Biblica® Open Lao Contemporary Version
ສຸພາສິດ 21
ຈິດໃຈຂອງກະສັດຢູ່ໃນມືຂອງພຣະເຈົ້າຢາເວເປັນດັ່ງສາຍນ້ຳໄຫລ
ທີ່ພຣະອົງນຳໄປຫາທຸກຄົນທີ່ພຣະອົງພໍໃຈ.
ມະນຸດອາດຈະຄິດວ່າທາງທັງໝົດຂອງຕົນນັ້ນຖືກຕ້ອງ,
ແຕ່ພຣະເຈົ້າຢາເວຢັ່ງເບິ່ງຈິດໃຈ.
ການເຮັດສິ່ງທີ່ຖືກຕ້ອງ ແລະ ຍຸຕິທຳນັ້ນ
ກໍໄດ້ຮັບການຍອມຮັບຈາກພຣະເຈົ້າຢາເວຫລາຍກວ່າການຖວາຍເຄື່ອງບູຊາ.
ຕາທີ່ຍິ່ງຈອງຫອງ ແລະ ໃຈໂອ້ອວດ
ເປັນເໝືອນທົ່ງນາຂອງຄົນຊົ່ວຮ້າຍທີ່ບໍ່ໄດ້ໄຖ ທັງສອງສິ່ງນີ້ແມ່ນຄວາມບາບ.
ແຜນການຂອງຄົນດຸໝັ່ນນຳຜົນກຳໄລມາໃຫ້ສັນໃດ
ແຜນການທີ່ຟ້າວຟັ່ງນຳຄວາມທຸກຍາກມາໃຫ້ສັນນັ້ນ.
ຊັບສົມບັດທີ່ໄດ້ມາຈາກການຕົວະ
ເປັນດັ່ງອາຍນ້ຳທີ່ຫາຍໄປຢ່າງວ່ອງໄວ ແລະ ເປັນດັ່ງບ້ວງແຮ້ວແຫ່ງຄວາມຕາຍ.1
ຄວາມຮຸນແຮງຂອງຄົນຊົ່ວຮ້າຍຈະລາກພວກເຂົາໄປ,
ເພາະພວກເຂົາບໍ່ຍອມເຮັດສິ່ງທີ່ຖືກຕ້ອງ.
ທາງຂອງຄົນທີ່ເຮັດຜິດນັ້ນກໍຄົດລ້ຽວ,
ແຕ່ການປະພຶດຂອງຄົນບໍລິສຸດນັ້ນກໍທ່ຽງທຳ.
ອາໄສຢູ່ເທິງຫລັງຄາເຮືອນ
ກໍດີກວ່າຢູ່ໃນເຮືອນຮ່ວມກັບເມຍທີ່ມັກຜິດຖຽງກັນ.
ຄົນຊົ່ວຮ້າຍປາຖະໜາຄວາມຊົ່ວ;
ເພື່ອນບ້ານບໍ່ໄດ້ຮັບຄວາມເມດຕາຈາກພວກເຂົາ.
ເມື່ອຄົນມັກເຢາະເຢີ້ຍຖືກລົງໂທດ, ຜູ້ທີ່ບໍ່ຮູ້ຈັກຄິດກໍຈະມີປັນຍາເພີ່ມຂຶ້ນ;
ການໃຫ້ຄວາມສົນໃຈນຳຄົນມີປັນຍາພວກເຂົາກໍໄດ້ຄວາມຮູ້.
ພຣະເຈົ້າອົງຊອບທຳ2 ເຝົ້າເບິ່ງເຮືອນຂອງຄົນຊົ່ວຮ້າຍ
ແລະ ນຳຄວາມຈິບຫາຍມາສູ່ພວກເຂົາ.
ຜູ້ທີ່ປິດຫູບໍ່ຟັງສຽງຮ້ອງໄຫ້ຂອງຄົນທຸກຍາກ
ກໍຈະຮ້ອງໄຫ້ ແລະ ບໍ່ໄດ້ຮັບຄຳຕອບເໝືອນກັນ.
ຂອງຂັວນທີ່ໃຫ້ຢ່າງລັບໆເຮັດໃຫ້ຄວາມໃຈຮ້າຍຫລຸດລົງ,
ສິນບົນທີ່ເຊື່ອງໄວ້ຢູ່ໃນກະເປົ໋າກໍຈະຫລຸດຜ່ອນຄວາມໂມໂຫຮ້າຍລົງ.
ເມື່ອໄດ້ຮັບຄວາມຍຸຕິທຳ, ມັນກໍຈະນໍາຄວາມຊື່ນຊົມຍິນດີມາໃຫ້ຄົນຊອບທຳ
ແຕ່ຄວາມຢ້ານເປັນຂອງຜູ້ທີ່ເຮັດຊົ່ວ.
