Biblica® Open Lao Contemporary Version
ສຸພາສິດ 19
ເປັນຄົນທຸກຍາກທີ່ດຳເນີນຊີວິດຢ່າງບໍ່ມີຕຳໜິ
ກໍດີກວ່າເປັນຄົນໂງ່ຈ້າທີ່ເວົ້າປີ້ນຄວາມ.
ຄວາມປາຖະໜາທີ່ຂາດຄວາມຮູ້ບໍ່ເປັນການດີ
ຕີນທີ່ຟ້າວຟັ່ງກໍຈະເຮັດໃຫ້ຫລົງທາງ!
ຄວາມໂງ່ຈ້າຂອງຄົນນໍາໄປສູ່ຄວາມຈິບຫາຍ,
ແຕ່ໃຈຂອງພວກເຂົາໂມໂຫກ່າວໂທດພຣະເຈົ້າຢາເວ.
ຄວາມຮັ່ງມີເຮັດໃຫ້ມີໝູ່ເພື່ອນຢ່າງຫລວງຫລາຍ,
ແມ່ນແຕ່ໝູ່ສະໜິດຂອງຄົນທຸກຍາກກໍຍັງປະຖິ້ມລາວໄປ.
ພະຍານທີ່ບໍ່ຈິງຈະໜີບໍ່ພົ້ນຈາກການລົງໂທດ,
ແລະ ຜູ້ທີ່ເວົ້າຕົວະຈະບໍ່ເປັນອິດສະຫລະ.
ຄົນສ່ວນຫລາຍເອົາໃຈຜູ້ມີອຳນາດ,
ແລະ ທຸກຄົນຈະເປັນໝູ່ກັບຜູ້ທີ່ເອົາຂອງຂັວນໃຫ້.
ຄົນທຸກຍາກນັ້ນພີ່ນ້ອງທຸກຄົນກໍກຽດຊັງ
ແລະ ໝູ່ເພື່ອນຂອງພວກເຂົາກໍຍິ່ງຫລີກໜີຫ່າງຈາກພວກເຂົາ!
ເຖິງແມ່ນວ່າ ຄົນທຸກຍາກຕາມໄປອ້ອນວອນຂໍພວກເຂົາ,
ພວກເຂົາກໍຫລົບໜີໄປໝົດ.1
ຜູ້ທີ່ມີປັນຍາກໍຮັກຊີວິດຂອງຕົນເອງ;
ຜູ້ທີ່ທະນຸຖະໜອມຄວາມເຂົ້າໃຈອີກບໍ່ດົນກໍຈະຈະເລີນຮຸ່ງເຮືອງຂຶ້ນ.
ພະຍານທີ່ບໍ່ຈິງຈະໜີບໍ່ພົ້ນຈາກການລົງໂທດ,
ແລະ ຜູ້ເວົ້າຕົວະຈະຈິບຫາຍ.
ຄົນໂງ່ຈ້າບໍ່ຄວນໃຊ້ຊີວິດຢ່າງຟຸມເຟືອຍສັນໃດ
ຂ້າທາດກໍບໍ່ຄວນຈະປົກຄອງເຈົ້ານາຍສັນນັ້ນ!
ປັນຍາຂອງຄົນເຮັດໃຫ້ເກີດຄວາມອົດທົນ;
ແລະ ກຽດຂອງຄົນນັ້ນຄືການເບິ່ງຂ້າມຄວາມຜິດຂອງຄົນອື່ນ.
ຄວາມໂກດຮ້າຍຂອງກະສັດເປັນດັ່ງສຽງໂຕສິງແຜດສຽງ,
ແຕ່ຄວາມເມດຕາຂອງເພິ່ນເປັນດັ່ງນໍ້າໝອກຢູ່ເທິງຫຍ້າ.
ລູກໂງ່ຈ້ານໍາຄວາມຈິບຫາຍມາໃຫ້ພໍ່,
ແລະ ເມຍທີ່ມັກທະເລາະວິວາດກໍເໝືອນຫລັງຄາຮົ່ວ
ທີ່ມີນ້ຳຝົນຍ້ອຍຢູ່ຕະຫລອດ.
ເຮືອນ ແລະ ຊັບສົມບັດເປັນມໍລະດົກຈາກພໍ່ແມ່,
ແຕ່ເມຍທີ່ສະຫລາດແມ່ນມາຈາກພຣະເຈົ້າຢາເວ.
ຄວາມຂີ້ຄ້ານເຮັດໃຫ້ຫລັບສະໜິດ,
ແລະ ຄົນຂີ້ຄ້ານກໍຈະຫິວໂຫຍ.
