Luka 6

1Bră tơmtom trôh nơ̆m du-nge Saƀat, Yang Jesu ndăng swà găn ƀlang srăy kôi-mi, gừn cro bơtê Kơnràñ katĕ ngkơ̆m kôi, kơpo nơ̆m tê, gừn sa. 2Mơya nhẵư hê cro Pharisi tơs lah: “Ngglơh ƀòn amî lơh jơno ơ̆ dî e gơnoăr nơ̆m nge Saƀat?” 3Tơm tô̆ kla dẵư ƀòn gô, Yang Jesu tơs băl î ƀòn gô: “Ƀòn ông dahrăư dơ̆ găy đŏk sră bơh bră mà Dabit sŏng lơh nơ̆m jơ bơtao î lơ̆gay cro ăm băl î mơ̆n kŏng jơgloh ơ̆h? 4Amơh bơtao sŏng mơ̆t nơ̆m hîh Yang Tơm Trồ dưñ ƀăñ ăn Yang, bơtao sa î dờp ma lơ̆gay cro swà băl î mơ̆n, ma ƀăñ rơ̆ ơ̆ dî gơnoăr sa, rlo bơh cro gơnoăr ăn jơno duh-khoai gời.” 5Sŏng gư̆n Kơnràñ tơs î ƀòn gô: “Kon-Mơnùs la Yang nge Saƀat dê.”

6Bră tơmtom nơ̆m du nge Saƀat nde, Kơnràñ mơ̆t nơ̆m hîh jơnư̆m lơi tơs bơtău, gừn nơ̆m anẵu gư̆n tom du hôi cro-klo, kơ̆mpang tê đah ma gô dê kŏng sìa. 7Hôm lơ̆gay cro bơtău jơno-bơlăm î cro Pharisi ngơ lăng nê̆ nê̆ Kơnràñ, lăng Kơnràñ tom sămƀeah nơ̆m nge Saƀat hă ơ̆h, lơi ƀòn gô jôi dî cư̆ng-tang kơ̆p glài Kơnràñ. 8Mơya Kơnràñ gư̆t jơno kơlôi-sơnư̆ng ƀòn gô, sŏng gư̆n Kơnràñ tơs î cro kŏng sìa kơ̆mpang tê: “Ñă cĕ atẵy î tơlôh ñă nhòng anẵu kơp cro.” Cro rơ̆ ñă atẵy gừn swà tơlôh ñă nơ̆m gư̆n. 9Yang Jesu tơs î ƀòn gô: “Ăñ lùp ƀòn ông, dilah iyŏ ngăn î jơno-bơlăm nơ̆m nge Saƀat gừn lơh bră niem hala lơh mơsăk, dŏng cro hala tơngsơ̆t cro?” 10Ma-ngkơi jơ lăng kơp cro tĕdơ, Kơnràñ tơs î cro gư̆n: “Yŏk tơlang cĕ tê mê dê.” Gô lơh-jăt gừn tê gô dî ƀeah wăl. 11Mơya ƀòn gô bîng-jut jơno tơcao nùs î bơyê î găp lăng ƀòn gô digơlăn mơmơh lơh î Yang Jesu.

12Bră tơmtom nơ̆m lơ̆gay nge gư̆n, rơ̆ la Kơnràñ swà hao lêh nơ̆m yồ lơi hôi-dăn, gừn Kơnràñ sŏng lôh du măng ang nơ̆m jơno hôi-dăn î Yang Tơm Trồ. 13Tơm tô̆ nge mhăy sŏng trôh, Kơnràñ hôi lơ̆gay cro bơtê mơ̆n, gừn săc-rwơh jư̆t-bea hê bơh nơ̆m ƀòn gô, mà Kơnràñ kŭng sơnăn jư̆t-bea cro gư̆n la cro gơnoăr bơtău dơng, gư̆m: 14Simôn, cro mà Kơnràñ kŭng sơnăn la pier, oh klo gô la Andre; Jakơ, Jăng; Philip, Ƀathelemi; 15Mathiơ Thôma; Jăng, kon Alphe; Simôn; la cro dî sơnăn la Selôt; 16Juđa kon Jakơ î Juđa Iskariôt la cro gôjîng cro tơmdră. 17Ma-ngkơi jơ swà jư î ƀòn gô, Kơnràñ ñă ăm nơ̆m du-anẵu ù dư̆ng ngĭt băl î tơmpôl jơnư̆m khăi kơp cro bơtê Kơnràñ, gư̆m tơmpôl lang bol î khà khăi ngăn trôh bơh lơ̆gay ƀòn dơng lơgơ Juđe î Jerusalem, kŭng gư̆ptî anẵu bôt bơlao dàlîng Tirơ î Siđôn, 18tơmpôl ƀòn gư̆n sŏng trôh lơi iet kơnău Kơnràñ bơtău gư̆m lơi dî sămƀeah bơh lơ̆gay kòp jê mơ̆n dê. Tơmpôl cro kŏng cà-ràk lơh gleh-glăr kŭng dî sămƀeah. 19Lơ̆gay tơmpôl lang bol kư̆ jôi rlèt tơbi nơ̆m să Kơnràñ bơh gơnăp-gơnoăr tơlôh bơh Kơnràñ î sămƀeah lơ̆gay cro.

