Biblica® Open Sorani Kurdish Book of Life
لۆقا 21
به‌خشین له‌پێویستی خۆت
له‌كاتێكدا عیسا ده‌یڕوانیه ئه‌و پاره‌دارانه‌ی پاره‌یان ده‌به‌خشی بۆ سه‌ندوقی په‌رستگا. بێوه‌ژنیكی هه‌ژاری بینی دوو پوول داده‌نێت. ئینجا ووتی: (ڕاستیتان پێ ده‌ڵێم، ئه‌م بێوه‌ژنه، له‌هه‌موو ئه‌وانه‌ی تر زیاتر پاره‌ی دانا. چونكه ئه‌وانه‌ی تر له‌وه‌ی له‌خۆیان زیاده به‌خشیان، به‌ڵام ئه‌م بێوه‌ژنه، ئه‌و پاره‌یه‌ی به‌خشی كه پێویستی پێیه‌تی بۆ ژیانی خۆی.)
باسی وێرانبوونی په‌رستگا
عیسا دوای ئه‌مه گوێی لهههندێكیان بوو باسی په‌رستگاكه‌یان ده‌كرد كه چۆن به‌به‌ردی جوانو ئه‌و دیاریانه‌ی پێشكه‌شی كراون ڕازێندراوه‌ته‌وه، ووتی: (ئه‌مه‌ی ئێستا ده‌یبینن، ڕۆژێ دێت به‌ردی به‌سه‌ر به‌ردیه‌وه نامێنێتو ده‌ڕوخێت.)
نیشانه‌كانی كۆتایی زه‌مانه
ئینجا لێیان پرسی: (مامۆستا كه‌ی ئه‌مه ده‌بێت؟ ئه‌و نیشانانه چییه كه ده‌رده‌كه‌وێت، كاتێ ئه‌م ڕووداوه نزیك ده‌بێته‌وه؟) عیسا ووتی: (ئاگاداربن هه‌ڵنه‌خه‌ڵه‌تێن زۆر هه‌ن به‌ناوی منه‌وه دێنو ده‌ڵێن: (من ئه‌وم)و (كاته‌كه نزیك بووه‌ته‌وه)، نه‌كه‌ن دوایان بكه‌ون. كاتێ باسی شه‌ڕو شۆڕو تێكچوون ده‌بیستن، مه‌ترسن، چونكه ئه‌و شتانه پێویسته یه‌كه‌مجار ڕووبدات، به‌ڵام كۆتایی ڕاسته‌وخۆ دوای ئه‌مه نایه‌ت.) هه‌روه‌ها پێیووتن: (ووڵات به‌سه‌ر ووڵات ڕاست ده‌بێته‌وه، پادشاهێتی به‌سه‌ر پادشاهێتیدا ڕاست ده‌بێته‌وه. له‌زۆر شوێن بوومه‌له‌رزه ده‌بێت، برسێتیو نه‌خۆشی بڵاوده‌بنه‌وه، له‌ئاسمانه‌وه نیشانه‌ی ترسناكو مه‌زن ڕووده‌دات. به‌ڵام پێش ئه‌مانه هه‌موو خه‌ڵكی ده‌ستتان بۆ درێژدهكهنو دهتانچهوسێننهوه، دهتانبهن بۆ كهنیشتهكانو بۆ به‌ندیخانه، دهتانبهنه به‌رده‌م پادشایانو فه‌رمانڕه‌وایان، له‌پێناوی ناوی من. به‌ڵام ئه‌مه هه‌لێك ده‌بێت بۆتان بۆ شایه‌تیدان. پێویست ناكات پێش ئه‌وه خۆتان ئاماده‌كه‌ن بۆ شێوه‌ی به‌رگری له‌خۆتان، چونكه من ووته‌و داناییه‌كتان ده‌ده‌مێ كه هه‌موو ئه‌وانه‌ی به‌ربه‌ره‌كانیتان ده‌كه‌ن، نه‌توانن وهڵامتانبدهنهوهو به‌رهه‌ڵستیتان بكه‌ن. ته‌نانه‌ت باوكو دایكیشتان یان براو خزمو هاوڕێتان، ده‌تانده‌ن به‌ده‌سته‌وه، هه‌ندێكیشتان لـێ‌ده‌كوژن. له‌پێناوی ناوی من خه‌ڵكی ڕقتان لـێ‌هه‌ڵده‌گرن، به‌ڵام موویه‌ك له‌سه‌رتان نافه‌وتێ. به‌دان به‌خۆداگرتن خۆتان ده‌به‌نه‌وه.
