Luka 7

1Ma-ngkơi jơ Kơnràñ bơtău sŏng kơp jơno tơs mơ̆n lai jơno iet kơnău lang bol dê, Kơnràñ mơ̆t nơ̆m ƀòn dơng Kapenaum.

2Jơ gư̆n, du hôi cro dê̆-gơna năy bơh cro kwăng ăt-bồ lĭñ, ma gư̆n la cro ông kơñ-kơloh ngăn, ndăng kòp kơjơ̆ ngăn, mơñ sơ̆t. 3Ma-ngkơi jơ kơnău bơh Yang Jesu, ông pơđơ lơ̆gay cro kwăng kra Juđa trôh băl Kơnràñ, hôi-dăn Kơnràñ trôh lơi Kơnràñ sămƀeah cro dê̆-gơna mơ̆n. 4Tơm tô̆ lơ̆gay cro rơ̆ trôh î Yang Jesu, ƀòn gô kôh-kồt răc-dăn Kơnràñ, tơs lah: “Ông rơ̆ gừn dî păl ngăn lơi cro bơtău rơp lơh sơmah bră dô ma gô, 5bơh ông kơñ-kơloh lang bol ƀòn mơ̆n, ông sŏng kŭng băt hîh jơnư̆m ma ƀòn mơ̆n.” 6Tîrơ̆ gừn, Yang Jesu swà băl î ƀòn gô. Mơya tơm tô̆ Kơnràñ sŏng mơñ trôh anẵu hîh ơ̆ hôm wĭc, gừn cro kwăng mpôl lĭñ pơyoa nhẵư hê cro bơyô tơlôh tơs î Kơnràñ: “Khoai Yang, dăn bư̆ng lơh kălkê dêh mơ̆n, bơh ăñ ơ̆ dî păl lơi Kơnràñ trôh nơ̆m hîh mơ̆n. 7Tài bơh gư̆n, ăñ tien gơs kŭng ơ̆ tơmpơl mơ̆n dî păl lơi trôh tơmtom Kơnràñ; Mơya, dăn Kơnràñ tơs du jơno, gừn cro dê̆-gơna ăñ păl dî ƀeah kòp. 8Bơh ăñ kŭng la cro dî ăn nteàh gơnoăr, ma tom lĭñ ăn nteàh gơnoăr mơ̆n, gừn ăñ pơđơ cro dô: ‘Swà cĕ,’ gừn gô swà; sŏng î cro nde: ‘Trôh ma dô,’ gừn gô trôh; gừn î cro dê̆-gơna mơ̆n: ‘Păl lơh bră dô,’ gừn gô lơh.” 9Tơm tô̆ Yang Jesu kơnău tîgư̆n, Kơnràñ ndrăt-ndròt ngăn bơh ông gư̆n, sŏng tơmblăc ma tơmpôl khăi ndăng swà jăt mơ̆n, Kơnràñ tơs: “Ăñ tơs î oh mi rôh lŏ, tien gơs anẵu Israel, ăñ kŭng dahrăư tơmpơl jơno don tîgư̆n.” 10Tơm tô̆ lơ̆gay cro dî pơđơ swà trê wăl trôh nơ̆m hîh, ƀòn gô tơmpơl cro dê̆-gơna ndăng pran-kơdăng.

11Bră tơmtom nơ̆m nge ma-ngkơi, Kơnràñ swà mơ̆t du-anẵu ƀòn êt sơnăn la Nain, lơ̆gay cro bơtê Kơnràñ î khăi ngăn lang bol ndăng swà băl î Kơnràñ. 12Tơm tô̆ Kơnràñ mơñ trôh en mpông ƀòn dơng gừn lăng năy, cro nde ndăng tung du hôi cro sŏng sơ̆t, la kon klo du hôi cro mơi mơ̆n (mò la ua mơ̆ndro), du tơmpôl lang bol khăi nhòng ƀòn êt swà băl î mò. 13Tơm tô̆ tơmpơl mò, Yang dî nùs rngoh-rngăc kơloh-kơlài e ma mò, gừn Kơnràñ tơs î mò lah: “Bư̆ng ñim.” 14Trôh en gư̆n, Kơnràñ tơbi tê nơ̆m plô̆ng ƀùc, gừn lơ̆gay cro ndăng tung ñă wăl. Sŏng Kơnràñ tơs: “Ơ cro pơnu, ăñ pơđơ mê, păl lôh khơñ.” 15Cro sơ̆t lôh nggui î sơntơm tơs, sŏng gư̆n Kơnràñ jao cro pơnu ma mơi gô. 16Tîrơ̆ la, jơno kơ̆mbrit-kơ̆mbròt gôgom tĕdơ lơ̆gay jơno, ƀòn gô jong-rơ Yang Tơm Trồ, tơs lah: “Du hôi cro gơnoăr-hwơr dơng ngăn sŏng dî tơlôh nhòng ƀòn mơ̆n” gừn lah “Yang Tơm Trồ sŏng còp rwang lang bol Kơnràñ.” 17Bră dô bơh Kơnràñ lam pơndrơ lơ̆gay ƀòn lơgơ Juđe gư̆m kơp lơgơ ăm tĕdơ.