20Sŏng gư̆n Yang Jesu, ngẵư măt mơ̆n lăng mađah lơ̆gay cro bơtê Kơnràñ, gừn tơs lah: “Lơnge ma oh mi rôh lŏ la cro kơsòt, bơh lơgơ Yang Tơm Trồ la ma oh mi rôh lŏ. 21Lơnge ma oh mi rôh lŏ jơ dô hôm jơgloh, bơh oh mi rôh lŏ rơp dî hơm tăl. Lơnge ma oh mi rôh lŏ hôm ñim-rèa, bơh oh mi rôh lŏ rơp dî sơhờp yŏ. 22Oh mi rôh lŏ dî lơnge tơm tô̆ cro nde tơm ngañ oh mi rôh lŏ, tơm tô̆ ƀòn gô lơi căư oh mi rôh lŏ, tơngyŏ-tơnghiel î khan lơi sơnăn oh mi rôh lŏ gư̆ptî cro bờk-mơsăk tài bơh Kon-Mơnùs. 23Nơ̆m nge gư̆n, păl sơhờp-sờhơn î sơm plŏng să yŏ uñ bơh, lăng năy, phăn-ƀan oh mi rôh lŏ cŭngsî trồ la dơng rlo ngăn, bơh ông-pang ƀòn gô sŏng lơh î lơ̆gay cro gơnoăr-hwơr dubă gư̆p tîgư̆n. 24Mơya, sơòs-sơngeh ma oh mi rôh lŏ, la cro kơnhơ̆p, bơh oh mi rôh lŏ sŏng dưñ-lăñ jơno mơ̆ndơm-mơ̆nieng mơ̆n dê lờt. 25Sơòs-sơngeh ma oh mi rôh lŏ la cro jơ dô ndăng hơm-le, bơh oh mi rôh lŏ rơp jơgloh. Sơòs-sơngeh ma oh mi rôh lŏ jơ dô ndăng yŏ, bơh oh mi rôh lŏ rơp moat-jrum î ñim-rèa. 26Sơòs-sơngeh ma oh mi rôh lŏ tơm tô̆ kơp cro tơs jơno niem bơh mơ̆n! Bơh ông-pang ƀòn gô kŭng lơh dubă tîgư̆n î lơ̆gay cro gơnoăr-hwơr mablăc.

27Mơya ăñ tơs î oh mi rôh lŏ, tơmpôl cro găy ndăng iet kơnău, kơñ-kơloh cĕ cro tơmdră mơ̆n, î lơh dubă niem î cro tơcao mơ̆n. 28E lơnge cĕ ma cro wac-rma oh mi rôh lŏ î hôi-dăn cĕ ma cro lơh bờk î oh mi rôh lŏ. 29Î cro găy pah oh mi rôh lŏ anẵu ƀồ đah ma dô, păl dờp cĕ ƀồ đah năy, hôm cro kơntô̆ng tơmpìt ao makin oh mi rôh lŏ, gừn oh mi rôh lŏ kŭng bư̆ng tơm kơ̆p wăl ao nơ̆m bơh cro gư̆n. 30Kơp cro găy răc-dăn oh mi rôh lŏ, păl e cĕ, gư̆m bư̆ng lơ-e wăl bơh cro dưñ jơno găy oh mi rôh lŏ dê. 31Oh mi rôh lŏ kơñ cro nde lơh ma mơ̆n mơmơh tîgay, păl lơh ma ƀòn gô tîrơ̆. 32Dilah oh mi rôh lŏ kơloh cro găy kơloh mơ̆n, gừn rơ̆ la tom jơno găy păl mơnê î oh mi rôh lŏ? Bơh ƀăt băl î cro tom glài kŭng kơloh cro kơloh mơ̆n. 33Dilah oh mi rôh lŏ lơh niem î cro lơh niem î mơ̆n, gừn rơ̆ la tom jơno găy păl mơnê î oh mi rôh lŏ? Cro tom glài kŭng lơh gư̆ptî gư̆n. 34Dilah oh mi rôh lŏ e cro nde mơn mà oh mi rôh lŏ kơnơm dưñ wăl bơh ƀòn gô, gừn tom jơno găy păl mơnê î oh mi rôh lŏ? Cro tìs-glài kŭng e cro tìs-glài mơn, lơi lăñ wăl gư̆p tîgư̆n. 35Mơya păl kơloh cro tơmdră mơ̆n gư̆m lơh niem î ƀòn gô, păl e mơn tơm tô̆ bư̆ng cang lăñ wăl, gừn phăn-ƀan oh mi rôh lŏ rơp la dơng rlo ngăn, oh mi rôh lŏ rơp la Kon Bơtao Dơng Rlo, bơh Kơnràñ hôm lơbăn-niem î cro bờk î mơsăk. 36Păl dî nùs kơñ-kơloh, gư̆ptî Bàp oh mi rôh lŏ dî nùs kơñ-kơloh. 37Bư̆ng cahrña, gừn oh mi rôh lơ̆ nên-nôn ngăn ơ̆ kŏng cahrña, Bư̆ng lơh-glài gừn oh mi rôh lŏ nên-nôn ngăn ơ̆ kŏng lơh-glài. Păl toh glài, gừn oh mi rôh lŏ rơp dî toh glài. 38Păl dờp e cĕ, gừn jơno rơp dî dờp e ma oh mi rôh lŏ: Du pơnah khăi — dî bơkhê, dî tơtô nteàh, dî lơh bîng-jut — ƀòn gô rơp tôh nơ̆m dơda ao oh mi rôh lŏ. Bơh oh mi rôh lơ̆ weh ma cro nde dư̆ng găy gừn ƀòn gô kŭng weh wăl ma oh mi rôh lơ̆ dư̆ng rơ̆.”

