ຄໍາສອນທີ 10
ຢ່າເວົ້າກັບຄົນໂງ່ຈ້າ,
ເພາະພວກເຂົາຈະດູໝິ່ນຄຳແນະນຳທີ່ສະຫລາດຂອງເຈົ້າ.
ຄໍາສອນທີ 11
ຢ່າຍ້າຍຫລັກເຂດແດນເກົ່າ
ຫລື ບຸກຢຶດທີ່ດິນຂອງລູກກຳພ້າ,
ເພາະຜູ້ປົກປ້ອງຂອງພວກເຂົາກໍເຂັ້ມແຂງ;
ພຣະອົງຈະສູ້ຄະດີກັບເຈົ້າແທນພວກເຂົາ.
ຄໍາສອນທີ 12
ຈົ່ງເອົາໃຈໃສ່ຕໍ່ຄຳສັ່ງສອນ
ແລະ ງ່ຽງຫູຟັງຖ້ອຍຄຳແຫ່ງຄວາມຮູ້.
ຄໍາສອນທີ 13
ຢ່າລັງເລໃນການຕີສອນລູກ;
ຖ້າເຈົ້າລົງໂທດພວກເຂົາດ້ວຍໄມ້ແສ້, ພວກເຂົາຈະບໍ່ຕາຍ.
ຈົ່ງລົງໂທດພວກເຂົາດ້ວຍໄມ້ແສ້
ແລະ ຊ່ວຍພວກເຂົາໃຫ້ພົ້ນຈາກຄວາມຕາຍ.
ຄໍາສອນທີ 14
ລູກເອີຍ, ຖ້າໃຈຂອງເຈົ້າມີປັນຍາ,
ຫົວໃຈຂອງພໍ່ກໍຈະມີຄວາມຍິນດີຫລາຍ;
ເມື່ອປາກຂອງເຈົ້າເວົ້າສິ່ງທີ່ຖືກຕ້ອງ
ຈິດວິນຍານຂອງພໍ່ກໍຈະຊື່ນຊົມຍິນດີ.
ຄໍາສອນທີ 15
ຢ່າໃຫ້ໃຈຂອງເຈົ້າອິດສາພວກຄົນບາບ,
ແຕ່ຈົ່ງກະຕືລືລົ້ນໃນການຢຳເກງພຣະເຈົ້າຢາເວຢູ່ສະເໝີ.
ເພາະມີຄວາມຫວັງໃນອະນາຄົດສໍາລັບເຈົ້າຢ່າງແນ່ນອນ,
ແລະ ຄວາມຫວັງຂອງເຈົ້າຈະບໍ່ສູນເສຍໄປ.
ຄໍາສອນທີ 16
ລູກເອີຍ, ຈົ່ງຟັງ ແລະ ມີປັນຍາ,
ຈົ່ງຮັກສາໃຈຂອງເຈົ້າໃຫ້ຢູ່ໃນທາງທີ່ຖືກຕ້ອງດັ່ງນີ້:
ຢ່າຮ່ວມວົງກັບຜູ້ທີ່ດື່ມເຫລົ້າໜັກ
ຫລື ຜູ້ທີ່ເຫັນແກ່ກິນ,
ເພາະຄົນຂີ້ເມົາ ແລະ ຄົນໂລບມາກຈະກາຍເປັນຄົນທຸກຍາກ,
ແລະ ຖ້າມີແຕ່ນອນຈະເຮັດໃຫ້ພວກເຂົານຸ່ງເຄື່ອງຂາດ.
ຄໍາສອນທີ 17
ຈົ່ງຟັງຄວາມພໍ່ຂອງເຈົ້າ, ຜູ້ທີ່ໃຫ້ຊີວິດແກ່ເຈົ້າ,
ແລະ ຢ່າດູໜິ່ນແມ່ຂອງເຈົ້າເມື່ອເພິ່ນເຖົ້າແກ່.
ຈົ່ງຊື້ຄວາມຈິງ ແລະ ຢ່າຂາຍສິ່ງເຫລົ່ານີ້ຄື:
ປັນຍາ, ຄຳສັ່ງສອນ3 ແລະ ຄວາມເຂົ້າໃຈ.