18Lơ̆gay cro bơtê Jăng tơs wăl ma ông bơh kơp bră gư̆n. Gừn ma-ngkơi jơ hôi bea hê cro bơtê mơ̆n năy, gừn Jăng 19pơđơ ƀòn gô trôh î Yang, lùp lah: “Cro Bơtău la Bơtao păl trôh, hala ƀòn hî păl ăm cang Bơtao nde?” 20Tơm tô̆ trôh î Kơnràñ, lơ̆gay cro rơ̆ lùp: “Jăng Ƀaptis pơđơ ƀòn hî trôh î cro bơtău, lah: ‘Cro bơtău la Bơtao păl trôh, hala ƀòn hî păl ăm cang Bơtao nde te?’” 21Nơ̆m du-jơ rơ̆, Kơnràñ sămƀeah khăi cro ƀeah kòp, kòp jê î hwîng cà; Kơnràñ kŭng lơh khăi cro ñô̆ng dî lăng tơmpơl. 22Lơi kla dẵư, Kơnràñ tơs î ƀòn gô: “Ma-ngkơi tơm jơ swà trê, păl tơs wăl ma Jăng lơ̆gay jơno ƀòn mê sŏng tơmpơl î kơnău; cro ñô̆ng dî ang măt, cro kwe swà dî, cro kòp dun dî lơhiê, cro tê̆ tua kơnău dî, cro sơ̆t dî lơh jîng wăl, cro kơsòt dî kơnău jơno niem, 23gừn lơnge ma cro găy ơ̆ kŏng sơmăm tìs bơh ăñ.”

24Pơnjăt te, ma-ngkơi jơ lơ̆gay cro kŏng pơđơ Jăng swà lờt, Kơnràñ sơntơm tơs î lang bol bơh Jăng: “Oh mi rôh lŏ swà mơ̆t nơ̆m ƀlang-càs lơi lăng jơno găy? Du ƀĕ sî proh kŏng cal tơwăl ơ̆h? 25Tơblơ̆ wăl, oh mi rôh lŏ swà tơlôh lơi lăng jơno găy? Du hôi cro dî cù jơno bơtơi lơbăn niem ya? Lăng năy, lơ̆gay cro nơ̆m jơno cù niem mơnĕ gư̆m jîng pròng priè gừn ăm nơ̆m gơlăng cro bơtao. 26Mơya tîrơ̆, oh mi rôh lŏ swà tơlôh lơi lăng jơno găy? Du hôi cro gơnoăr-hwơr ya? Iyŏ, ăñ tơs î oh mi rôh lŏ, hôm rlo cro gơnoăr-hwơr te. 27Rơ̆ la bơh cro ma jơno dô sŏng dî cêh lah:

‘Dô, Ăñ rơp pơđơ cro dî pơđơ Ăñ swà mađàp măt Kon,

cro rơp was gung Kon mađàp măt Kon.’

28Ăñ tơs ma oh mi rôh lŏ gư̆t, nhòng khà lơ̆gay cro bơh cro-ua bơda, ơ̆ tom cro găy la dơng rlo Jăng, mơya cro êt rlo nơ̆m lơgơ Yang Tơm Trồ gừn dơng rlo ông rơ̆.” 29(Tơm tô̆ iet kơnău sŏng, gừn lơ̆gay cro, gư̆m lơ̆gay cro lơboh-dia, gừn sơnăn Yang Tơm Trồ la tơpăt-durư̆ng, dơ̆ kŏng lơh ƀaptem jăt gơnoăr lơh ƀaptem Jăng dê. 30Mơya lơ̆gay cro Pharisi gư̆m lơ̆gay cro bơtău jơno-bơlăm lơi căư bră rơndăp Yang Tơm Trồ ăn lơi ma mơ̆n, tơm tô̆ ơ̆ kơñ ông ƀaptem.) 31“Tîrơ̆ gừn, ăn rơp sơntu pơndrơm lơ̆gay cro gôtrê nơ̆m rai dô î jơno găy? Ƀòn gô gư̆ptî cro găy? 32Ƀòn gô gư̆ptî tơmpôl kơmom nggui anẵu gung-drà, tơm hôi găp, ƀòn gô tơs lah: ‘Ƀòn ăñ ôh kơmbòt e ƀòn mê mà ƀòn mê ơ̆ kơñ sơmplô̆ng. Ƀòn ăñ ka yia sờ mà ƀòn mê ơ̆ ñim-rèa.’ 33Bơh Jăng Ƀaptis sŏng trôh, ơ̆ sa ƀăñ, kŭng ơ̆ ñô alăk, gừn ƀòn gô tơs: ‘Ông gư̆n kŏng cà lơh.’ 34Kon-Mơnùs sŏng trôh, ñô î sa, gừn ƀòn ông tơs: ‘Lăng năy, du hôi cro ham sa î ham ñô, bơyô swà băl cro lơboh-dia î tơmpôl cro tom glài!’ 35Mơya jơno jăk-sai sŏng dî tơmpẵu bơh lơ̆gay kon so mơ̆n.”

