Biblica® Open Lao Contemporary Version
ສຸພາສິດ 20
ເຫລົ້າເຮັດໃຫ້ຄົນເວົ້າບໍ່ມ່ວນ ແລະ ເບຍເຮັດໃຫ້ຄົນຜິດຖຽງກັນ;
ຜູ້ທີ່ປ່ອຍໃຫ້ຕົນເມົາກໍບໍ່ມີປັນຍາ.
ຄວາມໂກດຮ້າຍຂອງກະສັດເຮັດໃຫ້ເກີດຄວາມຢ້ານດັ່ງໂຕສິງຮ້ອງແຜດສຽງ;
ຜູ້ທີ່ເຮັດໃຫ້ເພິ່ນໃຈຮ້າຍຈະເສຍຊີວິດຂອງຕົນ.
ຫລີກລ້ຽງຈາກການຜິດຖຽງກັນກໍເປັນກຽດຢ່າງໜຶ່ງ,
ແຕ່ມີແຕ່ຄົນໂງ່ຈ້າເທົ່ານັ້ນທີ່ມັກຜິດຖຽງກັນ.
ຄົນຂີ້ຄ້ານບໍ່ຄາດໄຖດິນຕາມລະດູການ;
ດັ່ງນັ້ນ ເມື່ອເຖິງເວລາເກັບກ່ຽວພວກເຂົາຊອກຫາຜົນລະປູກແຕ່ກໍບໍ່ມີຫຍັງ.
ຄວາມປະສົງໃນໃຈຄົນເປັນເໝືອນນ້ຳເລິກ,
ແຕ່ຄົນທີ່ມີຄວາມເຂົ້າໃຈກໍຕັກມັນອອກມາໄດ້.
ມີຫລາຍຄົນອ້າງວ່າຕົນມີຄວາມຮັກໝັ້ນຄົງ,
ແຕ່ຜູ້ໃດສາມາດຊອກເຫັນຄົນສັດຊື່ໄດ້?
ຄົນຊອບທຳດຳເນີນຊີວິດຢ່າງບໍ່ມີຕຳໜິ;
ລູກຫລານຂອງພວກເຂົາໄດ້ຮັບພຣະພອນ.
ເມື່ອກະສັດນັ່ງເທິງບັນລັງເພື່ອພິພາກສາ
ເພິ່ນຝັດຮ່ອນຄວາມຊົ່ວທັງໝົດອອກໄປດ້ວຍຕາຂອງເພິ່ນ.
ຜູ້ໃດສາມາດເວົ້າໄດ້ວ່າ “ຂ້າພະເຈົ້າໄດ້ຮັກສາໃຈຂອງຕົນໃຫ້ບໍລິສຸດ;
ຂ້າພະເຈົ້າສະອາດ ແລະ ປາສະຈາກບາບ”?
ສອງສິ່ງທີ່ພຣະເຈົ້າຢາເວກຽດຊັງຄື
ເຄື່ອງຊັ່ງກັບເຄື່ອງແທກທີ່ບໍ່ທ່ຽງທໍາ.
ແມ່ນແຕ່ເດັກນ້ອຍກໍຮູ້ຈັກໄດ້ຈາກການກະທຳຂອງພວກເຂົາ,
ດັ່ງນັ້ນ ການກະທໍາຂອງພວກເຂົາບໍລິສຸດ ແລະ ຖືກຕ້ອງແທ້ບໍ?
ພຣະເຈົ້າຢາເວໄດ້ສ້າງສອງຢ່າງຄື
ຫູທີ່ໄດ້ຍິນ ແລະ ຕາທີ່ເບິ່ງເຫັນ.
ຢ່າຮັກການນອນ ເພາະເຈົ້າຈະທຸກຍາກ;
ຈົ່ງຕື່ນແລ້ວເຈົ້າຈະມີອາຫານເຫລືອເກັບໄວ້.
ຄົນຊື້ເວົ້າວ່າ, “ສິນຄ້າບໍ່ດີ! ສິນຄ້າບໍ່ດີ!”
ແຕ່ພໍອອກໄປ ແລະ ກໍໄປເວົ້າໂອ້ອວດກ່ຽວກັບສິນຄ້າທີ່ຕົນໄດ້ຊື້ມາ.
ມີຄໍາ, ແລະ ເພັດພອຍຢ່າງຫລວງຫລາຍ,
ແຕ່ຮິມສົບທີ່ເວົ້າດ້ວຍຄວາມຮູ້ເປັນເພັດທີ່ຫາຍາກ.