ຜູ້ທີ່ຖືຮັກສາກົດບັນຍັດກໍຮັກສາຊີວິດຂອງຕົນໄວ້.
ແຕ່ຜູ້ທີ່ບໍ່ເອົາໃຈໃສ່ທາງຂອງຕົນຈະເສຍຊີວິດ.
ຜູ້ທີ່ເມດຕາຕໍ່ຄົນທຸກຍາກກໍເທົ່າກັບໃຫ້ພຣະເຈົ້າຢາເວຢືມ,
ແລະ ພຣະອົງຈະໃຫ້ລາງວັນຕອບແທນຕໍ່ສິ່ງທີ່ພວກເຂົາໄດ້ເຮັດ.
ຈົ່ງແອບສອນລູກຂອງເຈົ້າ, ເພາະໃນນັ້ນຍັງມີຄວາມຫວັງຢູ່;
ການຕາມໃຈລູກຄືການສົ່ງເສີມພວກເຂົາໄປສູ່ຄວາມຕາຍ.
ຄົນໃຈຮ້ອນຈະໄດ້ຮັບການລົງໂທດ;
ຖ້າເຈົ້າຊ່ວຍພວກເຂົາ, ເຈົ້າກໍຈະຕ້ອງຊ່ວຍພວກເຂົາອີກ.
ຈົ່ງຟັງຄຳແນະນຳ ແລະ ຍອມຮັບເອົາການຕີສອນ,
ແລະ ໃນທີ່ສຸດເຈົ້າຈະຖືກນັບເຂົ້າເປັນໜຶ່ງໃນທ່າມກາງຄົນມີປັນຍາ.
ໃນໃຈຂອງມະນຸດມີແຜນການຢ່າງຫລວງຫລາຍ,
ແຕ່ຄວາມປະສົງຂອງພຣະເຈົ້າຢາເວນັ້ນຈະພົ້ນເດັ່ນ.
ສິ່ງທີ່ຄົນປາຖະໜາແມ່ນຄວາມຮັກໝັ້ນຄົງ;2
ແລະ ເປັນຄົນທຸກຍາກກໍດີກວ່າເປັນຄົນຂີ້ຕົວະ.
ການຢຳເກງພຣະເຈົ້າຢາເວນຳໄປສູ່ຊີວິດ;
ແລ້ວລາວກໍພັກຜ່ອນຢ່າງປອດໄພໂດຍປາສະຈາກບັນຫາ.
ຄົນຂີ້ຄ້ານແຊ່ມືຂອງຕົນໄວ້ຢູ່ໃນຈານ;
ລາວບໍ່ຍອມແມ່ນແຕ່ຈະຈັບອາຫານເຂົ້າໃສ່ປາກຕົນເອງ!
ຈົ່ງຂ້ຽນຕີຄົນທີ່ມັກເຢາະເຢີ້ຍ, ແລະ ຜູ້ທີ່ບໍ່ຮູ້ຈັກຄິດຈະຮຽນຮູ້ເອົາຄວາມສະຫລາດ;
ຈົ່ງຕັກເຕືອນຄົນສະຫລາດ ແລະ ພວກເຂົາຈະມີຄວາມຮູ້ເພີ່ມຂຶ້ນ.
ລູກທີ່ປຸ້ນພໍ່ ແລະ ໄລ່ແມ່ໜີ
ກໍເປັນລູກທີ່ນຳຄວາມອັບອາຍ ແລະ ຄວາມລະອາຍມາໃຫ້.
ລູກເອີຍ, ຖ້າບໍ່ຟັງຄຳສັ່ງສອນ,
ເຈົ້າກໍຈະຫລົງໄປຈາກຖ້ອຍຄຳແຫ່ງຄວາມຮູ້.
ພະຍານທີ່ຫລອກລວງເຢາະເຢີ້ຍຄວາມຍຸຕິທຳ,
ແລະ ປາກຂອງຄົນຊົ່ວຮ້າຍກໍກືນກິນຄວາມຊົ່ວຮ້າຍ.
ການລົງໂທດຕຽມໄວ້ສໍາລັບຄົນມັກເຢາະເຍີ້ຍ,
ແລະ ການຂ້ຽນຕີຕຽມໄວ້ສໍາລັບຫລັງຂອງຄົນໂງ່ຈ້າ.
Source notes (2)
- Footnote ໃນພາສາເຮັບເຣີປະໂຫຍກນີ້ມີຄວາມຫມາຍບໍ່ຊັດເຈນ
- Footnote ຫລື ຄວາມໂລບຂອງມະນຸດເປັນຄວາມອັບອາຍຂອງເຂົາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.