36Dơ̆ rơ̆, du hôi nhòng khà lơ̆gay cro Pharisi jà Kơnràñ lơi ăm sa băl î mơ̆n. Tơm tô̆ sŏng mơ̆t nhòng hîh cro Pharisi rơ̆, Kơnràñ nggui anẵu kaƀang sa. 37Lăng tò, tom du hôi cro-ua nhòng ƀòn dơng, ma cro-ua gư̆n la cro tom glài. Tơm tô̆ gư̆t đăl lah Kơnràñ ndăng nggui anẵu kaƀang să nơ̆m hîh cro Pharisi, gô iyà băl du-lăm kơlŏ màh ăn mơñà ƀôhơ̆, 38gừn trôh ñă ăm ma-ngkơi, en anẵu jư̆ng Kơnràñ, mà ñim. Gô sơntơm lơh suh jư̆ng Kơnràñ bơh î dà măt, sŏng gư̆n gô jut î sŏ nơ̆m găl mơ̆n, cư̆m jư̆ng Kơnràñ gư̆m bŏng mơñà ƀôhơ̆ măư. 39Tơm tô̆ cro Pharisi, la cro sŏng jà Kơnràñ, tơmpơl tîgư̆n, ông gư̆n tơs dêh: lah “Dilah ông dô la cro gơnoăr-hwơr, gừn ông rơ̆ păl gư̆t mò ndăng tơbi trôh mơ̆n la măt cro gừn gôtrê pơnah cro găy, lah mò gư̆n la cro tồi-glài.” 40Lơi kla dẵư, Yang Jesu tơs î ông: “Ơ Simôn, ăñ tom jơno dô lơi tơs î ông.” Ông gư̆n tơs: “Ơ cro Bơtău, dăn kư̆ tơs!” 41“Tom bea hê cro kađòng dồs; du hôi cro ờs e mơn priè năy. Du hôi cro kađòng dồs prăm-rhieng dơñe, hôm cro năy kađòng dồs prăm-jư̆t. 42Tơm tô̆ ƀòn gô ơ̆ tom tăl priè tăm dồs, cro pơnhơm e mơn sŏng hồ lơ̆ bea hê. Tîgư̆n, măt cro nhòng bea hê rơp kơñ-kơloh ông gư̆n rlo teh?” 43Tơm tô̆ Simôn e jơno kla dẵư, ông tơs: “Ăñ kơlôi lah cro mà cro pơnhơm e mơn sŏng hồ dồs khăi rlo.” Kơnràñ tơs î gô lah: “Mê kơlôi tîgư̆n la iyŏ ngăn.” 44Sŏng gư̆n tơmblăc ma đah cro-ua, Kơnràñ tơs î Simôn lah: “Mê tơmpơl cro-ua dô ya? Ăñ mơ̆t nhòng hîh ông. Ông ơ̆ e ăñ dà rao jư̆ng, hôm gô lơh suh jư̆ng ăñ bơh î dà măt, sŏng gư̆n jut jư̆ng î sŏ mơ̆n. 45Ông sŏng ơ̆ cư̆m ăñ, hôm gô, bơh dơ̆ ăñ swà mơ̆t, sŏng ơ̆ bơdê cư̆m jư̆ng ăñ. 46Ông ơ̆ bŏng mơñà nơ̆m găl ăñ, hôm gô sŏng bŏng jư̆ng ăñ î mơñà ƀôhơ̆. 47Tài bơh jơno gư̆n, ăñ tơs î ông, tồi-glài gô dê, bulah khăi, sŏng dî hồ-toh, bơh gô kơñ-kơloh khăi, Hôm cro găy dî hồ-toh dư̆ng-iè, gừn kơñ-kơloh dư̆ng-iè.” 48Sŏng gư̆n Kơnràñ tơs î gô lah: “Tồi-glài e sŏng dî hồ-toh.” 49Tơmpôl cro ndăng nggui nơ̆m anẵu kaƀang să sơntơm tơm tơs î găp nhòng ƀòn gô: “Cro dô la mơ̆t cro mà kŭng khơ̆n toh glài?” 50Sŏng gư̆n Kơnràñ tơs î cro-ua lah: “Jơno don e dê sŏng dŏng-klàs e. Swà cĕ nơ̆m jơno lơngăp-lơnge.”