ຈົ່ງຢຶດເຄື່ອງນຸ່ງຂອງຜູ້ທີ່ຄ້ຳປະກັນໃຫ້ແກ່ຄົນແປກໜ້າ;
ຈົ່ງຢຶດໄວ້ເປັນເຄື່ອງມັດຈໍາຖ້າເຮັດການຄ້ຳປະກັນໃຫ້ຄົນພາຍນອກ.
ອາຫານທີ່ໄດ້ມາໂດຍການສໍ້ໂກງກໍມີລົດຫວານດີ,
ແຕ່ໃນທີ່ສຸດມັນກໍກາຍເປັນຫີນແຮ່ເຕັມປາກ.
ແຜນການຈະສຳເລັດໄດ້ກໍໂດຍການຂໍຄຳປຶກສາ;
ດັ່ງນັ້ນ ຖ້າເຈົ້າເຮັດສົງຄາມກໍຕ້ອງຂໍຄໍາແນະນໍາ.
ຄຳນິນທາກໍທໍລະຍົດຄວາມໄວ້ວາງໃຈ;
ສະນັ້ນ ຈົ່ງຫລີກໜີຈາກຄົນທີ່ເວົ້າຫລາຍເກີນໄປ.
ຄົນທີ່ສາບແຊ່ງພໍ່ ຫລື ແມ່ຂອງຕົນ,
ຊີວິດຂອງພວກເຂົາກໍຈະດັບລົງໃນຂຸມແຫ່ງຄວາມມືດ.
ຊັບສົມບັດທີ່ຫາມາໄດ້ຢ່າງວ່ອງໄວ
ຈະບໍ່ເປັນພຣະພອນໃນບັ້ນປາຍ.
ຢ່າເວົ້າວ່າ “ຂ້ອຍຈະແກ້ແຄ້ນເຈົ້າສຳລັບຄວາມຜິດຄັ້ງນີ້!”
ຈົ່ງຄອຍຖ້າພຣະເຈົ້າຢາເວ, ແລະ ພຣະອົງຈະແກ້ແຄ້ນແທນເຈົ້າ.
ພຣະເຈົ້າຢາເວກຽດຊັງເຄື່ອງຊັ່ງບໍ່ທ່ຽງທໍາ,
ແລະ ພຣະອົງບໍ່ພໍໃຈນໍາຕາຊິງທີ່ບໍ່ສັດຊື່.
ພຣະເຈົ້າຢາເວເປັນຜູ້ກຳນົດບາດກ້າວຂອງມະນຸດ
ແລ້ວຈະມີຜູ້ໃດແດ່ເຂົ້າໃຈທາງຂອງຕົນໄດ້?
ການອຸທິດຖວາຍບາງສິ່ງບາງຢ່າງໂດຍບໍ່ຄິດກໍເປັນບ້ວງແຮ້ວໃສ່ຕົນ
ແລະ ຕໍ່ມາຈຶ່ງຄິດໄດ້ເມື່ອສາບານໄປແລ້ວ.
ກະສັດທີ່ມີປັນຍາຝັດຮ່ອນຄົນຊົ່ວຮ້າຍໃຫ້ອອກມາ;
ແລະ ເພິ່ນຂັດສັນພວກເຂົາດ້ວຍລໍ້ນວດເຂົ້າ.
ຈິດວິນຍານ1 ຂອງມະນຸດເປັນຕະກຽງຂອງພຣະເຈົ້າຢາເວ
ທີ່ສ່ອງແຈ້ງໃຫ້ເຫັນເຖິງສ່ວນພາຍໃນທີ່ເລິກທີ່ສຸດຂອງຄົນ.
ຄວາມຮັກ ແລະ ຄວາມສັດຊື່ຮັກສາກະສັດໄວ້ຢ່າງປອດໄພ;
ແລະ ບັນລັງຂອງເພິ່ນຕັ້ງຢູ່ຢ່າງໝັ້ນຄົງໂດຍຄວາມຮັກ.
ກຽດສັກສີຂອງຄົນໜຸ່ມແມ່ນກໍາລັງຂອງລາວ,
ແຕ່ຄວາມສະຫງ່າງາມຂອງຜູ້ເຖົ້າແມ່ນຜົມຫງອກ.
ບາດແຜ ແລະ ການຂ້ຽນຕີກຳຈັດຄວາມຊົ່ວອອກໄປ,
ແລະ ການຂ້ຽນຕີກໍຊໍາລະສ່ວນທີ່ເລິກທີ່ສຸດ.
Source notes (1)
- Footnote ຫລື ຖ້ອຍຄຳ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.