39Kơnràñ kŭng tơs ma ƀòn gô du jơno pơ̆niyô: “Cro ñô̆ng măt ơ̆ tom rgê bơlăm gung cro ñô̆ng măt, iyŏ hă ơ̆h? Ơ̆-iyŏ lơ̆ bea hê rơp duh nơ̆m trôm ơ̆h? 40Cro bơtê gừn ơ̆ dơng rlo cro bơtău, mơya kơp cro tơm tô̆ dî bơtê gư̆t wêl-tăl rơp gôjîng gư̆ptî cro bơtău mơ̆n. 41Ngglơh oh mi rôh lŏ lăng tơmpơl brêh-brăm ahên lŭi nhòng măt oh mi mơ̆n, mà oh mi rôh lŏ ơ̆ gư̆t đăl khô̆k sî nhòng măt mơ̆n? 42Lơh mơmơh oh mi rôh lŏ digơlăn tơs î oh mi mơ̆n: ‘Ơ amî, lơi cĕ ăñ dưñ brêh-brăm nhòng măt amî makin’ tơm tô̆ sătan oh mi rôh lŏ ơ̆ tơmpơl khô̆k sî nhòng măt mơ̆n? Ơ cro nùs don mablăc năy. Lai ngăn, păl dưñ khô̆k sî tơlôh bơh sơ măt mơ̆n, sŏng gư̆n oh mi rôh lŏ dî tơmpơl nê̆ lơi dưñ brêh-brăm nhòng măt oh mi mơ̆n. 43Bơh ơ̆ tom sî niem găy tơlôh ple bờk, pơnah nde, kŭng ơ̆ tom sî bờk găy tơlôh ple niem. 44Bơh kơ̆p sî dî gư̆t đăl kơnơm bơh ple sî gư̆n. Cro nde ơ̆ pĕ ple sî-hra anẵu pôm lẵu, ƀòn gô kŭng ơ̆ pĕ ple ño anẵu sî pîh pôm. 45Cro lơbăn-niem, bơh jơno niem ăn lơi nhòng nùs tơlôh jơno niem, hôm cro bờk-mơsăk bơh nhòng jơno bờk-mơsăk tơlôh jơno bờk-mơsăk. Bơh nơ̆m jơno bîng-jut nhòng nùs mà dẵư mơ̆n tơs tơlôh.

46Ngglơh oh mi rôh lŏ hôi ăñ lah: ‘Yang, Yang,’ mà ơ̆ lơh-jăt jơno ăñ tơs bơtău? 47Ăñ rơp e oh mi rôh lŏ gư̆t cro găy trôh î ăñ, kơnău jơno ăñ î lơh-jăt lơ̆gay jơno gư̆n gừn gư̆ptî cro găy? 48Cro gư̆n gư̆ptî du hôi cro băt hîh, mà cro dô sŏng tẵư ù jrô î lơh mơnang cŭngsî lô̆. Bơh gư̆n, tơm tô̆ brê mih rlîng sơn-gàc trôh, dà blah mơ̆t nơ̆m hîh gư̆n, mà gô ơ̆ tom tư̆ng wăñ hîh dî, bơh hîh sŏng dî băt tơngñă dubă kơđư̆ng ngăn. 49Hôm cro kơnău mà ơ̆ lơh-jăt gừn gư̆ptî du hôi cro băt hîh nơ̆m ù ma ơ̆ tom mơnang lô̆, tơm tô̆ dà dơng hal-apàl tơmơ̆t nơ̆m hîh gư̆n, gô khơñ ngăn rlăm jai, gừn jơno kŏng tơngroh hîh gư̆n la dơng ngăn.”