ພໍ່ທີ່ມີລູກເປັນຄົນຊອບທຳກໍມີຄວາມສຸກຫລາຍ;
ພໍ່ທີ່ມີລູກມີປັນຍາກໍພູມໃຈໃນຕົວລາວ.
ຈົ່ງເຮັດໃຫ້ພໍ່ແມ່ຂອງເຈົ້າມີຄວາມຊື່ນຊົມຍິນດີ;
ຈົ່ງເຮັດໃຫ້ແມ່ຜູ້ທີ່ເກີດເຈົ້າມີຄວາມສຸກ!
ຄໍາສອນທີ 18
ລູກເອີຍ, ຂໍໃຈຂອງເຈົ້າໃຫ້ເຮົາ
ແລະ ຈົ່ງໃຫ້ຕາຂອງເຈົ້າຍິນດີໃນທາງຂອງເຮົາ,
ເພາະຍິງຫລິ້ນຊູ້ເປັນດັ່ງຂຸມເລິກ,
ແລະ ເມຍທີ່ເອົາແຕ່ໃຈເປັນນໍ້າສ້າງແຄບໆ.
ນາງນອນໝອບລໍຖ້າຢູ່ຄືໂຈນ
ແລະ ເຮັດໃຫ້ຊາຍຫລາຍຄົນບໍ່ສັດຊື່ຕໍ່ເມຍຂອງຕົນ.
ຄໍາສອນທີ 19
ຜູ້ໃດທີ່ທຸກທໍລະມານ? ຜູ້ໃດທີ່ໂສກເສົ້າ?
ຜູ້ໃດທີ່ຜິດຖຽງກັນ? ຜູ້ໃດທີ່ຈົ່ມທຸກ?
ຜູ້ໃດມີຮອຍຊໍ້າດໍາຂຽວໂດຍບໍ່ຈຳເປັນ? ຜູ້ໃດທີ່ມີຕາແດງກ່ຳ?
ກໍຄືຄົນທີ່ມົວເມົາຢູ່ກັບເຫລົ້າ,
ຄົນທີ່ລອງຊີມເຫລົ້າປະສົມກັນຫລາຍຊະນິດຢູ່ໃນຖ້ວຍ.
ຢ່າຈ້ອງເບິ່ງເຫລົ້າອະງຸ່ນທີ່ມີສີແດງ,
ເມື່ອມັນເປັ່ງປະກາຍຢູ່ໃນຈອກ,
ເມື່ອດື່ມມັນລົງໄປກໍລື່ນຄໍດີ!
ໃນບັ້ນປາຍແລ້ວ ມັນຕອດຄືງູ
ແລະ ມີພິດຮ້າຍເໝືອນງູພິດ.
ຕາຂອງເຈົ້າຈະເຫັນພາບແປກໆ,
ແລະ ຄວາມຄິດຂອງເຈົ້າຈະຄິດສິ່ງທີ່ສັບສົນ.
ເຈົ້າຈະເປັນດັ່ງຄົນທີ່ກໍາລັງນອນຢູ່ກາງທະເລ,
ແລະ ເປັນດັ່ງຄົນທີ່ກໍາລັງນອນຢູ່ເທິງຍອດເສົາຂອງເຮືອໃບ.
ເຈົ້າຈະເວົ້າວ່າ, “ພວກເຂົາຕ່ອຍຂ້ອຍ,
ແຕ່ຂ້ອຍບໍ່ເຈັບ! ພວກເຂົາຟາດຂ້ອຍ,
ແຕ່ຂ້ອຍບໍ່ຮູ້ສຶກ!
ເມື່ອໃດຂ້ອຍຈະຕື່ນຂຶ້ນມາ ຂ້ອຍຈະໄປດື່ມອີກ”
Source notes (3)
- Footnote ຫລື ຜູ້
- Footnote ຫລື ເພາະເມື່ອເຂົາຄິດຢູ່ໃນໃຈ ດັ່ງນັ້ນເຂົາຈຶ່ງກຳລັງຄິດລາຄາ ຫລື ເພາະເມື່ອເຂົາຈັດງານລ້ຽງ ດັ່ງນັ້ນເຂົາກຳລັງຄິດເລື່ອງລາຄາ
- Footnote ຫລື ວິໄນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.