ຜູ້ທີ່ຫັນໜີໄປຈາກທາງແຫ່ງຄວາມເຂົ້າໃຈ
ຈະໄປພັກຜ່ອນໃນໝູ່ຄົນຕາຍ.
ຜູ້ທີ່ຮັກຄວາມສະໜຸກຈະທຸກຍາກ
ຜູ້ທີ່ຮັກເຫລົ້າອະງຸ່ນ ແລະ ນ້ຳມັນໝາກກອກຈະບໍ່ຮັ່ງມີຈັກເທື່ອ.
ຄົນຊົ່ວຮ້າຍກາຍເປັນຄ່າໄຖ່ໃຫ້ຄົນຊອບທຳ,
ຄົນບໍ່ສັດຊື່ເປັນຄ່າໄຖ່ໃຫ້ຄົນທ່ຽງທຳ.
ອາໄສຢູ່ໃນຖິ່ນແຫ້ງແລ້ງກັນດານ
ກໍດີກວ່າຢູ່ກັບເມຍທີ່ມັກທະເລາະວິວາດ ແລະ ມັກຈົ່ມ.
ຄົນມີປັນຍາສະສົມອາຫານຊັ້ນດີ3ແລະ ນ້ຳມັນໝາກກອກໄວ້.
ແຕ່ຄົນໂງ່ຈ້າກິນສິ່ງທີ່ມີຈົນໝົດກ້ຽງ.
ຜູ້ທີ່ຕິດຕາມຄວາມຊອບທຳ ແລະ ຄວາມຮັກ
ກໍພົບຊີວິດ, ຄວາມຈະເລີນຮຸ່ງເຮືອງ4 ແລະ ກຽດຕິຍົດ.
ຄົນມີປັນຍາສາມາດໂຈມຕີເມືອງທີ່ເຂັ້ມແຂງ
ແລະ ພັງທະລາຍຖານທີ່ໝັ້ນທີ່ພວກເຂົາໄວ້ວາງໃຈ.
ຜູ້ທີ່ລະວັງປາກ ແລະ ລີ້ນຂອງຕົນ
ກໍປ້ອງກັນຕົນຈາກຄວາມຈິບຫາຍ.
ຄົນຈອງຫອງ ແລະ ຄົນໂອ້ອວດມີຊື່ວ່າ “ຄົນມັກເຢາະເຢີ້ຍ”
ການປະພຶດຂອງລາວລ້ວນແຕ່ອວດດີ.
ຄວາມຢາກຂອງຄົນຂີ້ຄ້ານຈະຂ້າລາວໃຫ້ຕາຍ,
ເພາະລາວບໍ່ຍອມລົງມືເຮັດວຽກ.
ລາວປາຖະໜາຢາກໄດ້ຫລາຍຂຶ້ນຢູ່ທຸກມື້,
ແຕ່ຄົນຊອບທຳເອົາໃຫ້ໂດຍບໍ່ຂາດເຂີນ.
ເຄື່ອງບູຊາຂອງຄົນຊົ່ວຮ້າຍນັ້ນເປັນໜ້າລັງກຽດ
ໂດຍສະເພາະເມື່ອລາວນຳມາດ້ວຍເຈດຕະນາຊົ່ວ!
ພະຍານທີ່ບໍ່ຈິງຈະຈິບຫາຍໄປ,
ແຕ່ຄົນທີ່ຟັງຢ່າງລະມັດລະວັງຈະເປັນພະຍານທີ່ໜ້າເຊື່ອຖືໄດ້.
ຄົນຊົ່ວຮ້າຍຢືນຢັນຢ່າງກ້າຫານ,
ແຕ່ຄົນສະຫລາດຄິດເຖິງວິຖີທາງຂອງຕົນ.
ບໍ່ມີປັນຍາ, ຄວາມເຂົ້າໃຈ, ແຜນການອັນໃດ
ທີ່ສາມາດຕໍ່ສູ້ພຣະເຈົ້າຢາເວໄດ້ສຳເລັດ.
ມ້າຕຽມພ້ອມໄວ້ສຳລັບມື້ສູ້ຮົບ,
ແຕ່ໄຊຊະນະກໍຢູ່ນໍາພຣະເຈົ້າຢາເວ.
Source notes (4)
- Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ໝອກຄວັນ ສຳລັບຄົນທີ່ເສາະສະແຫວງຫາຄວາມຕາຍ
- Footnote ຫລື ຄົນ ຊອບ ທຳ
- Footnote ຫລື ອາຫານ ແລະ ນ້ຳມັນມະກອກ
- Footnote ຫລື ຄວາມ ຊອບ ທຳ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.