هاتنه‌وه‌ی عیسای مه‌سیح
كاتێ ده‌بینن سوپا ده‌وری قودسی داوه، بزانن كه ڕووخاندنی نزیك بووه‌ته‌وه. ئه‌وسا ڕاكه‌ن ئه‌وانه‌ی له‌ناوچه‌ی یه‌هودیادان به‌ره‌و چیاكان، ناو شار به‌جێ‌بهێڵن، ئه‌وانه‌ی لهلادێكانیشهوه ڕاده‌كه‌ن نه‌چنه ناو شار، چونكه ئه‌و ڕۆژانه ڕۆژی تۆڵه‌سه‌ندنه‌وه‌یه، ئه‌وه‌ی له‌كتێبی پیرۆزدا نووسراوه ده‌بێت هه‌مووی بێته‌دی، قوڕ به‌سه‌ر سك پڕانو شیرده‌ران لهوڕۆژهدا، چونكه ناخۆشیه‌كی گه‌وره به‌سه‌ر زه‌ویدا دێو توڕه‌بوونێكی به‌هێز داده‌به‌زێ به‌سه‌ر خه‌ڵكیدا. به‌زه‌بری شمشێر ده‌ست به‌سه‌ر دهكرێنو به‌دیلی ده‌برێن بۆ هه‌موو میلله‌تان، بێگانه‌كان قودس پێشێل ده‌كه‌ن، تا سه‌رده‌میان ته‌واو ده‌بێ.
له‌م كاته‌دا له‌خۆرو مانگو ئه‌ستێره‌كان نیشانه ده‌رده‌كه‌ون. گه‌له سه‌رلـێ‌شێواوه‌كان ده‌كه‌ونه ته‌نگانه‌یه‌كی زۆره‌وه، چونكه شهپۆلو كهفو كوڵی ده‌ریاكان جۆش دهخۆنو هه‌ڵده‌ستن. خه‌ڵكی لهترسان بێ‌هۆش ده‌بن له‌به‌رئه‌وه‌ی نازانن چی به‌سه‌ر جیهان دێت. چونكه هێزه‌كانی ئاسمان ده‌كه‌ونه جووڵه. لهوكاتهدا ده‌بینرێ چۆن ڕۆڵه‌ی مرۆڤ، بهشكۆو هێزه‌وه له‌ناو هه‌وردا دهردهكهوێتو دێت. كاتێ ڕوودانی ئه‌م شتانه ده‌ستی پێكرد، ههستنو سه‌ربه‌رزبكه‌نه‌وه، چونكه ڕزگاریتان نزیك ده‌بێته‌وه.) ئینجا نموونه‌یه‌كی بۆ هێنانه‌وه، ووتی: (سه‌یری دار هه‌نجیرو داره‌كانی تر بكه‌ن، كاتێ ده‌بینن ئه‌وا گه‌ڵا ده‌كات، ده‌زانن هاوین نزیك بووه‌ته‌وه. ئێوه‌ش هه‌ر به‌م شێوه‌یه، كه بینیتان ئه‌م شتانه ڕووده‌دات بزانن پادشاهێتی خودا نزیك بووه‌ته‌وه. ڕاستیتان پێ ده‌ڵێم، ئه‌م نه‌وه‌یه له‌ناوناچێ، هه‌تا ئه‌مانه هه‌مووی ڕوونه‌دات. ئاسمانو زه‌وی له‌ناوده‌چن، به‌ڵام ووشه‌كانم له‌ناوناچن.)
به‌خه‌به‌ربن و ووریابن
(ئاگاداری خۆتان بن، دڵتانو مێشكتان خه‌ریك مه‌كه‌ن بهڕابواردنو سه‌رخۆشیو خهمو خه‌فه‌تی ژیانه‌وه، ئه‌و ڕۆژه له‌ناكاو وه‌ك ته‌ڵه خۆی ده‌دا به‌سه‌رتان. چونكه هه‌موو دانیشتوانی سه‌ر زه‌وی ده‌گرێته‌وه. ئێشكبگرنو نوێژبكه‌ن له‌هه‌موو كاتێكدا، تا بتوانن ڕزگارتان بێت له‌هه‌موو ئه‌و شتانه‌ی ڕوودهداتو له‌به‌رده‌م ڕۆڵه‌ی مرۆڤ ڕاوه‌ستن.)
عیسا بهڕۆژ له‌په‌رستگا خه‌ریكی فێركردن بوو، بهشهویش ده‌ڕۆیشته ده‌ره‌وه بۆ چیای زهیتونو له‌وێ ده‌مایه‌وه. خه‌ڵكی به‌یانی زوو ده‌هاتن بۆ په‌رستگا، بۆ ئه‌وه‌ی گوێی بۆ ڕاگرن.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.